ລາວແມ່ນປະເທດບ້ານໃກ້ເຮືອນຄຽງ, ມີການພົວພັນດ້ານການທູດອັນດີງາມກັບຫວຽດນາມ, ແມ່ນປະຕູສຳຄັນເພື່ອແຊກຊຶມເຂົ້າຕະຫຼາດໃຫຍ່ຂອງອະນຸພາກພື້ນອາຊີ. ປະຈຸບັນ, ການລົງທຶນຂອງຫວຽດນາມ ຢູ່ລາວ ພວມຢືນອັນດັບ 3, ສະນັ້ນ, ການເຄື່ອນໄຫວແລກປ່ຽນການຄ້າລະຫວ່າງ 2 ປະເທດມີຄວາມຟົດຟື້ນທີ່ສຸດ. ໃນນັ້ນ, ພົ້ນເດັ່ນຄືທະນາຄານ Sacombank. ທ່ານ ຟ້າມກວາງຟູ໋ກ, ຜູ້ອຳນວຍການໃຫຍ່ທະນາຄານ Sacombank ປະຈຳລາວ, ໃຫ້ຮູ້ວ່າ.
“Sacombank ສາຂາຢູ່ລາວ ໄດ້ຮັບການສ້າງຕັ້ງເມື່ອວັນທີ 12/12/2008, ວັນທີ 03/08/2015 Sacombank ໄດ້ດຳເນີນການຍົກລະດັບສາຂາຢູ່ລາວ ໃຫ້ກາຍເປັນທະນາຄານລູກຖືຫຸ້ນ 100%. ຜ່ານການເຄື່ອນໄຫວມາເປັນເວລາ 8 ປີ, Sacombank ລາວ ໄດ້ມີບັນດາບາດກ້າວເຕີບໂຕພໍສົມຄວນ, ນັບມື້ນັບຢືນຢັນອິດທິພົນຊື່ສຽງ, ເຊື່ອມໂຍງເຂົ້າກັບລະດັບການພັດທະນາເສດຖະກິດຂອງລາວ ຜ່ານການສະໜອງບັນດາ ມາດຕະການແກ້ໄຂດ້ານການເງິນຢ່າງຮອບດ້ານ ແລະ ບັນດາການບໍລິການທະນາຄານ ທັນສະໄໝ ທີ່ສະຫງວນໃຫ້ລູກຄ້າເຊິ່ງແມ່ນວິສາຫະກິດ, ປະຊາຊົນທຸກຊັ້ນຄົນຢູ່ທ້ອງຖິ່ນ ກໍຄື ວົງການຊາວຫວຽດນາມອາໄສຢູ່ລາວ ແລະ ບັນດາວິສາຫະກິດຫວຽດນາມ ທີ່ມີການລົງທຶນດຳເນີນທຸລະກິດຢູ່ລາວ”.
ແຫຼ່ງທຶນ FDI ຂອງຫວຽດນາມ ເຂົ້າລາວ ນັບມື້ນັບໄດ້ເພີ່ມຂຶ້ນຢ່າງຕໍ່ເນື່ອງໃນໄລຍະ 2011 – 2015, ນັບທັງຈຳນວນໂຄງການ ແລະ ຍອດຈຳນວນເງິນຈົດທະບຽນ. ໄລ່ຮອດທ້າຍເດືອນ 09/2016, ຫວຽດນາມ ມີ 266 ໂຄງການໄດ້ຮັບໜັງສືອະນຸຍາດລົງທຶນເຂົ້າລາວ ຈາກກະຊວງແຜນການ ແລະ ການລົງທຶນຫວຽດນາມ ດ້ວຍຍອດຈຳນວນທຶນຈົດທະບຽນແມ່ນ 5,1 ຕື້ USD, ທົບ 1,3 ເທົ່າ ເມື່ອທຽບໃສ່ປີ 2011 ກ່ຽວກັບຈຳນວນໂຄງການ ແລະ ທົບ 1,26 ເທົ່າ ກ່ຽວກັບຍອດຈຳນວນເງິນທຶນ; ລາວ ຢືນອັນດັບທີ 1 ໃນຈຳນວນ 64 ປະເທດ ແລະ ເຂດແຄ້ວນທີ່ມີການເຄື່ອນໄຫວລົງທຶນຂອງວິສາຫະກິດຫວຽດນາມ; ບັນດາວິສາຫະກິດຫວຽດນາມ ໄດ້ລົງທຶນຢູ່ 16/18 ແຂວງ, ນະຄອນຂອງລາວ. ທ່ານປະລິຍາເອກ ແບກຫງອກທັ໋ງ, ພະແນກແຜນການ ແລະ ພັດທະນາ, ມະຫາວິທະຍາໄລເສດຖະກິດແຫ່ງຊາດ ໃຫ້ຮູ້ວ່າ.
“ປະຈຸບັນ, ບັນດາຂົງເຂດລົງທຶນຂອງຫວຽດນາມ ຢູ່ລາວ ຕົ້ນຕໍແມ່ນພະລັງງານ, ການບໍລິການ, ພື້ນຖານໂຄງລ່າງ, ກະສິກຳ - ປ່າໄມ້, ຂຸດຄົ້ນບໍ່ແຮ່, ທະນາຄານ… ຫວຽດນາມ ແມ່ນ 1 ໃນບັນດາຄູ່ຮ່ວມມືໃຫຍ່ ມີລະດັບຍຸດທະສາດຂອງລາວ ແລະ ມີກາລະໂອກາດຫຼາຍຢ່າງໃນການພັດທະນາການພົວພັນຮ່ວມມືລະຫວ່າງຫວຽດນາມ - ລາວ. 2 ປະເທດ ມີການພົວພັນດ້ານເສດຖະກິດ ແລະ ການເມືອງພິເສດ. ສະນັ້ນ, ລັດຖະບານລາວ ກໍສະໜັບສະໜູນ ແລະ ໃຫ້ບຸລິມະສິດແກ່ບັນດາວິສາຫະກິດຫວຽດນາມ ທີ່ມາລົງທຶນ, ດຳເນີນທຸລະກິດຢູ່ລາວທີ່ສຸດ”.
ມີຫຼາຍໂຄງການລົງທຶນເຂົ້າລາວ ດ້ວຍຂອບຂະໜາດໃຫຍ່ຂອງຫວຽດນາມ ໄດ້ເຄື່ອນໄຫວຢ່າງມີປະສິດທິຜົນ, ນຳມາເຊິ່ງຜົນປະໂຫຍດຢ່າງແທດຈິງໃຫ້ແກ່ການພັດທະນາເສດຖະກິດ, ສັງຄົມຂອງລາວ, ປະກອບສ່ວນເພີ່ມລາຍຮັບງົບປະມານໃຫ້ລັດຖະບານລາວ ປະມານ 240 – 260 ລ້ານ USD/ປີ, ສ້າງວຽກເຮັດງານທຳໃຫ້ຜູ້ອອກແຮງງານ 35.000 ຄົນ. ຄາດວ່າ, ໃນປີ 2017, ຕົວເລກນີ້ຈະບັນລຸ 350 – 400 ລ້ານ USD/ປີ, ສ້າງວຽກເຮັດງານທຳໃຫ້ຜູ້ອອກແຮງງານລາວ ປະມານ 45.000 ຄົນ ແລະ ຈະສືບຕໍ່ເພີ່ມຂຶ້ນໃນຊຸມປີຕໍ່ໄປ. ໃນການພົບປະກັບບັນດາວິສາຫະກິດຫວຽດນາມ ລົງທຶນຢູ່ລາວ, ທ່ານນາຍົກລັດຖະມົນຕີລາວ ທອງລຸນ ສີສຸລິດ, ໄດ້ຕີລາຄາສູງບັນດາວິສາຫະກິດຫວຽດນາມ ທີ່ພວມເຄື່ອນໄຫວລົງທຶນຢູ່ລາວ.
(ທ່ານນາຍົກລັດຖະມົນຕີລາວ ທອງລຸນ ສີສຸລິດ)
ບັນດາໂຄງການລົງທຶນຂອງວິສາຫະກິດຫວຽດນາມ ຢູ່ລາວ ບໍ່ພຽງແຕ່ແມ່ນການເຄື່ອນໄຫວດ້ານເສດຖະກິດເຊິ່ງ 2 ຝ່າຍຕ່າງມີຜົນປະໂຫຍດເທົ່ານັ້ນ ຫາກຍັງສະແດງໃຫ້ເຫັນວ່າ ພັກ, ລັດ ແລະ ປະຊາຊົນຫວຽດນາມ ຍາມໃດກໍຖືປະເທດລາວ ອ້າຍນ້ອງເປັນສຳຄັນ ແລະ ປາດຖະໜາຢາກປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ, ສັງຄົມຂອງປະເທດລາວ ອີກດ້ວຍ. ປະກອບສ່ວນສຳຄັນເຂົ້າໃນການປັບປຸງ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ - ລາວ ຢ່າງບໍ່ຢຸດຢັ້ງ.