(vovworld) - ໂດຍໄດ້ຮັບຄຳເຊີນຂອງເລຂາທິການໃຫຍ່ອົງການຕຳຫຼວດອາຍາສາກົນ Interpol, ທ່ານ Jurgen Stock, ວັນທີ 16/12, ທ່ານພົນໂທ ຫງວຽນວັນແທ່ງ, ກຳມະການສູນກາງພັກ, ຮອງລັດຖະມົນຕີກະຊວງຕຳຫຼວດ, ໄດ້ນຳໜ້າຄະນະຜູ້ແທນຂັ້ນສູງກະຊວງຕຳຫຼວດຫວຽດນາມ ໄປຢ້ຽມຢາມ ແລະ ເຮັດວຽກຢູ່ສຳນັກງານໃຫຍ່ຂອງຄະນະເລຂາທິການໃຫຍ່ Interpol, ຢູ່ນະຄອນ Lyon, ສ.ຝລັ່ງ. ການໄປປະຕິບັດງານແມ່ນເພື່ອແນໃສ່ເພີ່ມທະວີການຮ່ວມມືຂັ້ນສູງກັບຄະນະເລຂາທິການໃຫຍ່ Interpol, ຜ່ານນັ້ນຍົກສູງຄຸນນະພາບການສົມທົບກັນ, ແລກປ່ຽນຂໍ້ມູນຂ່າວອາດຊະຍາກຳ, ພ້ອມທັງຍູ້ແຮງການຮ່ວມມືປ້ອງກັນ, ຕ້ານອາດຊະຍາກຳຂ້າມຊາດລະຫວ່າງຫວຽດນາມ ກັບອົງການ Interpol ກໍຄືກັບບັນດາປະເທດສະມາຊິກຂອງ Interpol. ນີ້ແມ່ນການຢ້ຽມຢາມສຳນັກງານ Interpol ຢ່າງເປັນທາງການຄັ້ງທຳອິດຂອງການນຳກະຊວງຕຳຫຼວດຫວຽດນາມ ນັບແຕ່ເມື່ອຫວຽດນາມ ເຂົ້າເປັນສະມາຊິກຂອງອົງການນີ້ ເມື່ອປີ 1991. ທີ່ການເຮັດວຽກ, 2 ຝ່າຍໄດ້ເປັນເອກະພາບນຳກັນວ່າ, ໃນໄລຍະຈະມາເຖິງ, ຈະເພີ່ມທະວີການຮັັບ, ແກ້ໄຂ, ແລກປ່ຽນຂໍ້ມູນຂ່າວດ້ານອາດຊະຍາກຳທີ່ມີການຈັດຕັ້ງຂ້າມຊາດ, ອາດຊະຍາກຳມີປັດໃຈຕ່າງປະເທດ. Interpol ສືບຕໍ່ໜູນຊ່ວຍການບຳລຸງສ້າງ, ເພີ່ມທະວີກຳລັງໃຫ້ຖັນແຖວພະນັກງານບັນດາອົງການປະຕິບັດກົດໝາຍ, ເພື່ອແນໃສ່ຊ່ວຍຫວຽດນາມ ຮັບມືກັບບັນດາສິ່ງທ້າທາຍດ້ານປ້ອງກັນຄວາມສະຫງົບໃນໄລຍະຈະມາເຖິງຢ່າງມີປະສິດທິຜົນ.