(vovworld) - ກອງປະຊຸມໃຫຍ່ແຂ່ງຂັນຮັກຊາດທົ່ວປະເທດຄັ້ງທີ 9, ພວມດຳເນີນຢູ່ຮ່າໂນ້ຍ, ແມ່ນເຫດການສຳຄັນຍິ່ງ ເພື່ອເຊີດຊູບັນດາແບບຢ່າງທີ່ດີເດັ່ນໃນໝູ່ປະຊາຊົນ, ນີ້ກໍ່ແມ່ນຂີດໝາຍເພື່ອປ່ຽນໃໝ່ວຽກງານແຂ່ງຂັນ, ຍ້ອງຍໍ ເພື່ອໃຫ້ການແຂ່ງຂັນຍ້ອງຍໍກາຍເປັນກຳລັງໜູນຢ່າງແທ້ຈິງ, ເສີມຂະຫຍາຍນຳ້ໃຈຮັກຊາດ, ຕັ້ງໜ້າຮຳ່ຮຽນ, ຕໍ່ສູ້ອອກແຮງງານທຳການຜະລິດໃນໝູ່ປະຊາຊົນທຸກຊັ້ນວັນນະ. ບົດຂຽນ “ການປ່ຽນໃໝ່ວຽກງານແຂ່ງຂັນຍ້ອງຍໍໃຫ້ມີເນື້ອແທ້ ແລະ ປະສິດທິຜົນ“ ຂອງນັກຂ່າວ ລືວຮ່ວຽນ - ມິງເຈົາ.
ວັນທີ 11/6/1948, ທ່ານປະທານປະເທດ ໂຮ່ຈີມິນ ໄດ້ອອກຄຳຮຽກຮ້ອງແຂ່ງຂັນຮັກຊາດ, ປຸກລະດົມຂະບວນການແຂ່ງຂັນຮັກຊາດໃນໝູ່ປະຊາຊົນຢ່າງເປັນທາງການ. ນັບແຕ່ນັ້ນມາຮອດປະຈຸບັນ, ບັນດາຂະບວນການແຂ່ງຂັນໄດ້ກາຍເປັນກຳລັງໜູນຢ່າງແຮງ, ປະກອບສ່ວນອັນໃຫຍ່ຫຼວງເຂົ້າໃນການປະຕິບັດສຳເລັດໜ້າທີ່ສ້າງສາ ແລະ ປົກປັກຮັກສາປະເທດຊາດ.
ຈາກຄຳຮຽກຮ້ອງຂອງປະທານໂຮ່ຈີມິນ
ໃນຈຸດເວລາດຳເນີນກອງປະຊຸມແຂ່ງຂັນຮັກຊາດທົ່ວປະເທດຄັ້ງທີ 9, ທ່ານ ລ້າຍວັນຫງຽມ, ຢູ່ ຮ່າໂນ້ຍ, ຍັງຄົງຈື່ຈຳແຕ່ລະສັບໃນຄຳຮຽກຮ້ອງແຂ່ງຂັນຮັກຊາດຂອງປະທານປະເທດ ໂຮ່ຈີມິນ , ໃນວັນທີ 11/6/1948 ທີ່ວ່າ: “ຊາວຫວຽດນາມແຕ່ລະຄົນ, ບໍ່ວ່າຜູ້ເຖົ້າແກ່, ໜຸ່ມແໜ້ນ, ຜູ້ຍິງ, ຜູ້ຊາຍ, ຜູ້ຮັ່ງມີ, ຜູ້ທຸກຍາກ, ຜູ້ໃຫຍ່, ຜູ້ນ້ອຍ ລ້ວນແຕ່ຕ້ອງກາຍເປັນນັກຮົບຕໍ່ສູ້ໃນແນວຮົບ: ການທະຫານ, ເສດຖະກິດ, ການເມືອງ, ວັດທະນະທຳ…“. ຄຳຮຽກຮ້ອງນັ້ນໄດ້ກະຕຸກຊຸກຍູ້ທ່ານສະໝັກໃຈເຂົ້າເປັນທະຫານໃນເວລາອາຍຸ 20 ປີ, ແລະ ກາຍເປັນທະຫານປືນໃຫຍ່ປ້ອງກັນອາກາດ, ຕໍ່ສູ້ຢູ່ສະໜາມຮົບພາກເໜືອ ແລະ ພາກກາງ. ເວລານັ້ນບໍ່ພຽງແຕ່ມີທ່ານເທົ່ານັ້ນ, ຫາກຍັງມີປະຊາຊົນທຸກຄົນໄດ້ຕອບສະໜອງຄຳຮຽກຮ້ອງຂອງປະທານ ໂຮ່ຈີມິນ ຢ່າງຟົດຟື້ນ. ເຂົາເຈົ້າໄດ້ອອກແຮງງານທຳການຜະລິດດ້ວຍຄວາມຕື່ນຕົວ ແລະ ຫ້າວຫັນ, ແຂ່ງຂັນກັນປະຕິບັດສຳເລັດໜ້າທີ່ຂອງຕົນເປັນຢ່າງດີ:
“ໃນຄຳຮຽກຮ້ອງຂອງປະທານ ໂຮ່ຈີມິນ ແມ່ນຄຳຮຽກໂຮມ, ພິເສດເພິ່ນໄດ້ເວົ້າຢ່າງງ່າຍດາຍ ແຕ່ພັດເລິກເຊິ່ງ, ແລະໄດ້ສົ່ງຜົນກະທົບເຖິງແຕ່ລະຄົນ. ແຕ່ລະເທື່ອເມື່ອປະທານໂຮ່ຈີມິນມາຢ້ຽມຢາມກົມກອງພວກຂ້າພະເຈົ້າຢູ່ສະໜາມຮົບ, ເພິ່ນໄດ້ເວົ້າເລື່ອງນັ້ນຢ່າງຈະແຈ້ງວ່າ: ການແຂ່ງຂັນຮັກຊາດຂອງພວກຫຼານໃນປະຈຸບັນນັ້ນແມ່ນສູ້ຮົບໃຫ້ດີ, ປະຕິບັດສຳເລັດໜ້າທີ່ສູ້ຮົບຂອງຕົນ. ນັ້ນແມ່ນວິທີແຂ່ງຂັນດີທີ່ສຸດຂອງທະຫານ. ແຕ່ລະໄລຍະປະຕິວັດລ້ວນແຕ່ມີຄຳຮຽກຮ້ອງສະເພາະ, ແຕ່ແຂ່ງຂັນຍາມໃດກໍ່ຕ້ອງຕິດພັນກັບໜ້າທີ່ແທດຈິງ, ໜ້າທີ່ການເມືອງຂອງແຕ່ລະຄົນ, ຂອງແຕ່ລະອົງການຈັດຕັ້ງ ແລະ ແຕ່ລະກົມກອງ“.
ຄຳຮຽກຮ້ອງຂອງປະທານໂຮ່ຈິມິນ “ທຸກຄົນແຂ່ງຂັນ, ທຸກຂະແໜງແຂ່ງຂັນ” ໄດ້ສ້າງກຳລັງແຜ່ລາມອອກຢ່າງວ່ອງໄວໃນຊີວິດສັງຄົມ, ປຸກລະດົມປະຊາຊົນທຸກຊັ້ນວັນນະໃນທົ່ວປະເທດຕັ້ງໜ້າອອກແຮງງານທຳການຜະລິດ, ຕໍ່ສູ້ຢ່າງກ້າຫານເພື່ອຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ. ບັນດາຂະບວນການແຂ່ງຂັນຢ່າງຟົດຟື້ນ, ແທດຈິງໄດ້ຮັບການຜັນຂະຫຍາຍຄື “ຕໍ່ສູ້ຕ້ານຄວາມອຶດຫິວ, ຕໍ່ສູ້ຕ້ານຄວາມໂງ່ຈ້າ, ຕໍ່ສູ້ຕ້ານສັດຕູຕ່າງດ້າວ”, “ໄຫເຂົ້າແຫ່ງການຕໍ່ສູ້”, “ຄື້ນຟອງ ຢວຽນຫາຍ”… ຕະຫຼອດຮອດບັນດາຂະບວນການ “ຊາວໜຸ່ມ 3 ກຽມພ້ອມ”, “ແມ່ຍິງເຮັດຫຼ້ອນໜ້າທີ່ 3 ຢ່າງ”, “ອາຍຸໜຸ່ມແຕ່ເຈດຈຳນົງໃຫຍ່”, “ສອນດີ ຮຽນເກັ່ງ”…
ເລື່ອງປ່ຽນໃໝ່ບັນດາຂະບວນການແຂ່ງຂັນຮັກຊາດ
ໃນໄລຍະຕໍ່ຕ້ານກູ້ຊາດ, ບັນດາຂະບວນການແຂ່ງຂັນຮັກຊາດຍາມໃດກໍມີປະສິດທິຜົນຢ່າງແທດຈິງ. ຮັບແຕ່ເມື່ອປະເທດກ້າວເຂົ້າສູ່ໄລຍະປ່ຽນແປງໃໝ່, ຄວາມຮຽກຮ້ອງອັນຮີບດ່ວນແມ່ນຕ້ອງປ່ຽນໃໝ່ຂະບວນການແຂ່ງຂັນຮັກຊາດ ແລະ ວຽກງານແຂ່ງຂັນຍ້ອງຍໍໃຫ້ເໝາະສົມກັບໜ້າທີ່ພັດທະນາ ແລະ ເຊື່ອມໂຍງຂອງປະເທດຊາດ. ປີ 2014, ກົມການເມືອງຄະນະບໍລິຫານງານສູນກາງພັກກອມມູນິດຫວຽດນາມ ໄດ້ປະກາດໃຊ້ຄຳສັ່ງເລກທີ 34 ກ່ຽວກັບການປ່ຽນໃໝ່ວຽກງານແຂ່ງຂັນຍ້ອງຍໍ, ໃນນັ້ນໄດ້ເນັ້ນໜັກເຖິງການປ່ຽນໃໝ່ເນື້ອໃນ, ຮູບການ, ວິທີຈັດຕັ້ງບັນດາຂະບວນການແຂ່ງຂັນຮັກຊາດຕາມທິດແທດຈິງ ແລະ ມີປະສິດທິຜົນ. ຕາມທ່ານຮອງສາດສະດາຈານ, ດ.ຣ ຫງວຽນຫງອກບາວ ແລ້ວ, ເພື່ອເຮັດໄດ້ສິ່ງນັ້ນ, ບັນດາຂະບວນການແຂ່ງຂັນຕ້ອງມີເນື້ອໃນລະອຽດ, ໃກ້ຊິດຕິດແທດກັບສະພາບຕົວຈິງຂອງແຕ່ລະທ້ອງຖິ່ນ, ຫົວໜ່ວຍ. ວຽກງານຍ້ອງຍໍຕ້ອງເອົາໃຈໃສ່ເປັນພິເສດເຖິງການປຸກລະດົມບັນດາຜູ້ອອກແຮງງານທຳການຜະລິດໂດຍກົງຢ່າງທັນການ. ທ່ານຮອງສາດສະດາຈານ, ດ.ຣ ຫງວຽນຫງອກບາວ ເນັ້ນໜັກວ່າ.
“ທີ່ໜຶ່ງຖ້າຫາກຮູ້ວິທີປຸກລຸກຢ່າງຖືກຕ້ອງນ້ຳໃຈຮັກຊາດ ຈະສ້າງເປັນກຳລັງແຮງ. ທີ່ 2 ແມ່ນແຜນນະໂຍບາຍ, ແນວທາງຂອງພັກ, ລັດ ຕ້ອງສະແດງອອກຢ່າງຈະແຈ້ງວ່າ ແຜນນະໂຍບາຍແຂ່ງຂັນຮັກຊາດ ຕິດພັນຢ່າງແໜ້ນແຟ້ນກັບວຽກງານເອົາໃຈໃສ່ເຖິງຜົນປະໂຫຍດຂອງປະຊາຊົນຄືແນວໃດ. ທີ 3 ແມ່ນແຂ່ງຂັນຮັກຊາດຕ້ອງຕິດພັນກັບການຫົວຄິດປະດິດສ້າງຂອງບັນດາໝູ່ຄະນະ, ທ້ອງຖິ່ນ, ອີງຕາມສະພາບລະອຽດຂອງແຕ່ລະທ້ອງຖິ່ນ, ຂະແໜງຂອງຕົນ, ຊອກຫາບັນດາບັນຫາທີ່ສ້າງເປັນກຳລັງໜູນ ເພື່ອຊຸກຍູ້ບັນດາຂະບວນການໃຫ້ກ້າວຂຶ້ນ”.
67 ປີຜ່ານມາ, ຄຳຮຽກຮ້ອງແຂ່ງຂັນຮັກຊາດ ກໍຄືບັນດາແນວຄິດຂອງປະທານໂຮ່ຈິມິນ ກ່ຽວກັບການແຂ່ງຂັນ, ຍ້ອງຍໍຍັງຄົງຮັກສາຄຸນຄ່າເດີມໄວ້. ປ່ຽນໃໝ່ວຽກງານແຂ່ງຂັນຍ້ອງຍໍແມ່ນເພື່ອແຂ່ງຂັນ, ຍ້ອງຍໍໃຫ້ນັບມື້ນັບມີປະສິດທິຜົນ, ມີເນື້ອໃນແທ້ຈິງ, ເພື່ອເຮັດໃຫ້ການແຂ່ງຂັນຮັກຊາດເປັນກຳລັງໜູນທາງດ້ານຈິດໃຈຢ່າງແທ້ ຈິງ, ສ້າງກຳລັງແຮງອັນໃຫຍ່ຫຼວງ, ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ.