(vovworld) - ໃນຂອບເຂດການຢ້ຽມຢາມ ແລະ ເຮັດວຽກຢູ່ລາວ ໃນລະຫວ່າງວັນທີ 25 – 27/12, ວັນທີ 26/12, ຄະນະຜູ້ແທນສະມາຄົມນັກປະພັນຫວຽດນາມ ໂດຍນັກກະວີ ຮືວຖິງ (Huu Thinh), ປະທານສະມາຄົມນຳໜ້າໄດ້ ມີການເຮັດວຽກ ກັບຄະນະຜູ້ແທນສະມາຄົມນັກປະພັນລາວ ໂດຍທ່ານນາງ ຜິວລາວັນ, ປະທານສະມາຄົມນຳໜ້າ. ນະທີ່ນີ້, 2 ຝ່າຍໄດ້ຕີລາຄາໝາກຜົນແຫ່ງການຮ່ວມມືໃນປີ 2012 ແລະ ປຶກສາຫາລືທິດທາງການຮ່ວມມືໃນປີ 2013. ເຊິ່ງຕາມນັ້ນແລ້ວ, ປີ 2013, 2 ຝ່າຍຈະຍູ້ແຮງການຮ່ວມມືຮອບດ້ານ, ສູ້ຊົນຮຽບຮຽງເລື່ອງສັ້ນ ແລະ ບົດບັນທຶກກ່ຽວກັບປະເທດລາວ, ເຊື້ອເຊີນຄະນະນັກປະພັນລາວ ມາເຂົ້າຮ່ວມກອງປະຊຸມທິດສະດີວິຈານຂອງຫວຽດນາມ, ເຊື້ອເຊີນນັກປະພັນລາວເຂົ້າຮ່ວມ ຄ້າຍແຕ່ງບົດປະພັນ ໂດຍສະມາຄົມນັກປະພັນຫວຽດນາມ ຈັດຕັ້ງຂຶ້ນ. ສະມາຄົມທັງ 2 ກໍໄດ້ເຫັນດີເປັນເອກະສັນນຳກັນຈະສ້າງເງື່ອນໄຂໃຫ້ແກ່ບັນດານັກປະພັນລົງພາກປະຕິບັດຕົວຈິງເພື່ອແຕ່ງບົດ, ໂດຍສະເພາະແມ່ນນັກປະພັນຫວຽດນາມ ຈະມີໂອກາດກັບຄືນສະໜາມຮົບເກົ່າຢູ່ລາວຄື: ຫົວພັນ, ຊຽງຂວາງ, ທົ່ງໄຫຫິນ, ຫຼວງນ້ຳທາ ຫຼື ອັດຕາປື ເພື່ອມີເອກະສານອັນລ້ຳຄ່າ. ຄຽງຄູ່ກັນນັ້ນ, ສະມາຄົມນັກປະພັນ 2 ປະເທດ ກໍໄດ້ເພີ່ມທະວີການແລກປ່ຽນບົດຮຽນກ່ຽວກັບການຂຽນ ແລະ ແປບັນດາຫົວຂໍ້ທີ່ກ່ຽວຂ້ອງເຖິງການພົວພັນແບບພິເສດລະຫວ່າງ 2 ປະເທດ ແລະ ກົນໄກເຮັດວຽກ ແລະ ຄຸ້ມຄອງຂອງສະມາຄົມໃຫ້ນັບມື້ນັບມີປະສິດທິຜົນກ່ວາ, ປະກອບສ່ວນເພີ່ມພູນຄູນສ້າງສາຍພົວພັນແບບພິເສດຫວຽດນາມ - ລາວ ໃຫ້ນັບມື້ນັບພັດທະນາແບບຍືນຍົງ.