ក្នុងជំនួបនេះ លោក Ajay Banga បានអះអាងថា វៀតណាមជាដៃគូសំខាន់មួយរបស់ WB; ស្នើឱ្យភាគីទាំងពីរបន្តជំរុញកិច្ចសហប្រតិបត្តិការដើម្បីកែលម្អហេដ្ឋារចនាសម្ព័ន្ធផ្លូវទឹក ផ្លូវគោក និងផ្លូវដែក ជាពិសេសនៅក្នុងតំបន់មេគង្គ; ពន្លឿនការផ្លាស់ប្តូរថាមពលប្រកបដោយនិរន្តរភាព ពង្រីកនិងផ្សព្វផ្សាយជោគជ័យរបស់វៀតណាមក្នុងការដាំដំណាំស្រូវដែលមានការបំភាយឧស្ម័នទាប។

អគ្គលេខាបក្ស ប្រធានរដ្ឋវៀតណាម លោក តូឡឹម ទទួលជួបជាមួយប្រធានធនាគារពិភពលោក  លោក Ajay Banga ។ រូបថត៖ TTXVN

អគ្គលេខាបក្ស ប្រធានរដ្ឋ តូឡឹម បានអះអាងថា វៀតណាមជានិច្ចកាលផ្តល់អាទិភាពលើការពង្រឹងនិងបង្កើនទំនាក់ទំនងជាមួយ WB ដោយស្នើឲ្យភាគីទាំងពីរពន្លឿនការឯកភាពលើក្របខ័ណ្ឌភាពជាដៃគូជាតិ (CPF) រវាងវៀតណាមនិង WB ដើម្បីបង្កើតបុព្វបទសម្រាប់តម្រង់ទិសសហប្រតិបត្តិការរវាងភាគីទាំងពីរ នាពេលខាងមុខ។ លោកអគ្គលេខាបក្សបានស្នើឲ្យ WB បន្តជួយឧបត្ថម្ភធនធានសម្រាប់វៀតណាមក្នុងការអនុវត្តគម្រោងមានសក្តានុពល គន្លឹះ និងទំលុះទំលាយ ដែលផ្សារភ្ជាប់ទៅនឹងភារកិច្ចបង្កើតគំរូកំណើន រៀបចំរចនាសម្ព័ន្ធសេដ្ឋកិច្ចឡើងវិញ និងផ្លាស់ប្តូរថាមពល ឆ្លើយតបទៅនឹងការប្រែប្រួលអាកាសធាតុ និងកែលម្អភាពធន់របស់សេដ្ឋកិច្ចចំពោះហានិភ័យ និងការប្រែប្រួលដែលមិនអាចទាយទុកជាមុនបាននៅក្នុងបរិយាកាសអន្តរជាតិ។

ប្រធាន WB បានអះអាងថា លោកនឹងផ្តល់អាទិភាពលើការបែងចែកប្រភពទុនធំៗដល់វៀតណាម ដោយផ្តោតលើគម្រោងសំខាន់ៗក្នុងវិស័យអាទិភាព; មានបំណងចង់មកបំពេញទស្សនកិច្ចនៅវៀតណាមម្តងទៀតនាពេលឆាប់ៗខាងមុខ ដើម្បីជំរុញការអភិវឌ្ឍបន្ថែមទៀតនៃកិច្ចសហប្រតិបត្តិការរវាងភាគីទាំងពីរ ដើម្បីការអភិវឌ្ឍន៍របស់វៀតណាម និងតំបន់អាស៊ីទាំងមូលផងដែរ៕