រដ្ឋមន្ត្រីក្រសួងការបរទេសវៀតណាមលោក Bui Thanh Son ។ រូបថត៖ dangcongsan.vn

កសាងរូបភាពប្រទេសវៀតណាមដ៏សកម្ម និងប្រកបដោយមានការទទួលខុសត្រូវ

ឆ្នាំ ២០២៤ និងប៉ុន្មានឆ្នាំខាងមុខ កិច្ចការបរទេសពហុភាគីនឹងបន្តជានិន្នាការលេចធ្លោនៅក្នុងទំនាក់ទំនងអន្តរជាតិ ហើយដើរតួនាទីយ៉ាងសំខាន់ក្នុងជីវភាពខាងនយោបាយ សេដ្ឋកិច្ច និងសង្គមរបស់ប្រទេសនីមួយៗ ក៏ដូចជាពិភពលោក។ សម្រាប់វៀតណាម ការចូលរួមក្នុងយន្តការ និងវេទិកាពហុភាគី បន្តជាកាណាល់ដ៏សំខាន់ ដើម្បីរួមចំណែកថែរក្សា និងពង្រឹងបរិយាកាសសន្តិភាព និងស្ថិរភាព រក្សាឯករាជ្យ អធិបតេយ្យភាព និងបូរណភាពទឹកដី រួមវិភាគទានទៅក្នុងការដោះស្រាយបញ្ហាប្រឈមសន្តិសុខបែបប្រពៃណី និងក្រៅប្រពៃណីដែលទាក់ទងនឹងប្រទេស តំបន់ និងពិភពលោក ព្រមទាំងទាញយកជាអតិបរមាប្រភពកម្លាំងខាងក្រៅ ដើម្បីបម្រើការអភិវឌ្ឍសេដ្ឋកិច្ចសង្គម។

តាមនោះ វៀតណាមយកចិត្តទុកដាក់រៀបចំឲ្យបានល្អនូវរាល់ព្រឹត្តិការណ៍ជាន់ខ្ពស់ និងរៀបចំប្រកបដោយជោគជ័យនូវរាល់ព្រឹត្តិការណ៍ដែលវៀតណាមធ្វើជាម្ចាស់ផ្ទះ ព្រមទាំងសកម្មពង្រីកតួនាទីក្នុងយន្តការ ដែលវៀតណាមត្រូវបានបោះឆ្នោតក្នុង អង្គការសហប្រជាជាតិ អង្គការយូណេស្កូ ក្រុមប្រឹក្សាសិទ្ធិមនុស្ស និងចលនាឈរឈ្មោះក្នុងយន្តការផ្សេងៗទៀត ក៏ដូចជាការរួមវិភាគទានជាគំនិតផ្តួចផ្តើមក្នុងវិស័យការទូតឯកទេសដូចជាសន្តិសុខស្បៀងអាហារ បម្រែបម្រួលអាកាសធាតុ បេតិកភណ្ឌវប្បធម៌។ អំពីទិសដៅការទូតវៀតណាមក្នុងឆ្នាំ ២០២៤ រដ្ឋមន្ត្រីក្រសួងការបរទេសវៀតណាមលោក Bui Thanh Son បានឲ្យដឹងថា៖ “បន្តជំរុញខ្លាំងការផ្លាស់ប្ដូរថ្មីការត្រិះរិះអំពីកិច្ចការបរទេស។ ជាមួយនឹងឋានៈ និងកម្លាំងពលំថ្មីរបស់ប្រទេសជាតិ ដែលមិនធ្លាប់មានតាំងពីមុនមក យើងចាំបាច់ត្រូវស្វែងរករបៀបធ្វើថ្មី ដើម្បីផលប្រយោជន៍របស់ប្រទេសជាតិ និងប្រជាជាតិ។ ដូច្នេះហើយ ចាំបាច់ត្រូវរកឃើញបញ្ហាថ្មីៗ កំណត់កាលានុវត្តភាពឲ្យបានត្រឹមត្រូវ កំណត់ទីតាំងយុទ្ធសាស្ត្ររបស់ប្រទេសជាតិឲ្យបានត្រឹមត្រូវ ហើយទាញយកផលប្រយោជន៍ល្អពីនិន្នាការអន្តរជាតិ ដើម្បីម្ចាស់ការមានគោលនយោបាយ សេចក្ដីសម្រេចចិត្ត និងការបោះជំហាន កិច្ចការបរទេសសមស្របផងដែរ”។

ក្រៅពីការផ្តោតសំខាន់លើការទទួលខុសត្រូវឲ្យបានល្អនៅអង្គការ និងស្ថាប័នអន្តរជាតិ ដែលវៀតណាមជាសមាជិកនោះ វៀតណាមបន្តលើកសំណើ ជំរុញគំនិតផ្តួចផ្តើមកិច្ចសហប្រតិបត្តិការទាក់ទងនឹងវិស័យក្តៅគគុកនាពេលបច្ចុប្បន្នដូចជា៖ ការផ្លាស់ប្ដូរថាមពល សន្តិសុខប្រភពទឹកស្បៀងអាហារ និងការផ្លាស់ប្ដូរឌីជីថល។ តាមនោះ អះអាងយ៉ាងខ្លាំងក្លាពីទស្សនៈឥតងាករេលើការលើកកម្ពស់ពហុភាគីនិយម ការគោរពច្បាប់អន្តរជាតិ និងធម្មនុញ្ញអង្គការសហប្រជាជាតិ ការជំរុញកិច្ចសន្ទនា កិច្ចសហប្រតិបត្តិការ សាមគ្គីភាព ធ្វើសកម្មភាពដើម្បីសន្តិភាព អភិវឌ្ឍន៍ប្រកបដោយចីរភាព និងការឆ្លើយតបប្រកបដោយប្រសិទ្ធភាពចំពោះបញ្ហាប្រឈមសកល។

ប្រទេសមួយដែលមានកិត្យានុភាពទាំងក្នុងតំបន់ និងភូមិសាស្ត្រនយោបាយ

វៀតណាមបាននិងកំពុងអនុវត្តន៍គោលមាគ៌ាកិច្ចការបរទេសពហុភាគីប្រកបដោយប្រសិទ្ធភាព និងមានការទទួលខុសត្រូវខ្ពស់ កសាងរូបភាពប្រទេសមួយដ៏ទំនើប ហើយក្លាយទៅជាប្រទេសមួយដ៏មានកិត្យានុភាពទាំងថ្នាក់តំបន់ និង ភូមិសាស្ត្រនយោបាយ។

ក្រៅពីការចូលរួមអង្គការសមាហរណកម្មសេដ្ឋកិច្ច វៀតណាមក៏ជាសមាជិកសកម្ម ក្រកបដោយមានការទទួលខុសត្រូវក្នុងអង្គការភូមិសាស្ត្រនយោបាយនៅទូទាំងពិភពលោក ក្នុងនោះមានអង្គការសហប្រជាជាតិ ហើយត្រូវបានអង្គការ និងដៃគូនានា វាយតម្លៃខ្ពស់ ដោយសរឲ្យឃើញថា វៀតណាមបានអនុវត្តន៍ប្រកបដោយប្រសិទ្ធភាពគោលមាគ៌ាកិច្ចការបរទេសពហុភាគីប្រកបដោយស្មារតីទទួលខុសត្រូវខ្ពស់។ លើវិស័យការទូត ឯកអគ្គរដ្ឋទូតវៀតណាមបានរួមគ្នាកសាងរូបភាពប្រទេសវៀតណាមដ៏ទំនើប ហើយមានសំឡេងសំខាន់នៅកម្រិតតំបន់ និងភូមិសាស្ត្រនយោបាយ។

យោងតាមប្រធានក្រុមប្រឹក្សាអ្នកជំនាញនៃមូលនិធិស្រាវជ្រាវវិទ្យាសាស្ត្រគំនិតអាស៊ី អឺរ៉ុប លោក Grigory Trofimchuk បានឲ្យដឹងថា ជាមួយនឹងសកម្មភាពដូចដែលបានពោលខាងលើ វៀតណាមបានអះអាងថា ខ្លួន មិនត្រឹមតែជាប្រទេសខ្លាំងមាំមួនប៉ុណ្ណោះទេ ថែមទាំងមានកិត្យានុភាពលើឆាកពិភពលោកទៀតផង។ ប្រការនេះអាចសម្រេចបានតែជាមួយប្រជាជាតិវៀតណាមដ៏ខ្លាំងមាំមួនក្រោមការដឹកនាំរបស់បក្សកុម្មុយនិស្តវៀតណាម។ ឆ្នាំ ២០២៤ មានអត្ថន័យដ៏សំខាន់ក្នុងការអនុវត្តន៍ប្រកបដោយជោគជ័យនូវសេចក្តីសម្រេចចិត្តនៃមហាសន្និបាតលើកទី ១៣ របស់បក្សកុម្មុយនិស្តវៀតណាម។ តាមរយៈសកម្មភាពការទូតពហុភាគី វៀតណាមមិនត្រឹមតែបញ្ជូនសារអំពីទស្សនៈ និងវិធីអភិក្រមរបស់ប្រទេសកំពុងអភិវឌ្ឍន៍ចំពោះបញ្ហាដែលពិភពលោកកំពុងប្រឈមប៉ុណ្ណោះទេ ថែមទាំងរួមចំណែកអនុវត្តន៍ទិសដៅដ៏ធំធេងអំពីកិច្ចការបរទេស ដែលសេចក្តីសម្រេចចិត្តនៃមហាសន្និបាតបក្សលើកទី១៣ បានដាក់ចេញផងដែរ៕