(vovworld)-
ອາທິດຜ່ານມາ, ພວກເຮົາໄດ້ຮັບຈົດໝາຍ, ອີແມວຫຼາຍສະບັບ ແລະ ໂທລະສັບຂອງຜູ້ຟັງຜູ້ອ່ານຫຼາຍຄົນ ຝາກມາຍັງລາຍການ ເພື່ອສະແດງອາລົມຈິດຂອງຕົນເມື່ອໄດ້ຮັບຂ່າວທ່ານພົນເອກຫວໍ້ງວຽນຢາບ ເຖິງແກ່ມໍລະນະກຳ. VOV ຂໍຄັດສະເໜີບາງເນື້ອໃນບັນດາຈົດໝາຍດັ່ງກ່າວ.
(ພາບ: baomoi.com)
ໃນອາທິດຜ່ານມາ, ພວກເຮົາໄດ້ຮັບຈົດໝາຍຈາກທ່ານສຸບິນ ພິມມະສອນ, ລັດວິສາຫະກິດນ້ຳມັນເຊື້ອໄຟລາວ ສາຂາແຂວງຈຳປາສັກ ແລະ ທ່ານຫງວຽນວັນແຕວ ຊາວຫວຽດນາມ ອາໄສຢູ່ໄທ. ຈົດໝາຍຂອງພວກທ່ານມີຮູບພາບຂອງທ່ານພົນເອກຫວໍ້ງວຽນຢາບ ແລະ ສະແດງອາລົມຈິດຄວາມຮັກແພງ, ຄວາມອາໄລອາວອນແບ່ງເບົາຄວາມທຸກໂສກເສົ້າເສຍດາຍຕໍ່ການຈາກໄປຂອງທ່ານພົນເອກ.
ເພື່ອນຮ່ວາຍອານ, ມິງທູ, ນັກສຶກສາມະຫາວິທະຍາໄລແຫ່ງຊາດລາວຝາກຈົດໝາຍມາຍັງລາຍການໂດຍໃຫ້ຮູ້ວ່າ: “ພວກຂ້າພະເຈົ້າແມ່ນບັນດານັກສຶກສາຫວຽດນາມ ພວມຮ່ຳຮຽນຢູ່ລາວ ມີຄວາມຕົກສະເງີ້ເມື່ອໄດ້ ຮັບຂ່າວທ່ານພົນເອກຫວໍ້ງວຽນຢາບ ເຖິງແກ່ມໍລະນະກຳ. ພວກຂ້າພະເຈົ້າບໍ່ສາມາດກັບເມືອປະເທດໄດ້ ຍ້ອນພວມຮ່ຳຮຽນ. ພວກຂ້າພະເຈົ້າໄດ້ສະແດງ ຄວາມໂສກເສົ້າເສຍດາຍທ່ານພົນເອກດ້ວຍວິທີສະເພາະຂອງຕົນຄື: ພວກຂ້າພະເຈົ້າໄດ້ເຂົ້າຮ່ວມພິທີໄວ້ອາໄລທ່ານພົນເອກຢູ່ສະຖານທູດຫວຽດນາມ ປະຈຳລາວ, ຊັກທຸງຊາດລົງເຄິ່ງເສົາຢູ່ຫໍພັກນັກສຶກສາ ແລະ ພິເສດ, ຍາມໃດພວກຂ້າພະເຈົ້າກໍ່ຕິດຕາມຂ່າວກ່ຽວກັບພິທີງານສົບລະດັບຊາດຢູ່ບ້ານເກີດເມືອງນອນທາງວິທະຍຸກະຈາຍສຽງຫວຽດນາມ ພາກພາສາລາວ….“
ຮູບທ່ານພົນເອກຫວໍ້ງຽນຢາບເຂົ້າຮ່ວມກອງປະຊຸມໃຫ່ຍ
ຜູ້ແທນທົ່ວປະເທດ ພັກ ປຊຊ ປະຕິວັດລາວ ຄັ້ງທີ 2
(ພາບ: nld.com.vn)
ທ່ານເພັດອຳນວຍ, ນັກຮົບເກົ່າຢູ່ແຂວງຫົວພັນ - ນະຄອນຫຼວງແຫ່ງການປະຕິວັດ ຂອງລາວ ໃນສະໄໝສົງຄາມ, ທັງແມ່ນແຫ່ງທີ່ທ່ານພົນເອກຫວໍ້ງວຽນຢາບ ຕາງໜ້າໃຫ້ພັກກອມມູນິດຫວຽດນາມ ມາເຂົ້າຮ່ວມກອງປະຊຸມໃຫ່ຍຜູ້ແທນທົ່ວປະເທດ ພັກ ປຊຊ ປະຕິວັດລາວ ຄັ້ງທີ 2 ເມື່ອເດືອນ ກຸມພາປີ 1972 …. ໄດ້ສະແດງຄວາມສະເທືອນໃຈທີ່ສຸດເມື່ອໄດ້ຮັບຂ່າວທ່ານ ພົນເອກຫວໍ້ງວຽນຢາບ ເຖິງແກ່ມໍລະນະກຳ. ທ່ານແບ່ງປັນວ່າ: “ຂໍຂອບອົກຂອບທ່ານພົນເອກທີ່ໄດ້ພອ້ມກັບທະຫານຫວຽດນາມ ຊ່ວຍພວກຂ້າພະເຈົ້າຂັບໄລ່ສັດຕູຜູ້ຮຸກຮານ. ຍ້ອນໄດ້ຮັບການຊ່ວຍເລື້ອຈາກທ່ານ ແລະ ທະຫານຫວຽດນາມ, ປຊຊ ລາວ ພວກຂ້າພະເຈົ້າຈຶ່ງໄດ້ດຳລົງຊີວິດໃນຄວາມສະຫງົບສຸກຄືທຸກວັນນີ້. ຂໍໃຫ້ດວງວິນຍານເພິ່ນຂຶ້ນສູ່ສຸຄະຕິດ້ວຍ“.
ເພື່ອນຄຳຜອງ ຢູ່ແຂວງບໍ່ແກ້ວ ໂທລະສັບມາລາຍການໂດຍແບ່ງປັນວ່າ: “ຂ້າພະເຈົ້າເຄີຍຮັບຊົມບັນດາລາຍການໂທລະພາບລາວ ທີ່ເວົ້າເຖິງພົນເອກຫວໍ້ງວຽນຢາບ, ພີເສດແມ່ນເລື່ອງສົມທົບກັບກອງທັບປະເທດລາວ ຕີເອົາຊະນະພວກລ່າເມືອງຂຶ້ນຝະລັ່ງ ໃນບັ້ນຮົບທາງພາກເໜືອຂອງລາວ, ເປີດກ້ວາງເຂດຕໍ່ຕ້ານລາວ, ສ້າງເປັນໄຊຊະນະດ້ຽນບຽນຝູ ທີ່ດັງກ້ອງກັງວານໄປທົ່ວໂລກໃນສະໄໝຕ້ານພວກລ່າເມືອງຂຶ້ນຝະລັ່ງ ແລະ ໄຊຊະນະຢູ່ທາງເລກ 9 ພາກໃຕ້ລາວ ໃນສະໄໝສົງຄາມຕ້ານຈັກກະພັດອາເມລິກາ, ຊ່ວຍ ປຊຊ ສອງປະເທດຫວຽດນາມ-ລາວ ໄດ້ດຳລົງຊີວິດໃນສັນຕິພາບ. ປຊຊ ລາວມີຄວາມຮູ້ບຸນຄຸນ ແລະ ເອກອ້າງທະນົງໃຈຕໍ່ເພິ່ນ“
ທ່ານພົນເອກຫວໍ້ງວຽນຢາບຟ້ອນລຳວົງກັບ
ທ່ານປະທານໄກສອນ ພົມວິຫານ
(ພາບ:dantri.com.vn)
ອ້າຍບຸນມີ ຢູ່ແຂວງຫົວພັນ ແບ່ງປັນວ່າ: ອ້າຍຢາກມາຢ້ຽມຢາມເຂດປູສະນີຍະສະຖານປະຫວັດສາດປະຕິວັດສຸພານຸວົງທີ່ສຸດ, ຢູ່ແຫ່ງນີ້ ມີຮູບຖ່າຍ 2 ແຜ່ນ ທີ່ຖ່າຍໃນໂອກາດທ່ານພົນເອກຫວໍ້ງວຽນຢາບ ເຂົ້າຮ່ວມກອງປະຊຸມໃຫ່ຍຜູ້ແທນທົ່ວປະເທດພັກ ປຊຊ ປະຕິວັດລາວ ຄັ້ງທີ 2 ເມື່ອເດືອນ ກຸມພາປີ 1972 ທີ່ແຂວງຫົວພັນ. ນັ້ນແມ່ນຮູບທ່ານພົນເອກຫວໍ້ງວຽນຢາບ ກຳລັງຟ້ອນລຳວົງກັບທ່ານປະທານໄກສອນ ພົມວິຫານ ຢູ່ຖ້ຳຟ້າແດງ (ວຽງໄຊ) ແລະ ຮູບຖ່າຍຕົ້ນໝາກສົ້ມໂອທີ່ທ່ານພົນເອກເອົາມາຈາກສວນຕົ້ນໄມ້ຂອງທ່ານປະທານໂຮ່ຈິມິນ ມາປູກຢູ່ຕໍ່ໜ້າປາກຖ້ຳທີ່ເຂດປູສະນີຍະສະຖານປະຫວັດສາດປະຕິວັດສຸພານຸວົງ-ບ່ອນທີ່ສະເດັດເຈົ້າສຸພານຸວົງ ເຄີຍດຳລົງຊີວິດ ແລະ ເຮັດວຽກໃນຊຸມປີແຫ່ງການຕໍ່ຕ້ານ.
ອ້າຍບຸນມີ ໃຫ້ຮູ້ວ່າ: ຢູ່ເຂດປູສະນີຍະສະຖານດັ່ງກ່າວ, ອ້າຍໄດ້ຮັບຟັງແນະນຳວ່າ: “ບັນດານັກປະຕິວັດຜູ້ອະວຸໂສເລ່ົາສູ່ຟັງວ່າ: ພາຍຫຼັງເຂົ້າຮ່ວມກອງປະຊຸມໃຫ່ຍ, ທ່ານພົນເອກຫວໍ້ງວຽນຢາບ ໄດ້ເຂົ້າຮ່ວມງານລ້ຽງ ແລະ ຟ້ອນລຳວົງກັບການນຳຂອງລາວ. ຕອນເຊົ້າມື້ຕໍ່ມາ, ເພິ່ນໄດ້ມາຢາມເຂດຖານທີ່ໝັ້ນຂອງທ່ານສຸພານຸວົງ, ປູກຕົ້ນໝາກສົ້ມໂອເປັນທີ່ລະນຶກ ແລ້ວເດີນທາງກັບເມືອປະເທດ. 40 ປີໄດ້ລ່ວງເລີຍໄປແລ້ວ, ແຕ່ຕົ້ນໝາກສົ້ມໂອທີ່ທ່ານພົນເອກປູກໃນມື້ນັ້ນຍັງຂຽວສົດງົດງາມຢູ ແລະ ໃຫ້ໝາກຫຼາຍທີ່ສຸດ ຍ້ອນໄດ້ຮັບການບົວລະບັດຮັກສາເປັນປະຈຳ “.
ທ່ານຜູ້ຟັງຜູ້ອ່ານທີ່ເຄົາລົບ! ທີ່ກ່າວມາຂ້າງເທິງນັ້ນ ແມ່ນຄັດສະເໜີບາງເນື້ອໃນຂອງຈົດໝາຍສະບັບຕ່າງໆທີ່ທ່ານຜູ້ຟັງຜູ້ອ່ານຝາກມາລາຍການໃນອາທິດຜ່ານມາ. ຖ້າທ່ານຜູ້ໃດມີຄຳຖາມ ກະລຸນາຝາກມາຍັງລາຍການຂອງພວກເຮົາຕາມທີ່ຢູ່: ວິທະຍຸກະຈາຍສຽງຫວຽດນາມ ພາກພາສາລາວ, ເຮືອນເລກທີ 45 ຖະໜົນບ່າຈ້ຽວຮ່າໂນ້ຍ- ເບີໂທ: 00844.38256631-ອີແມວ:Laovov@.yahoo.com. ຂໍຂອບໃຈ ທ່ານທີ່ໄດ້ຮັບຟັງ ແລະ ຊົມລາຍການຂອງພວກເຮົາ, ສະບາຍດີ!