(vovworld)- ວັນທີ 8/8 ຜ່ານມາ, ອາຊຽນ ສະເຫລີມສະຫລອງ 46 ປີແຫ່ງວັນສ້າງຕັ້ງ(8/8/1967-8/8/2013). ຂີດໝາຍສຳຄັນຂອງອາຊຽນ ພາຍຫລັງ 46 ປີແຫ່ງການສ້າງຕັ້ງ ແລະ ພັດທະນາ, ປັດໄຈທີ່ຕັດສິນຊີ້ຂາດຕົ້ນຕໍຊ່ວຍສ້າງພາບພົດ ແລະ ທີ່ຕັ້ງບົດບາດອາຊຽນ ນັ້ນແມ່ນຄວາມສາມາດຮັກສາ“ຄວາມເປັນເອກະພາບໃນຫລາຍຮູບຫລາຍແບບ”, ສ້າງເປັນກຳລັງແຮງລວມຈາກລັກສະນະເປັນເອກະພາບ, ຄວາມສາມັກຄີ ແລະ “ວິທີການອາຊຽນ”. ເນື່ອງໃນໂອກາດນີ້ ບັນນາທິການວິທະຍຸກະຈາຍສຽງຫວຽດນາມ ມີບົດຂຽນທີ່ພາດຫົວເລື່ອງວ່າ: “ຄວາມເປັນເອກະພາບໃນຫລາຍຮູບຫລາຍແບບ”: ປັດໄຈຕົ້ນຕໍສ້າງພາບພົດ ແລະ ທີ່ຕັ້ງບົດບາດ ອາຊຽນ.
ຫວຽດນາມ ຈັດພິທີຊັກທຸງ ອາຊຽນ ເນື່ອງໃນໂອກາດ
ສະເຫລີມສະຫລອງ 46 ປີແຫ່ງວັນສ້າງຕັ້ງ ອາຊຽນ
ພາບ:vov/BuiHung
|
ໃນກວ່າ 4 ທົດສະວັດເຄິ່ງແຫ່ງການເປີດກວ້າງການຮ່ວມມື ແລະ ຍູ້ແຮງການຮ່ວມສຳພັນຢ່າງບໍ່ຢຸດຢັ້ງ, ປະຈຸບັນ ອາຊຽນ ມີທີ່ຕັ້ງບົດບາດສຳຄັນໃນພາກພື້ນ ແລະ ໃນໂລກ. ກ່ອນທີ່ສ້າງປະຊາຄົມອາຊຽນໃນປີ 2015, ອາຊຽນ ພວມມີບາດກ້າວຫັນປ່ຽນຢ່າງແຂງແຮງ. ຄຽງຄູ່ກັບການຮັດແຄບຊ່ອງຫວ່າງພັດທະນາ, ເປີດກວ້າງ ແລະ ຍົກລະດັບການພົວພັນຫລາຍດ້ານ ຕ່າງຝ່າຍຕ່າງມີຜົນປະໂຫຍດກັບບັນດາຄູ່ຮ່ວມມືພາຍນອກ, ອາຊຽນ ພວມກາຍເປັນອົງການຊີ້ນຳນຳພາບັນດາວິວັດທະນາການເຈລະຈາ ແລະ ຮ່ວມມືສຳຄັນຄື: ອາຊຽນ +1, ອາຊຽນ +3, ກອງປະຊຸມສຸດຍອດ ອາຊີຕາເວັນອອກ( EAS), ເວທີປາໄສພາກພື້ນ ອາຊຽນ (ARF) ແມ່ນກຳລັງຫນູນແຂງແຮງເພື່ອຊຸກຍູ້ການຮ່ວມມື ແລະ ຮ່ວມສຳພັນໃນພາກພື້ນ ອາຊີຕາເວັນອອກສຽງໃຕ້.
ອາດຈະຢືນຢັນວ່າ: ປັດໄຈຕັດສິນຊີ້ຂາດຕົ້ນຕໍຊ່ວຍສ້າງເປັນພາບພົດ ແລະ ທີ່ຕັ້ງບົດບາດອາຊຽນ ນັ້ນແມ່ນຄວາມສາມາດຮັກສາ“ຄວາມເປັນເອກະພາບໃນຫລາຍຮູບຫລາຍແບບ”, ສ້າງກຳລັງແຮງລວມຈາກລັກສະນະເປັນເອກະພາບ, ຄວາມສາມັກຄີ ແລະ “ວິທີການອາຊຽນ”. ຍາມໃດອາຊຽນກໍ່ເຊີດຊູຄວາມເຫັນດີເຫັນພ້ອມ, ເຄົາລົບ ແລະ ຫນູນຊ່ວຍເຊິ່ງກັນ ແລະ ກັນ ພ້ອມກັນເອົາໃຈໃສ່ ແລະ ປະສານສົມທົບກັນຢ່າງກົມກຽວລະຫວ່າງຜົນປະໂຫຍດຂອງປະເທດຊາດ ແລະ ຜົນປະໂຫຍດຂອງປະຊາຄົມ. ກຳລັງແຮງຂອງຄວາມສາມັກຄີ ອາຊຽນ ໄດ້ພິສູດໃຫ້ເຫັນເມື່ອ ອາຊຽນ ຜ່ານຜ່າວິກິດການການເງິນເມື່ອປີ 1997-1998, ສົມທົບກັນ ແລະ ແບ່ງປັນກັນໃນການແກ້ໄຂຜົນຮ້າຍຢ່ອນຫລັງຈາກໄພທຳມະຊາດ, ໂລກລະບາດຮ້າຍແຮງມທີ່ສົ່ງຜົນກະທົບເຖິງພາກພື້ນ. ແລະ ປະຈຸບັນ ພວມພ້ອມກັນຜ່ານຜ່າສິ່ງທ້າທາຍໃນສະພາບການໂລກ ແລະ ພາກພື້ນພວມມີການຜັນແປຫລາຍຢ່າງ. ໃນບົດປາໄສທີ່ກອງປະຊຸມລັດຖະມົນຕີການຕ່າງປະເທດ ອາຊຽນ ເຊິ່ງຈັດຂຶ້ນເມື່ອເດືອນ 7 ຜ່ານມາ, ສະເດັດເຈົ້າ ບຣູໄນ Hassan Bolkia ໄດ້ແບ່ງປັນວ່າ:
“ໃນໄລຍະເປັນປະທານອາຊຽນ, ມີສິ່ງຫນຶ່ງທີ່ພວກຂ້າພະເຈົ້າເຫັນໄດ້ຢ່າງຈະແຈ້ງນັ້ນແມ່ນ ອາຊຽນ ພວມພ້ອມກັນເປັນເອກະພາບ ສ້າງເປັນພາກພື້ນຮ່ວມແຫ່ງສັນຕິພາບ ແລະ ສະຖຽນລະພາບ ມີຄວາມວິຕົກກັງວົນວ່າ ບັນດາບັນຫາທີ່ຫາກໍ່ໄດ້ນຳມາປຶກສາຫາລືອາດຈະບໍ່ຖືກກັບຄວາມຫວັງ. ແຕ່ໂຊກດີ ມັນບໍ່ຄືແນວນັ້ນ. ພວກເຮົາໄດ້ພ້ອມກັນເຮັດວຽກ ແລະ ສົມທົບກັນເປັນຢ່າງດີ.”
ຄວາມສາມັກຄີ ແລະ ເປັນເອກະພາບ ນັ້ນກໍແມ່ນຂໍ້ກຸນແຈ່ທີ່ສ້າງເປັນອິດທິພົນຊື່ສຽງ ແລະ ຄວາມໄວ້ເນື້ອເຊື່ອໃຈ ຂອງອາຊຽນໃນການພົວພັນກັບບັນດາຄູ່ຮ່ວມມືພາຍນອກ. ໃນ 46 ປີຜ່ານມາ, ບົດບາດໃຈກາງຂອງອາຊຽນ ໄດ້ຮັບການເສີມຂະຫຍາຍ ຍ້ອນໄດ້ຮູ້ຈັກເປັນເຈົ້າການໃນການປະສົມກົມກຽວ, ຕິດພັນ ແລະ ຄວາມດຸນດຽງລະຫວ່າງບັນດາຄວາມສົນໃຈ ແລະ ຜົນປະໂຫຍດເພື່ອພ້ອມກັນສ້າງສັນຕິພາບ, ສະຖຽນລະພາບຢູ່ພາກພື້ນ, ຫນູນຊ່ວຍບັນດາຄວາມານະພະຍາຍາມຮ່ວມສຳພັນ ແລະ ພັດທະນາ. ນີ້ແມ່ນປັດໄຈສຳຄັນຊ່ວຍອົງການທີ່ມີຂອບຂະຫນາດນ້ອຍ ຊື່ງລວມມີບັນດາປະເທດກາງ ແລະ ນ້ອຍ ຄື ອາຊຽນ ກາຍເປັນພາກພື້ນທີ່ດຶງດູດບັນດາຄູ່ຮ່ວມມືໃຫຍ່ ແລະ ນ້ອຍ ທັງພາຍໃນ ແລະ ນອກພາກພື້ນ ພ້ອມກັນຕັ້ງຫນ້າເຂົ້າຮ່ວມບັນດາວິວັດທະນາການເຈລະຈາ ແລະ ຮ່ວມມື ຢູ່ ອາຊີ- ປາຊີຟີກ. ເມື່ອເຕື້ອງເຖິງບັນຫາດັ່ງກ່າວ, ທ່ານ ລັດຖະມົນຕີການຕ່າງປະເທດ ອາເມລິກາ John Kerry ຢືນຢັນວ່າ:
“ອາເມລິກາ ສົນໃຈເຖິງ 3 ບັນຫາໃນການຮ່ວມມືກັບ ອາຊຽນ. ນັ້ນແມ່ນ ບັນດາກາລະໂອກາດຮ່ວມມືດ້ານເສດຖະກິດ, ຄວາມໝັ້ນຄົງ ດ້ານການເມືອງ, ການຮັດແຫນ້ນສາຍພົວພັນລະຫວ່າງປະຊາຊົນນຳກັນ. ບົນພື້ນຖານຄວາມສົນໃຈນັ້ນ, ອາເມລິກາ ໝັ້ນໝາຍສະຫນັບສະຫນູນ ການເຊື່ອມໂຍງເຂົ້າກັບເສດຖະກິດຂອງອາຊຽນ ຢ່າງແຮງ, ໃນນັ້ນ ມີການສ້າງປະຊາຄົມເສດຖະກິດ ອາຊຽນ ໃນປີ 2015, ການຫນູນຊ່ວຍດ້ານເຕັກນິກໃຫ້ແກ່ ອາຊຽນ ເພື່ອປະຕິບັດຈຸດໝາຍນີ້. ຄຽງຄູ່ກັນນັ້ນ ອາເມລິກາ ກໍຈະເພີ່ມທະວີບັນດາຄຳໝັ້ນສັນຍາທີ່ມີຢູ່ແລ້ວກັບອາຊຽນ ເພື່ອສ້າງ ອາຊຽນ ແຫ່ງສັນຕິພາບ, ສະຖຽນລະພາບ ແລະ ວັດທະນາຖາວອນ.”
ເພື່ອປະຕິບັດສຳເລັດບັນດາຈຸດໝາຍທີ່ໄດ້ວາງອອກ, ກ່ອນອື່ນໝົດ ແມ່ນສ້າງ ປະຊາຄົມ ອາຊຽນ ໃຫ້ປະກົດຜົນເປັນຈິງໃນປີ 2015, ອາຊຽນ ໄດ້ ແລະ ພວມໝູນໃຊ້ບັນດາຫລັກການ ແລະ ທິດນຳຕົ້ນຕໍ່ຢ່າງມີໄຫວພິບ ແລະ ຊຳນານ. ນັ້ນແມ່ນເປັນເອກະພາບກັນໃນຄວາມຕັດສິນໃຈລວມ ແລະ ການກະທຳຢ່າງແຂງແຮງ ເພື່ອສຳເລັດບັນດາແຜນການຮ່ວມມືໃນ 3 ເສົາຄ້ຳຕົ້ນຕໍຄື: ການເມືອງ, ຄວາມໝັ້ນຄົງ, ເສດຖະກິດ ແລະ ວັດທະນະທຳ ສັງຄົມໃນວິວັດທະນາການສ້າງປະຊາຄົມອາຊຽນ ໃຫ້ຖືກກັບການກຳນົດເວລາ ແລະ ມີປະສິດທິຜົນ. ທ່ານ ລັດຖະມົນຕີການຕ່າງປະເທດຫວຽດນາມ ຟ້າມບີ່ງມີນ ໃຫ້ຮູ້ວ່າ:
“ບັນດາປະເທດເປັນເອກະພາບສ້າງປະຊາຄົມອາຊຽນ ໃນວັນທີ 31/12/2015. ນີ້ບໍ່ພຽງແຕ່ແມ່ນເຫດການຖະແຫລງ ອາຊຽນ ກາຍເປັນປະຊາຄົມ ແບບຮູບການເທົ່ານັ້ນ ຫາກເລີ່ມຕົ້ນວິວັດທະນາການສືບຕໍ່ສ້າງປະຊາຄົມ ອາຊຽນ ຢ່າງແທດຈິງ, ປຶກສາຫາລືເຖິງອະນາຄົດຂອງອາຊຽນຫລັງປີ 2015. ນັ້ນແມ່ນນຳບັນດາມາດຖານຂອງອາຊຽນ, ຫາກກາຍເປັນມາດຖານໃນພາກພື້ນ, ດ້ວຍຈຸດໝາຍສ້າງພາກພື້ນແຫ່ງສັນຕິພາບ, ຄວາມໝັ້ນຄົງ ແລະ ສະຖຽນລະພາບ.”
ພາຍຫລັງ 46 ປີ ນັບແຕ່ເມື່ອອົງການ ອາຊຽນ ໄດ້ຮັບການສ້າງຕັ້ງຂຶ້ນ ສະພາບໂລກ ແລະ ພາກພື້ນກໍຄື ອາຊຽນເອງ ໄດ້ມີການຫັນປ່ຽນຫລາຍຢ່າງ ແຕ່ບັນດາມາດຖານ, ຫລັກການ, ວິທີການການເຄື່ອນໄຫວ ແລະ ຈຸດພິເສດສະເພາະຂອງ ອາຊຽນ ຍັງຄົງຮັກສາຄຸນຄ່າເດີມໄວ້.
ສືບຕໍ່ຍູ້ແຮງການເຊື່ອມຈອດ ອາຊຽນ ແລະ ຊຸກຍູ້ການພັດທະນາຢ່າງສະໝຳ່ສະເຫມີ, ໝັ້ນຄົງ, ຮັດແຄບຊ່ອງຫວ່າງການພັດທະນາລະຫວ່າງບັນດາປະເທດສະມາຊິກ, ພ້ອມທັງເພີ່ມທະວີສະຕິ ແລະ ການກະທຳຂອງລັດຖະບານ ແລະ ປະຊາຊົນບັນດາປະເທດໃນພາກພື້ນ ເພື່ອປະຊາຄົມນັ້ນ ແມ່ນຈຸດໝາຍ ທີ່ອາຊຽນ ພວມມຸ່ງໄປເຖິງໃນໄລຍະຈະມາເຖິງ. ສືບຕໍ່ຮັກສາບັນດາຫລັກການພື້ນຖານ, ສາມັກຄີ, ເປັນເອກະພາບ ຄຽງຄູ່ກັບການເປັນເຈົ້າການ, ມີຫົວຄິດປະດິດສ້າງໃນການແກ້ໄຂບັນດາບັນຫາທີ່ວາງອອກ, ອາຊຽນ ຈະສຳເລັດຈຸດໝາຍຂອງຕົນ, ສ້າງບົດບາດທີ່ຕັ້ງຢ່າງໝັ້ນຄົງຢູ່ພາກພື້ນ ແລະ ໂລກ.