ຕອບຄຳຖາມຈາກທ່ານຜູ້ຟັງ ທີ່ຝາກມາລາຍການໃນອາທິດຜ່ານມາ
Minh Duc -
(vovworld) - ໃນອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ໂທລະສັບ ແລະ ອີແມວ ຈາກທ່ານຜູ້ຟັງທີ່ຝາກມາລາຍການ. ໃນຈົດໝາຍທີ່ຝາກມາລາຍການປະກອບບັນດາຄຳເຫັນທີ່ມີປະໂຫຍດໃຫ້ແກ່ລາຍການ, ນອກນັ້ນ, ກໍຢາກຊອກຮູ້ກ່ຽວກັບຍານພາຫະນະບັນທຸກຜູ້ໂດຍສານເພື່ອຢ້ຽມຢາມນະຄອນຫຼວງຮ່າໂນ້ຍ ແລະ ໂຮງລະຄອນຕຸກກະຕານ້ຳທັງລອງ, ຮ່າໂນ້ຍ.
ເພື່ອນ ມີນາ ແກ້ວມາລີ, ພວມດຳລົງຊີວິດຢູ່ແຂວງ ບໍ່ແກ້ວ ໄດ້ສົ່ງອີແມວ ມາຍັງລາຍການໂດຍຖາມວ່າ: ຂ້າພະເຈົ້າພ້ອມກັບເພື່ອນມິດ ປະມານ 10 ຄົນຈະມາທ່ອງທ່ຽວຢູ່ຮ່າໂນ້ຍ. ພວກຂ້າພະເຈົ້າລ້ວນແຕ່ຢາກໄປຢ້ຽມຢາມຢູ່ໃນບໍລິເວັນນະຄອນຫຼວງຮ່າໂນ້ຍ ແຕ່ບໍ່ຮູ້ທາງໄປ ກໍ່ຄືບັນດາສະຖານທີ່ທ່ອງທ່ຽວ. ສະນັ້ນຢາກໃຫ້ທາງລາຍການແນະນຳໃຫ້ວິທີ່ໃດໜຶ່ງທີ່ສະດວກທີ່ສຸດ. ຂໍຂອບໃຈລາຍການ.
(ລົດໃຊ້ພະລັງງານໄຟຟ້າຮັບໃຊ້ນັກທ່ອງທ່ຽວ)
ເພື່ອນ ມີນາ ແກ້ວມາລີ ທີ່ຮັກແພງ, ປະຈຸບັນ, ຢູ່ໃຈກາງນະຄອນຫຼວງຮ່າໂນ້ຍ, ຢູ່ຖະໜົນ ດິງຕຽນຮ່ວາງ, ໜອງຮ່ວານກ໋ຽມ, ໄດ້ມີລົດໃຊ້ພະລັງງານໄຟຟ້າຮັບໃຊ້ນັກທ່ອງທ່ຽວຢູ່ພາຍໃນ ແລະ ຕ່າງປະເທດມາຢ້ຽມຢາມບັນດາສະຖານທີ ທີ່ມີຊື່ສຽງຢູ່ບໍລິເວັນ. ດ້ວຍຄວາມຍາວ 7 ກມ, ລົດໃຊ້ພະລັງງານໄຟຟ້າ ຈະແລ່ນໄປຜ່ານ 28 ຖະໜົນການຄ້າ, 13 ຖະໜົນອາຊີບຫັດຖະກຳ, 22 ສາລາ, 3 ວັດ, 8 ປູຊະນີຍະຊະຖານ, ທິວທັດເຂດໜອງຮ່ວານກ໋ຽມ ແລະ ຕະຫຼາດ ດົ່ງຊວນ. ລົດໃຊ້ພະລັງງານໄຟຟ້າສາມາດບັນທຸກຜູ້ໂດຍສານໄດ້ຈຳນວນ 8 ຄົນ, ໃຊ້ເວລາປະມານ 45 ນາທີ/ ຖ້ຽວ. ເປີດຮັບແຂກໃນເວລາ ຕອນກາງເວັນແຕ່ 8ໂມງ30 ນາທີ - ຕອນຄໍ່າແຕ່ 19ໂມງ - 23 ໂມງ. ເພື່ອນສາມາດຊື້ປີ້ຢູ່ກັບທີ່ເລີຍ. ຂໍອວຍພອນໃຫ້ເພື່ອນ ແລະ ສະມາຊິກໃນຄະນະມີການເດີນທາງດ້ວຍຄວາມມ່ວນຊື່ນ, ປອດໄພ.
(ການສະແດງລະຄອນຕຸກກະຕານ້ຳ)
ເພື່ອນ ວຽງ ສິນທຳມະນາວົງ ທີ່ຮັກແພງ, ສິລະປະລະຄອນຕຸກກະຕານ້ຳແມ່ນປະເພດສິລະປະສະແດງບົນ ເວທີ່ພື້ນເມືອງທີ່ເປັນເອກະລັກສະເພາະ, ຕິດພັນກັບ ພື້ນຖານອະລິຍະທຳປູກເຂົ້າ ນາທາມ ແລະ ໄດ້ມີມາກ່ອນນີ້ເກືອບພັນປີຢູ່ຫວຽດນາມ. ເມື່ອມີໂອກາດມາຮັບຊົມລາຍການສະແດງສິລະປະລະຄອນຕຸກກະຕານ້ຳຢູ່ ໂຮງລະຄອນຕຸກກະຕານ້ຳທັງລອງ, ສິ່ງທີ່ປະທັບໃຈທຳອິດ ແມ່ນການວາງສະແດງສິລະປະຈັດວາງບັນດາຕົວລະຄອນ ຕຸກກະຕານ້ຳທີ່ເຮັດດ້ວຍໄມ້ຊະນິດຕ່າງໆ, ມີສີສັນຫຼາກຫຼາຍເພື່ອຮັບໃຊ້ລາຍການສະແດງລະຄອນ ຕຸກກະຕານ້ຳ. ບັນດາ ລາຍການສະແດງລະຄອນຕຸກກະຕານ້ຳ ສ່ວນຫຼາຍແມ່ນບັນດາເລື່ອງລາວ, ເທບນິຍາຍ, ເລື່ອງລາວປະຫວັດສາດ, ຊີວິດອອກແຮງງານຂອງຊາວກະສີກອນຫວຽດນາມ... ອັນໄດ້ດຶງດູດແຂກມາຊົມເປັນຈຳນວນຫຼວງຫຼາຍ, ໂດຍສະເພາະແມ່ນຊາວຕ່າງປະເທດ. ນັກສິລະປີນ ຈູເລື້ອງ ຮອງຜູ້ອຳນວຍການ ໂຮງລະຄອນຕຸກກະຕານ້ຳທັງລອງ ໃຫ້ຮູ້ວ່າ:
“ໂຮງລະຄອນຂອງພວກຂ້າພະເຈົ້າເຄຶ່ອນໄຫວຕະຫຼອດປີເພື່ອຮັບໃຊ້ແຂກຄົນ ທັງຫຼາຍເພື່ອແນະນຳ ແລະ ໂຄສະນາຈຸດວັດທະນະທຳທີ່ເປັນເອກະລັກສະເພາະຂອງຫວຽດນາມ, ນັ້ນແມ່ນ ສິລະປະລະຄອນຕຸກກະຕານ້ຳ. ນີ້ແມ່ນປະເພດສິລະປະ ບໍ່ພຽງແຕ່ໄດ້ຮັບຄວາມສົນໃຈຈາກຊາວຫວຽດນາມເທົ່ານັ້ນ, ຫາກຍັງໄດ້ຮັບຄວາມສົນໃຈຈາກແຂກທ່ອງທ່ຽວສາກົນອີກດ້ວຍ. ໄລ່ມາຮອດປະຈຸບັນ, ໂຮງລະຄອນຕຸກກະຕານ້ຳຂອງພວກຂ້າພະເຈົ້າເຄື່ອນໄຫວໄດ້ 20 ປີແລ້ວ”.
ຂໍຂອບໃຈເພື່ອນ ວຽງ ສິນທຳມະນາວົງ ທີ່ເອົາໃຈໃສ່ເຖິງສິລະປະພິເສດຂອງຫວຽດນາມ. ເພື່ອນສາມາດມາຮັບຊົມການສະແດງຕຸກກະຕານ້ຳຢູ່ ໂຮງລະຄອນ ຕຸກກະຕານ້ຳທັງລອງ ທີ່ເຮືອນເລກທີ 57 B ຖະໜົນດິງຕຽນຮ່ວາງ - ຮ່າໂນ້ຍ.
ຖ້າທ່ານຜູ້ຟັງທ່ານໃດມີຄວາມສົນໃຈ ແລະ ມີຄຳຖາມກະລຸນາຝາກຈົດໝາຍມາຍັງລາຍການຂອງພວກເຮົາຕາມທີ່ຢູ່: ວິທະຍຸກະຈາຍສຽງຫວຽດນາມ ພາກພາສາລາວ, ເຮືອນເລກທີ 45 ຖະໜົນບ່າຈຽວຮ່າໂນ້ຍ ຫຼື ໂທມາໂດຍກົງກໍ່ໄດ້ຕາມເບີໂທ: 0084.4.38256631 ຫຼື ອີແມວ laovov@yahoo.com.
Minh Duc