(vovworld)- ໃນສະພາບຕ້ອງປະເຊີນຫນ້າກັບສິ່ງທ້າທາຍກ່ຽວກັບໄພທຳມະຊາດ, ໄພພິບັດໄດ້ເຮັດໃຫ້ການຜະລິດດຳເນີນທຸລະກິດຖືກຢຸດຕິ, ໃນໄລຍະຜ່ານມາ ສິງກະໂປໄດ້ມີຫລາຍມາດຕະການຊ່ວຍເຫລືອບັນດາວິສາຫະກິດຜ່ານຜ່າຄວາມຫຍຸ້ງຍາກເພື່ອພັດທະນາ. ໃນນັ້ນ ໂຄງການ“ຄຸ້ມຄອງປະສິດທິພາບການເຄື່ອນໄຫວວິສາຫະກິດ” ຂອງສິງກະໂປພວມແມ່ນບັນຫາທີ່ບັນດາປະເທດຄື: ໄທ, ຫວຽດນາມ, ຟິລິບປີນ ມີຄວາມສົນໃຈ ແລະ ຖອດຖອນບົດຮຽນ.
ພື້ນຖານເສດຖະກິດເປີດໄດ້ນຳມາໃຫ້ປະເທດສິງກະໂປຫລາຍກາລະໂອກາດຮ່ວມມືລົງທຶນ, ແຕ່ກໍເກີດຄວາມສ່ຽງຫລາຍຢ່າງກ່ຽວກັບຄວາມປອດໄພຢູ່ສຳນັກງານເຮັດວຽກ, ການສະຫນອງບໍລິການຫລືຄວາມສ່ຽງຈາກຝ່າຍທີ 3. ວິສາຫະກິດຈະຕ້ອງປະເຊີນຫນ້າກັບບັນດາຄວາມສ່ຽງດັ່ງກ່າວເມື່ອໄພທຳມະຊາດ ເກີດຂຶ້ນ. ສະນັ້ນ ໂຄງການ ຄຸ້ມຄອງປະສິດທິພາບການເຄື່ອນໄຫວວິສາຫະກິດ” ຂອງສິງກະໂປໄດ້ຮັບການປະຕິບັດເພື່ອຍົກສູງຄວາມຮັບຮູ້ຂອງບັນດາວິສາຫະກິດກ່ຽວກັບການສ້າງແຜນການຜະລິດດຳເນີນທຸລະກິດ ແລະ ການຮັບມືກັບບັນດາຄວາມສ່ຽງໃນວິວັດການເຄື່ອນໄຫວ. ແຜນການດັ່ງກ່າວຕ້ອງມີການຕີລາຄາສັງລວມບັນດາການກະທົບທີ່ອາດຈະນາບຂູ່ເຖິງວິວັດການຜະລິດດຳເນີນທຸລະກິດຂອງວິສາຫະກິດ, ຈາກນັ້ນ ສ້າງຕັ້ງບັນດາມາດຕະການປ້ອງກັນເຫດ, ສ້າງວິທີການຮັບມືເມື່ອເກີດເຄາະຮ້າຍຢ່າງມີປະສິດທິຜົນ ກໍຄືວິທີຟື້ນຟູການເຄື່ອນໄຫວພາຍຫລັງເກີດເຄາະຮ້າຍຢ່າງວ່ອງໄວທີ່ສຸດ. ໂຄງການດັ່ງກ່າວບໍ່ພຽງແຕ່ຊ່ວຍບັນດາວິສາຫະກິດສິງກະໂປ ຮັກສາຊັບສິນ, ພື້ນຖານໂຄງລ່າງ, ບັນເທົາຄວາມເສຍຫາຍເທົ່ານັ້ນ ຫາກຍັງຍົກສູງອິດທິພົນຊື່ສຽງ, ເຮັດໃຫ້ວິສາຫະກິດກາຍເປັນຄູ່ຮ່ວມມືທີ່ໄວ້ເນື້ອເຊື່ອໃຈອີກດ້ວຍ. ທ່ານ Teiter Long, ຜູ້ອຳນວຍການບໍລິຫານບໍລິສັດ Land and Sea ໃຫ້ຮູ້ວ່າ:
“ເຖິງວ່າບໍ່ວ່າສິ່ງໃດເກີດຂຶ້ນຄື ໄພພິບັດທຳມະຊາດຫລືວິກິດການກໍຕາມ ແຕ່ບັນດາບໍລິການຂອງພວກຂ້າພະເຈົ້າຍັງສະຫນອງເຖິງຜູ້ບໍລິໂພກອຸປະໂພກ. ສຳລັບການເຄື່ອນໄຫວດຳເນີນທຸລະກິດຂອງພວກຂ້າພະເຈົ້າ, ຫນັງສືຢັ້ງຢືນຄຸ້ມຄອງປະສິດທິພາບການເຄື່ອນໄຫວແມ່ນຄ້າຍຄືການຮັບປະກັນສຳລັບລູກຄ້າ.”
ປະເທດສິງກະໂປ
ພາບ:internet
|
ໂຄງການຄຸ້ມຄອງ“ປະສິດທິພາບການເຄື່ອນໄຫວວິສາຫະກິດ” ຂອງສິງກະໂປໄດ້ຮັບການປຸກລະດົມນັບແຕ່ປີ 2010 ໂດຍມີການເຂົ້າຮ່ວມຂອງບັນດາວິສາຫະກິດທີ່ຂຶ້ນກັບຫລາຍຂະແຫນງດຳເນີນທຸລະກິດ ແລະ ຜົນປະໂຫຍດຂອງໂຄງການໄດ້ຮັບການຮັບຮອງ. ເຖິງຢ່າງໃດກໍຕາມ ໃນໄລຍະຕົ້ນແຫ່ງການປະຕິບັດ, ໂຄງການ “ຄຸ້ມຄອງປະສິດທິພາບການເຄື່ອນໄຫວວິສາຫະກິດ” ໄດ້ປະສົບກັບຄວາມຫຍຸ້ງຍາກບໍ່ແມ່ນຫນ້ອຍ. ຫນຶ່ງໃນຈຳນວນນັ້ນແມ່ນວິສາຫະກິດບໍ່ຄິດໄລ່ເຖິງຄວາມຈຳເປັນຕ້ອງສ້າງແຜນການດຳເນີນທຸລະກິດໃນການຮັບມືກັບຄວາມສ່ຽງຈາກໄພພິບັດທຳມະຊາດ . ນອກນັ້ນ ຍາມໃດບັນດາວິສາຫະກິດກໍມີຄວາມເອົາໃຈໃສ່ເຖິງຜົນປະໂຫຍດ ແລະ ບໍ່ຢາກຈ່າຍເງິນໃຫ້ແກ່ການຄົ້ນຄ້ວາ, ຕີລາຄາ ແລະ ສ້າງແຜນການນີ້. ທ່ານ Chu Giun Wa ຮອງຜູ້ອຳນວຍການ ຄະນະສ້າງກຳລັງແຮງ, ສະມາຄົມວິສາຫະກິດ ສິງກະໂປ ໃຫ້ຮູ້ວ່າ: ເລື່ອງຍົກສູງຄວາມຮັບຮູ້ຂອງເຂົາເຈົ້າໄດ້ສວມບົດບາດສຳຄັນ.
“ໄລຍະຕົ້ນ ຄຳນິຍາມດັ່ງກ່າວແມ່ນບັນຫາໃຫມ່ອ່ຽມຢູ່ ສິງກະໂປ. ຜູ້ຄົນຮູ້ຈັກ ກໍຄືສົນໃຈຕໍ່ໂຄງການພຽງເລັກນ້ອຍ. ພວກຂ້າພະເຈົ້າໄດ້ຈັດຕັ້ງກອງປະຊຸມສຳມະນາຫລາຍຄັ້ງເພື່ອຊ່ວຍບັນດາວິສາຫະກິດເຫັນໄດ້ຜົນຮ້າຍຢ້ອນຫລັງເມື່ອວິກິດການ, ໄພທຳມະຊາດເກີດຂຶ້ນ. ສະນັ້ນ ຖ້າຫາກບໍ່ເຂົ້າໃຈ, ເຂົາເຈົ້າຈະບໍ່ຕີລາຄາສູງບົດບາດຂອງການສ້າງແຜນການຮັບມື.”
 |
ຄຽງຄູ່ກັນນັ້ນ ການໂຄສະນາເຖິງບັນດາວິສາຫະກິດ, ລັດຖະບານ ສິງກະໂປຍັງປະຕິບັດບັນດານະໂຍບາຍສົ່ງເສີມ ແລະ ຫນູນຊ່ວຍເຂົາເຈົ້າ. ທຳອິດ ສິງກະໂປປະກາດໃຊ້ມາດຖານກ່ຽວກັບ “ການຄຸ້ມຄອງປະສິດທິພາບການເຄື່ອນໄຫວວິສາຫະກິດ” ໄດ້ນຳໃຊ້ສຳລັບບັນດາວິສາຫະກິດທີ່ຂຶ້ນກັບທຸກຂະແຫນງເສດຖະກິດ. ຕໍ່ຈາກນັ້ນ, ລັດຖະບານ ຫນູນຊ່ວຍລາຍຈ່າຍສ່ວນຫນຶ່ງເພື່ອໃຫ້ວິສາຫະກິດບັນລຸມາດຖານດັ່ງກ່າວຄື: ລາຍຈ່າຍບຳລຸງສ້າງພະນັກງານ, ຄ່າຈ້າງຜູ້ທີ່ປຶກສາຂອງຝ່າຍທີ 3, ລາຍຈ່າຍການໝູນໃຊ້ເຕັກໂນໂລຊີຂໍ້ມູນຂ່າວສານໃນການຈັດຕັ້ງຜັນຂະຫຍາຍ. ສະນັ້ນ ໂຄງການຮັບມືກັບເຄາະຮ້າຍນັບມື້ນັບໄດ້ຮັບການເປີດກວ້າງໃນປະຊາຄົມວິສາຫະກິດ ສິງກະໂປ. ໂຄງການ“ຄຸ້ມຄອງປະສິດທິພາບການເຄື່ອນໄຫວວິສາຫະກິດ” ຂອງສິງກະໂປ ແມ່ນບັນຫາທີ່ຫລາຍປະເທດຖືກຜົນກະທົບຈາກໄພທຳມະຊາດ, ການປ່ຽນແປງຂອງດິນຟ້າອາກາດມີຄວາມສົນໃຈ ແລະ ຖອດຖອນບົດຮຽນ. ເປັນທີ່ຈະແຈ້ງແລ້ວວ່າ, ລາຍຈ່າຍປ້ອງກັນບັນດາເຫດການເກິດຂຶ້ນຜິດປົກກະຕິຍາມໃດກໍຫນ້ອຍກວ່າເມື່ອທຽບໃສ່ຄວາມເສຍຫາຍທີ່ມັນກໍ່ຂຶ້ນ ຖ້າຫາກບໍ່ໄດ້ຮັບມືຢ່າງທັນການ. ໃນສະພາບການພື້ນຖານເສດຖະກິດບັນດາປະເທດລ້ວນແຕ່ມີການກະທົບເຊິ່ງກັນ ແລະ ກັນ ຍ້ອນຜົນສະທ້ອນຂອງວິວັດການໂລກາພິວັດ, ບັນດາປະເທດໄດ້ກະກຽມຮັບມືກັບທຸກຄວາມສ່ຽງຄືສິງກະໂປຈະແມ່ນຄູ່ຮ່ວມມືໄວ້ເນື້ອເຊື່ອໃຈຂອງບັນດາຄູ່ຄ້າສາກົນ.