(vovworld) - ໃນວິວັດທະນາການສ້າງປະຊາຄົມ ອາຊຽນ ໃນປີ 2015, ບັນດາປະເທດ ອາຊຽນ ໄດ້ວາງຈຸດໝາຍມຸ່ງໄປເຖິງປະຊາຄົມ ອາຊຽນ ປອດຢາເສບຕິດໃນປີ 2015. ທີ່ກອງປະຊຸມ ຂັ້ນລັດຖະມົນຕີສາມຝ່າຍຄັ້ງທີ 12 ກ່ຽວກັບການຮ່ວມມືປ້ອງກັນ ແລະ ຕ້ານຢາເສບຕິດ ລະຫວ່າງ ຫວຽດນາມ, ລາວ ແລະ ກຳປູເຈຍ ເຊິ່ງຈັດຂຶ້ນຢູ່ນະຄອນຫລວງ ຮ່າໂນ້ຍ ຫວ່າງແລ້ວນີ້, ການນຳບັນດາກະຊວງ, ອົງການກ່ຽວຂ້ອງຂອງສາມປະເທດໄດ້ສະແດງໃຫ້ເຫັນຄວາມຕັດສິນໃຈປະຕິບັດຈຸດໝາຍດັ່ງກ່າວ.
ຢາເສບຕິດ ໄດ້ ແລະ ພວມແມ່ນໄພນາບຂູ່ຕໍ່ປະເທດຕ່າງໆໃນໂລກ ແລະ ພິເສດ ແມ່ນຢູ່ພາກພື້ນອາຊຽນ. ໂດຍຮັບຮູ້ໄພພິບັດດັ່ງກ່າວຢ່າງຈະແຈ້ງ, ບັນດາປະເທດ ອາຊຽນ ເວົ້າລວມ ແລະ ຫວຽດນາມ, ລາວ ແລະ ກຳປູເຈຍ ເວົ້າສະເພາະ ພວມສະແດງໃຫ້ເຫັນຄວາມຕັດສິນໃຈດ້ານການເມືອງຢ່າງຈະແຈ້ງໃນການສຸມທຸກແຫລ່ງກຳລັງ ແລະ ຖືການລົງທຶນໃຫ້ແກ່ວຽກງານປ້ອງກັນ,ຕ້ານ ແລະ ຄວບຄຸມຢາເສບຕິດແມ່ນວຽກງານປະກອບສ່ວນໃຫ້ແກ່ການພັດທະນາແບບຍືນຍົງຂອງປະເທດຊາດ. ໃນຊຸມປີຜ່ານມາ, ດ້ວຍແຫລ່ງກຳລັງພາຍໃນຂອງຕົນ ພ້ອມກັບການຊ່ວຍເຫລືອ, ການປະສານສົມທົບຈາກປະຊາຄົມໂລກ, ລັດຖະບານ ຫວຽດນາມ, ລາວ ແລະ ກຳປູເຈຍ ໄດ້ເປັນເຈົ້າການໃນການຜັນຂະຫຍາຍແຜນນະໂຍບາຍຢ່າງຄົບຊຸດ, ຮອບດ້ານ, ມີມາດຕະການຕ່າງໆຢ່າງຕັ້ງຫນ້າເພື່ອປ້ອງກັນ, ຕ້ານອາດຊະຍາ
ກຳ ແລະ ໄພຢາເສບຕິດ ແລະ ບັນລຸໝາກຜົນດີພໍສົມຄວນໃນການເພີ່ມທະວີການຮ່ວມມືກັບສາກົນໃນການປ້ອງກັນຕ້ານຢາເສບຕິດ. ກອງປະຊຸມຂັ້ນລັດຖະມົນຕີກ່ຽວກັບການຮ່ວມມືໃນການປ້ອງກັນຕ້ານຢາເສບຕິດ ແມ່ນເວທີປາໄສທີ່ມີຄວາມສຳຄັນຍິ່ງເພື່ອໃຫ້ສາມປະເທດແລກປ່ຽນ, ປຶກສາຫາລື, ຕີລາຄາສະພາບການ, ວາງອອກບັນດາມາດຕະການປະສານສົມທົບກັນ ຫນູນຊ່ວຍເຊິ່ງກັນ ແລະກັນ, ສ້າງກຳລັງແຮງເພື່ອຍູ້ໄພຢາເສບຕິດໃຫ້ຖອຍໄປ, ກ້າວໄປເຖິງຍາດໄຊຊະນະໃນການຕໍ່ສູ້ຕ້ານຢາເສບຕິດ. ພົນໂທ ດັ້ງວັນຮຽວ, ຮອງລັດຖະມົນຕີຜູ້ປະຈຳກະຊວງຕຳຫລວດ ຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າໄດ້ສຸມໃສ່ຊີ້ນຳການປະຕິບັດເນື້ອໃນຜ່ານ 4 ຂົງເຂດ. ທີຫນຶ່ງ ສືບຕໍ່ຊຸກຍູ້ການແລກປ່ຽນຂໍ້ມູນຂ່າວສານລະຫວ່າງສາມປະເທດກ່ຽວກັບການປ້ອງກັນ ແລະ ຕ້ານຢາເສບຕິດ. ຂ້າພະເຈົ້າຖືວ່າ ນີ້ແມ່ນບັນຫາສຳຄັນທີ່ສຸດ, ເພາະວ່າ ປະຈຸບັນ ອາດຊະຍາກຳຢາເສບຕິດເຄື່ອນໄຫວຂ້າມຊາດ ແລະ ມີລັກສະນະສັບສົນທີ່ສຸດ. ທີສອງ ແມ່ນສືບຕໍ່ການປະສານສົມທົບລະຫວ່າງສາມປະເທດໃນບັນດາແຜນການລະອຽດເພື່ອຊອກຈັບອາດຊະຍາກຳຢາເສບຕິດ. ບັນຫາທີສາມ ແມ່ນສືບຕໍ່ຊ່ວຍເຫລືອບຳລຸງສ້າງພະນັກງານ ແລະ ປະກອບພາຫະນະອຸປະກອນຮັບໃຊ້ການປ້ອງກັນ ແລະ ຕ້ານອາດຊະຍາກຳຢາເສບຕິດ. ບັນຫາສຸດທ້າຍແມ່ນ ພວກເຮົາຈະເພີ່ມທະວີການປະສານສົມທົບລະຫວ່າງຕຳຫລວດສອງຝ່າຍຢູ່ເຂດຊາຍແດນຕິດກັບ ກຳປູເຈຍ ກໍ່ຄື ກັບລາວ.”
ບັນດາຜູ້ແທນສາມປະເທດ ຫວຽດນາມ, ລາວ ແລະ ກຳປູເຈຍ ເຂົ້າຮ່ວມ
ກອງປະຊຸມ
ພາບ:internet |
ໃນຂອບເຂດສາມປະເທດ, ອາດຊະຍາກຳຢາເສບຕິດໄດ້ສວຍໃຊ້ເງື່ອນໄຂພູມີປະເທດ, ຄວາມຊີນເຄີຍໃນການເຄື່ອນໄຫວພົວພັນແລກປ່ຽນດ້ານເສດຖະກິດ, ການໄປມາຢື້ຢາມຖາມຂ່າວຂອງປະຊາຊົນ 3 ປະເທດ ເພື່ອຂົນສົ່ງ, ຄ້າຂາຍຢາເສບຕິດຜ່ານຊາຍແດນ. ເພາະສະນັ້ນ, ລັດຖະບານ 3 ປະເທດ ຖືວ່າ: ລົບລ້າງໄພຢາເສບຕິດ ແມ່ນການຕໍ່ສູ້ຮ່ວມກັນ, ໃນນັ້ນ ຜົນສຳເລັດຂອງແຕ່ລະປະເທດແມ່ນຕິດພັນຢ່າງແຫນ້ນແຟ້ນນຳກັນ ແລະ ກໍແມ່ນໄຊຊະນະລວມຂອງທັງສາມປະເທດ. ທ່ານ It Sam Heng ລັດຖະມົນຕີກະຊວງສັງຄົມ ນັກຮົບເກົ່າ ແລະ ຟື້ນຟູ ຊາວຫນຸ່ມ, ຮອງປະທານຄະນະກຳມະການແຫ່ງຊາດປ້ອງກັນ ແລະ ຕ້ານຢາເສບຕິດ ກຳປູເຈຍ ໃຫ້ຮູ້ວ່າ: ໃນປີ 2011 - 2012 ຜ່ານມາ, ໃນການປາບປາມອາດຊະຍາກຳຢາເສບຕິດລະຫວ່າງສາມປະເທດກໍຄືການສົມທົບລະຫວ່າງອຳນາດການປົກຄອງສາມປະເທດ, ອຳນາດການປົກຄອງບັນດາແຂວງມີຊາຍແດນຕິດຈອດກັນ. ສາມປະເທດໄດ້ແກ້ໄຂຢ່າງທັນການ ແລະ ບັນລຸຜົນງານຫລາຍຢ່າງໃນການປາບປາມອາດຊະຍາກຳຢາເສບຕິດ. ໃນນັ້ນ ມີຫລາຍກໍລະນີອັນຕະລາຍທີ່ສຸດ. ທ່ານ It Sam Heng ໄດ້ຕີລາຄາສູງຄວາມມານະພະຍາຍາມຂອງບັນດາແຂວງຊາຍແດນ.
“ຄວາມຈິງ ຍັງມີຫລາຍບັນຫາກ່ຽວຂ້ອງເຖິງຢາເສບຕິດ. ເພາະວ່າ ເມື່ອພວກເຮົາປາບປາມ, ອາດຊະຍາກຳຢາເສບຕິດເຄີຍໃຊ້ກົນອຸບາຍໃຫມ່. ບັນດາກົນອຸບາຍຂອງພວກເຂົານັ້ນແມ່ນ: ຂົນສົ່ງຢາເສບຕິດຂ້າມຊາຍແດນ, ທີສອງຢາກຖືປະເທດເຮົາແມ່ນບ່ອນຜະລິດ ແລະ ແຈກຢາຍຢາເສບຕິດ. ເຖິງຢ່າງໃດກໍຕາມ, ພວກເຮົາບັນລຸຜົນງານໄດ້ຫລາຍຢ່າງແລ້ວ ແຕ່ຫນ້າທີ່ຂອງພວກເຮົາຍັງຄົງຫນັກຫນ່ວງທີ່ສຸດ.”
ຕັ້ງຫນ້າຊຸກຍູ້ການປະຕິບັດແຜນການດຳເນີນງານ ອາຊຽນ ກ່ຽວກັບການປ້ອງກັນ ຕ້ານການຜະລິດ, ຂົນສົ່ງ ແລະ ນຳໃຊ້ຢາເສບຕິດບໍ່ຖືກກັບກົດໝາຍໄລຍະ 2009 - 2015 ແລະ ວິວັດທະນາການສ້າງປະຊາຄົມ ອາຊຽນ ປອດຢາເສບຕິດໃນປີ 2015 ແມ່ນຈຸດໝາຍສູງສຸດຂອງທັງສາມປະເທດ ຫວຽດນາມ, ກຳປູເຈຍ ແລະ ລາວ. ລັດຖະບານແຕ່ລະປະເທດລ້ວນແຕ່ຍົກອອກບັນດາມາດຕະການເພື່ອປະຕິບັດຈຸດໝາຍດັ່ງກ່າວໃນໄລຍະໄວທີ່ສຸດ. ທ່ານ It Sam Heng ຮອງປະທານຄະນະກຳມະການແຫ່ງຊາດ ກ່ຽວກັບການປ້ອງກັນ ແລະ ຕ້ານຢາເສບຕິດ ກຳປູເຈຍ ໃຫ້ຮູ້ວ່າ:
“ກ່ຽວກັບບັນຫານີ້ ລັດຖະບານ ກຳປູເຈຍ ມີຄວາມຕັດສິນໃຈສູງ. ລັດຖະບານ ກຳປູເຈຍ ໄດ້ສ້າງກົດໝາຍສະບັບໃຫມ່ກ່ຽວກັບການຕໍ່ສູ້ປ້ອງກັນ ແລະ ຕ້ານຢາເສບຕິດ, ຜ່ານການປະຕິບັດກົດໝາຍສະບັບນີ້, ພວກເຮົາຈະເພີ່ມທະວີການຕໍ່ສູ້ປ້ອງກັນ ແລະ ຕ້ານຢາເສບຕິດ. ພວກເຮົາເພີ່ມທະວີການແຊກແຊງກໍຄືການປາບປາມອາດຊະຍາກຳຢາເສບຕິດ. ບັນຫາຫນຶ່ງອີກ, ພວກເຮົາຕ້ອງເພີ່ມທະວີການສຶກສາໃນແຕ່ລະປະເທດ. ເພື່ອໃຫ້ສັງຄົມມີຄວາມເຂົ້າໃຈຕໍ່ຄວາມອັນຕະລາຍຂອງໄພຢາເສບຕິດ. ຂ້າພະເຈົ້າປາດຖະຫນາວ່າ ດ້ວຍຄວາມມານະພະຍາຍາມຂອງແຕ່ລະປະເທດ, ສາມປະເທດ ຫວຽດນາມ, ລາວ ແລະ ກຳປູເຈຍ ກໍຄືບັນດາປະເທດໃນພາກພື້ນ ອາຊຽນ ຈະກາຍເປັນເຂດປອດຢາເສບຕິດຢ່າງວ່ອງໄວ.”
ການເຄື່ອນໄຫວໂຄສະນາວຽກງານປ້ອງກັນ ແລະ ຕ້ານຢາເສບຕິດ ຢູ່ ຫວຽດນາມ
ພາບ:baothainguyen.org.vn |
ດ້ວຍຄວາມຕັດສິນໃຈ ແລະ ບາດກ້າວຮ່ວມມືຢ່າງລະອຽດ, ເພື່ອຍູ້ແຮງການຮ່ວມມືຢ່າງແຫນ້ນແຟ້ນລະຫວ່າງສາມປະເທດ ແລະ ບັນດາປະເທດສະມາຊິກ ອາຊຽນອື່ນ. ກອງປະຊຸມຂັ້ນລັດຖະມົນຕີ ຫວຽດນາມ, ລາວ ແລະ ກຳປູເຈຍ ກ່ຽວກັບການປ້ອງກັນ ແລະ ຕ້ານຢາເສບຕິດລະຫວ່າງ ຫວຽດນາມ, ກຳປູເຈຍ ແລະ ລາວ ເພື່ອປະກອບສ່ວນເຂົ້າໃນກິດຈະການປ້ອງກັນ ແລະ ຕ້ານຢາເສບຕິດຂອງພາກພື້ນ ແລະ ໃນໂລກ. ປະກອບສ່ວນຫັນຈຸດໝາຍປະຊາຄົມ ອາຊຽນ ປອດຢາເສບຕິດໃນປີ 2015 ຈະປະກົດຜົນເປັນຈິງ.