ទេសភាពភូមិ Kon Trang Long Loi

អញ្ជើញមកដល់ ភូមិ Kon Trang Long Loi ភ្ញៀវទេសចរ បានសម្របខ្លួនទៅក្នុងបរិយាកាសស្រស់បរិសុទ្ធ រួមជាមួយអាកប្បកិរិយារួសរាយរាក់ទាក់និងស្រឡាញ់ភ្ញៀវរបស់ប្រជាជននៅភូមិដ៏ស្រស់បំព្រងនៅក្បែមាត់ទន្លេនេះ។ ចាប់តាំងពីពេលដែលវារីអគ្គិសនី Plei Krong ត្រូវបានសាងសង់រួចរាល់មក ការគួបផ្សំរបស់ចរន្តទឹកទន្លេ Po Ko រឿងព្រេងនិទានជាមួយតំបន់អាងស្តុកទឹក បានធ្វើឱ្យទេសភាពនៅភូមិ Kon Trang Long Loi កាន់តែស្រស់បំព្រងថែមទៀត។

Kon Trang Long Loi គឺជាភូមិទេសចរណ៍សហគមន៍ដើមដំបូងរបស់ស្រុក Dak Ha និងទី ៣ របស់ខេត្ត Kon Tum។ ដើម្បីទទួលបាននាមជា គោលដៅ ទេសចរណ៍របស់ខេត្តនៅពាក់កណ្ដាលឆ្នាំ ២០២០នោះ ក្រុមគ្រួសារចំនួន ១៣២ គ្រួ ជាមួយចំនួនប្រជាជនជិត ៨០០ នាក់ក្នុងភូមិ បានសាមគ្គីគ្នា ពង្រីកការទទួលខុសត្រូវក្នុងការកសាងភូមិទេសចរណ៍សហគមន៍។ ប្រការគួរឲ្យសប្បាយរីករាយ គឺយុវជនវ័យក្មេងតែងតែឈានមុខគេ រួមកម្លាំងកាយចិត្តច្រើនបំផុត ដើម្បីបង្កើតផលិតផលទេចរណ៍។ អ្នកស្រី Y Le ពលការិនីម្នាក់នៅគោលដៅទេសចរណ៍សួនផ្កានៅក្បែរមាត់ទន្លេបានឲ្យដឹងថា ទេសចរណ៍សហគមន៍បាននាំមកនូវការងារធ្វើ ប្រាក់ចំណូល និងសេចក្ដីសប្បាយរីករាយជូនអ្នកភូមិ៖ “ចាប់តាំងពីពេលមានទេសចរណ៍សហគមន៍មក បងប្អូនប្រជាជនមានការងារធ្វើ ហើយការយល់ដឹងរបស់ប្រជាជនគឺល្អប្រសើរណាស់។ បងប្អូនប្រជាជនបានចូលរួមសកម្មភាពទទួលស្វាគមន៍និងបម្រើភ្ញៀវទេសចរណ៍ យ៉ាងសកម្ម។មនុស្សវ័យចំណាស់ កុមារា កុមារី បុរស និងស្ត្រីក៏បានចូលរួមពីធីបុណ្យទាននិងព្រឹត្តិការណ៍នានាយ៉ាងច្រើនកុះករផងដែរ។ ដោយទទួលបានប្រាក់ចំណូលពីការធ្វើទេសចរណ៍សហគមន៍នោះ បងប្អូនប្រជាជនមានអារម្មណ៍សប្បាយរីយរាយណាស់ ហើយជីវភាពរស់នៅរបស់គ្រួសារ ក៏ត្រូវបានកែលំអផងដែរ” ។

អញ្ជើញមកភូមិ Kon Trang Long Loi ភ្ញៀវទេសចរបានសម្របខ្លួនទៅក្នុងលំហប្រពៃណីរបស់ជនជាតិ Ba Na ។ ភ្ញៀវទេសចរមិនត្រឹមតែបានទទួលទានបាយក្រឡាន ស្រា សាច់មាន់អាំង ស្ដាប់សំឡេងគងឃ្មោះ ប៉ុណ្ណោះទេ ថែមទាំងបានចូលរួមពិធីបុណ្យទានប្រពៃណី ដែលត្រូវបានបងប្អូនប្រជាជន បង្ហាញឡើងវិញដើម្បីបម្រើភ្ញៀវទេចរណ៍ ឆ្លងបទពិសោធន៍ទៀតផង។ លោកស្រី Nguyen Thi Tham ប្រធានការិយាល័យវប្បធម៌ ព័ត៌មានស្រុក Dak Ha បានឲ្យដឹងថា៖ “ដើម្បីកសាងភូមិទេសចរណ៍សហគមន៍រួមជាមួយបេតិកភ័ណ្ឌអភិវឌ្ឍន៍ប្រកបដោយចីរភាព កាត់បន្ថយភាពក្រីក្រនោះ យើងខ្ញុំបានធ្វើការឃោសនា និងចលនាដល់ប្រជាជនធ្វើការថែរក្សាអនាម័យបរិស្ថានឲ្យបានស្អាតបាត។ ជួសជុលកែលំអផ្ទះសម្បែងរបស់ខ្លួនដើម្បីធ្វើសេវាកម្ម homestay ។ ទន្ទឹមនឹងនេះបំពេញល្អការងារអភិរក្ស ពង្រីកកេរតំណែលប្រពៃណីដល់ជំនាន់កូនចៅ ពោលគឺមិនត្រឹមតែមនុស្សពេញវ័យប៉ុណ្ណោះទេថែមទាំងកុមារា កុមារីក៏អាចចូលរួមធ្វើទេសចរណ៍ផងដែរ”។

ទេសភាពភូមិ Kon Trang Long Loi

ចែករំលែកអំពីផែនការរបស់អាជ្ញាធរក្នុងការអភិវឌ្ឍភូមិទេសចរសហគមន៍ Kon Trang Long Loi នោះ លោក Nguyen Chi Anh ប្រធានគណៈកម្មាធិការទីរួមស្រុក Dak Ha បានឲ្យដឹងថា៖ “ដំបូងឡើយគឺត្រូវធានា ការរៀបចំផែនការផ្ទុះស្នាក់នៅដែលមានលក្ខណៈសហគមន៍អំណោយផល ពោលគឺ សម្រាប់ជីវភាពរស់នៅផង ធ្វើពលកម្មផលិតកម្មផង ហើយជាគោលដៅទេសចរណ៍ទៀតផង។ ក្នុងនោះមានហេដ្ឋារចនាសម្ព័ន្ធផ្លូវគមនាគមន៍អគ្គិសនី និងវិស័យផ្សេងៗមួយចំនួនទៀតជូនប្រជាជនប្រកបដោយស្ថេរភាព។ ទាក់ទងនឹងការថែរក្សាវប្បធម៌ជាតិនោះ យើងខ្ញុំបានធ្វើការ បូកសរុបនិងរៀបចំបញ្ជីជាក់លាក់ ហើយបានរៀបចំផែនការ បណ្ដុះបណ្ដាលវិជ្ជាជីវៈ ជូនពលករ ជាពិសេសគឺរបរប្រពៃណី ដែលមានលក្ខណៈអត្តសញ្ញាណជាតិ”។

ដោយអះអាងបានទិសដៅដ៏ត្រឹមត្រូវក្នុងការពង្រីកសក្កានុពល និងប្រៀបខ្លាំងដែលមានស្រាប់ រួមទាំងការសុក្រិតដំណើរការ លើកកម្ពស់គុណភាពបម្រើ ទាក់ទាញភ្ញៀវទេសចរនោះ អ្នកភូមិ Kon Trang Long Loi ក៏កំពុងរៀបចំគម្រោងធំៗជាច្រើនស្ដីពីការអភិវឌ្ឍទេសចរណ៍សហគមន៍។ នោះគឺសាងសង់ផ្ទះវែងប្រពៃណីចំនួន ៦ ខ្នង នៅជុំវិញបរិវេណផ្ទះ rong របស់ភូមិ  ជួសជុលកែលម្អ និងដាក់ឲ្យធ្វើអាជីវកម្ម homestay ចំនួន ៥ កន្លែង ចូលរួមវគ្គហ្វឹកហ្វឺន បណ្ដុះបណ្ដាលអំពីជំនាញវិជ្ជាជីវៈទេសចរណ៍សម្រាប់ពលករចំនួន ២០០ នាក់របស់ភូមិឲ្យមានការងារធ្វើប្រកបដោយស្ថេរភាពជាមួយនឹងប្រាក់ចំណូល ពីសកម្មភាពទេសចរណ៍សហគមន៍។បរិយាកាសថ្មី ជាមួយនឹងកម្លាំងរស់ថ្មីកំពុងរីកសុះសាយចំពោះមនុស្ស និងទេសភាពនៅភូមិ Kon Trang Long Loi ផងដែរ៕