លោកស្រី Phan Thi Mai - គ្រិស្តសាសនិកជាគំរូល្អទាំងខាងផ្លូវលោកនិងខាងធម៌។ (រូបថត៖ VOV)

ចាប់តាំងពីកុមារភាព លោកស្រី Phan Thi Mai ត្រូវបានឪពុកម្ដាយជូនទៅព្រះវិហារកាតូលិកដើម្បីសិក្សារៀនសូត្រ ហើយស្ដាប់ដូនជីនិងលោកអាចារ្យកាតូលិកប្រៀនប្រដៅពីព្រះគម្ពីរ។ មិនត្រឹមតែយល់ច្បាស់ពីប្រការដ៏ល្អប្រសើរក្នុងព្រះគម្ពីរប៉ុណ្ណោះទេ លោកស្រីថែមទាំងយកមកអនុវត្តន៍ក្នុងជីវភាពប្រចាំថ្ងៃទៀតផង។ នៅក្បែរផ្ទះរបស់លោកស្រី Mai មានគ្រួសារលោក Nguyen Van Nghiem ដែលមានស្ថានភាពលំបាកខ្លាំងណាស់។ គ្រួសារលោក Nghiem គ្មានដីធ្លីសម្រាប់បង្កបង្កើនផលនោះទេ ហើយរូបលោកផ្ទាល់ក៏រងជម្ងឺដាច់សរសៃឈាមខួរក្បាលកម្រិតស្រាលផងដែរ។ គ្រួសារលោកស្រី Mai មិនថាមានត្រីឬបន្លែ ក៏តែងតែចែករំលែកជាមួយលោក Nghiem។ ក្នុងអំឡុងពេលមានជម្ងឺកូវីដ-១៩ លោកស្រី Mai បានឧបត្ថម្ភអង្ករ មីកញ្ចប់របស់គ្រួសារខ្លួន ជូនដល់លោក Nghiem នៅពេលដែលកូនៗរបស់លោកដែលបានធ្វើចំណាកស្រុកប្រកបរបររកស៊ី មិនអាចផ្ញើរប្រាក់មកផ្ទះវិញបានឡើយ។ ចំពោះលោកស្រី Phan Thi Mai គឺការប្រតិបត្តិតាមព្រះបន្ទូលមិនត្រឹមតែជាការជួយឧបត្ថម្ភអ្នកដទៃប៉ុណ្ណោះទេ ថែមទាំងជាការគោរពតាមច្បាប់ទៀតផង។ លោកស្រីបានសំណេះសំណាលថា៖

“បច្ចុប្បន្ននេះ កំពុងរស់នៅក្នុងស្ថានភាពជម្ងឺរាតត្បាត គឺយើងត្រូវតែ ប្រតិបត្តិតាមបទបញ្ញត្តិនៃច្បាប់។ ប្រតិបត្តិតាមគោលការណ៍ ៥K កុំចេញទៅក្រៅប្រសិនបើមិនចាំបាច់ ហើយមិនគប្បីប្រមូលផ្ដុំគ្នាឡើយ។ ប្រសិនបើអ្នកជិតខាងរបស់យើងជួបប្រទះនឹងការលំបាក យើងគួរតែជួយគេតែម្ដង។ អ្នកណាមកផ្ទះខ្ញុំសុំអ្វីៗដែលខ្ញុំមាន ខ្ញុំក៏ឲ្យទៅភ្លាម។ មានអង្ករឲ្យអង្ករ មានលុយឲ្យលុយ មានបន្លែ ផ្លែឈើក៏ឲ្យដែរ”។

នៅពេលដែលសហគមន៍គ្រិស្តសាសនិកនៅមូលដ្ឋានបង្កើតបណ្ដាក្រុមដើម្បីធ្វើការងារសប្បុរសធម៌ លោកស្រី Mai តែងតែចូលរួមយ៉ាងសកម្ម។ លេចធ្លោគឺ ក្រុម Legio ដោយមានសមាជិកជាស្ត្រីដែលទទួលបន្ទុកការចុះសួរសុខទុក្ខ លើកទឹកចិត្ត ជួយឧបត្ថម្ភគ្រួសារដែលជួបការលំបាក។ លោកស្រី Mai ជាសមាជិកាដ៏ក្លៀវក្លាម្នាក់ ដែលត្រៀមខ្លួនជាស្រេចរួមកម្លាំងកាយចិត្ត រហូតដល់សម្ភារៈទៀតផង ដើម្បីជួយឧបត្ថម្ភអ្នកដទៃ។ មិនត្រឹមតែប៉ុណ្ណោះទេ លោកស្រីថែមទាំងអំពាវនាវឲ្យអ្នកមានលក្ខណៈ ជួយយកចិត្តទុកដាក់ដល់បណ្ដាគ្រួសារដែលជួបការលំបាកទៀតផង។ លោកស្រី Phan Thi Mai បានសង្ខេបការប្រៀនប្រដៅក្នុងព្រះគម្ពីរដោយពាក្យចំនួន២ដែលជា “ស្រឡាញ់និងចែករំលែក” ដូច្នេះលោកស្រីតែងតែត្រៀមខ្លួនជាស្រេចជួយឧបត្ថម្ភមនុស្សដែលជួបការលំបាក ជាពិសេសគឺក្នុងបុណ្យណូអែល៖

“ចំពោះគ្រិស្តសាសនា បុណ្យណូអែលគឺជាពិធីបុណ្យដ៏ធំ។ គ្រិស្តសាសនិកទាំងអស់សុទ្ធតែមានក្ដីសប្បាយរីករាយយ៉ាងក្រៃលែង។ ហើយសាសនិកម្នាក់ៗត្រូវតែចេះ មានវិប្បដិសារី ប្រសិនបើខ្លួនឯងមានកំហុសណាមួយ គឺត្រូវសម្លឹងមើល កែប្រែ រស់នៅឲ្យកាន់តែល្អប្រសើរឡើង”។

ជារៀងរាល់ថ្ងៃ លោកស្រី Phan Thi Mai ត្រូវធ្វើស្រែចម្ការហើយធ្វើការងារ ផ្ទះដូចមនុស្សផ្សេងៗដែរ ប៉ុន្តែលោកស្រីនៅតែឆ្លៀតពេលដើម្បីទៅព្រះវិហារកាតូលិក។ លោកស្រីក៏ខិតខំរៀបចំពេលវេលាដើម្បីចូលរួមសកម្មភាពដែលព្រះវិហាររៀបចំឡើង ជាពិសេសគឺសកម្មភាពដើម្បីសហគមន៍។ លោកស្រីក៏យកប្រការដ៏ល្អប្រសើរក្នុងព្រះគម្ពីរមកប្រៀនប្រដៅកូនចៅ ហើយថែទាំឲ្យកូនៗធំដឹងក្ដី សិក្សារៀនសូត្របានល្អផងដែរ។ ហេតុដូច្នេះ លោកស្រី Mai ទទួលបានការគោរពសរសើរយ៉ាងខ្លាំងពីសំណាក់អ្នកស្រុក។ លោកស្រី Le Thi Tham អ្នកស្រុកម្នាក់ បានចែករំលែកថា៖   

“និយាយពីផ្លូវធម៌ គឺលោកស្រី Mai ល្អណាស់ មិនដែលរំលោភបំពានលើធម៌វិន័យឬពាក្យប្រៀនប្រដៅរបស់ព្រះឡើយ ហើយថែមទាំងរស់នៅយ៉ាងត្រឹមត្រូវណាស់។ គ្រួសារគាត់មិនសូវជាមានលក្ខណៈធូធារឡើយ ត្រឹមតែល្មមៗប៉ុណ្ណោះ ប៉ុន្តែក្នុងអំឡុងពេលមានជម្ងឺរាតត្បាត គ្រួសារណាដែលជួបការលំបាក គឺគាត់នៅតែជួយទំនុកបម្រុងនិងចែករំលែកជាមួយគេ។ អស់រយៈពេល៣ឆ្នាំចុងក្រោយនេះ គាត់បានធ្វើការងារមួយដែលយើងខ្ញុំមិនទាន់ធ្វើបានទេ នោះគឺការចែករំលែកជាមួយជនក្រីក្រ។ ជារៀងរាល់ខែ គាត់តែងតែចែករំលែកអង្ករ ១០ គីឡូក្រាមជូនដល់ជនក្រីក្រ។ នៅទីនេះ ខ្ញុំមិនទាន់ឃើញនរណាម្នាក់ដែលអាចធ្វើការងារនេះបាន”។

ចំពោះលោកស្រី Phan Thi Mai ការរស់នៅនិងប្រតិបត្តិតាមព្រះបន្ទូល មិនត្រឹមតែជាការគោរពតាមធម៌វិន័យប៉ុណ្ណោះទេ ថែមទាំងជាការប្រតិបត្តិតាមប្រការទាំងនោះនៅក្នុងជីវភាពរស់នៅជាក់ស្ដែងទៀតផង។ នោះគ្រាន់តែជាការរស់នៅប្រកបដោយសុខដុមរមនា ស្មោះត្រង់ ហើយជួយឧបត្ថម្ភមនុស្សដែលជួបការលំបាក៕