(vovworld) - ໃນສະພາບການບັນດາປະເທດພວມປະເຊີນຫນ້າກັບສະພາບເສດຖະກິດໂລກ ພວມຜັນແປໄປຢ່າງສັບສົນ, ການຈັດຕັ້ງ ງານຕະຫລາດນັດ ຈີນ - ອາຊຽນ (CAEXPO) ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ (CABIS) ຄັ້ງທີ 9 ຫາກຳດຳເນີນໄປຢູ່ນະຄອນ ຫນານຫນິງ ແຂວງ ກວາງຊີ ປະເທດ ຈີນ ສຳເລັດຜົນແມ່ນມີຄວາມໝາຍສຳຄັນ ແລະ ສົ່ງຜົນສະທ້ອນຢ່າງເລິກເຊິ່ງກວ້າງຂວາງ. ການເຄື່ອນໄຫວປີນີ້ແມ່ນບາດກ້າວໃນການເສີມຂະຫຍາຍບົດບາດແມ່ນເວທີປາໄສພົບປະແລກປ່ຽນມິດຕະພາບ, ຊຸກຍູ້ເສດຖະກິດການຄ້າ ແລະ ການຮ່ວມມືໃນຫລາຍຂົງເຂດລະຫວ່າງ ອາຊຽນ ແລະ ຈີນ. ງານຕະຫລາດນັດ ຈີນ - ອາຊຽນ (CAEXPO) ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ (CABIS) ຄັ້ງທີ 9 ປະກອບສ່ວນສຳຄັນເພື່ອຫັນເຂດການຄ້າເສລີ ອາຊຽນ - ຈີນ ປະກົດຜົນເປັນຈິງ.
ນາຍົກລັດຖະມົນຕີ Nguyen Tan Dung ນຳຫນ້າຄະນະຜູ້ແທນ ລັດຖະບານ ຫວຽດນາມ ເຂົ້າຮ່ວມ ງານຕະຫລາດນັດ ຈີນ - ອາຊຽນ
ພາບ:congthuong.com.vn
|
ງານຕະຫລາດນັດ ຈີນ - ອາຊຽນ (CAEXPO) ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ (CABIS) ຖືກຈັດຂຶ້ນປະຈຳປີຢູ່ ນະຄອນ ຫນານຫນິງ ແຂວງກວາງຊີ ປະເທດຈີນ ໂດຍແມ່ນອົງການຮັບຜິດຊອບດ້ານການຄ້າຂອງຈີນ,10 ປະເທດ ອາຊຽນ ແລະ ຄະນະເລຂາອາຊຽນ ຮ່ວມຈັດຕັ້ງ. ສຳລັບ ຈີນ ແລະ ບັນດາປະເທດສະມາຊິກ ອາຊຽນ, ງານຕະຫລາດນັດ ຈີນ - ອາຊຽນ (CAEXPO) ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ (CABIS) ຄັ້ງທີ 9 ມີບົດບາດສຳຄັນໃນການເພີ່ມທະວີການແລກປ່ຽນເສດຖະກິດ, ການຄ້າກໍຄືຂົງເຂດອື່ນໆ, ຊຸກຍູ້ການສ້າງເຂດການຄ້າເສລີ ອາຊຽນ - ຈີນ. ທ່ານ Vu Huy Hoang ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:
“ນີ້ແມ່ນຫນຶ່ງໃນບັນດາເຄື່ອງມືຢ່າງມີປະສິດທິຜົນ. ແມ່ນເວທີປາໄສເພື່ອໃຫ້ບັນດານັກລົງທຶນ, ນັກທຸລະກິດຂອງບັນດາປະເທດ ອາຊຽນ, ຈີນ ພົບປະແລກປ່ຽນ ແລະ ຕົກລົງເຊັນສັນຍາກ່ຽວກັບການລົງທຶນ ແລະ ການຄ້າ. ນີ້ກໍແມ່ນເວທີປາໄສເພື່ອໃຫ້ສອງຝ່າຍສາມາດແລກປ່ຽນບໍ່ພຽງແຕ່ບັນດາບັນຫາຮ່ວມມືເສດຖະກິດການຄ້າການລົງທຶນໃນພາກພື້ນ ອາຊີ ຕາເວັນອອກສຽງໃຕ້ເທົ່ານັ້ນ ຫາກຍັງແມ່ນເວທີປາໄສເພື່ອໃຫ້ບັນດາຝ່າຍສາມາດແລກປ່ຽນເປີດກວ້າງຄວາມສາມາດການຮ່ວມມືເສດຖະກິດການຄ້າການລົງທຶນໃນພາກພື້ນ ອາຊີ ປາຊີຟິກ.”
ໃນໄລຍະຜ່ານມາ, ການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ ອາຊຽນ - ຈີນ ນັບມື້ນັບພັດທະນາຢ່າງເລິກເຊິ່ງ ກວ້າງຂວາງ, ບັນດາປະເທດ ອາຊຽນ ແມ່ນຄູ່ຮ່ວມມືດ້ານເສດຖະກິດ, ການລົງທຶນສຳຄັນຕົ້ນຕໍຂອງຈີນ. ສະເພາະການລົງທຶນ, ໄລ່ມາຮອດເດືອນ 7/2012, ການຮ່ວມມືລົງທຶນລະຫວ່າງ ຈີນ ແລະ ບັນດາປະເທດ ອາຊຽນ ບັນລຸເກືອບ 100 ຕື້ USD. ປະຈຸບັນ ຈີນ ແລະ ບັນດາປະເທດ ອາຊຽນ ໄດ້ຍົກການພົວພັນຂຶ້ນສູ່ລະດັບຍຸດທະສາດ. ກ່າວຄຳເຫັນໄຂກອງປະຊຸມສຸດຍອດການລົງທຶນ ການຄ້າ ອາຊຽນ - ຈີນ ຄັ້ງທີ 9, ທ່ານຮອງປະທານປະເທດຈີນ ສີຈິ້ນຜິງ ໃຫ້ຮູ້ວ່າຜ່ານການຈັດຕັ້ງມາເປັນແລ້ວ 8 ຄັ້ງ, ງານຕະຫລາດນັດ ຈີນ - ອາຊຽນ ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ ນັບມື້ນັບຢືນຢັນບົດບາດພົ້ນເດັ່ນຂອງຕົນ ແລະ ໄດ້ກາຍເປັນຈຸດນັດພົບບໍ່ພຽງແຕ່ສຳລັບວິສາຫະກິດຈີນ ແລະ ບັນດາປະເທດ ອາຊຽນ ເທົ່ານັ້ນ ຫາກຍັງສຳລັບບັນດາປະເທດຄູ່ເຈລະຈາຢູ່ນອກພາກພື້ນອີກດ້ວຍ.
“ຍາມໃດ ຈີນ ກໍສ້າງເງື່ອນໄຂສະດວກເພື່ອໃຫ້ບັນດາວິສາຫະກິດຂອງຈີນ ແລະ ວິສາຫະກິດຂອງບັນດາປະເທດ ອາຊຽນ ນຳໃຊ້ ບັນດາກາລະໂອກາດ, ເພີ່ມທະວີການຮ່ວມມືເສດຖະກິດ, ການຄ້າການລົງທຶນ ຢ່າງສຸດຂີດ. ຍາມໃດຈີນກໍຖືບັນດາປະເທດ ອາຊຽນ ແມ່ນຈຸດນັດພົບອັນດູດດື່ມໃນການເຄື່ອນໄຫວຮ່ວມມືເສດຖະກິດ, ການລົງທຶນຂອງຕົນ.”
ງານຕະຫລາດນັດ ຈີນ - ອາຊຽນ
ພາບ:congthuong.com.vn
|
ເຖິງວ່າແມ່ນເວທີປາໄສກ່ຽວກັບເສດຖະກິດ, ການຄ້າ ແຕ່ດ້ວຍການເຂົ້າຮ່ວມຂອງປະມຸກລັດຫລາຍທ່ານ, ງານຕະຫລາດນັດ ຈີນ - ອາຊຽນ ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ ໄດ້ກາຍເປັນເວທີປາໄສສຳຄັນເພື່ອໃຫ້ບັນດາການນຳຂອງ 10 ປະເທດ ອາຊຽນ ແລະ ຈີນ ພົບປະ, ແລກປ່ຽນ. ບັນດາການພົບປະແລກປ່ຽນສອງຝ່າຍຢູ່ນອກ ງານຕະຫລາດນັດ ຈີນ - ອາຊຽນ ແມ່ນກາລະໂອກາດດີເພື່ອໃຫ້ສອງຝ່າຍແລກປ່ຽນບັນດາບັນຫາກ່ຽວກັບການພົວພັນລະຫວ່າງສອງປະເທດ, ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ. ເລື່ອງນາຍົກລັດຖະມົນຕີ Nguyen Tan Dung ນຳຫນ້າຄະນະຜູ້ແທນ ລັດຖະບານ ຫວຽດນາມ ເຂົ້າຮ່ວມ ງານຕະຫລາດນັດ ຈີນ - ອາຊຽນ ຄັ້ງນີ້ໄດ້ສະແດງໃຫ້ເຫັນວ່າ: ຫວຽດນາມ ສະຫນັບສະຫນູນກໍຄືຖືເປັນສຳຄັນບົດບາດຂອງ ງານຕະຫລາດນັດ ຈີນ - ອາຊຽນ ໃນການຊຸກຍູ້ການພົວພັນດ້ານເສດຖະກິດ, ການຄ້າ ລະຫວ່າງ ຫວຽດນາມ ແລະ ຈີນ ເວົ້າສະເພາະ ກໍຄືລະຫວ່າງ ອາຊຽນ ກັບ ຈີນ ເວົ້າລວມ. ເນື່ອງໃນໂອກາດນີ້ ທ່ານນາຍົກລັດຖະມົນຕີ Nguyen Tan Dung ໄດ້ມີການພົບປະກັບການນຳຈີນ ແລະ ການນຳແຂວງ ກວາງຊີ, ພົບປະສອງຝ່າຍກັບການນຳຂັ້ນສູງບັນດາປະເທດສະມາຊິກ ອາຊຽນ ເຂົ້າຮ່ວມ ງານຕະຫລາດນັດ ຈີນ - ອາຊຽນແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ.
ຮ້ານວາງສະແດງສິນຄ້າ ຂອງ ຫວຽດນາມ ຢູ່ງານຕະຫລາດນັດ ອາຊຽນ - ຈີນ
ພາບ: internet
|
ເລື່ອງຈັດຕັ້ງ ງານຕະຫລາດນັດ ຈີນ - ອາຊຽນ ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ ສຳເລັດຜົນ ຄັ້ງນີ້ ຄືດັ່ງຄຳຢືນຢັນຂອງທ່ານນາຍົກລັດຖະມົນຕີ Nguyen Tan Dung ທ່ີ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ ແມ່ນກາລະໂອກາດດີເພື່ອໃຫ້ບັນດາປະເທດ ອາຊຽນ ແລະ ຈີນ ເພີ່ມທະວີການພົວພັນຮ່ວມມື, ການຄ້າ, ການຊຸກຍູ້ການພົວພັນຄູ່ຮ່ວມມືຍຸດທະສາດ ອາຊຽນ - ຈີນ ນັບມື້ນັບພັດທະນາ. ງານຕະຫລາດນັດ ຈີນ - ອາຊຽນ ແລະ ກອງປະຊຸມສຸດຍອດການລົງທຶນ, ການຄ້າ ຈີນ - ອາຊຽນ ປີນີ້ ໄດ້ກາຍເປັນຫນຶ່ງໃນບັນດາເຄື່ອງມືຕົ້ນຕໍປະກອບສ່ວນຫັນເຂດການຄ້າເສລີ ອາຊຽນ - ຈີນ ໃຫ້ປະກົດຜົນເປັນຈິງ.