ປະຈຸບັນ ຫວຽດນາມ ມີກິດຈະກຳເຂື່ອນໄຟຟ້ານ້ຳຕົກ 268 ແຫ່ງ
photo:internet
|
(vovworld)- ແຜນສັງລວມກ່ຽວກັບໄຟຟ້ານ້ຳຕົກໂດຍທ່ານ ຫວູຮູຍຮ່ວາງ, ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ລາຍງານທີ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມຊຸດທີ 13 ໃນຕອນເຊົ້າວັນທີ 30/10. ຕໍ່ຈາກນັ້ນ, ກຳມາທິການວິທະຍາສາດ, ເຕັກໂນໂລຊີ ແລະ ສິ່ງແວດລ້ອມຂອງສະພາແຫ່ງຊາດໄດ້ລາຍງານການກວດກາແຜນສັງລວມກ່ຽວກັບໄຟຟ້າ. ປະຈຸບັນ ຫວຽດນາມ ມີກິດຈະກຳເຂື່ອນໄຟຟ້ານ້ຳຕົກ 268 ແຫ່ງ ພວມເຄື່ອນໄຫວ, 205 ໂຄງການພວມດຳເນີນການກໍ່ສ້າງ ແລະ ຄາດວ່າຈະຂຸດຄົ້ນແຕ່ນີ້ຮອດປີ 2017. ປີ 2012, ເຂື່ອນໄຟຟ້ານ້ຳຕົກໄດ້ປະກອບໃຫ້ລະບົບໄຟຟ້າກວ່າ 48% ກຳລັງການຜະລິດໄຟຟ້າ ແລະ ເກືອບ 44% ປະລິມານການຜະລິດໄຟຟ້າ. ເຖິງຢ່າງໃດກໍຕາມ, ໃນຊຸມປີຜ່ານມາ, ການວາງແຜນກຳນົດ, ກໍ່ສ້າງ ແລະ ຂຸດຄົ້ນໄຟຟ້ານຳ້ຕົກໄດ້ເກີດຫລາຍບັນຫາຍັງຈຳກັດຢູ່. ຫວ່າງແລ້ວນີ້ ລັດຖະບານໄດ້ຍົກເລີກກວ່າ 400 ໂຄງການເຂື່ອນໄຟຟ້ານຳ້ຕົກຂະຫນາດນ້ອຍ ຍ້ອນປະສິດທິຜົນຕຳ່ ແລະ ສົ່ງຜົນກະທົບຢ່າງຫຍໍ້ທໍ້ເຖິງສິ່ງແວດລ້ອມ ແລະ ສັງຄົມ. ກ່ຽວກັບບັນຫານີ້, ທ່ານ ຟານຊວນຢຸງ, ຫົວໜ້າກຳມາທິການວິທະຍາສາດ, ເຕັກໂນໂລຢີ ແລະ ສິ່ງແວກລ້ອມຂອງສະພາແຫ່ງຊາດ ສະເໜີວ່າ:
“ລັດຖະບານຄວນສືບຕໍ່ຊີ້ນຳການຈັດຕັ້ງປະຕິບັດບັນດາແຜນກຳນົດຂະແໜງພະລັງງານ ໃນນັ້ນມີແຜນກຳນົດເຂື່ອນໄຟຟ້ານ້ຳຕົກຢ່າງເປັນເອກະພາບ ແລະ ຄົບຊຸດ. ຕ້ອງເຮັດແຈ້ງຄວາມຮັບຜິດຊອບຂອງບັນດາອົງການ, ອົງການຈັດຕັ້ງ, ສ່ວນບຸກຄົນທີ່ກ່ຽວຂ້ອງເຖິງການຍົກເລີກບັນດາໂຄງການກໍ່ສ້າງເຂື່ອນໄຟຟ້າອອກຈາກແຜນກຳນົດ, ເຊິ່ງໄດ້ກໍ່ຄວາມເສຍຫາຍ, ຟຸມເຟືອຍແຫຼ່ງກຳລັງ, ບໍ່ປະຕິບັດຂໍ້ກຳນົດ, ກົດໝາຍກ່ຽວກັບການລົງທຶນກໍ່ສ້າງ, ການຂຸດຄົ້ນກິດຈະກຳເຂື່ອນໄຟຟ້ານຳ້ຕົກຢ່າງເຂັ້ມງວດ, ກໍ່ຜົນສະທ້ອນຢ່າງໃຫຍ່ຫຼວງເຖິງຊີວິດຂອງປະຊາຊົນ .“
ແລະກໍ່ໃນການເຮັດວຽກມື້ນີ້, ລັດຖະບານກໍ່ຍື່ນສະເໜີບົດລາຍງານປັບປຸງ, ເພີ່ມເຕີມມະຕິ 38 ປີ 2004 ຂອງສະພາແຫ່ງຊາດ ກ່ຽວກັບແຜນນະໂຍບາຍລົງທຶນກໍ່ສ້າງທາງ ໂຮ່ຈີມິນ, ດ້ວຍຄວາມຍາວ 3.183 ກມ, ເລີ່ມແຕ່ ປັກປໍ່, ແຂວງ ກາວບັ່ງ ຮອດ ເດິດໝູຍ, ແຂວງກ່າເມົາ, ທີ່ແລ່ນຜ່ານ 28 ແຂວງ, ນະຄອນ.