(vovworld)- ໃນຊຸມປີຜ່ານມາ, ທະນາຄານໃຫຍ່ຫລາຍແຫ່ງໃນລະບົບທະນາຄານ ຫວຽດນາມ ໄດ້ດຳເນີນທຸລະກິດຢູ່ຕ່າງປະເທດ ເພື່ອຊອກຫາບັນດາກາລະໂອກາດດຳເນີນທຸລະກິດ. ທະນາຄານການຄ້າຫຸ້ນສ່ວນອຸດສາຫະກຳ ການຄ້າ ຫວຽດນາມ (Vietinbank), ເຖິງວ່າຫາກໍເປີດສາຂາໃຫມ່ຢູ່ນະຄອນຫລວງ ວຽງຈັນ ບໍ່ທັນຮອດ 1 ປີ ກໍຕາມ ແຕ່ໄດ້ຢັ້ງຢືນອິດທິພົນຊື່ສຽງ ແລະ ເຄື່ອງໝາຍການຄ້າຂອງຕົນເທື່ອລະກ້າວ ດ້ວຍບັນດາການເຄື່ອນໄຫວລົງທຶນຢູ່ປະເທດອ້າຍນ້ອງ
ຊື່ງແມ່ນຫນຶ່ງໃນບັນດາທະນາຄານຊັ້ນນຳ ຢູ່ ຫວຽດນາມ ດ້ວຍການເຕີບໂຕສູງພໍສົມຄວນ, ຄຸນນະພາບຜະລິດຕະພັນການບໍລິການທີ່ດີ, ເຄືອຂ່າຍເປີດກວ້າງ ດ້ວຍສາຂາ 160 ແຫ່ງ ແລະ 1100 ຫ້ອງທຸລະກຳ ຢູ່ 60 ແຂວງ, ນະຄອນ ໃນທ່ົວປະເທດ ຫວຽດນາມ. ໃນຊຸມປີມໍ່ໆມານີ້, Vietinbank ເລີ່ມຕົ້ນຜັນຂະຫຍາຍຍຸດທະສາດເຊື່ອມໂຍງເຂົ້າກັບເສດຖະກິດໂລກ ດ້ວຍການກໍ່ສ້າງ ແລະ ຂະຫຍາຍເຄືອຂ່າຍຢູ່ຕ່າງປະເທດ. ສາຂາທຳອິດຂອງ Vietinbank ຢູ່ ອາຊີ ແມ່ນຕັ້ງຢູ່ນະຄອນຫລວງ ວຽງຈັນ ໄດ້ຮັບການເປີດສະຫລອງເມື່ອເດືອນ 2/2012. ທ່ານ ຫງວຽນດຶກແທ່ງ, ຮອງຜູ້ອຳນວຍການໃຫຍ່ Vietinbank ໃຫ້ຮູ້ວ່າ: Vietinbank ເລືອກເຟັ້ນ ສປປ ລາວ ແມ່ນຈຸດນັດພົບໃນຂະບວນວິວັດຂະຫຍາຍເຄືອຂ່າຍຂອງຕົນອອກສູ່ຕ່າງປະເທດ ເພາະວ່າ ລະຫວ່າງ ຫວຽດນາມ ແລະ ລາວ ມີສາຍພົວພັນທີ່ເປັນມູນເຊື້ອມາແຕ່ດົນນານ.
“ຕະຫລາດ ລາວ ແມ່ນຕະຫລາດນ້ອຍ ແຕ່ມີຄວາມສາມາດບົ່ມຊ້ອນ, ມີທ່າໄດ້ປຽບຫລາຍຢ່າງ. ນີ້ແມ່ນຕະຫລາດທີ່ຂະຫຍັນຂັນເຄື່ອນ, ມີທີ່ຕັ້ງເສດຖະກິດໃນພາກພື້ນ ອາຊີຕາເວັນອອກສຽງໃຕ້. ໃນອະນາຄົດໃກ້ໆນີ້, ລາວ ແມ່ນຕະຫລາດມີຄວາມສາມາດບົ່ມຊ້ອນໃຫຍ່ໃນການພັດທະນາເສດຖະກິດ.”
ຮອງນາຍົກລັດຖະມົນຕີ ລາວ ສົມສະຫວາດ ເລັ່ງສະຫວັດ ເຂົ້າຮ່ວມພິທີເປີດສະຫລອງ ສາຂາ Vietinbank ຢຸ່ ສປປ ລາວ
ພາບ:tinmoi.com.vn
|
ເຖິງວ່າຫາກໍ່ເປີດສາຂາ Vietinbank ໄດ້ມີການເຄື່ອນໄຫວເປັນປົກກະຕິ, ເປັນປະຈຳ ແລະ ສະຫນອງບັນດາຜະລິດຕະພັນບໍລິການຢ່າງຄົບຖ້ວນຄື: ໂອນເງິນ, ດຳເນີນທຸລະກິດແລກປ່ຽນເງິນຕາຕ່າງປະເທດ, ບໍລິການບັນຊີ ແລະ ເງິນຝາກປະຢັດ, ໃຫ້ກູ້ຢືມ, ອຸປະຖຳການຄ້າ, ບໍລິການບັດເງິນ..ແລະ ພິເສດ ແມ່ນສະຫນອງສິນເຊື່ອໃຫ້ແກ່ບັນດາວິສາຫະກິດ ຫວຽດນາມ ພວມລົງທຶນຢູ່ລາວ ຄື: ບໍລິສັດຮ່ວມທຸລະກິດ Star Telecom, ກຸ່ມບໍລິສັດຢາງພາລາ ຫວຽດນາມ, ກຸ່ມບໍລິສັດເຄມີ, ກຸ່ມບໍລິສັດຖ່ານຫີນແຮ່ທາດ. ດຣ ສົມພອນ ສີຈະເລີນ, ເອກອັກຄະລັດຖະທູດ ລາວ ປະຈຳ ຫວຽດນາມ ໄດ້ຕີລາຄາວ່າ: Vietinbank ໄດ້ ແລະ ພວມແມ່ນຂົວເຊື່ອມຕໍ່ເພື່ອຫນູນຊ່ວຍ, ຊຸກຍູ້ການພົວພັນລົງທຶນ ການຄ້າ ລະຫວ່າງ ສອງປະເທດ ຫວຽດນາມ ແລະ ລາວ. “Vietinbank ເປີດສາຂາຢູ່ ສປປ ລາວ ເປັນການສະແດງໃຫ້ເຫັນວ່າ, ຝ່າຍ ຫວຽດນາມ ມີຄວາມໄວ້ເນື້ອເຊື່ອໃຈເມື່ອລົງທຶນຢູ່ ລາວ. ນີ້ແມ່ນການຊຸກຍູ້ການຮ່ວມມືດ້ານການຄ້າລະຫວ່າງສອງປະເທດນັບມື້ນັບພັດທະນາ ແລະ ສ້າງທ່າແຮງໃຫ້ແກ່ບັນດາບໍລິສັດຫວຽດນາມ ລົງທຶນ ຢູ່ ລາວ ນັບມື້ນັບຫລາຍກວ່າ. ປະກອບສ່ວນສຳຄັນເຂົ້າໃນການພັດທະນາການພົວພັນຫລາຍດ້ານລະຫວ່າງ ລາວ ແລະ ຫວຽດນາມ ໃຫ້ນັບມື້ນັບເຂົ້າສູ່ລວງເລິກ. ຂ້າພະເຈົ້າປາດຖະຫນາວ່າ ດ້ວຍບົດຮຽນດຳເນີນທຸລະກິດສຳເລັດຜົນຂອງ Vietinbank ຢູ່ ຫວຽດນາມ, Vietinbank ຈະເພີ່ມທະວີການຊຸກຍູ້ດ້ານການຄ້າໃຫ້ພັດທະນາຍິ່ງຂຶ້ນ.”
ດ້ວຍຈຳນວນທຶນເບື້ອງຕົ້ນເມື່ອເປີດສາຂາຢູ່ ລາວ ແມ່ນ 12,5 ລ້ານ USD, ປະຈຸບັນ Vietinbank ໄດ້ເພີ່ມຈຳນວນທຶນຂຶ້ນເຖິງ 22 ລ້ານ USD ເພື່ອຕອບສະຫນອງຄວາມຕ້ອງການນັບມື້ນັບເພີ່ມຂຶ້ນຂອງລູກຄ້າ. ໃນວິວັດທະນາການແຫ່ງການເຄື່ອນໄຫວ, Vietinbank ໄດ້ຮັບການຫນູນຊ່ວຍ, ສົ່ງເສີມຈາກລັດຖະບານກໍຄືບັນດາອົງການກ່ຽວຂ້ອງຂອງ ລາວ. ຕາມທ່ານ ຫງວຽນດຶກແທ່ງ, ຮອງຜູ້ອຳນວຍການ Vietinbank ເມື່ອເຄື່ອນໄຫວຢູ່ຕະຫລາດລາວ, Vietinbank ກໍປະສົບກັບຄວາມຫຍຸ້ງຍາກຫລາຍຢ່າງ.
“ລາວ ມີນະໂຍບາຍລົງທຶນຕ່າງປະເທດສະດວກ ແລະ ງ່າຍດາຍ, ເປັນຕົ້ນໃນຂົງເຂດການເງິນທະນາຄານ ແລະ ສັນຍາການຄ້າເສລີ ອາຊຽນ ກໍແມ່ນກອບກົດໝາຍທີ່ດີເຊິ່ງສ້າງເງື່ອນໄຂໃຫ້ແກ່ບັນດາວິສາຫະກິດໄປລົງທຶນຢູ່ ລາວ. ເມື່ອລົງທຶນຢູ່ ລາວ ພວກຂ້າພະເຈົ້າຮູ້ສຶກຄືດັ່ງລົງທຶນ ຢູ່ ຫວຽດນາມ.”
ຍາມໃດ Vietinbank ກໍກຳນົດຈະລົງທຶນຍາວນານຢູ່ ລາວ ກໍຄືເປີດກວ້າງເຄືອຂ່າຍສາຂາ, ສະຫນອງແຫລ່ງການເງິນໃຫ້ແກ່ລາວ. ໃນໄລຍະຈະມາເຖິງ, Vietinbank ຈະຂໍຫນັງສືອະນຸຍາດຫັນປ່ຽນຈາກສາຂາເປັນທະນາຄານນ້ອຍ ແລະ ເປີດສາຂາຕື່ມອີກຢູ່ບັນດາເຂດເສດຖະກິດຈຸດສຸມຂອງລາວ. ຈຸດໝາຍຂອງ Vietinbank ໃນຊຸມປີຕໍ່ໄປ ແມ່ນພະຍາຍາມສະຫນອງບັນດາບໍລິການການເງິນທະນາຄານທີ່ກ້າວຫນ້າໃຫ້ແກ່ຜູ້ອຸປະໂພກບໍລິໂພກ ລາວ ເວົ້າລວມ ກໍຄືບັນດາວິສາຫະກິດ ຫວຽດນາມ ພວມລົງທຶນຢູ່ ລາວ ແລະ ບັນດາວິສາຫະກິດ ລາວ ພວມມີການພົວພັນຄ້າຂາຍກັບ ຫວຽດນາມ ເວົ້າສະເພາະ.