ກອງປະຊຸມສຳມະນາ“ຫວຽດນາມ-ສະຖານທີ່ທ່ອງທ່ຽວດຳເນີນທຸລະກິດຂອງເພື່ອນ"ຢູ່ອັງກິດ
ທ່ານນາງ ໂຮ່ທິກີມທວາ, ລັດຖະມົນຕີຊ່ວຍວ່າການກະຊວງ
ອຸດສາຫະກຳ ການຄ້າຫວຽດນາມ
ພາບ: .pvn.vn
|
(vovworld)- ກອງປະຊຸມສຳມະນາໂດຍສະພາການຄ້າອັງກິດ - ອາຊຽນ (UKABC) ຫາກໍ່ຈັດຕັ້ງຢູ່ນະຄອນຫລວງ ລອນດອນ ເນື່ອງໃນໂອກາດຄະນະປະຕິບັດງານລະຫວ່າງກະຊວງໂດຍທ່ານນາງ ໂຮ່ທິກີມທວາ, ລັດຖະມົນຕີຊ່ວຍວ່າການກະຊວງອຸດສາຫະກຳ ການຄ້າຫວຽດນາມ ນຳຫນ້າ ໄປເຂົ້າຮ່ວມກອງປະຊຸມຄັ້ງທີ 8 ຄະນະກຳມະການປະສົມ ຫວຽດນາມ -ອັງກິດ ກ່ຽວກັບການຮ່ວມມືເສດຖະກິດ ແລະ ການຄ້າ ຈັດຂຶ້ນຢູ່ ອັງກິດ. ກ່າວຄຳເຫັນທີ່ກອງປະຊຸມສຳມະນາ, ທ່ານນາງ ໂຮ່ທີກີມທວາ ລັດຖະມົນຕີຊ່ວຍວ່າການກະຊວງອຸດສາຫະກຳ ການຄ້າຫວຽດນາມ ແນະນຳບັນດາກາລະໂອກາດລົງທຶນດຳເນີນທຸລະກິດ ຢູ່ ຫວຽດນາມ, ໃນນັ້ນ ເນັ້ນຫນັກວ່າ ຫວຽດນາມ ໄດ້ ແລະ ພວມຕັ້ງຫນ້າປະຕິບັດການສ້າງໂຄງປະກອບຄືນໃຫມ່, ສ້າງລະບົບນິຕິກຳໃຫ້ສົມບູນແບບ, ປັບປຸງສະພາບແວດລ້ອມແຫ່ງການລົງທຶນ, ສ້າງເງື່ອນໄຂສະດວກ, ສະເຫມີພາບ ແລະ ໂປ່ງໃສໃຫ້ແກ່ບັນດານັກລົງທຶນ. ທ່ານນາງໂຮ່ທິກີມທວາ ລັດຖະມົນຕີຊ່ວຍວ່າການກະຊວງອຸດສາຫະກຳ ການຄ້າຫວຽດນາມ ຢືນຢັນ: ຫວຽດນາມ ແມ່ນຄູ່ຮ່ວມມືມີຄວາມຮັບຜິດຊອບ ທີ່ໄດ້ລົງນາມໃນສັນຍາສອງຝ່າຍ ແລະ ຫລາຍຝ່າຍຫລາຍສະບັບ ແລະ ຍັງມີຄວາມສາມາດບົ່ມຊ້ອນຫລາຍຢ່າງເພື່ອຂຸດຄົ້ນການລົງທຶນ ພ້ອມທັງສະແດງຄວາມຫວັງວ່າ ຜ່ານເວທີປາໄສຄັ້ງນີ້ ບັນດາວິສາຫະກິດຈະມີຂໍ້ມູນຂ່າວສານຕື່ມອີກກ່ຽວກັບກາລະໂອກາດການຮ່ວມມື, ລົງທຶນ, ດຳເນີນທຸລະກິດດ້ານການຄ້າຢູ່ຫວຽດນາມ, ປະກອບສ່ວນຊຸກຍູ້ການພົວພັນດ້ານການຄ້າລະຫວ່າງສອງປະເທດ ຫວຽດນາມ - ອັງກິດໃຫ້ຂຶ້ນສູ່ລະດັບສູງໃຫມ່.