កាសែតឈូងសមុទ្រ (Al-Khaleej) នាថ្ងៃទី ២៧ តុលា បានវាយតម្លៃថា ដំណើរទស្សនកិច្ចរបស់នាយករដ្ឋមន្ត្រី លោក ហ្វាម មិញជីញ នៅ UAE បានប្រព្រឹត្តទៅក្នុងក្របខ័ណ្ឌនៃការយកចិត្តទុកដាក់និងបំណងប្រាថ្នារួមរវាងប្រទេសទាំងពីរក្នុងការជំរុញទំនាក់ទំនងទ្វេភាគី; ហើយបានបញ្ជាក់យ៉ាងច្បាស់ថា វៀតណាមជាដៃគូពាណិជ្ជកម្មមិនមែនប្រេងរ៉ែធំបំផុតរបស់ UAE ក្នុងសមាគមប្រជាជាតិអាស៊ីអាគ្នេយ៍ (អាស៊ាន) នៅពេលដែលពាណិជ្ជកម្មទ្វេភាគីមិនមែនប្រេងរ៉ែក្នុងឆមាសទីមួយនៃឆ្នាំ ២០២៤ សម្រេចបាន ៦,១ ពាន់លានដុល្លារអាមេរិក កើនឡើង ៩ % បើធៀបនឹងរយៈពេលដូចគ្នាកាលពីឆ្នាំមុន។

កាសែត Al-Khaleej បានរាយការណ៍អំពីដំណើរទស្សនកិច្ចរបស់នាយករដ្ឋមន្ត្រីវៀតណាម លោក ហ្វាម មិញជីញ ទៅកាន់ UAE។ រូបថត៖ Minh Ngo/VOV-Cairo

ទន្ទឹមនឹងនោះ ប្រព័ន្ធផ្សព្វផ្សាយ UAE និងបណ្តាប្រទេសឈូងសមុទ្របានលើកឡើងពីលទ្ធផលដែលសម្រេចបានក្នុងដំណើរបំពេញទស្សនកិច្ច ជាពិសេសវៀតណាម និង UAE បានឯកភាពលើកកំពស់ទំនាក់ទំនងទ្វេភាគីទៅជាភាពជាដៃគូលើគ្រប់ជ្រុងជ្រោយ ចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយវៀតណាម - UAE (CEPA) ក៏ដូចជាកិច្ចព្រមព្រៀង និងអនុស្សរណៈយោគយល់គ្នាជាបន្តបន្ទាប់រវាងប្រទេសទាំងពីរ លើវិស័យសំខាន់ៗ ដូចជា៖ សេដ្ឋកិច្ច វិនិយោគ ពាណិជ្ជកម្ម ការអភិវឌ្ឍន៍រដ្ឋាភិបាល ការអប់រំ និងការស្រាវជ្រាវ...។

ប្រព័ន្ធផ្សព្វផ្សាយ UAE បានរាយការណ៍អំពីពិធីចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចទូលំទូលាយវៀតណាម - UAE (CEPA) ។ រូបថត៖ Minh Ngo/VOV-Cairo

ប្រព័ន្ធផ្សព្វផ្សាយក្នុងស្រុក បានដកស្រង់ប្រសាសន៍របស់អនុប្រធានាធិបតីនិងជានាយករដ្ឋមន្ត្រី UAE លោក Sheikh Mohammed bin Rashid Al Maktoum ដែលធ្វើអត្ថាធិប្បាយអំពីទំនាក់ទំនងដ៏ល្អប្សើរ រវាងវៀតណាមនិងUAE។ ប្រទេសទាំងពីរគឺជាដៃគូពាណិជ្ជកម្មដ៏ធំបំផុតរបស់គ្នាទៅវិញទៅមកនៅមជ្ឈិមបូព៌ា ហើយបានចុះហត្ថលេខាលើកិច្ចព្រមព្រៀងសហប្រតិបត្តិការថ្មីមួយ និងមានទំនុកចិត្តចំពោះអនាគតនៃទំនាក់ទំនងនេះ៕