ប្រធានរដ្ឋសភាវៀតណាម លោក Vuong Dinh Hue ថ្លែងមតិនៅកិច្ចប្រជុំគណៈកម្មាធិការ ប្រតិបត្តិការ AIPA ៤៣។ (រូបថត៖ TTXVN)

AIPA ៤៣ គឺជាមហាសន្និបាតលើកដំបូង ដែលត្រូវបានប្រារព្ធឡើងតាមទម្រង់ផ្ទាល់ក្រោយរយៈពេលជាង ២ ឆ្នាំនៃជំងឺរាតត្បាតកូវីដ-១៩។ គណៈប្រតិភូរដ្ឋសភាវៀតណាមបានចូលរួម AIPA ៤៣ នៅកម្រិតខ្ពស់បំផុត ដែលដឹកនាំដោយប្រធានរដ្ឋសភាលោក Vuong Dinh Hue។

សមាជិកសកម្ម និងមានការទទួលខុសត្រូវ

ក្នុងអំឡុងពេល ២៧ ឆ្នាំ រួមដំណើរជាមួយ AIPO/AIPA (ខែកញ្ញា ឆ្នាំ ១៩៩៥ - ខែកញ្ញា ឆ្នាំ២០២២) រដ្ឋសភាវៀតណាមតែងតែស្នើឡើងយ៉ាងសកម្មនូវគំនិតផ្តួចផ្តើមជាច្រើនដើម្បីជួយឲ្យយន្តការសហប្រតិបត្តិការអន្តរសភាក្នុងតំបន់កាន់តែមានប្រសិទ្ធភាព។

ក្រឡែកមើលប្រវត្តិសាស្ត្រឡើងវិញ ក្នុងពេលវេលាដែលតំបន់ជួបការលំបាក រដ្ឋសភាវៀតណាមតែងតែចាត់វិធានការដោយទាន់ពេលវេលា រួមជាមួយសភានៃប្រទេសសមាជិក AIPA នានា រួមចំណែកដោះស្រាយបញ្ហាដែលកើតឡើងនៅក្នុងតំបន់។

នៅឆ្នាំ ១៩៩៨ មួយឆ្នាំបន្ទាប់ពីវិបត្តិសេដ្ឋកិច្ច ហិរញ្ញវត្ថុនៅអាស៊ីអាគ្នេយ៍ វៀតណាមបានផ្តួចផ្តើមគំនិតអំពីការរៀបចំកិច្ចប្រជុំគណៈកម្មាធិការឯកទេស AIPO ស្តីពីតួនាទីរបស់ស្ថាប័ននីតិបញ្ញត្តិនៃបណ្ដាប្រទេស នៅចំពោះមុខវិបត្តិសេដ្ឋកិច្ច ហិរញ្ញវត្ថុតំបន់ នៅទីក្រុងហាណូយ។ នេះគឺជាកិច្ចប្រជុំឯកទេសមួយដែលបង្ហាញពីការចូលរួមទាន់ពេលវេលារបស់ស្ថាប័ននីតិប្បញ្ញត្តិក្នុងកិច្ចខិតខំប្រឹងប្រែងរួមរបស់អាស៊ានដើម្បីឆ្លើយតបនឹងការលំបាកដែលកើតមានឡើងក្នុងតំបន់។

នៅឆ្នាំ ២០០២ ជាលើកដំបូងដែលរដ្ឋសភាវៀតណាមកាន់តំណែងជាប្រធាន AIPO ហើយបានរៀបចំមហាសន្និបាត AIPO លើកទី២៣ នៅទីក្រុងហាណូយប្រកបដោយជោគជ័យ។ នេះជាព្រឹត្តិការដ៏សំខាន់មួយក្នុងសកម្មភាពការទូតសភា របស់រដ្ឋសភាវៀតណាម នៅពេលដែលក្នុងចំណោមសេចក្តីសម្រេចចិត្តសរុបចំនួន ៣៣ ដែលបានអនុម័ត មានសេចក្ដីសម្រេចចិត្តចំនួន ២០ ត្រូវបានស្នើឡើងដោយវៀតណាម។ បន្ទាប់ពីជោគជ័យនៃ AIPO ២៣ ក្នុងឆ្នាំ ២០១០ រដ្ឋសភាវៀតណាមបានកាន់តំណែងជាប្រធាន AIPA ជាលើកទីពីរ ហើយធ្វើជាម្ចាស់ផ្ទះនៃមហាសន្និបាត AIPA លើកទី ៣១។

ទិដ្ឋភាពនៅកិច្ចប្រជុំគណៈកម្មាធិការប្រតិបត្តិការ AIPA ៤៣។

១០ ឆ្នាំក្រោយ (ឆ្នាំ ២០២០) ដោយសារផលប៉ះពាល់នៃជំងឺរាតត្បាតកូវីដ-១៩ រដ្ឋសភាវៀតណាមបានរៀបចំមហាសន្និបាត AIPA លើកទី ៤១ ដែលជាមហាសន្និបាតតាមប្រព័ន្ធវីដេអូលើកដំបូង ក្នុងប្រវត្តិសាស្ត្រ AIPA ហើយបន្តបង្ហាញពីតួនាទីនាំមុខគេ ដោយស្នើឡើងនូវគំនិតផ្តួចផ្តើមប្រកបដោយលក្ខណៈទម្លុះទម្លាយជាច្រើន ដូចជា ការរៀបចំកិច្ចប្រជុំក្រៅផ្លូវការរបស់សមាជិកសភាវ័យក្មេង AIPA ជាលើកដំបូង ឬការទទួលយកសភាសង្កេតការណ៍បន្ថែមទៀតក្រោយរយៈពេល ១០ ឆ្នាំមិនពង្រីកចំនួនអ្នកសង្កេតការណ៍របស់ AIPA។

នៅមហាសន្និបាតនីមួយៗ រដ្ឋសភាវៀតណាមតែងតែស្នើឡើងយ៉ាងសកម្មនូវគំនិតផ្តួចផ្តើមនានា ដើម្បីជំរុញទំនាក់ទំនងរវាង AIPA និងអាស៊ាន។ ក្រៅពីនោះ ដោយឈរលើការកំណត់ថា តំបន់មិនអាចបំបែកចេញពីពិភពលោកបានទេ វៀតណាមបានផ្តួចផ្តើមគំនិតអំពីការអញ្ជើញសហភាពអន្តរសភា (IPU) ចូលរួមសម័យប្រជុំមហាសន្និបាត។ នេះគឺជាជំហានដ៏សែនសំខាន់ ក្នុងដំណើរការសមាហរណកម្មអន្តរជាតិរបស់ AIPO/AIPA។

អញ្ជើញថ្លែងមតិក្នុងកិច្ចប្រជុំបូកសរុបឆ្នាំប្រធាន AIPA ២០២០ និងមហាសន្និបាត AIPA ៤១ (ខែធ្នូ ឆ្នាំ ២០២០) អតីតប្រធានរដ្ឋសភាវៀតណាម លោកស្រី Nguyen Thi Kim Ngan បានចាត់ទុកថា៖

“ការងារកិច្ចការបរទេសពហុភាគីរបស់រដ្ឋសភាវៀតណាមបានបង្កើតឡើងសញ្ញាសម្គាល់ដ៏លេចធ្លោ ជាពិសេសការតភ្ជាប់អង្គការសភាដែលរដ្ឋសភាវៀតណាមជាសមាជិក តាមនោះពង្រីកបាននូវកម្លាំងរួម ទាក់ទាញការចូលរួមពីសភាអន្តរជាតិនិងតំបន់ជាច្រើន។ តួនាទីនិងឋានៈរបស់រដ្ឋសភាវៀតណាមត្រូវបានបញ្ជាក់កាន់តែមុតមាំពីមួយថ្ងៃទៅមួយថ្ងៃ”។

បន្តរួមវិភាគទានយ៉ាងជាក់ស្តែងនៅ AIPA ៤៣

ក្នុងឆ្នាំ២០២២ ការសន្យារបស់រដ្ឋសភាវៀតណាមចំពោះ AIPA បន្តត្រូវបានបង្ហាញតាមរយៈការចូលរួមយ៉ាងសកម្មនៅក្នុងកិច្ចប្រជុំនានាក្នុងក្របខ័ណ្ឌ AIPA។ នៅ AIPA ៤៣ ប្រធានរដ្ឋសភាវៀតណាម លោក Vuong Dinh Hue បានចូលរួមសកម្មភាពសំខាន់ៗក្នុងក្របខ័ណ្ឌមហាសន្និបាត។ នេះជាឱកាសដើម្បីរដ្ឋសភាវៀតណាមបន្តស្នើគំនិតផ្តួចផ្តើម ហើយរួមចំណែកយ៉ាងសកម្មដល់ AIPA។ លោក Vu Hai Ha ប្រធានគណៈកម្មាធិការកិច្ចការបរទេសនៃរដ្ឋសភាបានឲ្យដឹងថា៖

“យើងមានការរួមវិភាគទាន ចែករំលែកបទពិសោធន៍របស់វៀតណាមក្នុងដំណើរការកសាងតំបន់អាស៊ីអាគ្នេយ៍ប្រកបដោយសន្តិភាព ស្ថិរភាព និងអភិវឌ្ឍន៍ រួមគ្នាដោះស្រាយបញ្ហាប្រឈមនានាក្នុងតំបន់។ ចំពោះសេដ្ឋកិច្ច យើងផ្តោតលើការពិភាក្សាអំពីប្រធានបទដែលអាស៊ានយកចិត្តទុកដាក់ នោះគឺការផ្លាស់ប្តូរឌីជីថល ការងើបឡើងវិញនៃសេដ្ឋកិច្ចក្រោយជំងឺរាតត្បាត ក៏ដូចជាការងើបឡើងវិញនៃវិស័យទេសចរណ៍ផងដែរ”។

ការរួមវិភាគទានរបស់រដ្ឋសភាវៀតណាមចំពោះ AIPA ក្នុងរយៈពេល ២៧ ឆ្នាំកន្លងមកនេះ មិនត្រឹមតែបញ្ជាក់នូវសំឡេងរបស់វៀតណាមនៅវេទិកាអន្តរសភាប៉ុណ្ណោះទេ ថែមទាំងលើកកំពស់ប្រសិទ្ធភាពនៃសកម្មភាពកិច្ចការបរទេសរបស់រដ្ឋសភាវៀតណាម ដើម្បីឲ្យការទូតសភារួមចំណែកលើកកម្ពស់ឋានៈ មុខមាត់ និងកិត្យានុភាពរបស់ប្រទេសជាតិក្នុងតំបន់ និងលើពិភពលោកផងដែរ៕