ທ່ານເຈີນດ້າຍກວາງ ສາບານຕົວຮັບດຳລົງຕຳແຫນ່ງ
ພາບ:http://vnexpress.net
|
(vovworld)- ທີ່ກອງປະຊຸມສະໄຫມສາມັນເທື່ອທີ 11 ສະພາແຫ່ງຊາດຊຸດທີ 13 ດຳເນີນໃນຕອນເຊົ້າວັນທີ 2/4, ພົນເອກ ເຈີນດ້າຍກວາງ, ກຳມະການກົມການເມືອງ, ໄດ້ຮັບເລືອກຕັ້ງເປັນປະທານປະເທດ ຫວຽດນາມ ດ້ວຍອັດຕາສ່ວນບັດສະຫນັບສະຫນູນ 91,5%. ພາຍຫລັງໄດ້ຮັບການເລືອກຕັ້ງ, ທ່ານປະທານປະເທດເຈີນດ້າຍກວາງ ປະຕິບັດພິທີສາບານຕົວຮັບດຳລົງຕຳແຫນ່ງ. ກ່າວຄຳເຫັນຕໍ່ສະພາແຫ່ງຊາດ, ທ່ານປະທານປະເທດ ເຈີນດ້າຍກວາງ ຢືນຢັນວ່າ:
“ດ້ວຍຄວາມເປັນກຽດ, ຄວາມຮັບຜິດຊອບອັນໃຫຍ່ຫລວງຂອງຜູ້ນຳລັດ, ປະທານສະພາປ້ອງກັນຊາດ ປ້ອງກັນຄວາມສະຫງົບ, ຂ້າພະເຈົ້າໝັ້ນໝາຍຈະເຮັດຈົນສຸດຄວາມສາມາດຂອງຕົນເພື່ອຮັບໃຊ້ປະເທດຊາດ,ຮັບໃຊ້ປະຊາຊົນ, ສືບທອດ ແລະ ເສີມຂະຫຍາຍມູນເຊື້ອແຫ່ງການສ້າງສາ ແລະ ປົກປັກຮັກສາອັນສະຫງ່າອົງອາດຂອງຊາດ ແລະ ບົດຮຽນຂອງບັນດາທ່ານປະທານປະເທດໃນອາຍຸການກ່ອນນີ້, ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເດັດດ່ຽວ, ຢືດໝັ້ນຕໍ່ສູ້ເພື່ອຮັກສາເອກະລາດ ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດ, ຜົນປະໂຫຍດ ແລະ ຄວາມໝັ້ນຄົງຂອງຊາດຢ່າງໝັ້ນຄົງ. ສືບຕໍ່ຍູ້ແຮງກິດຈະການປ່ຽນແປງໃຫມ່ຢ່າງຮອບດ້ານ, ຄົບຊຸດ, ເປັນເຈົ້າການຕັ້ງຫນ້າເຊື່ອມໂຍງ, ຍົກສູງທີ່ຕັ້ງບົດບາດ ແລະ ອິດທິພົນຊື່ສຽງຂອງຫວຽດນາມ ໃນເວທີສາກົນ, ປະກອບສ່ວນຢ່າງເໝາະສົມເຂົ້າໃນພາລະກິດປັກປັກຮັກສາສັນຕິພາບ, ເອກະລາດແຫ່ງຊາດ, ປະຊາທິປະໄຕ, ຄວາມກ້າວຫນ້າສັງຄົມໃນໂລກ.”
ດ້ວຍອັດຕາສ່ວນບັດເຫັນດີສູງ, ບັນດາສະມາຊິກສະພາແຫ່ງຊາດມີຄວາມເຊື່ອໝັ້ນວ່າ ດ້ວຍລະດັບຄວາມຮູ້, ກຳລັງຄວາມສາມາດ ແລະ ປະສົບການໃນວຽກງານ, ທ່ານປະທານປະເທດ ເຈີນດ້າຍກວາງ ຈະສຳເລັດຫນ້າທີ່ຊື່ງພັກ, ສະພາແຫ່ງຊາດ ແລະ ປະຊາຊົນມອບໝາຍໃຫ້ເປັນຢ່າງດີ.
ທ່ານເຈີນດ້າຍກວາງ ເກີດວັນທີ 12/10/1956, ແມ່ນ ສາດສະດາຈານ. ດຣ ກົດໝາຍວິທະຍາ. ທ່ານໄດ້ດຳລົງຫລາຍຕຳແຫນ່ງທີ່ແຕກຕ່າງກັນຢູ່ສູນກາງ ແລະ ທ້ອງຖິ່ນ. ໄລຍະ 2011-2016 ທ່ານດຳລົງຕຳແຫນ່ງເປັນລັດຖະມົນຕີວ່າການກະຊວງຕຳຫລວດຫວຽດນາມ.