(vovworld) – ຕອນບ່າຍວັນທີ 21/10, ຢູ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ໄດ້ໃຫ້ການຕ້ອນຮັບທ່ານ Michael Froman, ຜູ້ຕາງໜ້າດ້ານການຄ້າອາເມລິກາ, ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທີ່ການຕ້ອນຮັບ, ທ່ານປະທານສະພາແຫ່ງຊາດຫງວຽນຊິງຮຸ່ງ ຢືນຢັນວ່າ, ຍາມໃດພັກ, ລັດ, ສະພາແຫ່ງຊາດ ແລະ ປະຊາຊົນຫວຽດນາມ ກໍ່ພ້ອມແລ້ວທີ່ຈະຊຸກຍູ້ການພົວພັນຮ່ວມມືຮອບດ້ານກັບອາເມລິກາ, ພິເສດແມ່ນໃນຂົງເຂດການຄ້າ, ການລົງທຶນ. ສະພາແຫ່ງຊາດຫວຽດນາມ ສະໜັບສະໜູນການເຈລະຈາລົງນາມໃນສັນຍາຄູ່ຮ່ວມມືເສດຖະກິດຍຸດທະສາດຂ້າງປາຊີຝິກ (TPP) ລະຫວ່າງລັດຖະບານຫວຽດນາມ ແລະ ອາເມລິກາ ຢ່າງແຮງ ເພື່ອຕອບສະໜອງຄວາມມຸ່ງມາດປາດຖະໜາ ກໍ່ຄືຜົນປະໂຫຍດຂອງປະຊາຊົນ 2 ປະເທດ. ຕີລາຄາສູງບັນດາວາລະເຈລະຈາຢ່າງຕັ້ງໜ້າລະຫວ່າງ 2 ປະເທດ ໃນໄລຍະຜ່ານມາ, ທ່ານ Michael Froman ຖືວ່າ, 2 ຝ່າຍຄວນມານະພະຍາຍາມກວ່າອີກເພື່ອລົງນາມໃນສັນຍາ TPP ໂດຍໄວ. ສັນຍາ TPP ແມ່ນໂອກາດໃຫຍ່ໃຫ້ແກ່ການພັດທະນາເສດຖະກິດ, ເປັນຂີດໝາຍໃໝ່ໃນການພົວພັນດ້ານເສດຖະກິດ, ການເມືອງລະຫວ່າງ 2 ປະເທດ. ອາເມລິກາ ປາດຖະໜາວ່າ, ສະພາແຫ່ງຊາດຫວຽດນາມ, ບັນດາກະຊວງ, ຂະແໜງການສະໜັບສະໜູນການປັບປຸງບັນດາກົດໝາຍເພື່ອໃຫ້ສັນຍາ TPP ບັນລຸຜົນສຳເລັດ. ທ່ານ Michael Froman ຢືນຢັນວ່າ ລັດຖະບານອາເມລິກາ ຕີລາຄາສູງບົດບາດຂອງອາຊີ, ໃນນັ້ນມີຫວຽດນາມ. ອາເມລິກາ ປາດຖະໜາວ່າ ຫວຽດນາມ ຈະພັດທະນາຢ່າງວັດທະນາຖາວອນ.