ទិដ្ឋភាពនៃវត្ត Nom (រូបថត៖ Internet)

  វត្ត Nom មានប្រសិទ្ធនាមថា “Linh thong co tu” ដែលមានន័យថា វត្តបុរម បុរាណស្ថិតនៅកណ្ដាលព្រៃស្រល់ដ៏ពិសិដ្ឋ។ វត្តនេះត្រូវបានជួសជុល កសាង ឡើងវិញនាសតវត្សទី១៧។

        វត្ត Nom ស្ថិតនៅក្រោមម្លប់ដើមឈើដ៏ត្រឈឹងត្រឈៃ។ ចូលតាមខ្លោងទ្វារ វត្ត យើងនឹងឃើញប៉មជួងនិងប៉មស្គរនៅសង្ខាង។

        លក្ខណៈពិសេសគួរឲ្យទាក់ទាញចំពោះភ្ញៀវទេសចរ ពេលមកដល់វត្ត Nom ម្ដងៗនោះ គឺបរិយកាសត្រជាក់ស្រួល បរិវេណធំទូលាយដោយមានសំណង់ ស្ថាបត្យកម្មវិសេសវិសាលជាច្រើន។ ទីធ្វើសក្ការៈបូជាព្រះម៉ែ គង់ ស៊ីអ៊ីម ស្ថិត នៅកណ្ដាលបឹងដែលមើលទៅដូចជាផ្កាឈូកដ៏ស្អាតឆើយឆាយមួយ។

        នាបច្ចុប្បន្ន វត្ត Nom នៅតែថែរក្សាវត្ថុតាងបុរមបុរាណពិសេសជាច្រើន ដែលវត្តផ្សេងៗគ្មានទេ ដូចជារូបចម្លាក់ដីដ៏សម្បូរបែប ជួងបុរាណ ឬពាក្យ ប្រស្នា ជាដើម។ លោក Tran Dinh Van អ្នកភូមិ Nom មួយរូបបានចែករំលែកថា៖

        “នៅវត្ត Nom លេចធ្លោបំផុតគឺឈ្មោះវត្ត។ ក្នុងទូទាំងប្រទេស មានវត្តជា ច្រើនដែលមានឈ្មោះដូចគ្នា ប៉ុន្តែមានវត្ត Nom តែមួយគត់ប៉ុណ្ណោះ។ ប្រការ ពិសេសមួយទៀតគឺ រូបចម្លាក់ទាំង១២៨រូបក្នុងវត្តនៅតែបានថែរក្សាដដែលចាប់ តាំងពីសតវត្សទី១៥មក។ ពាក្យប្រស្នាក៏បានរក្សាដដែលផងដែរ ដោយសារ ត្រូវបានធ្វើពីវត្ថុធាតុដើមល្អណាស់”។

        ពេលមកដល់វត្ត Nom ភ្ញៀវទេសចរក៏អាចទស្សនាប្រជុំចេតិយតម្កល់ទុក សរីរធាតុព្រះចៅអធិការដែលត្រូវបានកសាងឡើងដោយថ្មបាយក្រៀមនៅក្បែរ វត្តនេះទៀតផង។ វត្ត Nom តាំងពីយូរលង់ណាស់មកហើយ បានក្លាយទៅជាសាក្សី ប្រវត្តិសាស្ត្រដែលជិតស្និទ្ធជាមួយប្រជាពលរដ្ឋនៅទីនេះ ទាំងសម័យសង្គ្រាមផង និងសម័យសុខសន្តិភាពទៀតផង។ រួមជាមួយការអភិវឌ្ឍនិងសមាហរណកម្មនៃ ខឿនវប្បធម៌សហសម័យនោះ វត្ត Nom ក៏ដូចជាវត្តដទៃទៀតនៅតំបន់ជនបទ វៀតណាមដែរ ត្រូវបានអភិរក្សនិងពង្រីកតំលៃទាំងអស់។ ព្រះតេជគុណ Thich Hong Hue ព្រះចៅអធិការវត្ត Nom បានមានពុទ្ធដីការថា៖

        “ចំណងប្រាថ្នារបស់អ្នកភូមិក៏ដូចជាព្រះសង្ឃទាំងអស់នោះគឺ ត្រូវអភិរក្ស វប្បធម៌បុរមបុរាណជាមុនសិន បន្ទាប់នោះទើបជួសជុលកែលំអ។ ចំពោះសំណង់ ណាក៏ដោយ ត្រូវអភិរក្សផងប៉ុន្តែក៏ត្រូវអភិវឌ្ឍន៍ទៀតផង។ ក្នុងដំណើរការអភិវឌ្ឍ របស់ខ្លួន វត្ត Nom ត្រូវបានជួសជុលកែលំអជាច្រើនលើកច្រើនសារហើយ។ រហូតដល់សព្វថ្ងៃ ដោយទទួលបានការយកចិត្តទុកដាក់របស់អាជ្ញាធរគ្រប់ជាន់ ថ្នាក់និងពុទ្ធសាសនិកគ្រប់ទិសទី វត្ត Nom ត្រូវបានជួសជុលកែលំអជាថ្មីម្ដង ទៀត”។

        ពេលមកដល់វត្ត Nom ភ្ញៀវទេសចរនឹងរកឃើញលក្ខណៈវិសេសវិសាល ជាច្រើនអំពីវត្តបុរមបុរាណមួយរបស់វៀតណាម។ ទន្ទឹមនឹងនេះ ស្ថិតនៅក្នុង មណ្ឌលកេរ្តិ៍ដំណែលភូមិ Nom ក៏មានខ្លោងទ្វារភូមិ Nom ស្ពាន Nom ផ្សារ Nom និងសាលាភូមិ Tam Giang ទៀតផង។ នេះក៏ជាទីកន្លែងគួរឲ្យចាប់អារម្មណ៍ ចំពោះភ្ញៀវទេសចរគ្រប់រូបផងដែរ។

        ក្នុងបុណ្យចូលឆ្នាំថ្មីប្រពៃណីជារៀងរាល់ឆ្នាំ ភ្ញៀវទេសចរពីគ្រប់ទិសទីមកធ្វើ សក្ការៈបូជានៅវត្ត Nom យ៉ាងច្រើនកុះករណាស់។ នេះជាលក្ខណៈវប្បធម៌ដែល មានតាំងពីយូរលង់ណាស់មកហើយ។ ដោយបង្កប់នូវតំលៃប្រពៃណីដ៏ឧត្តងឧត្តមនោះ វត្ត Nom ជានិច្ចកាលជាកេរ្តិ៍ដំណែលវប្បធម៌មួយដែលរួមចំណែកជំរុញជីវភាព រស់នៅខាងស្មារតីរបស់ប្រជាជន ព្រមទាំងបង្កើតឡើងសន្ទុះអភិវឌ្ឍសម្រាប់ខឿន វប្បធម៌វៀតណាមផងដែរ៕