(ພາບປະກອບ:eu2007.de)
( vovworld ) – ດັ່ງທີ່ພວກເຮົາໄດ້ໃຫ້ຂ່າວໄປແລ້ວ, ນັບແຕ່ວັນທີ 1/7/2012 ເປັນຕົ້ນໄປ, ຫວຽດນາມ ໄດ້ຮັບບົດບາດເປັນຜູ້ປະສານງານລະຫວ່າງສະຫະສະມາຄົມປະຊາຊາດອາຊີຕາເວັນອອກສຽງໃຕ້ (ASEAN) ແລະ ສະຫະພາບເອີລົບ (EU). ໃນສະພາບການປີນີ້, ASEAN ແລະ EU ຈະຈັດພິທີລະນຶກ 35 ປີແຫ່ງວັນສ້າງຕັ້ງສາຍພົວພັນຄູ່ເຈລະຈາ (1977-2012) ແລະ ຫວຽດນາມ- EU ຫາກໍ່ລົງນາມໃນສັນຍາຮ່ວມມື ແລະ ຄູ່ຮ່ວມມືຮອບດ້ານ (PCA) ພ້ອມທັງເປີດສາກການເຈລະຈາສັນຍາການຄ້າເສລີສອງຝ່າຍຢ່າງເປັນທາງການ (FTA), ຫວຽດນາມ ພວມມານະພະຍາຍາມ ເພື່ອຍົກການພົວພັນລະຫວ່າງສອງຝ່າຍຂຶ້ນສູ່ລະດັບສູງໃໝ່, ນຳມາເຊີ່ງຜົນປະໂຫຍດໃຫ້ທັງຫວຽດນາມ ແລະ ປະເທດຕ່າງໆ, ຍູ້ແຮງການໜູນຊ່ວຍຂອງ EU ໃຫ້ແກ່ວິວັດການສ້າງປະຊາຄົມ ASEAN ໃນປີ 2015.
ຕາມທ່ານ Nguyen Tien Minh ຫົວໜ້າກົມ ASEAN ກະຊວງການຕ່າງປະເທດຫວຽດນາມ ແລ້ວ, ຫວຽດນາມ ໄດ້ກະກຽມເປັນຢ່າງດີ ເພື່ອຮັບບົດບາດເປັນຜູ້ປະສານງານໃນການພົວພັນລະຫວ່າງ ASEAN-EU. ທ່ານ Nguyen Tien Minh ໃຫ້ຮູ້ວ່າ: “ຫວຽດນາມ ຈະເພີ່ມທະວີການທາບທາມຄຳເຫັນກັບທັງ ASEAN ແລະ EU ເພື່ອຮັບຟັງຄວາມມຸ້ງຫວັງ ແລະ ເປັນຂົວຕໍ່ລະຫວ່າງ ASEAN ແລະ EU ໃຫ້ເປັນຢ່າງດີ, ພ້ອມກັນນັ້ນ, ຫວຽດນາມ ຈະມານະພະຍາຍາມສົ່ງເສີມ EU ມີບັນດາຄຳໝັ້ນສັນຍາດ້ານການເມືອງ ແລະ ການເຄື່ອນໄຫວລະອຽດ ເພື່ອປະກອບສ່ວນໃຫ້ແກ່ການພົວພັນຮອບດ້ານລະຫວ່າງ ASEAN ແລະ EU, ປັບປຸງສັນຕິພາບ, ສະຖຽນລະພາບ ແລະ ການພັດທະນາຢູ່ໃນສອງພາກພື້ນ“