ຈຳນວນຜູ້ຖືກເສຍຊີວິດຈາກເຫດແຜ່ນດິນໄຫວຢູ່ເນປານ
ເພີ່ມຂຶ້ນສູງ
ພາບ:phunutoday.vn
|
(vovworld)- ຕາມຕົວເລກລ້າສຸດ, ຈຳນວນຜູ້ຖືກເສຍຊີວິດຈາກເຫດແຜ່ນດິນໄຫວຄັ້ງໃຫຍ່ສຸດໃນຮອບເວລາ 80 ປີຜ່ານມາຢູ່ເນປານ ໄດ້ຂຶ້ນເຖິງ 6.841 ຄົນ ແລະ ຜູ້ໄດ້ຮັບບາດເຈັບແມ່ນລື່ນກາຍ 14.000 ຄົນ. ປະຈຸບັນ ຍັງມີເຂດທີ່ຫ່າງໄກບາງແຫ່ງ ກຳລັງກູ້ໄພກູ້ຊີບບໍ່ທັນເຂົ້າໄດ້ ຍ້ອນເສັ້ນທາງຄົມມະນາຄົມຖືກທຳລາຍຢ່າງຫນັກ, ການໄປມາແມ່ນຫຍຸ້ງຍາກຫລາຍ. ກ່ຽວຂ້ອງເຖິງຈຳນວນຜູ້ຖືກເສຍຊີວິດຈາກເຫດແຜ່ນດິນໄຫວນີ້, ໂຄສົກກະຊວງການຕ່າງປະເທດ ຝລັ່ງ Romain Nadal ໃຫ້ຮູ້ວ່າ: ປະຈຸບັນ ຍັງມີພົນລະເມືອງ ຝລັ່ງ 135 ຄົນບໍ່ທັນຮູ້ຂ່າວຄາວເທື່ອ, ພຽງໄດ້ຮູ້ວ່າ 3 ຄົນຖືກເສຍຊີວິດ ແລະ ຜູ້ຫນຶ່ງຖືກຫາຍສາບສູນ. ໃນຂະນະນັ້ນ ຄວາມມານະພະຍາຍາມກູ້ຊ່ວຍ ຈາກປະຊາຄົມສາກົນ ສືບຕໍ່ດຳເນີນໄປ. ປາກິດສະຖານ ປະກາດວ່າ ໄດ້ສົ່ງເຄື່ອງຊ່ວຍເຫລືອໄປຍັງ ເນປານ ເພື່ອຊ່ວຍປະຊາຊົນປະເທດນີ້ ແກ້ໄຂຜົນຮ້າຍຢ້ອນຫລັງຈາກເຫດແຜ່ນດິນໄຫວ.