(vovworld) - ໃນໄລຍະ 45 ປີ ຜ່ານມາ, ນັບແຕ່ເມື່ອ ຫວຽດນາມ ແລະ ກຳປູເຈຍສ້າງສາຍພົວພັນທາງການທູດ, ການພົວພັນມິດຕະພາບ ແລະ ການຮ່ວມມືຊ່ວຍເຫລືອເຊິ່ງກັນ ແລະ ກັນ ລະຫວ່າງສອງປະເທດ ນັບມື້ນັບໄດ້ຮັບການປັບປຸງ ແລະ ພັດທະນາຢ່າງຮອບດ້ານ. ການພົວພັນລະຫວ່າງສອງປະເທດບັນລຸໄດ້ບັນດາຜົນງານອັນໃຫຍ່ຫລວງ, ເພາະວ່າ ຄຽງຄູ່ກັບຄວາມຕັດສິນໃຈດ້ານການເມືອງຂອງການນຳຂັ້ນສູງສອງຝ່າຍ, ບັນດາກົນໄກຮ່ວມມືລະຫວ່າງສອງປະເທດໄດ້ຮັບການສ້າງຂຶ້ນເທື່ອລະກ້າວ ແລະ ສວມບົດບາດສຳຄັນທີ່ມີຕໍ່ການຊຸກຍູ້ການພົວພັນລະຫວ່າງສອງປະເທດ.
ທ່ານນາຍົກລັດຖະມົນຕີ ຫວຽດນາມ Nguyen Tan Dung ແລະ ນາຍົກລັດຖະມົນຕີ ກຳປູເຈຍ ສຳເດັດ ຮຸນແຊນ
ພາບ: internet
|
ຄະນະກຳມະການປະສົມກ່ຽວກັບການຮ່ວມມືເສດຖະກິດ, ວັດທະນະທຳ, ວິທະຍາສາດເຕັກນິກ ລະຫວ່າງ ຫວຽດນາມ ແລະ ກຳປູເຈຍ ແມ່ນກົນໄກການຮ່ວມມືລະຫວ່າງລັດຖະບານສອງປະເທດ. ກົນໄກນີ້ໄດ້ຮັບການສ້າງຂຶ້ນເມື່ອປີ 1994, ໂດຍໄດ້ຮັບການມອບໝາຍຈາກທ່ານນາຍົກລັດຖະມົນຕີສອງປະເທດ, ລັດຖະມົນຕີ ການຕ່າງປະເທດຂອງແຕ່ລະປະເທດ ເປັນປະທານອະນຸກຳມະການຮ່ວມມື ແລະ ບັນດາສະໄຫມປະຊຸມຂອງຄະນະກຳມະການປະສົມເຊິ່ງຖືກຜັດປ່ຽນກັນ ຈັດຂຶ້ນ
ປະຈຳປີ. ເພື່ອແນໃສ່ປະຕິບັດກົນໄກຮ່ວມມືລະຫວ່າງລັດຖະບານສອງປະເທດໃຫ້ປະກົດຜົນເປັນຈິງ, ສອງຝ່າຍໄດ້ແລກປ່ຽນບັນດາຄະນະການນຳຂັ້ນສູງ, ບັນດາຄະນະກຳມະການສະເພາະກິດເປັນປະຈຳ ເພື່ອແບ່ງປັນບົດຮຽນໃນວຽກງານນິຕິບັນຍັດ, ຕິດຕາມກວດກາ, ຫນູນຊ່ວຍບຳລຸງສ້າງພະນັກງານ.
ພ້ອມກັບບັນດາກົນໄກຮ່ວມມືລະຫວ່າງສູນກາງ, ບັນດາກະຊວງ, ຄະນະ, ຂະແຫນງການຂອງສອງປະເທດ ລ້ວນແຕ່ມີການພົວພັນຮ່ວມມືລະອຽດ, ປະຕິບັດຕາມຂໍ້ຕົກລົງຮ່ວມມືປະຈຳປີ. ກະຊວງສຶກສາ ແລະ ບຳລຸງສ້າງ ຫວຽດນາມ ແລະ ກະຊວງສຶກສາ, ຊາວຫນຸ່ມ ແລະ ກິລາ ກຳປູເຈຍ ກໍໄດ້ສ້າງກົນໄກແລກປ່ຽນບົດຮຽນ ແລະ ບຳລຸງສ້າງແຫລ່ງຊັບພະຍາກອນມະນຸດ. ກ່າວຄຳເຫັນຕໍ່ກັບວົງການນັກຂ່າວ, ທ່ານ Hun Phany ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງລາຊະອານາຈັກ ກຳປູເຈຍ ປະຈຳ ຫວຽດນາມ ເວົ້າວ່າ:
“ພັກ, ລັດຖະບານ ແລະ ປະຊາຊົນ ຫວຽດນາມ ຍາມໃດກໍຊ່ວຍເຫລືອ, ບຳລຸງສ້າງແຫລ່ງຊັບພະຍາກອນມະນຸດໃຫ້ແກ່ ກຳປູເຈຍ ດ້ວຍການສະຫນອງທຶນສຶກສາປະຈຳປີໃຫ້ແກ່ນັກສຶກສາ ເພື່ອໃຫ້ບັນດານັກສຶກສາພາຍຫລັງຮຽນຈົບກັບຄືນເມືອປະເທດປະກອບສ່ວນສ້າງສາ ແລະ ພັດທະນາປະເທດຊາດ, ນຳປະເທດກຳປູເຈຍ ກາຍເປັນປະເທດຮັ່ງມີເຂັ້ມແຂງໃນພາກພື້ນ ແລະ ໃນໂລກ.”
ງານມິດຕິງລະນຶກ 45 ປີ ແຫ່ງການສ້າງສາຍພົວພັນທາງການທູດລະຫວ່າງ
ຫວຽດນາມ ແລະ ກຳປູເຈຍ
ພາບ: internet
|
ການທູດປະຊາຊົນກໍແມ່ນຫນຶ່ງໃນບັນດາກົນໄກຮ່ວມມືໄດ້ຮັບຄວາມເອົາໃຈໃສ່ຊຸກຍູ້, ໃນນັ້ນ ການຮ່ວມມືລະຫວ່າງແນວໂຮມປະເທດຊາດ ຫວຽດນາມ ກັບແນວໂຮມສາມັກຄີພັດທະນາປະເທດ ກຳປູເຈຍ, ຄະນະຊາວຫນຸ່ມກອມມູນິດ ໂຮ່ຈິມີນ ກັບສະມາຄົມຊາວຫນຸ່ມກຳປູເຈຍ, ສະຫະພັນແມ່ຍິງ ຫວຽດນາມ ກັບສະມາຄົມແມ່ຍິງ ກຳປຸເຈຍ ເພື່ອສັນຕິພາບ ແລະ ການພັດທະນາ, ສະມາຄົມມິດຕະພາບ ຫວຽດນາມ ກຳປູເຈຍກັບສະມາຄົມມິດຕະພາບ ກຳປູເຈຍ ຫວຽດນາມ. ໃນໄລຍະຜ່ານມາ, ບັນດາອົງການນີ້ໄດ້ມີການເຄື່ອນໄຫວອຸດົມສົມບູນຫລາຍຢ່າງ ແລະ ແທດຈິງ. ທ່ານ ຫວູຫມາວ ປະທານສະມາຄົມມິດຕະພາບ ຫວຽດນາມ ກຳປູເຈຍ ໃຫ້ຮູ້ວ່າ:
“ຍາມໃດ ພວກຂ້າພະເຈົ້າ ກໍຄິດວ່າ: ຄົນລຸ້ນຫນຸ່ມ ຈະແມ່ນກຳລັງຮັກສາຄວາມສາມັກຄີລະຫວ່າງສອງປະເທດ ຫວຽດນາມ ແລະ ກຳປູເຈຍ. ຍາມໃດ ພວກຂ້າພະເຈົ້າ ກໍເອົາໃຈໃສ່ພວກນ້ອງນັກສຶກສາກຳປູເຈຍ ທີ່ຮຳ່ຮຽນຢູ່ ຫວຽດນາມຢ່າງສຸດຈິດສຸດໃຈ. ໃນໄລຍະມໍ່ໆມານີ້ ພວກຂ້າພະເຈົ້າໄດ້ຈັດຕັ້ງໃຫ້ບັນດາຄອບຄົວ ຫວຽດນາມຊ່ວຍເຫລືອ ບັນດານັກສຶກສາ ກຳປູເຈຍ ທີ່ພວມຮຳ່ຮຽນຢູ່ ຫວຽດນາມ, ແຜ່ບໍລິຈາກເພື່ອຊ່ວຍເຫລືອບັນດາຄອບຄົວທຸກຍາກຢູ່ ກຳປູເຈຍ.”
ຫວຽດນາມ ແລະ ກຳປູເຈຍ ມີເສັ້ນຊາຍແດນຮ່ວມທາງບົກຍາວກວ່າ 1.100 ກິໂລແມດ, ຜ່ານ 10 ແຂວງຂອງຫວຽດນາມ ແລະ 9 ແຂວງຂອງ ກຳປູເຈຍ. ນັ້ນແມ່ນທ່າໄດ້ປຽບອັນໃຫຍ່ຫລວງສຳລັບການພົບປະແລກປ່ຽນປະຊາຊົນ, ສ້າງຄວາມສະດວກສຳລັບການແລກປ່ຽນຄ້າຂາຍ. ເພື່ອຕອບສະຫນອງຄວາມຕ້ອງການພັດທະນາຂອງແຕ່ລະປະເທດ, ການນຳພັກ, ລັດ ແລະ ປະຊາຊົນ ຫວຽດນາມ ແລະ ກຳປູເຈຍ ໄດ້ກຳນົດວ່າ: ວຽກງານເພີ່ມທະວີການຮ່ວມມືລະຫວ່າງບັນດາແຂວງຊາຍແດນຍາມໃດກໍໄດ້ຮັບຖືເປັນສຳຄັນຈາກສອງປະເທດ. ຕາມຂໍ້ຕົກລົງ ລະຫວ່າງສອງຝ່າຍເມື່ອປີ 2004, ກົນໄກກອງປະຊຸມຮ່ວມມື ແລະ ພັດທະນາບັນດາແຂວງ ຢູ່ ເຂດຊາຍແດນ ໄດ້ຮັບການສ້າງຂຶ້ນ ແລະ ຖືກຈັດຂຶ້ນປະຈຳປີ ໂດຍຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ກຳປູເຈຍ ແລະ ລັດຖະມົນຕີການຕ່າງປະເທດ ຫວຽດນາມ ເປັນເຈົ້າພາບຮ່ວມ. ມາຮອດປະຈຸບັນ, ສອງຝ່າຍໄດ້ດຳເນີນກອງປະຊຸມເປັນ 7 ຄັ້ງແລ້ວ ແລະ ກອງປະຊຸມຫວ່າງມໍ່ໆມານີ້ ຖືກຈັດຂຶ້ນຢູ່ ນະຄອນ ໂຮ່ຈິມີນ (3/2012). ຕາມພົນຈັດຕະວາ ຮ່ວາງກຽ່ນ, ຮອງຫົວຫນ້າຄະນະຊີ້ນຳໂຄງການສ້າງເສັ້ນທາງລາດຕາເວັນເຂດຊາຍແດນ ຫວຽດນາມ, ລາວ ແລະ ກຳປູເຈຍ ແລ້ວ, ຜ່ານກອງປະຊຸມຄັ້ງຕ່າງໆ, ບັນດາກະຊວງ, ຂະແຫນງການ ແລະ ທ້ອງຖິ່ນຢູ່ເຂດຊາຍແດນສອງປະເທດ ລ້ວນແຕ່ຢືນຢັນວ່າ: ນີ້ແມ່ນກົນໄກການຮ່ວມມືຢ່າງມີປະສິດທິຜົນ, ຊ່ວຍເຫລືອໂດຍກົງໃຫ້ແກ່ບັນດາທ້ອງຖິ່ນເຂດຊາຍແດນສອງປະເທດເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ການຮ່ວມມືຊ່ວຍເຫລືອເຊິ່ງກັນ ແລະ ກັນ, ສອດຄອ່ງກັບຄວາມຮຽກຮ້ອງຕ້ອງການຕົວຈິງຂອງແຕ່ລະທ້ອງຖິ່ນ, ພິເສດກົນໄກນີ້ ໄດ້ປະກອບສ່ວນຢ່າງຕັ້ງຫນ້າເຂົ້າໃນການຮັບປະກັນສະຖຽນລະພາບ, ຄວາມໝັ້ນຄົງ ຢູ່ເຂດຊາຍແດນລະຫວ່າງສອງປະເທດ.
“ສະພາບຄວາມໝັ້ນຄົງຢູ່ເຂດຊາຍແດນ ຈະນຳມາຊຶ່ງຄວາມສັນຕິພາບມິດຕະພາບໃຫ້ແກ່ສອງປະເທດ, ສ້າງເງື່ອນໄຂໃຫ້ປະຊາຊົນສອງປະເທດໄປມາຢື້ຢາມຖາມຂ່າວ ແລະ ແລກປ່ຽນເຊິ່ງກັນ ແລະ ກັນ. ຖ້າມີບັນຫາຕິດຂັດ, ພວກຂ້າພະເຈົ້າພ້ອມກັນເຈລະຈາ, ສ້າງຄວາມເຫັນດີເຫັນພ້ອມລະຫວ່າງສອງຝ່າຍເພື່ອສ້າງການພົວພັນທີ່ດີໃຫ້ແກ່ສອງປະເທດ.”
ບັນດາກົນໄກຮ່ວມມືຮອບດ້ານ, ໝັ້ນຄົງຍາວນານ ໄດ້ສວມບົດບາດສຳຄັນທີ່ມີຕໍ່ການພັດທະນາຂອງການພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ຫວຽດນາມ ແລະ ກຳປູເຈຍ. ສາຍພົວພັນ ລະຫວ່າງສອງປະເທດ ຫວຽດນາມ ແລະ ກຳປູເຈຍ ໄດ້ກາຍເປັນແບບຢ່າງແຫ່ງການພົວພັນຮ່ວມມືມິດຕະພາບ, ການຊ່ວຍເຫລືອເຊິ່ງກັນ ແລະ ກັນ ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມືຄວາມຈະເລີນຮຸ່ງເຮືອງ ແລະ ພັດທະນາຢູ່ພາກພື້ນອາຊີຕາເວັນອອກສຽງໃຕ້.