(vovworld) - ປູກຕົ້ນໝາກເຜັດຢູ່ໃນສວນຄົວແມ່ນຫນຶ່ງໃນບັນດາມາດຕະການຊຶ່ງອຳນາດການປົກຄອງຂອງປະທານາທີບໍດີ ອິນໂດເນເຊຍ ວາງອອກໃນໄລຍະມໍ່ໆມານີ້ ເພື່ອສະກັດກັ້ນໄພເງິນເຟີ້ເພີ່ມຂຶ້ນສູງ. ປະທານາທິບໍດີ ອິນໂດເນເຊຍ ຖືວ່າ: ມາດຕະການນີ້ ຈະຈຳກັດລາຄາເພີ່ມຂຶ້ນຢ່າງລຽນຕິດຂອງໝາກເຜັດ ຊຶ່ງແມ່ນອາຫານທີ່ຂາດບໍ່ໄດ້ໃນທຸກຄາບເຂົ້າຂອງຊາວ ອິນໂດເນເຊຍ ໃນໄລຍະທີ່ຜ່ານມາ.
ລາຄາໝາກເຜັດເພີ່ມຂຶ້ນສູງໄດ້ກໍ່ຄວາມວິຕົກກັງວົນຕໍ່ໍຊາວອິນໂດເນເຊຍ
ພາບ:internet
|
ໃນປີ 2011 ຍ້ອນຝົນຕົກໜັກແກ່ຍາວ, ປະເທດອິນໂດເນເຊຍ ຕ້ອງປະເຊີນຫນ້າກັບສະພາບນ້ຳຖ້ວມໃນຫລາຍເດືອນ. ເພາະສະນັ້ນ ໄດ້ເກີດສະພາບບົ້ງແຜ່ຂະຫຍາຍໃນບໍລິເວນກວ້າງຂວາງຊື່ງເຮັດໃຫ້ປະລິມານການເກັບກູ້ໝາກເຜັດຫລຸດລົງຢ່າງແຮງ. ແຫລ່ງສະຫນອງໝາກເຜັດບໍ່ສາມາດຕອບສະຫນອງຄວາມຕ້ອງການໄດ້ ເຮັດໃຫ້ລາຄາໝາກເຜັດເພີ່ມຂຶ້ນເກືອບທົບ 5 ເທົ່າ. ເປັນອັນວ່າ ລາຄາໝາກເຜັດຢູ່ ອິນໂດເນເຊຍແມ່ນແພງກວ່າ ລາຄາຊີ້ນງົວ. ສິ່ງດັ່ງກ່າວພວມສົ່ງຜົນສະທ້ອນຫລາຍຢ່າງເຖິງຊາວ ອິນໂດເນເຊຍ ເພາະວ່າ ຊາວອິນໂດເນເຊຍແມ່ນຜູ້ມັກກິນເຜັດ. ເກືອບຄືວ່າ ອາຫານທຸກເຍ່ືອງຂອງຊາວ ອິນໂດເນເຊຍລ້ວນແຕ່ໃສ່ໝາກເຜັດ. ເລື່ອງລາຄາໝາກເຜັດເພີ່ມຂຶ້ນຢ່າງກະໂດດຂັ້ນໄດ້ສົ່ງຜົນສະທ້ອນບໍ່ຫນ້ອຍເຖິງຊີວິດການເປັນຢູ່ຂອງປະຊາຊົນ. ນອກຈາກປະກົດການເກັບກູ້ໝາກເຜັດບໍ່ໄດ້ຮັບຜົນ, ລາຄາເພີ່ມຂຶ້ນ, ປີຜ່ານມາ ອາກາດບໍ່ເອື້ອອຳນວຍ ຍ້ອນຜົນສະທ້ອນຈາກການປ່ຽນແປງຂອງດິນຟ້າອາກາດ ເຮັດໃຫ້ລະດູການເກັບກ່ຽວເຂົ້າຢູ່ຫລາຍທ້ອງຖິ່ນຂອງ ອິນໂດເນເຊຍ ຖືກຫລຸດລົງ, ລາຄາເຂົ້າສານເພີ່ມຂຶ້ນ ບາງແຫ່ງເພີ່ມຂຶ້ນເຖິງ 10%.
ຕໍ່ຫນ້າສະພາບການຄືດັ່ງກ່າວ, ລັດຖະບານ ອິນໂດເນເຊຍ ໄດ້ຕົກລົງນຳເຂົ້າ ເຂົ້າສານຈາກໄທ ແລະ ຫວຽດນາມ 1,3 ລ້ານໂຕນໃນເດືອນ 2 ຜ່ານມາພາຍຫລັງຢຸດຕິການນຳເຂົ້າເຂົ້າສານໃນ 2 ປີຜ່ານມາ. ເຖິງຢ່າງໃດກໍຕາມ, ອຳນາດການປົກຄອງ ອິນໂດເນເຊຍ ໃຫ້ຮູ້ວ່າ: ພວມເກີດຄວາມວິຕົກກັງວົນກ່ຽວກັບລາຄາໝາກເຜັດ. ເພາະສະນັ້ນ ມີພຽງວິທີດຽວແມ່ນປະຊາຊົນຜະລິດໝາກເຜັດເອງໃຫ້ແກ່ຄາບອາຫານໃນແຕ່ລະວັນຂອງຕົນ ຈຶ່ງສາມາດຊ່ວຍປັບປຸງສະພາບລາຄາ ໝາກເຜັດພວມເພີ່ມຂຶ້ນສູງໄດ້. ຄືເຊັນດຽວກັບຊາວ ອິນໂດເນເຊຍ ຫລາຍຄົນ, ຄອບຄົວ ເອື້ອຍ Maryuni ຢູ່ພາກກາງ Jawa ກໍນຳໃຊ້ໝາກເຜັດຫລາຍພໍສົມຄວນໃນຄາບອາຫານປະຈຳວັນຂອງຕົນ
“ ຄອບຄົວຂອງຂ້າພະເຈົ້າປູກໝາກເຜັດ ນັ້ນແມ່ນຄວາມຕ້ອງການປະຈຳວັນ, ໃນຄາບອາຫານ, ໝາກເຜັດແມ່ນປະເພດອາຫານຂາດບໍ່ໄດ້. ສະນັ້ນ ຄອບຄົວຂ້າພະເຈົ້າຈຶ່ງປູກຕົ້ນໝາກເຜັດໃນສວນຄົວ ນັບແຕ່ເມື່ອລາຄາໝາກເຜັດບໍ່ເປັນປົກກະຕິ ແລະ ເພີ່ມຂຶ້ນສູງໃນທ້ອງຕະຫລາດ. ສຳລັບຂ້າພະເຈົ້າແລ້ວ, ລາຄາໝາກເຜັດ ເພີ່ມຂຶ້ນສູງກໍ່ບໍ່ສົ່ງຜົນສະທ້ອນເຖິງຄອບຄົວ.”
|
ຊາວ ອິນໂດເນເຊຍ ປູກຕົ້ນໝາກເຜັດໃນສວນ
ພາບ:internet
|
ຂະບວນການປູກ ໝາກເຜັດຢູ່ໃນສວນຄົວຂອງຕົນແມ່ນແຜ່ຂະຫຍາຍຢ່າງກວ້າງຂວາງໃນທົ່ວປະເທດ. ຢູ່ ນະຄອນຫລວງ Jakarta ປະຊາຊົນຢູ່ທີ່ນີ້ ໄດ້ນຳໃຊ້ບັນດາເຂດດິນເປົ່າຫວ່າງລະຫວ່າງຕືກອາຄານຫລາຍຊັ້ນ ເພື່ອເພີ່ມເນື້ອທີ່ປຸກຕົ້ນໝາກເຜັດ, ຕອບສະຫນອງຄວາມຕ້ອງການໝາກເຜັດປະຈຳວັນໄດ້ສ່ວນໃດສ່ວນຫນຶ່ງ. ເພື່ອຕອບສະຫນອງຂະບວນການດັ່ງກ່າວ, ປະທານາທິບໍດີ ອິນໂດເນເຊຍ Susilo Bambang Yudhoyono ແລະ ທ່ານນາງ Mari Elka Pangestu ລັດຖະມົນຕີກະຊວງທ່ອງທ່ຽວ ແລະ ປະດິດສ້າງ ອິນໂດເນເຊຍ ກໍປູກຕົ້ນໝາກເຜັດຫລາຍພໍສົມຄວນໃນສວນ ແລະ ໂຖດອກໄມ້ ຂອງບ້ານຕົນ. ປະຈຸບັນ ກະຊວງກະສິກຳ ກໍເລີ່ມຕົ້ນເຜີຍແຜ່ບັນດາວິທີປູກຕົ້ນໝາກເຜັດໃຫ້ແກ່ປະຊາຊົນຢ່າງກວ້າງຂວາງ ພິເສດແມ່ນປູກຕົ້ນໝາກເຜັດໃນສວນເພື່ອສາມາດກຸ້ມຕົນເອງ ໂດຍບໍ່ຕ້ອງໃຊ້ໝາກເຜັດໃຫ້ຄາບອາຫານຂອງຄອບຄົວ. ນອກນັ້ນ ລັດຖະບານກໍເລີ່ມຕົ້ນຍູ້ແຮງຂະບວນການແຈກຢາຍ ແນວໝາກເຜັດໂດຍບໍ່ເສຍເງິນໃຫ້ແກ່ຊາວທ້ອງຖິ່ນບາງແຫ່ງ.
ໂດຍຕອບສະຫນອງຂະບວນການດັ່ງກ່າວ, ດອກເຕີ Muhamad Syukur ຄູສອນຢູ່ພະແນກກະສິກຳວິທະຍາ ແລະ ໝາກໄມ້, ສັງກັດສະຖາບັນ ກະສິກຳ Bogor ໄດ້ເຜີຍແຜ່ຄວາມຮູ້ພື້ນຖານກ່ຽວກັບການປູກຕົ້ນໝາກເຜັດໃຫ້ແກ່ປະຊາຊົນ.
“ປະຊາຊົນສາມາດປູກຕົ້ນໝາກເຜັດຢູ່ບໍ່ວ່າບ່ອນໃດ ແລະ ບໍ່ວ່າລະດູໃດ. ໝາກເຜັດສາມາດປູກຢູ່ເຂດພູພຽງ, ທົ່ງພຽງ ແລະ ພູດອຍ. ຖ້າວ່າ ພວກເຮົາມີເນື້ອທີ່ດິນແຄບ ພວກເຮົາກໍສາມາດປູກຕົ້ນໝາກເຜັດຮັບໃຊ້ຄວາມຕ້ອງການປະຈຳວັນໄດ້.”
ທ່ານ Agung Laksono ລັດຖະມົນຕີກະຊວງຮ່ວມມື ແລະ ວັດທະນາຖາວອນ ອິນໂດເນເຊຍ ໃຫ້ຮູ້ວ່າ: ລັດຖະບານພວມເອົາໃຈໃສ່ເປັນພິເສດຕໍ່ເລື່ອງສະກັດກັ້ນການເພີ່ມຂຶ້ນຂອງລາຄາໝາກເຜັດ ດ້ວຍວິທີຊອກຫາແຫລ່ງສະຫນອງໃນຕະຫລາດ. ທ່ານ ກໍຍອມຮັບວ່າ: ລາຄາໝາກເຜັດເພີ່ມຂຶ້ນ ແມ່ນສົ່ງຜົນສະທ້ອນເຖິງການເພີ່ມ ໄພເງິນເຟີ້. ບໍ່ພຽງແຕ່ ຮຽກຮ້ອງໃຫ້ປະຊາຊົນປູກຕົ້ນໝາກເຜັດເພື່ອຫລຸດຜ່ອນໄພເງິນເຟີ້ເທົ່ານັ້ນ ຫາກປະທານາທິບໍດີ Yudhoyono ກໍໄດ້ຮຽກຮ້ອງໃຫ້ປະຊາຊົນປ່ຽນແປງຄວາມຊີນເຄີຍເອົາເຂົ້າສານເປັນທັນຍາຫານຕົ້ນຕໍ. ລັດຖະບານໄດ້ເປີດບັ້ນຂົນຂວາຍຮຽກຮ້ອງໃຫ້ປະຊາຊົນ ປ່ຽນແປງເຍື່ອງອາຫານໃນຄາບກິນປະຈຸວັນ ດ້ວຍສາລີ, ມັນຕົ້ນ, ມັນດ້າງ ເພື່ອຫລຸດຜ່ອນເລື່ອງອີງໃສ່ເຂົ້າສານ.
ໃນສະພາບການລາຄາທັນຍາຫານໃນທົ່ວໂລກເພີ່ມຂຶ້ນສູງຢູ່ໃນລະດັບປະມານ 13 USD/kg, ລັດຖະບານ ອິນໂດເນເຊຍ ໄດ້ນຳໃຊ້ຫລາຍມາດຕະການດ້ວຍຄວາມປາຖະຫນາຈະສາມາດແກ້ໄຂບັນຫາທັນຍາຫານໄດ້ສ່ວນໃດສ່ວນຫນຶ່ງໃຫ້ແກ່ປະຊາຊົນ ອິນໂດເນເຊຍ ກວ່າ 230 ລ້ານຄົນໄດ້.
ນັກຂ່າວ ດັ້ງຮ່ວາ