តន្ត្រីករ Nguyen Dinh Thi (១៩២៤-២០០៣)  (រូបថត៖ baicadicungnamthang.net)

នៅខែសីហាឆ្នាំ ១៩៤៥ បរិយាកាសបដិវត្តន៍របស់ប្រជាជនគ្រោកឈរឡើងដណ្តើមរដ្ឋអំណាចនៅរដ្ឋធានីហាណូយនិងមូលដ្ឋាននានាលើទូទាំងប្រទេសប្រព្រឹត្តទៅ យ៉ាងប្រញាប់ប្រញាល់ណាស់។ នៅថ្ងៃទី ១៣ ខែសីហាឆ្នាំ ១៩៤៥ សន្និសីទទូទាំងប្រទេសរបស់បក្ស ត្រូវបានប្រារព្ធធ្វើឡើងនៅ Tan Trao (ខេត្ត Tuyen Quang) បានចេញសេចក្តីសម្រេច៖ ចាប់ផ្តើមបំផុសការក្រោកឈរឡើងទូទាំងប្រទេសដើម្បីដណ្តើមរដ្ឋអំណាច។ នៅយប់នោះ គណៈកម្មាធិការជាតិ បះបោរក្រោកឈរឡើងទូទាំងប្រទេសត្រូវបានបង្កើតឡើងនិងចេញបញ្ជាយោធាលេខ ១ ដោយបញ្ជាឱ្យចាប់ផ្តើមគ្រោកឈរឡើង។ ក្នុងរយៈពេលតែ ១៥ ថ្ងៃប៉ុណ្ណោះប្រជាជនជាង ២០ លាននាក់ពីខាងជើងទៅខាងត្បូងបានដំណើរការការគ្រោកឈរឡើងទូទាំងប្រទេសប្រកបដោយជោគជ័យ។

នៅថ្ងៃទី ៧ ខែកញ្ញាឆ្នាំ ១៩៤៥ ជាលើកដំបូងហើយដែលមិត្តអ្នកស្តាប់នៅទូទាំងប្រទេសបានលឺស្នូរសំឡេងតន្ត្រីសម្គាល់ (nhạc hiệu) របស់វិទ្យុសំឡេងវៀតណាមបន្លឺឡើង។ នោះគឺជាតន្ត្រីនៃចម្រៀង “កំចាត់ហ្វាស៊ីសនិយម” ដែលនិពន្ធដោយតន្ត្រីករ Nguyen Dinh Thi ចំថ្ងៃរដូវស្លឹកឈើជ្រុះជាប្រវត្តិសាស្រ្តឆ្នាំ ១៩៤៥។ នេះគឺជាពាក្យសំណេះសំណាលរបស់តន្ត្រីករ Nguyen Dinh Thi កាលនៅរស់ ដែលត្រូវបានថតទុកនៅលើខ្សែអាត់នៃវិទ្យុសំឡេងវៀតណាម៖ “កាលនោះ ខ្ញុំបានចូលរួមសន្និសីទស្តីពីវប្បធម៌សង្រ្គោះជាតិដើម្បីសរសេររបាយការណ៍សម្រាប់មហា សន្និបាត Tan Trao។ យប់នោះជិះកង់ត្រឡប់មកពី Duc Tu ឆ្លងកាត់ស្ពានទន្លេ Cai ខ្យល់បក់ខ្លាំង។ ស្រាប់តែគិតនឹកអំពីប្រទេស ហើយស្រាប់តែក្នុងចិត្តផុសចេញប្រយោគថា “វៀតណាម វៀតណាម វៀតណាម”។ ដូច្នេះប្រយោគដំបូងដែលបង្ហាញនៅក្នុងអត្ថបទ “កំចាត់ហ្វាស៊ីស” គឺជាប្រយោគទាំងនោះ។ ខ្ញុំបានសរសេរអត្ថបទ “កំចាត់ហ្វាស៊ីស” យ៉ាងលឿន។ បន្ទាប់ពីខ្ញុំបានសរសេរចប់ ខ្ញុំបានសរសេរដោយដៃជូនមិត្តម្នាក់ មិនបានបោះពុម្ពវានៅកន្លែងណាទេ។ បន្ទាប់មក បទចម្រៀងនេះបានឆ្លងពីមនុស្សម្នាក់ទៅមនុស្សម្នាក់ ហើយបានរីកសុះសាយ ដាលបន្តិចម្តងៗ ហើយក្លាយជាបទចម្រៀងនៃការគ្រោកឈរឡើងរបស់ហាណូយ”។

តន្ត្រីករ Xuan Oanh (១៩២៣-២០១០) (រូបថតឯកសារ) (ប្រភព៖ dangcongsan.vn)

កាលនោះ បទចម្រៀង “ថ្ងៃដប់ប្រាំបួនសីហា” ត្រូវបានតន្រ្តីករ Xuan Oanh និពន្ធឡើង ខណៈពេលដែលលោកនិងប្រជាជនកំពុងធ្វើកូបកម្ម ដូច្នេះនៅក្នុងទំនុកនៃបទចម្រៀង ដំណើរថ្មើរជើងរបស់មហាជន មានការស្រែកហោរសប្បាយរីករាយរបស់មហាជន។ អនុស្សាវរីយ៍នៅតែដិតជាប់ក្នុងអារម្មណ៍និងនៅដដែលអំពីថ្ងៃ ១៩ សីហា ១៩៤៥ ជាប្រវត្តិសាស្ត្រ ដែលបទ ចម្រៀងដែលមានប្រយោគតែ ១០ ប៉ុន្តែចង្វាក់ច្រៀងគឺងាយចំាខ្លាំងណាស់។  ពីរបីថ្ងៃបន្ទាប់ មក បទចម្រៀងនេះត្រូវបានវិទ្យុសំឡេងវៀតណាមថតហើយចាក់ផ្សាយនៅសប្តាហ៍ក្រោយក្នុងឱកាសដែលលោកប្រធានហូជីមិញអានសេចក្តីប្រកាសឯករាជ្យនៅទីលាន Ba Dinh នៅថ្ងៃទី ២ ខែកញ្ញាឆ្នាំ ១៩៤៥ ដូច្នេះបទចម្រៀងនេះកាន់តែមានអត្ថន័យយ៉ាងជ្រាលជ្រៅ។ តន្ត្រីករ Xuan Oanh កាលនៅរស់លោកធ្លាប់រំលឹកថា៖ “មុននោះ ខ្ញុំបានដឹងថា បរិយាកាសនៃថ្ងៃគ្រោកឈរឡើងទូទាំងប្រទេសដណ្តើមរដ្ឋអំណាចនឹងមកដល់ ដូច្នេះ ខ្ញុំមានគំនិតចង់សរសេរ បទចម្រៀងអំពីបដិវត្តន៍ ប៉ុន្តែខ្ញុំមិនទាន់គិតថា នឹងសរសេរពីអ្វី។ ខ្ញុំជាកម្មាភិបាលមួយរូបនៃរណសិរ្សវៀតមិញ រួមដំណើរជាមួយប្រជាជនធ្វើបាតុកម្ម។ បទចម្រៀងត្រូវបានសរសេរឡើងនៅពេលខ្ញុំចូលរួមបាតុកម្ម ហើយដើរបណ្តើរខ្ញុំសរសេរបណ្តើរ សរសេរបានប្រយោគណាខ្ញុំច្រៀងឡើងប្រយោគនោះ។  នៅពេលដែលច្រៀងបានប្រយោគណា គឺប្រជាជនច្រៀងតាមក្រោយ  សរសេរបានប្រយោគណាគឺច្រៀងបន្តប្រយោគនោះ រហូតដល់ពេលដែលហ្វូងបាតុករបានទៅដល់រោងមហោស្រពគឺបទចម្រៀងត្រូវបានបញ្ចប់ផងដែរ។ បទចម្រៀងនេះ បាននិពន្ធឡើងនៅក្នុងអំឡុងពេលទៅធ្វើបាតុកម្ម ហើយបរិយាកាសបាតុកម្មបានចាប់កំណើតបទចម្រៀងនោះ ចំនឹងថ្ងៃទី ១៩ ខែសីហាតែម្តង។ ដូច្នេះ អាចមានអារម្មណ៍ថា នៅក្នុងបទចម្រៀងមានចង្វាក់និងថ្មើរជើងដើរតាមក្បួនរបស់មហាជន រួមទាំងការសម្រែកហោររបស់មហាជនទៀត ផង។ មហាជនត្រូវបានរំដោះ មហាជនងើបឡើងដើម្បីដណ្តើមរដ្ឋអំណាច។ ទំនុកច្រៀងគឺ សាមញ្ញណាស់ “ប្រជាជនវៀតណាមទាំងអស់ ក្រោកឈរឡើងហើយរួមចំណែកនៅថ្ងៃតែមួយ”។ បទចម្រៀងនេះរៀបរាប់ពីថ្ងៃទី ១៩ ខែសីហាដែលជាថ្ងៃប្រវត្តិសាស្ត្រផងនិងជាការបោះជំហានរបស់មហាជនផង”។

បដិវត្តន៍ខែសីហានិងទិវាបុណ្យជាតិថ្ងៃទី ២ កញ្ញាបានក្លាយជាអនុស្សាវរីយ៍មិនអាចបំភ្លេចបាននៅក្នុងដួងចិត្តរបស់ប្រជាជនវៀតណាមគ្រប់រូប។ គ្រាដ៏ពិសិដ្ឋទាំងនោះត្រូវបានតន្ត្រីករជាច្រើនរូបរក្សាទុកនៅក្នុងចម្រៀងបដិវត្តន៍ដ៏ល្បីល្បាញដែលរស់នៅជារៀងរហូត ជាមួយប្រវត្តិសាស្ត្របដិវត្តន៍វៀតណាម។ បទចំរៀង “កំចាត់ពួកហ្វាស៊ីស” និង “ថ្ងៃដប់ប្រាំបួនសីហា” ត្រូវបានគេកត់ត្រាទុកនៅក្នុងប្រវត្តិសាស្ត្រនៃការតស៊ូបដិវត្តន៍របស់ប្រជាជាតិវៀតណាម ដែលបានចារឹកយ៉ាងជ្រាលជ្រៅនៅក្នុងដួងចិត្តរបស់ប្រជាជនវៀតណាមគ្រប់ៗគ្នា៕