(vovworld) - ເພື່ອໂຄສະນາ ແລະ ແນະນຳພາບພົດຂອງປະເທດຊາດ ແລະ ຊາວ ອິນໂດເນເຊຍ ເຖິງບັນດາປະເທດໃນພາກພື້ນ ແລະ ໂລກນັ້ນ. ໃນຊຸມປີຜ່ານມາ, ລັດຖະບານ ອິນໂດເນເຊຍ ໄດ້ຜັນຂະຫຍາຍໂຄງການທຶນສຶກສາບຳລຸງສ້າງຫລາຍໂຄງການທີ່ສະຫງວນໃຫ້ແກ່ນັກສຶກສາ ແລະ ພະນັກງານຢູ່ ຫລາຍປະເທດໃນພາກພື້ນ ແລະ ໃນໂລກ. ປີ 2012, ລັດຖະບານ ອິນໂດເນເຊຍ ສືບຕໍ່ສະຫນອງໂຄງການທຶນສຶກສາ Darmasiswa ຕື່ມອີກ. ຜ່ານນັ້ນ, ບັນດານັກສຶກສາຕ່າງປະເທດຈະມີກາລະໂອກາດເຂົ້າໃຈກວ່າກ່ຽວກັບວັດທະນະທຳສັງຄົມທີ່ມີຫລາຍຮູບຫລາຍແບບຂອງປະເທດຊາດທີ່ມີໝູ່ເກາະນັບພັນແຫ່ງນີ້.
ໂຄງການທຶນສຶກສາ Darmasiswa ແມ່ນໂຄງການບຳລຸງສ້າງປະຈຳປີ ໂດຍລັດຖະບານ ອິນໂດເນເຊຍ ສະຫງວນໃຫ້. ໂຄງການນີ້ເລີ່ມຕົ້ນຜັນຂະຫຍາຍແຕ່ປີ 2001 ແລະ ຈຳນວນນັກຮຽນເຂົ້າຮ່ວມໂຄງການນີ້ນັບມື້ນັບເພີ່ມຂຶ້ນໃນແຕ່ລະປີ. ບັນດານັກຮຽນທີ່ເຂົ້າຮ່ວມໂຄງການຈະໄດ້ຍົກເວັ້ນຄ່າຮຽນ ພ້ອມທັງໄດ້ຮັບການຫນູນຊ່ວຍລາຍຈ່າຍ, ຄ່າກິນຢູ່. ໂຄງການນີ້ ໄດ້ຊ່ວຍນັກສຶກສາປະເທດຕ່າງໆ ມີກາລະໂອກາດໄປຍັງປະເທດ ອິນໂດເນເຊຍ ເພື່ອຮຳ່ຮຽນ ແລະ ຊອກຮູ້ກ່ຽວກັບດ້ານພາສາ, ວັດທະນະທຳ ແລະ ຊີວິດການເປັນຢູ່ຂອງຊາວ ອິນໂດເນເຊຍກວ່າ.
ໃນສົກຮຽນ 2012 - 2013, ທຶນສຶກສາ Darmasiswa ລວມມີ: ບັນດາຊຸດຮຽນໄລຍະສັ້ນ ແລະ ຍາວ ກ່ຽວກັບພາສາອິນໂດເນເຊຍ, ດົນຕີ, ບັນດາວາດຟ້ອນ ແລະ ອາຊີບຜະລິດເຄື່ອງສິລະປະຫັດຖະກຳຢູ່ ມະຫາວິທະຍາໄລທີ່ມີຊື່ສຽງຕ່າງໆຂອງ ອິນໂດເນເຊຍ.ທ່ານ I Nyoman ທີ່ປຶກສາດ້ານວັດທະນະທຳ ແລະ ຖະແຫລງ ຂ່າວ ຂອງສະຖານທູດອິນໂດເນເຊຍ ປະຈຳ ຫວຽດນາມ ໃຫ້ຮູ້ວ່າ:
“ ກໍເຊັ່ນດຽວກັບປະເທດອື່ນໆ, ໃນແຕ່ລະປີ ລັດຖະບານ ອິນໂດເນເຊຍ ໄດ້ມອບທຶນສຶກສາໃຫ້ແກ່ນັກຮຽນຕ່າງປະເທດຫລາຍຄົນ. ທຶນສຶກສານີ້ມີຊື່ວ່າ: Darmasiswa ລວມມີ 3 ລາຍການ: ບຳລຸງສ້າງໄລຍະຍາວ, ໄລຍະກາງ ແລະ ໄລຍະສັ້ນ. ປີນີ້ ລັດຖະບານ ອິນໂດເນເຊຍ ໄດ້ມອບ 700 ທຶນສຶກສາ ໃຫ້ແກ່ນັກສຶກສາຢູ່ຫລາຍປະເທດ, ໃນນັ້ນ ຫວຽດນາມ ມີ 25 ຄົນໄດ້ຮັບທຶນສຶກສານີ້.”
ປະເທດ ອິນໂດເນເຊຍ
ພາບ:internet
|
ຕາມທ່ານ I Nyoman ແລ້ວ, ໂຄງການທຶນສຶກສາ Darmasiswa ໄດ້ຮັບການຜັນຂະຫຍາຍຕາມນະໂຍບາຍຫນູນຊ່ວຍການສຶກສາບຳລຸງສ້າງຂອງສະຖານທູດ ອິນໂດເນເຊຍ. ຈຸດໝາຍຂອງໂຄງການນີ້ແມ່ນສ້າງເງື່ອນໄຂເພື່ອໃຫ້ບັນດານັກຮຽນມາຈາກຫລາຍປະເທດໃນພາກພື້ນ ແລະ ໂລກ ສາມາດມາ ອິນໂດເນເຊຍ ເພື່ອຊອກຮູ້ທາງດ້ານວັດທະນະທຳ ແລະ ຊາວອິນໂດເນເຊຍ, ເພີ່ມທະວີຄວາມເຂົ້າອົກເຂົ້າໃຈກວ່າກ່ຽວກັບອິນໂດເນເຊຍໃນຫລາຍຂົງເຂດຄື: ດ້ານພາສາ, ວັດທະນະທຳ, ສິລະປະ, ຊີວິດສັງຄົມ… ຜ່ານນັ້ນ ຈະປະກອບສ່ວນໂຄສະນາ ແລະ ແນະນຳພາບພົດຂອງ ອິນໂດເນເຊຍ ເຖິງປະເທດອື່ນໆ. ພາຍຫລັງຫລາຍປີ, ໂຄງການນີ້ ບັນລຸໄດ້ໝາກຜົນອັນຕັ້ງຫນ້າ. ທ່ານ I Nyoman ເວົ້າວ່າ:
“ລັດຖະບານ ອິນໂດເນເຊຍ ຜັນຂະຫຍາຍໂຄງການນີ້ມາເປັນເວລາ ກວ່າ 10 ປີແລ້ວ. ໄລຍະຈະມາເຖິງ ໂຄງການທຶນສຶກສານີ້ ຈະກາຍເປັນການເຄື່ອນໄຫວປະຈຳປີ. ຄຸນນະພາບບັນດາຊຸດຮຽນ ແລະ ຈຳນວນນັກຮຽນເຂົ້າຮ່ວມນັບມື້ນັບເພີ່ມຂຶ້ນໃນແຕ່ລະປີ ພ້ອມກັບການພັດທະນາເສດຖະກິດສັງຄົມ ຢູ່ ອິນໂດເນເຊຍ.”
ນາງສາວ ອິນໂດເນເຊຍ ແນະນຳໃຫ້ນັກທ່ອງທ່ຽວການລະຫລິ້ນພື້ນເມືອງ
ພາບປະກອບ:internet
|
ທ່ານ I Nyoman ຍັງໃຫ້ຮູ້ວ່າ: ໃນປີ 2011, ມີນັກຮຽນ ຫວຽດນາມ 20 ຄົນໄດ້ຮັບທຶນສຶກສາດັ່ງກ່າວ, ສ່ວນໃນປີ 2012 ນີ້ ໂຄງການທຶນສຶກສາ Darmasiswa ຈະມອບທຶນສຶກສາໃຫ້ນັກຮຽນຫວຽດນາມ 25 ຄົນເພື່ອເຂົ້າຮ່ວມຊຸດຮຽນພາສາອິນໂດເນເຊຍໃນເວລາ 6 ເດືອນ. ບັນດານັກຮຽນຈະເລີ່ມຕົ້ນຊຸດຮຽນຂອງຕົນແຕ່ເດືອນ 9/2012 ຈະມາເຖິງ. ໂດຍແມ່ນນັກຮຽນຜູ້ຫນຶ່ງທີ່ໄດ້ຮັບທຶນສຶກສາໃນຄັ້ງນີ້, ນາງ Tran Huong Tra ບັນນາທິການລາຍການພາກພາສາ ອິນໂດເນເຊຍ, ສັງກັດລະບົບກະຈາຍສຽງພາສາຕ່າງປະເທດ - ວິທະຍຸກະຈາຍສຽງຫວຽດນາມ ໃຫ້ຮູ້ວ່າ:
“ຂ້າພະເຈົ້າແມ່ນຫນຶ່ງໃນຈຳນວນນັກຮຽນ 25 ຄົນທີ່ໄດ້ຮັບທຶນສຶກສາ Darmasiswa ຂອງສະຖານທູດ ອິນໂດເນເຊຍ ປະຈຳ ຫວຽດນາມ. ຂ້າພະເຈົ້າຄິດວ່າ ນີ້ແມ່ນຊຸດຮຽນທີ່ມີປະໂຫຍດສຳລັບຜູ້ທີ່ຢາກຝຶກຝົນຫລໍ່ຫລອມພາສາອິນໂດເນເຊຍ ກໍຄື ມີໂອກາດໄດ້ຊອກຮູ້ຕື່ມກ່ຽວກັບວັດທະນະທຳຂອງປະເທດນີ້. ຂ້າພະເຈົ້າປາດຖະຫນາວ່າ ພາຍຫລັງຊຸດຮຽນນີ້ ຂ້າພະເຈົ້າສາມາດໂອ້ລົມ ແລະ ນຳໃຊ້ພາສາອິນໂດເນເຊຍໄດ້ດີກວ່າ ເພື່ອຮັບໃຊ້ວຽກງານຂອງຂ້າພະເຈົ້າຢູ່ ວິທະຍຸກະຈາຍສຽງ ຫວຽດນາມ.”
ຜ່ານບັນດາຊຸດຮຽນ ຄືດັ່ງກ່າວ ລັດຖະບານ ອິນໂດເນເຊຍຢາກໂຄສະນາພາບພົດ, ແນະນຳປະເທດຊາດ ແລະ ຊາວອິນໂດເນເຊຍ ເຖິງປະເທດເພື່ອນມິດ. ສຳລັບບັນດານັກຮຽນໄດ້ຮັບທຶນສຶກສາ Darmasiswa ແລະ ບັນດາໂຄງການທຶນສຶກສາອື່ນໆ, ນີ້ແມ່ນໂອກາດເພື່ອໃຫ້ເຂົາເຈົ້າສາມາດຊອກຮູ້ກ່ຽວກັບດ້ານພາສາ, ສິລະປະວັດທະນະທຳທີ່ມີຫລາຍຮູບຫລາຍແບບຢູ່ປະເທດທີ່ມີກວ່າ 250 ຊົນເຜົ່າ, ຜ່ານນັ້ນປະຊາຊົນປະເທດຕ່າງໆສາມາດມີຄວາມເຂົ້າອົກເຂົ້າໃຈນຳກັນກວ່າ ແລະ ຫຍັບມໍ່ເຂົ້າໃກ້ກັນກວ່າ./.