ធូបចន្ទន៍ក្រឹស្នាប្រពៃណីរបស់ជនជាតិ Nung An នៅខេត្ត Cao Bang

ពីវត្ថុធាតុដើមដែលបានធម្មជាតិប្រទាន រួមជាមួយបាតដៃដ៏ប៉ិនប្រសប់របស់សិប្បករ បានបង្កើតសរសៃធូបក្រអូប ដែលពោរពេញទៅដោយអត្តសញ្ញាណវប្បធម៌ប្រពៃណីរបស់ជនជាតិ Nung An ជាច្រើនជំនាន់។

ដោយស្ថិតនៅក្រោមជើងភ្នំ Ta Hung ភូមិ Phja Thap ស្រុក Quang Uyen ខេត្ត Cao Bang នោះ ភូមិ Phja Thap ត្រូវបានស្គាល់ដល់ជាមួយនឹងរបរធ្វើធូបប្រពៃណីតាំងពីច្រើនជំនាន់មកហើយ។ ជាមួយនឹងគ្រឿងផ្សំធម្មជាតិសុទ្ធសាធ ក្លិនក្រអូបរបស់ Phja Thap មានក្លិនឈ្ងុយឈ្ងប់ របស់ដើមចន្ទន៍ក្រឹស្នា ហើយទេសចរណ៍ធ្វើធូបកំពុងក្លាយទៅជា ទួរទេសចរណ៍គួរឲ្យទាក់ទាញសម្រាប់ភ្ញៀវទេសចរនៅពេលមកដល់ទីនេះ។

នៅពេលដែលមានពន្លឺព្រះអាទិត្យបញ្ចេញកំដៅនោះ គ្រប់ច្រកល្ហកក្នុងភូមិ Phja Thap ពោរពេញទៅដោយក្លឹនធូបខ្លឹមចន្ទន៍ក្រឹស្នា។ ក្នុងពេលទំនេរ តាំងពីមនុស្សវ័យចាស់រហូតដល់ក្មេង ក្នុងភូមិសុទ្ធតែបានធ្វើធូបយ៉ាងមមាញឹក។ របៀបរស់នៅនេះត្រូវបានជនជាតិ Nung នៅទីនេះថែរក្សាអស់រយៈពេលរាប់រយឆ្នាំមកហើយ។

ចំពោះក្រុមគ្រួសាររបស់លោក Nong Van Lap នៅភូមិ Phja Thap ក៏អញ្ចឹងដែរ។ នៅពេលដែលព្រះអាទិត្យចែងចាំងរស្មីដំបូង គឺជាពេលវេលាគ្រួសាររបស់លោកបានចាប់ផ្ដើមធ្វើការងារប្រចាំថ្ងៃ។ លោក Nong Van Lap បានសំណេះសំណាលថា៖

“ដំបូងឡើយ ខ្ញុំបានហាលស្លឹក Bau hat។ ការធ្វើធូបត្រូវឆ្លងកាត់ដំណាក់កាល ចំនួន ៨។ ដោយឡែក ការបេះស្លឹកឈើនៅព្រៃ ដើម្បីហាលឲ្យស្ងួតគឺសំខាន់ណាស់ ព្រោះថា ស្លឹកឈើនេះអាចធ្វើជាកាវស្អិត។ បើសិនជាខ្វះស្លឹកឈើនេះគឺមិនអាចធ្វើធូបបានឡើយ។ កាលពីមុន ស្លឹកឈើនេះបានដុះនៅតាមព្រៃ ដែលមានក្លិនក្រអូបធម្មជាតិ ប៉ុន្តែនាបច្ចុប្បន្ននេះ អ្នកភូមិអាចដាំដើមឈើនេះបានដែរ“។

ទោះបីជាបានឆ្លងកាត់រយៈពេលរាប់រយឆ្នាំក៏ដោយ ប៉ន្តែអ្នកភូមិ Phja Thap នៅតែថែរក្សាបានរបរធ្វើធូបសិប្បកម្ម ដោយមិនប្រើសារធាតុគីមីឡើយ។ ចាប់ពីដើមអង្គាសិល ដើម្បីធ្វើឆ្អឹងធូប សំបកដើមកប្បាស សំបកដើមស្រល់ក្រហមដើម្បីធ្វើជាពណ៌ កំទេចដើមចន្ទន៍ក្រឹស្នា ហើយជាពិសេសគឺស្លឹកដើម Bau hat ដែលបានដុះនៅព្រៃ ដើម្បីធ្វើជាកាវស្អិតសារធាតុនានាជាមួយគ្នា។

ជនជាតិ Nung An នៅខេត្ត Cao Bang កំពុងធ្វើធូបចន្ទន៍ក្រឹស្នា

ធូប Phja Thap ល្បីឈ្មោះជាមួយក្លិនក្រអូបធម្មជាតិ ងាយឆេះនៅពេលអុជ ហើយអាចរក្សាទុកបានយូរ។ របរធ្វើធូបនៅ Phja Thap ជារបរសិប្បកម្ម ព្រោះថា មិនប្រើប្រាស់ម៉ាស៊ីន ឧបករណ៍ណាមួយឡើយ ។ ផលិតផលធូប Phja Thap ត្រូវបានជនជាតិ Nung An ហាលឲ្យស្ងួតតាមធម្មជាតិ។ ជាទូទៅ អ្នកភូមិបានហាលធូបក្នុងរយៈពេល ១ ថ្ងៃគឺគ្រប់គ្រាន់ហើយ។

នាបច្ចុប្បន្ននេះ ក្រុមគ្រួសារ ចំនួន ១០០% នៅក្នុងភូមិសុទ្ធតែបានប្រកបរបរធ្វើធូប។ ចែករំលែកអំពីការងារធ្វើធូបប្រចាំថ្ងៃរបស់គ្រួសារ លោក Hoang Van Tinh នៅភូមិ Phja Thap ឃុំ Quoc Dan ស្រុក Quang Uyen ខេត្ត Cao Bang បានឲ្យដឹងថា៖

“ជាទូទៅ នារដូវត្រជាក់ ប្រជាជនបានក្រោកពីដំណេកតាំងពីរម៉ោង ៥ ព្រឹក ដើម្បីធ្វើធូប។ ចំណែករដូវក្ដៅវិញ គឺ អ្នកភូមបានធ្វើការតាំងពីម៉ោង ៤ ព្រឹក។ ប្រសិនបើមានភ្លៀងធ្លាក់ គឺមិនអាចធ្វើធូបបានឡើយ ហើយអ្នកភូមិត្រូវយកធូបធ្វើរួចមុននោះទៅហាលលើចង្ក្រានភ្លើងពេញមួយថ្ងៃ“។

មកដល់ភូមិ Phja Thap នាថ្ងៃដែលមានពន្លឺព្រះអាទិត្យបញ្ចេញកំដៅនោះ ភ្ញៀវទេសចរមិនត្រឹមតែបានសម្របខ្លួនទៅក្នុងទេសភាពធម្មជាតិ ដ៏ស្រស់បំព្រងនៅតំបន់ព្រៃភ្នំប៉ុណ្ណោះទេ ថែមទាំងបានគយគន់បាច់ធូប ដែលត្រូវបានហាលពាសពេញជើងភ្នំដូចជាផ្កាដ៏ស្រស់ស្អាត។ របរធ្វើធូបប្រពៃណីបាននាំមកនូវប្រាក់ចំណូលគួរឲ្យកត់សម្គាល់សម្រាប់ប្រជាជននៅទីនេះ។ លោក Hoang Kim Ngoc លេខាសាខាបក្សភូមិ Phja Thap បានឲ្យដឹងថា៖

“បើគិតតាមតម្លៃទីផ្សារ របរធ្វើធូបបាននាំមកនូវប្រាក់ចំណូលខ្ពស់ជាងរបរកសិកម្ម។ ជារៀងរាល់ឆ្នាំមានរដូវកាលចំនួន ៣ ហើយរដូវកាលនីមួយៗអាចទទួលបានប្រាក់ចំណូលមធ្យមគឺ ២០ លានដុង“។

របរធ្វើធូបមិនត្រឹមតែឆ្លើយតបទៅនឹងតម្រូវការទីផ្សារ និងនាំមកនូវប្រាក់ចំណូលសម្រាប់ប្រជាជននៅភូមិ Phja Thap ប៉ុណ្ណោះទេ ថែមទាំងភ្ញៀវទេសចរមកពីគ្រប់ទិសទីអាចស្វែងយល់អំពីរបៀបថែរក្សាររបរប្រពៃណីរបស់ប្រជាជនទៀតផង។ ហេតុដូច្នេះហើយ ភ្ញៀវទេសចរអាចយល់ដឹងបន្ថែមអំពីលក្ខណៈស្រស់ស្អាត ដែលពោរពេញទៅដោយអត្តសញ្ញាណ វប្បធម៌ជនជាតិរបស់ជនរួមជាតិ Nung An ខេត្ត Cao Bang ៕