ສະມາຊິກໃນຄະນະນັກຫນັງສືພິມໄທ ນຸ່ງຊຸດຂອງຊາວເຜົ່າມົ້ງ
ພາບ: ມີນຫງວຽນ vovworld
|
“ເມື່ອມາຢ້ຽມຢາມ ຫວຽດນາມ, ສິ່ງທຳອິດທີ່ຂ້າພະເຈົ້າມີຄວາມຮູ້ສຶກນັ້ນແມ່ນ ການຕ້ອນຮັບຢ່າງສະຫນິດສະໜົມຈາກເພື່ອນມິດຫວຽດນາມ. ນັບແຕ່ເມື່ອມາຮອດ ຮ່າໂນ້ຍ ຕໍ່ມາແມ່ນໄປຢ້ຽມຢາມແຂວງ ນີນບີ່ນ, ລ່າວກາຍ, ຊາປາ, ການນຳທ້ອງຖິ່ນ ພ້ອມກັບໝູ່ເພື່ອນຮ່ວມງານຢູ່ທຸກສະຖານທີ່ ລ້ວນແຕ່ໃຫ້ການຕ້ອນຮັບຢ່າງສຸດຈິດສຸດໃຈ, ສິ່ງດັ່ງກ່າວເຮັດໃຫ້ຂ້າພະເຈົ້າມີຄວາມຕື້ນຕັນໃຈຫລາຍ”. ນັ້ນແມ່ນຄວາມຮູ້ສຶກຂອງທ່ານທະນາໄຈ ນານະຄອນ ສະມາຊິກຜູ້ຫນຶ່ງໃນຄະນະຜູ້ແທນສະມາພັນນັກຫນັງສືພິມແຫ່ງປະເທດ ໄທ ເນື່ອງໃນໂອກາດຄະນະມາຢ້ຽມຢາມ ແລະ ພົບປະກັບອົງການຫນັງສືພິມ ຫວຽດນາມຈຳນວນຫນຶ່ງ ໃນຍາມຕົ້ນປີໃຫມ່ 2012.
ການຢ້ຽມຢາມ ຫວຽດນາມ ຄັ້ງນີ້ຂອງຄະນະນັກໜັງສືພິມ ໄທ ແມ່ນນອນໃນຂອບເຂດການຮ່ວມມືລະຫວ່າງສະມາຄົມນັກຂ່າວຫວຽດນາມ ແລະ ສະມາພັນນັກຫນັງສືພິມແຫ່ງປະເທດໄທ. ໃນໄລຍະຢູ່ຢ້ຽມຢາມ ຫວຽດນາມ, ຄະນະໄດ້ມີການພົບປະ ແລະ ເຮັດວຽກກັບອົງການສື່ມວນຊົນສູນກາງ, ການນຳແຂວງ ນະຄອນ ຈຳນວນຫນຶ່ງ ແລະ ຢ້ຽມຢາມປູຊະນິຍະສະຖານປະຫວັດສາດ ກໍຄືທັດສະນິຍະພາບທີ່ສວຍງາມຫລາຍແຫ່ງ. ແລະຢູ່ແຕ່ລະທ້ອງຖິ່ນຊຶ່ງຄະນະມາຢ້ຽມຢາມນັ້ນ ລ້ວນແຕ່ສ້າງຄວາມປະທັບໃຈໃຫ້ແກ່ສະມາຊິກແຕ່ລະຄົນ. ບາງຄົນມີຄວາມປະທັບໃຈຕໍ່ທິວທັດທຳມະຊາດທີ່ສວຍງາມ, ບາງຄົນມີຄວາມຕື້ນຕັນໃຈຕໍ່ການຕ້ອນຮັບຢ່າງສະຫນິດສະໜົມຈາກບັນດາອົງການມະຫາຊົນຢູ່ບັນດາທ້ອງຖິ່ນທີ່ເຂົາເຈົ້າມາຢາມ ແລະ ບາງຄົນມີຄວາມຕົກສະເຫງີ້ຕໍ່ການພັດທະນາຢ່າງບໍ່ຢຸດຢັ້ງຂອງ ຫວຽດນາມ. ທ່ານ ທະນາໄຈ ນານະຄອນ ປະທານສະມາຄົມນັກຂ່າວເສດຖະກິດໄທແບ່ງປັນວ່າ: ທ່ານຢາກຍາດເວລາມາຢ້ຽມຢາມຫວຽດນາມຫລາຍເທື່ອແລ້ວ ແຕ່ຍ້ອນຄາວຽກ ສະນັ້ນບໍ່ປະຕິບັດໄດ້. ກ່ອນຈະມາຫວຽດນາມ ທ່ານພຽງແຕ່ຮູ້ຈັກເຖິງຫວຽດນາມຜ່ານຂ່າວຄາວລວບລວມກ່ຽວກັບ ພູມີປະເທດ,ບັນດາແຂວງ, ນະຄອນ, ສູນເສດຖະກິດ ແລະ ສະພາບພັດທະນາລວມ ຂອງຫວຽດນາມເທົ່ານັ້ນ. ສະນັ້ນ ທ່ານຈຶ່ງມີຄວາມຮູ້ສຶກຕົກສະເຫງີ້ເມື່ອໄດ້ເຫັນປະຈັກຕາປະເທດຊາດ ແລະ ຊາວຫວຽດນາມ.
“ສິ່ງທີ່ຮັບຮູ້ຢ່າງງ່າຍດາຍທີ່ສຸດ ນັ້ນແມ່ນການພັດທະນາໃນຂົງເຂດໂທລະຄົມ, ອິນເຕີແນດ ແລະ ໂທລະສັບມືຖື, ມັນກາຍເປັນຫນຶ່ງໃນບັນດາຄວາມຕ້ອງການທີ່ຂາດບໍ່ໄດ້ໃນຊີວິດປະຈຳວັນຂອງຊາວຫວຽດນາມ. ພຽງແຕ່ມີໂທລະສັບມືຖື ຫລືອຸປະກອນເຊື່ອມຕໍ່ອິນເຕີແນດ ໄປຮອດໃສທ່ານກໍສາມາດເຂົ້າຊົມຫລືຊອກຫາຂໍ້ມູນຂ່າວຢ່າງງ່າຍດາຍໄດ້, ນັບທັງຢູ່ເຂດພູດອຍຄື: ຊາປາ. ສິ່ງດັ່ງກ່າວຢູ່ ໄທ ບໍ່ທັນຕອບສະຫນອງໄດ້.”
ສຳລັບທ່ານຈະວາຣົງ ລີມພັດທາມະປານີ ປະທານສະມາພັນນັກຫນັງສືພິມແຫ່ງປະເທດ ໄທແລ້ວ, ການເຕີບໃຫຍ່ຂອງບັນດາອົງການ ແມ່ນສິ່ງທີ່ທ່ານມີຄວາມສົນໃຈຫລາຍສຸດ. ພາຍຫລັງໄດ້ໄປຢ້ຽມຢາມວິທະຍຸກະຈາຍສຽງຫວຽດນາມ ແລະ ບັນດາອົງການສື່ມວນຊົນອື່ນ, ທ່ານໃຫ້ຮູ້ວ່າ ການຢ້ຽມຢາມໄດ້ເຮັດໃຫ້ທ່ານເຂົ້າໃຈກ່ຽວກັບປະເທດຫວຽດນາມຈະແຈ້ງກວ່າ, ເປັນຕົ້ນແມ່ນການພັດທະນາຂອງຂະແຫນງວິທະຍຸກະຈາຍສຽງໂທລະພາບໃນທ່າອ່ຽງພັດທະນາໃຫມ່. ອາດຈະເຫັນໄດ້ວ່າ ຫວຽດນາມ ພວມມີການກະກຽມເປັນຢ່າງດີເພື່ອຮອງຮັບບັນດາທ່າອ່ຽງພັດທະນາຂອງໂທລະຄົມທີ່ທັນສະໄຫມ ດ້ວຍການປະກອບຫລາຍຮູບການສື່ສານ ເພື່ອຮັບໃຊ້ໃຫ້ທຸກເປົ້າໝາຍ ແລະ ນັ້ນແມ່ນທິດກ້າວເດີນທີ່ຖືກຕ້ອງ.
ໃນການຢ້ຽມຢາມ ຫວຽດນາມ ຄັ້ງນີ້, ຄະນະນັກຫນັງສືພິມໄທ ກໍໄດ້ໄປຢ້ຽມຢາມທັດສະນິຍະພາບຈຳນວນຫນຶ່ງ ແລະ ຢູ່ແຕ່ລະແຫ່ງນັ້ນ ເຂົາເຈົ້າລ້ວນແຕ່ມີຄວາມຮູ້ສຶກພິເສດກ່ຽວກັບວັດທະນະທຳປະຫວັດສາດ, ກ່ຽວກັບຊາວຫວຽດນາມກໍຄືທຳມະຊາດທີ່ສວຍງາມ. ທ່ານນາງ ວາຣີສາຣະລີ ແກ້ງພັງ ສະມາຊິກຂອງສະມາຄົມນັກຂ່າວບັນດາທ້ອງຖິ່ນໄທ, ທັງເປັນປະທານສະມາຄົມພັດທະນາສື່ມວນຊົນວົງຄະນາຍາດໃຫ້ຮູ້ວ່າ: ປະຈຸບັນຫວຽດນາມ ໄດ້ມີການປ່ຽນແປງຫລາຍຢ່າງນັບແຕ່ຄັ້ງທຳອິດທີ່ີທ່ານນາງມາຢ້ຽມຢາມຫວຽດນາມກ່ອນນີ້ 2 - 3 ປີ. ສຳລັບທ່ານນາງແລ້ວ, ແຕ່ລະເທື່ອເມື່ອມາຢ້ຽມຢາມຫວຽດນາມ ລ້ວນແຕ່ສ້າງຄວາມດູດດື່ມໃຫມ່ໃຫ້ທ່ານນາງ. ພິເສດການຢ້ຽມຢາມນີນບີ່ນ ດ້ວຍບັນດາກິດຈະກຳສະຖາປັດຕະຍະກຳທີ່ໃຫຍ່ໂຕໂອ່ຖົງຂອງວັດ ບາຍດີນ, ຂອງເຂດທ່ອງທ່ຽວ ຈ່າງອານ ຫລື ຈຸດວັດທະນະທຳຂອງເຂດບ້ານນາທາງພາກເຫນືອ ຫວຽດນາມ ແມ່ນຕິດພັນກັບພື້ນຖານອະລິຍະທຳແຫ່ງການປູກເຂົ້ານາທາມ ທັງໝົດເຫລົ່ານັ້ນໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ທ່ານນາງ.
“ວັດທະນະທຳ ຫວຽດນາມ ໄດ້ສະແດງໃຫ້ເຫັນສີສັນສະເພາະຂອງຕົນຢ່າງຈະແຈ້ງ. ລຽບຕາມເສັ້ນທາງໄປ ພວກຂ້າພະເຈົ້າເຫັນວ່າ ຊີວິດການເປັນຢູ່ຂອງຊາວກະສິກອນ ແມ່ນສະຫງົບ ແລະ ມີຄວາມໃກ້ຊິດຕິດແທດກັບທຳມະຊາດ. ຢູ່ໄທພຽງແຕ່ເຫັນລົດໄຖນາ ພ້ອມກັບບັນດາເຂດອຸດສາຫະກຳທີ່ທັນສະໄຫມຢ່າງຄັບຄາຫນ້າແຫນ້ນເທົ່ານັ້ນ. ແຕ່ຢູ່ ຫວຽດນາມ ອາດຈະເຫັນໂຕຄວາຍ ແລະ ຊາວກະສິກອນເຮັດວຽກ ຢ່າງດຸໝັ່ນຂະຫຍັນພຽນ ຢູ່ຕາມເຂດທົ່ງນາທີ່ຂຽວສົດໃສ ສ້າງເປັນຮູບພາບບ້ານນາຢ່າງສະຫງົບສຸກ. ສິ່ງດັ່ງກ່າວແມ່ນສ້າງຄວາມປະທັບໃຈທີ່ສຸດໃຫ້ແກ່ຂ້າພະເຈົ້າ.”
ພາຍຫລັງໄປຢ້ຽມຢາມຈ່າງອານ ບາຍດີນ, ແຂວງ ນີນບີ່ນສະຖານທີ່ສຸດທ້າຍຊຶ່ງຄະນະໄປທັດສະນະສຶກສາແມ່ນເທດສະບານ ຊາປາ ຢູ່ ແຂວງ ລ່າວກາຍ. ເຖິງວ່າ ອາກາດຢູ່ທີ່ນີ້ຫນາວຈັດປະມານ 6 ອົງສາ ແລະ ນ້ຳໝອກປົກຄຸມໄປທົ່ວກໍຕາມ ແຕ່ສະມາຊິກທຸກຄົນໃນຄະນະລ້ວນແຕ່ມີຄວາມເບິກບານມ່ວນຊື່ນເມື່ອເປັນຄັ້ງທຳອິດໄດ້ມາຢ້ຽມຢາມເທດສະບານ ຊາຊາ ຊຶ່ງແມ່ນຫນຶ່ງໃນຈຳນວນສະຖານທີ່ 3 ແ່ຫງຢູ່ຫວຽດນາມ ຊຶ່ງນັກທ່ອງທ່ຽວໄທນິຍົມທີ່ສຸດ. ເຖິງວ່າ ບໍ່ລື້ງເຄີຍກັບອາກາດຫນາວຈັດກໍຕາມ ແຕ່ບັນດານັກຫນັງສືພິມໄທ ກໍຍັງຄົ້ນຫາຈຸດວັດທະນະທຳທີ່ເປັນເອກະລັກສະເພາະຂອງ ຊາປາຢູ່. ຄະນະໄດ້ໄປຢ້ຽມຢາມ ໝູ່ບ້ານ ກາດກາດ ຂອງຊາວຊົນເຜົ່າມົ້ງ ຊຶ່ງແມ່ນບ້ານທີ່ມີທິວທັດທຳມະຊາດສວຍສົດງົດງາມ.
ຄະນະນັກຫນັງສືພິມໄທຢ້ຽມຢາມຖ້ຳ ຢູ່ເຂດທ່ອງທ່ຽວຈາງອານ ບາຍດີນ
ພາບ: ມີນຫງວຽດ vovworld
|
“ເມື່ອມາຢ້ຽມຢາມ ຊາປາ ຂ້າພະເຈົ້າມີຄວາມຮູ້ສຶກປະທັບໃຈຫລາຍ. ນັບແຕ່ຊີວິດການເປັນຢູ່ຂອງບັນດາຊົນເຜົ່າສ່ວນຫນ້ອຍຕະຫລອດຮອດບັນດາບໍລິການທ່ອງທ່ຽວ ແລະ ຄວາມຄັບຄາຫນາແຫນ້ນຂອງນັກທ່ອງທ່ຽວຢູ່ ຊາປາ. ເຖິງວ່າການໄປມາບໍ່ສະດວກປານໃດ ແຕ່ນັກທ່ອງທ່ຽວຍັງຄົງຢາກຢ້ຽມຊົມຄວາມງາມຂອງຊາປາຢູ່. ນອກນັ້ນ ການຢ້ຽມຢາມ ນີນບີ່ນ ດ້ວຍເຮືອກໍເຮັດໃຫ້ຂ້າພະເຈົ້າມີຄວາມແປກປະຫລາດໃຈ ເພາະບໍ່ເຄີຍຄິດວ່າ ຢູ່ ຫວຽດນາມ ມີສະຖານທີ່ຫລາຍແຫ່ງທີ່ສ້າງຄວາມປະທັບໃຈຄືແນວນັ້ນ.”
ການຢ້ຽມຢາມຫວຽດນາມຂອງຄະນະ ເຖິງວ່າ ເວລາບໍ່ຫລາຍປານໃດ ແຕ່ກໍຊ່ວຍໃຫ້ບັນດານັກຫນັງສືພິມ ໄທ ມີຄວາມເຂົ້າໃຈ ແລະ ມີອາລົມຈິດທີ່ດີກ່ຽວກັບປະເທດຊາດ ແລະ ຊາວຫວຽດນາມ. ບັນດາອາລົມຈິດ ກໍຄືການຕ້ອນຮັບຢ່າງສະຫນິດສະໜົມຈາກການນຳບັນດາທ້ອງຖິ່ນ, ຈາກເພື່ອນຮ່ວມງານ ຫວຽດນາມ ໄດ້ເຮັດໃຫ້ຄະນະນັກຫນັງສືພິມໄທຍິ່ງມີຄວາມຮັກແພງຫວຽດນາມກວ່າ ແລະ ຫວັງວ່າ ຖ້າມີໂອກາດເຂົາເຈົ້າຈະກັບຄືນມາຢ້ຽມຢາມຫວຽດນາມ ອີກຄັ້ງຫນຶ່ງ.
ມີນຫງວຽດ