(vovworld)- ໃນຈຳນວນສະຖານທີ່ທ່ອງທ່ຽວທີ່ລືຊື່ຫລາຍແຫ່ງຂອງພາກພື້ນ ອາຊຽນ, ນະຄອນຫລວງ ຂອງແຕ່ລະປະເທດສະມາຊິກ ອາຊຽນ ຍາມໃດກໍແມ່ນສະຖານທີ່ທ່ອງທ່ຽວດຶງດູດໃຈນັກທ່ອງທ່ຽວ. ມານີລາ ນະຄອນຫລວງທີ່ສວຍງາມຂອງປະເທດ ຟິລິບປີນກໍແມ່ນຫນຶ່ງໃນຈຳນວນນະຄອນເຫົ່ຼານັ້ນ. ເຖິງວ່າ ນະຄອນແຫ່ງນີ້ແມ່ນເກົ່າແກ່ກໍຕາມ ແຕ່ ມານີລາ ກໍແມ່ນນະຄອນທີ່ທັນສະໄຫມ ເພາະວ່າຢູ່ທີ່ນີ້ ບໍ່ພຽງແຕ່ມີສູນການຄ້າໃຫຍ່ຊັ້ນນຳຢູ່ ອາຊີ ເປັນຈຳນວນຫລາຍ ເທົ່ານັ້ນ ຫາກຍັງແມ່ນສະຖານທີ່ຍັງຄົງຮັກສາຮ່ອງຮອຍປະຫວັດສາດແຫ່ງການຕໍ່ສູ້ຂອງປະເທດ ຟິລິບປີນ ອີກດ້ວຍ.
ໃນສາຍຕາຂອງນັກທ່ອງທ່ຽວມານີລາແມ່ນນະຄອນຫລວງທີ່ຂະຫຍັນຂັນເຄື່ອນຂອງປະເທດທີ່ພວມໃນທ່າພັດທະນາ ດ້ວຍບັນດາຕືກອາຄານຊັ້ນສູງ, ສູນການຄ້າທີ່ຫລາຍແຫ່ງທີ່ຄັບຄາຫນາແຫນ້ນ. ລະບົບລົດໄຟດ້ວຍລາຍຈ່າຍຖືກອັນໄດ້ສ້າງເງື່ອນໄຂສະດວກໃຫ້ແກ່ນັກທ່ອງທ່ຽວໄປມາເມື່ອໄປທ່ຽວຊົມໃນນະຄອນ. ນອກນັ້ນ ນັກທ່ອງທ່ຽວສາມາດໄປຢ້ຽມຢາມເຂດໃຈກາງ ມານີລາ ດ້ວຍ ລົດ jeepney ຊື່ງແມ່ນພາຫະນະໄປມາຕົ້ນຕໍຢູ່ທີ່ນີ້ ຄ້າຍຄືລົດສາມລໍ້ຢູ່ໄທ ແລ່ນຕາມຖະໜົນສາຍນັ້ນ. ຈຸດພິເສດນັ້ນແມ່ນ ບັນດາລົດແບບນີ້ໄດ້ຖືກທາສີຫລາກຫລາຍທີ່ສວຍງາມ ສະແດງໃຫ້ເຫັນນິດໄສຂອງເຈົ້າຂອງລົດ.
ໃນສາຍຕາຂອງນັກທ່ອງທ່ຽວມານີລາແມ່ນນະຄອນຫລວງ
ທີ່ຂະຫຍັນຂັນເຄື່ອນ
ພາບ: internet
|
ເມື່ອເວົ້າເຖິງບັນດາສູນການຄ້າໃນພາກພື້ນ, ຜູ້ຄົນທັງຫລາຍເຄີຍເວົ້າເຖິງ ໄທ, ສິງກະໂປ, ມາເລເຊຍ ຫາກບໍ່ເຄີຍເຕື້ອງເຖິງ ມານີລາ ຊື່ງແມ່ນແຫ່ງເຕົ້າໂຮມສູນການຄ້າໃຫຍ່ອັນດັບຫນຶ່ງຢູ່ອາຊີ. ຢູ່ ມານີລາ ມີສິນຄ້າທຸກປະເພດ, ຈາກສິນຄ້າມີຄຸນນະພາບສູງດ້ວຍຍີ່ຫໍ້ທີ່ລືຊື່ໃນໂລກຕະຫລອດຮອດສິນຄ້າຜະລິດພາຍໃນປະເທດຫລາຍປະເພດ. Makati City ສູນການຄ້າໃຫຍ່ກວ່າໝູ່ຢູ່ ມານີລາ ຊື່ງແມ່ນບ່ອນທີ່ດຶງດູດນັກທ່ອງທ່ຽວມາຢ້ຽມຢາມ ແລະ ຊື້ເຄື່ອງຂອງເປັນຈຳນວນຫລວງຫລາຍ, ດ້ວຍລະບົບສູນການຄ້າທີ່ກວ້າງໃຫຍ່ ແລະ ປະກອບສິນຄ້າທຸກປະເພດຄື: ເກີບ, ໂສ້ງເສື້ອ, ເຄື່ອງຫັດຖະກຳສິລະປະກຳ, ເຄື່ອງໃຊ້ສອຍໃນຄອບຄົວ. ບັນດາອາຄານຢູ່ທີ່ນີ້ໄດ້ຮັບການກໍ່ສ້າງເຊື່ອມຕໍ່ກັນດ້ວຍຂົວໃນອາຄານ ສະນັ້ນນັກທ່ອງທ່ຽວສາມາດໄປມາຢ່າງສະດວກໂດຍບໍ່ຕ້ອງອອກຖະຫນົນເທື່ອ. ເອື້ອຍ ຫງວຽນທິມີນຮ່າ, ພາລະກອນຫ້ອງການໄດ້ແບ່ງປັນວ່າ: ບັນດາສູນການຄ້າໃຫຍ່ໄດ້ສ້າງຄວາມປະທັບໃຈໃຫ້ແກ່ເອື້ອຍຫລາຍເມື່ອໄປຢ້ຽມຢາມ ຟິລີບປິນໃນໂອກາດປີໃຫມ່ຜ່ານມາ.
“ຂ້າພະເຈົ້າຮູ້ສຶກປະທັບໃຈຫລາຍເມື່ອໄປຢ້ຽມຢາມບັນດາສູນການຄ້າ. ຢູ່ທີ່ນີ້ ສິນຄ້າແມ່ນອຸດົມສົມບູນ ແລະ ໄດ້ຮັບການສັບຊ້ອນຢ່າງລະບຽບຮຽບຮ້ອຍ ແລະ ສວຍງາມ. ພິເສດແມ່ນກິລິຍາທ່າທີ່ຂອງຜູ້ຂາຍເຄື່ອງ. ເຂົາເຈົ້າມີຄວາມຊຳນານໃນການຂາຍເຄື່ອງ, ດ້ວຍຄວາມສຸດຈິດສຸດໃຈ ແລະ ເປີດອົກເປີດໃຈກັບລູກຄ້າຫລາຍ.”
ລົດ jeepne ຂົນສົ່ງຜູ້ໂດຍສານໄປມາຢ່າງສະດວກ
ພາບ:internet
|
ເມື່ອມາຢ້ຽມຢາມມານີລາ, ນອກຈາກໄປຢ້ຽມຢາມບັນດາສູນການຄ້າໃຫຍ່ແລ້ວ, ນັກທ່ອງທ່ຽວມັກທ່ຽວຊົມຕະຫລາດກາງຄືນ Quiabo. ຢູ່ທີ່ນີ້ ນັກທ່ອງທ່ຽວສາມາດຊື້ບັນດາເຄື່ອງຫັດຖະກຳສິລະປະກຳທີ່ໄດ້ຮັບການຜະລິດຢ່າງຄ່ອງແຄ້ວຈາກນັກສິລະປະການຟິລີບປີນອີກດ້ວຍ.
ບໍ່ພຽງແຕ່ແມ່ນນະຄອນຫນຸ່ມ ແລະ ຂະຫຍັນຂັນເຄ່ືອນເທົ່ານັ້ນ, ມານີລາ ຍັງຄົງຮັກສາຈຸດເກົ່າແກ່ໄວ້ໄດ້ ເພາະວ່າ ຢູ່ທີ່ນີ້ ມີບັນດາປູຊະນີຍະສະຖານປະຫວັດສາດ, ບັນດາກຳແພງເກົ່າ, ປ້ອມປືນໃຫຍ່ທີ່ເກົ່າແກ່ອີກດ້ວຍ. ນັກທ່ອງທ່ຽວເຄີຍເວົ້າວ່າ: ໄປຢ້ຽມຢາມມານີລາ ຖ້າບໍ່ທັນມາຢ້ຽມຊົມ Intramoros ໝາຍຄວາມວ່າບໍ່ທັນເຖິງ ມານີລາເທື່ອ. Intramoros ຕາມພາສາ ຟິລິບປີນແມ່ນ “ບໍລິເວນພາຍໃນກຳແພງ”. ນີ້ແມ່ນເຂດກຳແພງເກົ່າໂດຍຊາວ ແອດສະປາຍກໍ່ສ້າງໃນຊຸມປີ 1571 ເພື່ອຮັບໃຊ້ຈຸດປະສົງປົກຄອງຂອງຕົນຢູ່ປະເທດນີ້. ເຂດກຳແພງເກົ່າຖືກຕັ້ງຢູ່ປາກແມ່ນ້ຳ Pagis ດ້ວຍຂຸມຄອງເລິກຫລາຍແຫ່ງ ແລະ ກຳແພງຫີນມີຄວາມສູງ 6 ແມັດ, ຍາວ 4,5 ກິໂລແມັດເຊິ່ງອ້ອມຮອບເຂດທີ່ມີເນື້ອທີ່ກ້ວາງ 64 ເຮັກຕາ. ກິດຈະກຳນີ້ ລວມມີ ວີນລາ, ຫໍປະສາດຫລາຍຫລັງ ພ້ອມດ້ວຍໂບດ, ໂຮງຮຽນ ແລະ ຕືກອາຄານຂອງກົງຈັກປົກຄອງແອດສະປາຍ. ກ່ອນນີ້ ກຳແພງ Intramuros ໄດ້ຮັບການກໍ່ສ້າງດ້ວຍໄມ້ ແຕ່ມາຮອດປີ 1590 ເຈົ້າຄອງຜູ້ທຳອິດຂອງ ມານີລາແມ່ນທ່ານ Santiago ໄດ້ອອກຄຳສັ່ງທຳລາຍບັນດາເຂດກຳແພງໄມ້ເພື່ອກໍ່ສ້າງກຳແພງດ້ວຍຫີນ ແລະ ມີຄວາມຫນາ 10 ແມດ, ພ້ອມທັງກໍ່ສ້າງປ້ອມເວັນຍາມ ແລະ ປ້ອມປືນໃຫຍ່. ກຳແພງເກົ່ານີ້ຖືກທຳລາຍໃນສົງຄາມໂລກຄັ້ງທີ 2 ແຕ່ບາງປູຊະນີຍະສະຖານທີ່ມີຄຸນຄ່າຍັງຄົງຕົວຈົນເຖິງປະຈຸບັນ. ໃນຈຳນວນເຫລົ່ານັ້ນ, ໂບດ San Augustin ແມ່ນແຫ່ງທີ່ສ້າງຄວາມປະທັບໃຈກວ່າໝູ່ໃຫ້ແກ່ນັກທ່ອງທ່ຽວເມື່ອມາຢ້ຽມຢາມ. ນີ້ແມ່ນກິດຈະກຳຫນຶ່ງດຽວທີ່ຍັງຄົງຮັກສາສະຖາປັດຕະຍະກຳທີ່ເປັນເອກະລັກສະເພາະແບບເອີລົບໄດວ້. ໂດຍໄດ້ຮັບການກໍ່ສ້າງໃນໄລຍະ 1578 - 1606, ໂບດ San Augustin ໄດ້ຮັບຖືວ່າແມ່ນໂບດເກົ່າແກ່ກວ່າໝູ່ ຟິລີບປີນ ແລະ ໄດ້ຮັບການຮັບຮອງຈາກ UNESCO ແມ່ນມໍລະດົກວັດທະນະທຳຂອງໂລກ. ອ້າຍເລຫຽນ, ນັກສະຖາປັດ ຜູ້ທີ່ມີໂອກາດໄປເຮັດວຽກ ຢູ່ ຟິລີບປີນ ໃຫ້ຮູ້ວ່າ:
“ກຳແພງເກົ່າແຫ່ງນີ້ແມ່ນງາມຫລາຍ ແລະ ເຮັດໃຫ້ຂ້າພະເຈົ້າເຂົ້າໃຈກ່ຽວກັບຍຸກສະໄຫມຜ່ານມາ, ກ່ຽວກັບອະດີດຕະການທີ່ສະຫງ່າລາສີຂອງຊາວ ຟິລີບປີນ. ອຳນາດການປົກຄອງຢູ່ທີ່ນີ້ປະຕິບັດວຽກງານອະນຸລັກຮັກສາດີທີ່ສຸດ ສະນັ້ນ ບັນດາປູຊະນີຍະສະຖານປະຫວັດສາດຈຶ່ງຮັກສາຮູບເດີມໄວ້ຄືເກົ່າ.”
ອາດຈະເວົ້າໄດ້ວ່າ, ດ້ວຍບັນດາປູຊະນີຍະສະຖານປະຫວັດສາດທີ່ເປັນເອກະລັກສະເພາະ, ບັນດາສູນການຄ້າທີ່ສ້າງຄວາມປະທັບໃຈນັ້ນ, ມານີລາ ກາຍເປັນສະຖານທີ່ດຶງດູດນັກທ່ອງທ່ຽວມາຢ້ຽມຢາມນັບມື້ນັບຫລາຍ.