អគ្គលេខាបក្ស លោក Nguyen Phu Trong - ប្រធានគណៈកម្មាធិការមជ្ឈិមដឹកនាំការងារប្រយុទ្ធប្រឆាំងអំពើពុករលួយ ថ្លែងក្នុងសន្និសីទជាតិបូកសរុបការងារប្រឆាំងអំពើពុករលួយ  រយៈពេល ១០ ឆ្នាំ ២០១២-២០២២ នាថ្ងៃទី ៣០ មិថុនា ឆ្នាំ ២០២២ នៅទីក្រុងហាណូយ (រូបថត៖ VOV)

សន្និបាតមជ្ឈិមលើកទី ៥ នីតិកាល ទី១១ (ឧសភា ២០១២) បានសម្រេចលើគោលនយោបាយ បង្កើតគណៈកម្មាធិការមជ្ឈិមដឹកនាំការងារប្រយុទ្ធប្រឆាំងអំពើពុករលួយ (គណៈកម្មាធិការដឹកនាំ) ចំណុះការិយាល័យនយោបាយ ដឹកនាំដោយអគ្គលេខា គណៈកម្មាធិការមជ្ឈិមបក្សកុម្មុយនិស្តវៀតណា  ដើម្បីដឹកនាំការងារប្រយុទ្ធប្រឆាំងអំពើពុករលួយទូទាំងប្រទេស។ ចាប់តាំងពីការបង្កើតគណកម្មាធិការដឹកនាំ (ខែកុម្ភៈ ឆ្នាំ២០១៣) រហូតមកដល់ពេលនេះ ការងារប្រយុទ្ធប្រឆាំងអំពើពុករលួយទទួលបានវឌ្ឍនភាពយ៉ាងខ្លាំងក្លា និងសម្រេចបានលទ្ធផលលេចធ្លោជាច្រើនលើគ្រប់ជ្រុងជ្រោយនិងច្បាស់លាស់ បន្សល់ទុកនូវសញ្ញាសម្គាល់ល្អប្រសើរ បង្កើតផលវិជ្ជមាន រីកសុះសាយក្នុងសង្គមទាំងមូល ដែលទទួលបានការស្រុះចិត្តគំនិត ឯកភាព ឆ្លើយតប និងកោតសរសើរពីកម្មាភិបាល បក្ខជន និងប្រជាជន ហើយបានសហគមន៍អន្តរជាតិទទួលស្គាល់។ ពោលគឺ អំពើពុករលួយកំពុងត្រូវបាន “រាំងស្កាត់ និងកាត់បន្ថយជាជំហានៗ” ដែលជាការរួមចំណែកយ៉ាងសំខាន់ក្នុងការកសាង និងកែតម្រូវបក្ស រក្សាស្ថិរភាពនយោបាយ និងអភិវឌ្ឍន៍សេដ្ឋកិច្ចសង្គមរបស់ប្រទេសជាតិ។

តាមនោះ ក្នុងរយៈពេល ១០ ឆ្នាំកន្លងទៅ វៀតណាមបានសុក្រិតនូវយន្តការទប់ស្កាត់ និងគ្រប់គ្រងយ៉ាងតឹងរ៉ឹងក្នុងការប្រយុទ្ធប្រឆាំងនឹងអំពើពុករលួយ។ ការងារត្រួតពិនិត្យនិងឃ្លាំមើលរបស់បក្ស អធិការកិច្ច និងសវនកម្មរបស់រដ្ឋត្រូវបានពង្រឹង រកឃើញ និងដោះស្រាយយ៉ាងតឹងរ៉ឹងនូវការរំលោភបំពាន រឹតបន្តឹងវិន័យ រួមចំណែកលើកកម្ពស់ប្រសិទ្ធភាពការងារប្រយុទ្ធប្រឆាំងអំពើពុករលួយ។

ចំណុចលេចធ្លោគឺការងារស៊ើបអង្កេត  និងកាត់ក្តី ត្រូវបានដឹកនាំយ៉ាងម៉ឺងម៉ាត់ ដោយអនុវត្តន៍យ៉ាងត្រឹមត្រូវនូវគោលគំនិត “គ្មានតំបន់ហាមឃាត់ គ្មានករណីលើកលែង មិនថា បុគ្គលនោះជានរណាទៀតសោត” បង្កើតឱ្យមានចំណុចលោតផ្លោះក្នុងការងារប្រយុទ្ធប្រឆាំងអំពើពុករលួយ។ ក្នុងរយៈពេល ១០ ឆ្នាំកន្លងមកនេះ ស្ថាប័នប្រតិបត្តិច្បាប់ទូទាំងប្រទេស បានកាត់ទោស និងស៊ើបអង្កេតជាង ១៩.៨៦០ ករណី ដោយមានជនជាប់ចោទជាង ៣៣.៨៦០ នាក់ កាត់ទោសជិត ១៦.៧០០ ករណី ដោយមានជនជាប់ចោទជាង ៣៣.០០០ នាក់។ ជាពិសេសនាពេលថ្មីៗនេះ ស្ថាប័នមុខងារបានផ្តោតទៅលើការស៊ើបអង្កេត និងដោះស្រាយយ៉ាងតឹងរ៉ឹងនូវករណីពុករលួយជាច្រើន  អំពើពុករលួយធ្ងន់ធ្ងរពិសេស បង្កឲ្យមានការខូចខាតយ៉ាងធំ  ដែលកើតឡើងលើវិស័យសុខាភិបាល ការគ្រប់គ្រង និងប្រើប្រាស់ដីធ្លី មូលបត្របំណុលសាជីវកម្ម...ជាដើម។

គួរបញ្ជាក់ផងដែរថា ការងារកសាង និងសុក្រិតរបបទទួលបានការយកចិត្តទុកដាក់កាន់តែច្រើនឡើង ដោយបង្កើតយន្តការទប់ស្កាត់ដ៏តឹងរ៉ឹងជាបណ្តើរៗ  ដើម្បី “អំពើពុករលួយ និងអវិជ្ជមានមិនអាចកើតមានបានឡើយ”។ គណៈកម្មាធិការមជ្ឈិម ការិយាល័យនយោបាយ និងគណៈលេខាបានចេញឯកសារជាង ២៥០ ច្បាប់ ស្តីពីការកសាងបក្ស ការកសាងប្រព័ន្ធនយោបាយ និងការងារប្រយុទ្ធប្រឆាំងអំពើពុករលួយ; រដ្ឋសភាបានធ្វើវិសោធនកម្ម បំពេញបន្ថែម និងចេញផ្សាយនូវច្បាប់ បទប្បញ្ញត្តិនិងសេចក្តីសម្រេចថ្មីជាង ៣០០ច្បាប់; រដ្ឋាភិបាល និងនាយករដ្ឋមន្ត្រីបានចេញក្រឹត្យ និងសេចក្តីសម្រេចជាង ២.០០០ ច្បាប់ ហើយ ក្រសួង ស្ថាប័ន និងមូលដ្ឋានបានចេញឯកសារច្បាប់រាប់ពាន់ ដើម្បីលាតត្រដាងអនុវត្តន៍ជាក់ស្តែង នូវគោលការណ៍ណែនាំ និងគោលនយោបាយរបស់បក្ស ស្តីពីការគ្រប់គ្រងសេដ្ឋកិច្ច-សង្គម ការងារប្រយុទ្ធប្រឆាំងអំពើពុករលួយ រួមចំណែកប្រកបដោយប្រសិទ្ធភាពក្នុងការបង្ការ ទប់ស្កាត់ និងដោះស្រាយអំពើពុករលួយនិងអំពើអសកម្ម។ ទន្ទឹមនឹងនោះ ការងាររៀបចំកម្មាភិបាលមានការច្នៃប្រឌិតជាច្រើន ប្រជាធិបតេយ្យ និងតម្លាភាព; បញ្ហាដែលនៅសេសសល់ជាច្រើន ក្នុងការងាររៀបចំកម្មាភិបាលត្រូវបានណែនាំដោះស្រាយ។  ការងារគ្រប់គ្រងទ្រព្យសម្បត្តិ ប្រាក់ចំណូល ការទូទាត់មិនប្រើសាច់ប្រាក់ ការលើកកម្ពស់កំណែទម្រង់រដ្ឋបាល ការលើកកម្ពស់ការបើកចំហរជាសាធារណៈ បង្កើនលក្ខណៈតម្លាភាព និងគណនេយ្យភាព បានចូលរួមចំណែកយ៉ាងសំខាន់ក្នុងការធ្វើឲ្យប្រសើរឡើងនូវបរិយាកាសវិនិយោគ និងអាជីវកម្ម លើកកម្ពស់នូវការប្រកួតប្រជែងថ្នាក់ជាតិ និងទប់ស្កាត់អំពើពុករលួយនិងអសកម្ម។

សន្និសីទជាតិបូកសរុបការងារប្រឆាំងអំពើពុករលួយ រយៈពេល ១០ ឆ្នាំ ២០១២ - ២០២២ (រូបថត៖ VOV)

ក្នុងរយៈពេល ១០ ឆ្នាំកន្លងមកនេះ សកម្មភាពរបស់គណៈកម្មាធិការមជ្ឈិមអំពីការងារបង្ការប្រឆាំងអំពើពុករលួយមានភាពច្នៃប្រឌិត មានវិន័យ វិធីសាស្រ្ត វិទ្យាសាស្រ្ត យ៉ាងខ្លាំងក្លា និងមានប្រសិទ្ធភាព។ នៅថ្ងៃទី ១៦ ខែកញ្ញា ឆ្នាំ ២០២១ ការិយាល័យនយោបាយបានចេញបទបញ្ជាលេខ ៣២-QD/TW បំពេញបន្ថែម និងពង្រីកមុខងារ ភារកិច្ច និងអំណាចរបស់គណៈកម្មាធិការដឹកនាំ ដើម្បីដឹកនាំទាំងការងារប្រយុទ្ធប្រឆាំងអំពើពុករលួយ និងអំពើអសកម្ម។ ស្ថាប័នទទួលបន្ទុកកិច្ចការផ្ទៃក្នុង ត្រួតពិនិត្យរបស់បក្ស អធិការកិច្ច សវនកម្ម ការស៊ើបអង្កេត ការកាត់ទោស ការកាត់ក្តី ។ល។ ត្រូវបានពង្រឹង និងសម្របសម្រួលកាន់តែជិតស្និទ្ធ ទាន់ពេលវេលា និងពិតជាបាននាំយកមកនូវតួនាទីយ៉ាងសំខាន់ក្នុងការស្វែងរក និងដោះស្រាយអំពើពុករលួយ និងអំពើអសកម្ម។គិតដល់ត្រឹមថ្ងៃទី ២៧ ខែ មិថុនា ឆ្នាំ ២០២២ មានខេត្ត ក្រុងចំនួន ៣៤ បានបង្កើតគណៈកម្មាធិការដឹកនាំថ្នាក់ខេត្ត ដើម្បីបង្កើតការផ្លាស់ប្តូរកាន់តែរឹងមាំក្នុងការងារប្រយុទ្ធ ប្រឆាំងអំពើពុករលួយនៅតាមមូលដ្ឋាន។

លទ្ធផលដែលសម្រេចបានក្នុងការងារបង្ការប្រយុទ្ធប្រឆាំងអំពើពុករលួយ និងអំពើអសកម្មនៅវៀតណាម នាពេលកន្លងមក ត្រូវបានប្រជាជនស្រុះចិត្តគំនិតឯកភាព គាំទ្រ និងវាយតម្លៃខ្ពស់ គឺជារង្វាស់នៃជំនឿទុកចិត្តរបស់ប្រជាជនចំពោះបក្ស បញ្ជាក់ពីគោលដៅ ទស្សនៈ គោលនយោបាយ ដំណោះស្រាយរបស់បក្សនិងរដ្ឋលើការទប់ស្កាត់ និងប្រឆាំងអំពើពុករលួយ អំពើអសកម្ម គឺត្រឹមត្រូវទាំងស្រុង ទាន់ពេលវេលា ស្របតាមតម្រូវការជាក់ស្តែង និងការពារបានយ៉ាងល្អនូវមូលដ្ឋានមនោគមវិជ្ជារបស់បក្ស រដ្ឋនិងរបបសង្គមនិយមរបស់វៀតណាម៕