សារមន្ទីរវាយនភណ្ឌ

មានទំហំផ្ទៃដីជាង ១៦,០០០ ម៉ែត្រការ៉េ សារមន្ទីរវាយនភ័ណ្ឌមានទីតាំងស្ថិតនៅក្នុងវីឡាបុរាណបារាំងមួយ ដែលត្រូវបានសាងសង់ឡើងនៅសតវត្សរ៍ទី ១៩។ នាឆ្នាំ ១៩៦៧ លោកស្រី Tien Soeharto ភរិយាទី ២ របស់ប្រធានាធិបតីឥណ្ឌូនេស៊ី បានប្រែក្លាយទីកន្លែងនេះទៅជាអគារបេតិកភណ្ឌ ដែលរក្សាទុក        ក្រណាត់ប្រពៃណីគ្រប់ប្រភេទរបស់ប្រទេសខ្លួន។ នេះមិនមែនជាការចៃដន្យទេដែលសារមន្ទីរវាយនភ័ណ្ឌនេះមានទីតាំងជាប់នៅផ្សារណាត់ប្រពៃណី Tanah Abang នៃរដ្ឋធានីហ្សាកាតា។ លោកស្រី Sari Permana Everlyn ប្រធានផ្នែកព័ត៌មាននិងអប់រំនៅសារមន្ទីរបានមានប្រសាសន៍ថា៖

«មានប្រជាជននិងភ្ញៀវទេសចរជាច្រើនពេលមកដល់ប្រទេសឥណ្ឌូនេស៊ីសុទ្ធសឹងតែឈាងចូលទិញក្រណាត់និងសម្លៀកបំពាក់នៅផ្សារ Tanah Abang ។ យើងខ្ញុំមានបំណងចង់ឱ្យប្រជាជនមិនត្រឹមតែទិញផលិតផលវាយនភណ្ឌប៉ុណ្ណោះទេ ថែមទាំងស្វែងយល់អំពីក្រណាត់ប្រពៃណីរបស់ឥណ្ឌូនេស៊ីទៀតផង។ ហេតុដូច្នេះសារមន្ទីរនេះ បានបង្កើតឡើងក្នុងគោលបំណងចង់ជួយឲ្យមនុស្សយល់ដឹងច្បាស់អំពីប្រភពដើម របៀបធ្វើក្រណាត់ និងការអភិវឌ្ឍវាយនភ័ណ្ឌផងដែរ»។

ក្រោយរយៈពេល ៥៤ ឆ្នាំនៃធ្វើសកម្មភាពនៅសារមន្ទីរ នេះគឺជាកន្លែងរក្សាទុកនូវគំរូក្រណាត់ជាង ៣.០០០ ប្រភេទពីប្រពៃណីរហូតដល់សម័យទំនើបនៅទូទាំងប្រទេសឥណ្ឌូនេស៊ី។ មានផលិតផលចាប់ពីក្រណាត់ត្បាញ ក្រណាត់ប៉ាក់ ក្រណាត់ Batik  និងក្រណាត់សារុង រហូតដល់សម្លៀកបំពាក់ប្រពៃណីក្នុងតំបន់ និងឧបករណ៍ត្បាញក្រណាត់ឥណ្ឌូនេស៊ីផ្សេងទៀត ត្រូវបានតាំងបង្ហាញនៅទីនេះ។ សារមន្ទីរនេះក៏មានកន្លែងមួយសម្រាប់អ្នករចនាម៉ូដជនជាតិឥណ្ឌូនេស៊ី ធ្វើការបង្ហាញផលិតផលរបស់ខ្លួនហើយជារៀងរាល់ខែ នឹងមានការផ្លាស់ប្តូរដើម្បីនាំមកនូវរូបភាពថ្មីៗសម្រាប់សារមន្ទីរនេះផងដែរ។ អ្វីដែលប្លែកជាងគេ គឺបន្ទប់ដាក់តាំងបង្ហាញក្រណាត់ Batik ជាង ៣០០ ប្រភេទ ដែលជាបេតិកភណ្ឌវប្បធម៌ឥណ្ឌូនេស៊ីត្រូវបានទទួលស្គាល់ដោយអង្គការ UNESCO។ មានវត្តមាននៅប្រទេសឥណ្ឌូនេស៊ីកាលពី ៥០០ ឆ្នាំមុន ក្រណាត់ Batik ត្រូវបានគេស្គាល់ថាជាក្រណាត់មួយប្រភេទ ទុកសម្រាប់កាត់ដេរ សំលៀកបំពាក់ថ្វាយព្រះមហាក្សត្រក្នុងព្រះបរមរាជវាំង។ នាសព្វថ្ងៃនេះ ក្រណាត់ Batik ត្រូវបានប្រើប្រាស់សម្រាប់មនុស្សទាំងអស់គ្នាផងដែរ។

សារមន្ទីរតាំងបង្ហាញក្រណាត់ និងសំលៀកបំពាក់ប្រពៃណីក្នុងស្រុក

លើសពីនេះទៀតនៅក្នុងកន្លែងតាំងបង្ហាញនេះដែរ ភ្ញៀវអាចទស្សនាក្រណាត់ batik បែបបុរាណ និងក្រណាត់ batik បែបសម័យទំនើប ដែលត្រូវបានវិវឌ្ឍន៍តាមពេលវេលា។ មានក្រណាត់ Batik ខ្លះគឺពិបាករកទិញដោយមានលំនាំក្បូរក្បាច់ពិសេសៗ ដែលគូរដោយដៃដូចជាក្រណាត់ Batik នៅ Aceh ផលិតផល Batik បុរាណដែលមានអាយុកាលរាប់រយឆ្នាំក៏ត្រូវបានគេស្វែងរកនៅទីនេះផងដែរ។ បន្ទប់តាំងបង្ហាញក្រណាត់ Batik នេះជាប្រភពដើមនៃសារមន្ទីរ Batik ជាតិរបស់ឥណ្ឌូណេស៊ី ។

មិនត្រឹមតែជាកន្លែងទស្សនាប៉ុណ្ណោះទេ សារមន្ទីរវាយនភ័ណ្ឌក៏មានលំហរមួយកន្លែង សម្រាប់ភ្ញៀវទេសចរមកទស្សនាសាកល្បងធ្វើផលិត Batik។ ក្រៅពីនេះសារមន្ទីរក៏រៀបចំវគ្គបណ្តុះបណ្តាល ទាក់ទងនឹងក្រណាត់ប្រពៃណី និងសិល្បៈ Batik របស់ឥណ្ឌូនេស៊ីផងដែរ។ លោក Sugeng Riadi - សិប្បករណែនាំអំពីការធ្វើ Batik ក្នុងសារមន្ទីរ បានចែករំលែកថា៖

«វគ្គបណ្តុះបណ្តាល Batik ត្រូវបានបើក ដើម្បីរក្សាទុកនិងអភិរក្សនូវវប្បធម៌របស់ឥណ្ឌូនេស៊ី ដើម្បីបង្កលក្ខណៈងាយស្រួលសម្រាប់មនុស្សជំនាន់ក្រោយអាចសិក្សារៀនសូត្រ និងមានមោទនភាពចំពោះប្រពៃណីជាតិ។ លើសពីនេះទៀត នេះក៏ជាកន្លែងមួយដើម្បីបន្ត«បណ្តុះពន្លក» និងអភិវឌ្ឍន៍ទេពកោសល្យផងដែរ។ អ្នកចូលរួមក្នុងវគ្គបណ្តុះបណ្តាល Batik នៅទីនេះ កាន់តែមានចំណង់ចំណូលចិត្តរបស់ខ្លួនថែមទៀត ដើម្បីអភិវឌ្ឍន៍ទៅជាអាជីពមួយផងដែរ” ។

អាចនិយាយបានថា សារមន្ទីរវាយនភណ្ឌនៅរដ្ឋធានីហ្សាកាតា គឺជាសារមន្ទីរដ៏ធំនិងមានគ្រប់ប្រភេទក្រណាត់ច្រើនបំផុតរបស់ឥណ្ឌូណេស៊ី ហើយថែមទាំងជាការខិតខំប្រឹងប្រែងមួយរបស់រដ្ឋាភិបាល ក្នុងការប្រមូល និងអភិរក្សបេតិកភណ្ឌនៃវិស័យវាយនភណ្ឌរបស់ប្រទេសនេះផងដែរ៕