(vovworld)- ວັນທີ 26/8, ຢູ່ Minsk ນະຄອນຫລວງ Belarus ໄດ້ດຳເນີນການພົບປະຂັ້ນສູງ ລະຫວ່າງ ຢູແກຼນ, ລັດເຊຍ ແລະ ສະຫະພາບເອີລົບ( EU) ເພື່ອປຶກສາຫາລືກ່ຽວກັບຄວາມໝັ້ນຄົງດ້ານພະລັງງານ ແລະ ການປະທະກັນຢູ່ພາກຕາເວັນອອກຂອງ ຢູແກຼນ. ເຖິງຢ່າງໃດກໍຕາມ, ບັນດາການຜັນແປກ່ອນດຳເນີນກອງປະຊຸມສະແດງໃຫ້ເຫັນວ່າ ບັນດາຝ່າຍທີ່ຖືກຜົນສະທ້ອນຈາກສະພາບການຢູແກຼນ ຍັງສືບຕໍ່ຮັກສາທັດສະນະແຕກຕ່າງກັນໃນການຫລຸດຜ່ອນຄວາມເຄັ່ງຕຶງຢູ່ປະເທດນີ້. ວົງການນັກສັງເກດການຖືວ່າ: ການພົບປະບໍ່ສາມາດນຳມາເຊິ່ງບາດກ້າວບຸກທະລຸໄດ້.
ການພົບປະຂັ້ນສູງລະຫວ່າງ, ລັດເຊຍ, ຢູແກຼນ ແລະ ອີຢູ ດຳເນີນໄປໃນຂະນະການພົວພັນລະຫວ່າງ ລັດເຊຍ ແລະ ຢູແກຼນ ພວມເຄັ່ງຕຶງ. ຢູແກຼນ ກ່າວຫາລັດເຊຍ ເປີດແນວຮົບໃຫມ່ຢູ່ພາກຕາເວັນອອກຂອງປະເທດນີ້, ໃນຂະນະນັ້ນ ມົດສະກູ ຖະແຫລງວ່າ ຈະສືບຕໍ່ສົ່ງເຄື່ອງຊ່ວຍເຫລືອເຖິງພາກຕາເວັນອອກຢູແກຼນ, ໂດຍບໍ່ຫົວຊາຕໍ່ ເລື່ອງ ກີແອບ ບໍ່ເຫັນດີເຫັນພ້ອມ.
ທັດສະນະກົງກັນຂ້າມ
ເມື່ອຕອບສຳພາດຊ່ອງໂທລະພາບ ເຢຍລະມັນ ARD ເມື່ອວັນທີ 24/8, ທ່ານນາຍົກລັດຖະມົນຕີ ເຢຍລະມັນ Angela Merkel ໃຫ້ຮູ້ວ່າ: ທ່ານນາງບໍ່ຕັ້ງຄວາມຫວັງຕໍ່ໝາກຜົນການພົບປະຄັ້ງນີ້. ຕາມທ່ານນາງນາຍົກລັດຖະມົນຕີ Angela Merkel ແລ້ວ, ການປະທະກັນຢູ່ ຢູແກຼນ ພຽງແຕ່ສາມາດແກ້ໄຂຜ່ານມາດຕະການການເມືອງ ແລະ ອີຢູ ກໍຄື ເຢຍລະມັນ ລ້ວນແຕ່ຢາກເຂົ້າຮ່ວມວິວັດການນີ້ເພື່ອບັນລຸໃຫ້ໄດ້ມາດຕະການຫນຶ່ງ. ທ່ານນາງນາຍົກລັດຖະມົນຕີ ເຢຍລະມັນ ອີກຄັ້ງຫນຶ່ງປະຕິເສດມາດຕະການການທະຫານໃຫ້ແກ່ການປະທະກັນປະຈຸບັນ ພ້ອມທັງຊີ້ແຈ້ງວ່າ ອີຢູ ຢາກຊອກຫາທິດກ້າວເດີນແຕ່ບໍ່ສົ່ງຜົນສະທ້ອນເຖິງລັດເຊຍ ແລະ ປາດຖະຫນາ ຢາກສ້າງສາຍພົວພັນອັນດີງາມ ກັບ ມົດສະກູ. ທ່ານນາງນາຍົກລັດຖະມົນຕີ ເຢຍລະມັນ Angela Merkel ຍັງຖືວ່າ: ສະພາບການປະຈຸບັນ ຢູ່ ຢູແກຼນ ຍັງສັບສົນຢູ່ ແລະ ເຢຍລະມັນ ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອຊອກຫາມາດຕະການແກ້ໄຂໃຫ້ແກ່ການປະທະກັນນີ້.
ສ່ວນທ່ານ Laurent Fabius, ລັດຖະມົນຕີການຕ່າງປະເທດ ຝລັ່ງ ຖະແຫລງວ່າ ຢູແກຼນ ຄວນມີການພົວພັນອັນດີງາມກັບ ທັງ ລັດເຊຍ ແລະ ອີຢູ ເຖິງວ່າບັນລຸສິ່ງດັ່ງກ່າວບໍ່ແມ່ນເລື່ອງງ່າຍ ແຕ່ ຝລັ່ງ ຈະຊຸກຍູ້ການແກ້ໄຂວິກິດການ ແລະ ຫລຸດຜ່ອນຄວາມເຄັ່ງຕຶງລະຫວ່າງ ລັດເຊຍ ແລະ ຢູແກຼນ.
ທ່ານ Petro Poroshenko ແລະ ທ່ານ Vladimir Putin
(ພາບ: AP) ທ່ານນາງ Catherine Ashton,ເຈົ້າຫນ້າທີ່ ອີຢູ ຮັບຜິດຊອບນະໂຍບາຍການຕ່າງປະເທດ ແລະ ຄວາມສະຫງົບປອດໄພ ກໍຕີລາຄາວ່າ: ການພົບປະຂັ້ນສູງດັ່ງກ່າວ ແມ່ນກາລະໂອກາດດີເພື່ອແກ້ໄຂວິກິດການຢູ່ ຢູແກຼນ. ທ່ານນາງ ກໍຖືວ່າ: ຢູແກຼນ ຄວນສ້າງການພົວພັນອັນດີງາມກັບບັນດາປະເທດ ອີຢູ ກໍຄື ລັດເຊຍ.
ກົງກັນຂ້າມກັບທ່າທີຂອງ ເອີລົບ, ໂຄສົກກະຊວງການຕ່າງປະເທດອາເມລິກາ, ທ່ານ Marie Harh ຢືນຢັນວ່າ: ອາເມລິກາ ຈະກໍ່ກຳລັງດັນຕໍ່ລັດເຊຍ ພາຍຫລັງມີຂ່າວຈາກ NATO ກ່ຽວກັບການແຊກແຊງຂອງກຳລັງທະຫານ ແລະ ອາວຸດຂອງ ລັດເຊຍເຂົ້າໃນການເຄື່ອນໄຫວການທະຫານຢູ່ເຂດດິນແດນ ຢູແກຼນ. ກ່ອນຫນ້ານັ້ນ, ລັດຖະມົນຕີກະຊວງປ້ອງກັນປະເທດ ລັດເຊຍ ໄດ້ປະຕິເສດ ຄຳກ່າວເຕືອນນີ້ຂອງ NATO.
ສ່ວນຢູ່ ຢູແກຼນ, ປະທານສະພາແຫ່ງຊາດປະເທດນີ້ ທ່ານ Alexdander Turchinov ຖະແຫລງທາງໂທລະພາບວ່າ ບໍ່ສາມາດແກ້ໄຂວິກິດການຢູ່ພາກຕາເວັນອອກ ຢູແກຼນ ດ້ວຍມາດຕະການທາງການທູດໄດ້.
ການກະທຳກໍ່ຄວາມບໍ່ລົງລອຍກັນເພີ່ມຂຶ້ນ
ກ່ອນທີ່ດຳເນີນການພົບປະຂັ້ນສູງ, ວັນທີ 25/8 ຢູ່ ມົດສະກູ ປະເທດລັດເຊຍ, ທ່ານລັດຖະມົນຕີການຕ່າງປະເທດ ລັດເຊຍ Sergei Lavrov ຊີ້ແຈ້ງວ່າ :ລັດເຊຍ ສະຫນັບສະຫນູນທຸກຄວາມມານະພະຍາຍາມ ເພື່ອຮັບປະກັນອະທິປະໄຕຜືນແຜ່ນດິນອັນຄົບຖ້ວນຂອງ ຢູແກຼນ. ຕາມທ່ານ Sergei Lavrov ແລ້ວ, ລັດເຊຍ ພ້ອມແລ້ວ ເຮັດວຽກຕາມບໍ່ວ່າຂອບເຂດໃດ, ພ້ອມແລ້ວ ຊ່ວຍຊາວ ຢູແກຼນ ບັນລຸໄດ້ຄວາມເຫັນດີເປັນເອກະສັນຢູ່ພາຍໃນປະເທດ, ບັນລຸໄດ້ຄວາມເປັນເອກະພາບກ່ຽວກັບບັນດາມາດຖານເພື່ອໃຫ້ປະຊາຊົນດຳລົງຊີວິດໃນລັດຫນຶ່ງ, ແຫ່ງທີ່ທຸກເຜົ່າພັນ, ວັດທະນະທຳສາສະຫນາ ລ້ວນແຕ່ໄດ້ຮັບການເຄົາລົບ. ເຖິງຢ່າງໃດກໍຕາມ, ທ່ານ Sergei Lavrov ຍັງຖະແຫລງວ່າ ມົດສະກູ ຈະສົ່ງຂະບວນລົດຂົນສົ່ງເຄື່ອງຊ່ວຍເຫລືອເຖິງ ຢູແກຼນ ຄັ້ງທີ 2, ເຊິ່ງແມ່ນເລື່ອງທີ່ ກີແອບ ບໍ່ຊົມເຊີຍ.
ໃນຂະນະນັ້ນ, ໂຄສົກຄະນະກຳມະການປ້ອງກັນຊາດ ປ້ອງກັນຄວາມສະຫງົບ ຢູແກຼນ Andriy Lysenko ກ່າວຫາ ລັດເຊຍ ຂົນສົ່ງ ລົດຖັງ, ລົດຫຸ້່ມເກາະ 10 ຄັນພາຍໃຕ້ຮູບການຂອງກຳລັງທວງໃຫ້ຫັນເປັນສະຫະພັນ, ບຸກເຂົ້າພາກຕາເວັນອອກ ຢູແກຼນ. ຢູແກຼນ ຖືວ່າ ລັດເຊຍ ພວມຢາກເປີດແນວຮົບໃຫມ່ຢູ່ ພາກໃຕ້ Donetsk. ເພື່ອປັບປຸງທັດສະນະບໍ່ສາມາດແກ້ໄຂສະພາບຂາດສະຖຽນລະພາບຢູ່ພາກຕາເວັນອອກ ດ້ວຍມາດຕະການການທູດ, ທ່ານ Petro Poroshenko, ປະທານາທິບໍດີ ຢູແກຼນ ໃຫ້ຮູ້ວ່າ: ຢູແກຼນ ຈະຈ່າຍເກືອບ 3 ຕື້ USD ເພື່ອປະກອບເຮືອບິນ, ກຳປັ່ນຮົບຂະຫນາດໃຫຍ່ຄັ້ງໃຫມ່ໃຫ້ແກ່ກອງທັບ ຢູແກຼນ ແຕ່ປີ 2015-2017. ຕາມການນຳຢູແກຼນ ແລ້ວ, ຈຳນວນເງິນດັ່ງກ່າວ ພຽງແຕ່ແມ່ນໄລຍະເບື້ອງຕົ້ນຂອງໂຄງການປະກອບອາວຸດຄືນໃຫມ່ ຊື່ງຈຸດປະສົງຫນຶ່ງດຽວແມ່ນຟື້ນຕົວກອງທັບ ຢູແກຼນ. ກ່ອນຫນ້ານັ້ນ, ວັນທີ 24/8, ເມື່ອຈັດຕັ້ງສະເຫລີມສະຫລອງ 23 ປີແຫ່ງວັນແຍກອອກຈາກອະດີດສະຫະພາບ ໂຊຫວຽດເກົ່າ, ຢູແກຼນ ໄດ້ຈັດຕັ້ງການສວນສະຫນາມຄັ້ງໃຫຍ່ຢູ່ ກີແອບ ໂດຍມີການເຂົ້າຮ່ວມຂອງພົນທະຫານປະມານ 1.500 ຄົນ ພ້ອມດ້ວຍອາວຸດຍຸດທະພັນການທະຫານຫລາຍປະເພດ.
ເລື່ອງບັນດາຝ່າຍກ່ຽວຂ້ອງເຖິງວິກິດການຢູ່ຢູແກຼນ ຍັງມີຄວາມບໍ່ລົງລອຍກັນຫລາຍຢ່າງ, ນອກນັ້ນ ການເພີ່ມຂຶ້ນບັນດາການກະທຳທີ່ກໍ່ຄວາມສົງໄສເຊິ່ງກັນ ແລະ ກັນ ໄດ້ເຮັດໃຫ້ວິກິດການຢູ່ ຢູແກຼນ ຍາກທີ່ຊອກຫາມາດຕະການສັນຕິພາບໄດ້. ສິ່ງດັ່ງກ່າວກໍໝາຍຄວາມວ່າ ການພົບປະຂັ້ນສູງກ່ຽວກັບສະພາບການຢູແກຼນ ຍາກທີ່ຈະບັນລຸບາດກ້າວບຸກທະລຸໄດ້.