(vovworld) - ພ້ອມກັບການຮ່ວມມືທາງດ້ານເສດຖະກິດ, ການແລກປ່ຽນດ້ານການສຶກສາກໍ່ພົ້ນເດັ່ນຂຶ້ນໃນການພົວພັນລະຫວ່າງ ຫວຽດນາມ - ອາເມລິກາໃນໄລຍະຜ່ານມາ. ມີນັກສຶກສາ ແລະ ນັກຄົ້ນຄ້ວາ ຫວຽດນາມເກືອບ 15 ພັນຄົນຢູ່ ອາເມລິກາ, ພ້ອມກັບບັນດາລາຍການແລກປ່ຽນ ແລະ ກໍ່ສ້າງຄູອາຈານນັ້ນ, ບໍ່ພຽງແຕ່ສ້າງແຫຼ່ງຊັບພະຍາກອນມະນຸດທີ່ມີຄູນນະພາບສູງໃຫ້ແກ່ ຫວຽດນາມເທົ່ານັ້ນ, ຫາກຍັງປະກອບສ່ວນຊຸກຍູ້ການແລກປ່ຽນດ້ານວັດທະນະທຳລະຫວ່າງສອງປະເທດອີກດ້ວຍ.
ວັນທີ 10/7/2015 ໄດ້ກາຍເປັນຂີດໝາຍສຳຄັນໃນການພົວພັນຮ່ວມມືດ້ານການສຶກສາລະຫວ່າງ ຫວຽດນາມ - ອາເມລິກາ, ໃນຂະນະທີ່ຢູ່ນະຄອນ New York, ມະຫາວິທະຍາໄລ Fulbright ຫວຽດນາມໄດ້ຮັບໃບຢັ້ງຢືນທຳອິດຢ່າງເປັນທາງການ, ດ້ວຍການເປັນສັກຂີພິຍານຂອງທ່ານ ຫງວຽນຟູ໋ຈ້ອງ, ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດ ຫວຽດນາມ.
(ທ່ານ ຫງວຽນຟູ໋ຈ້ອງ, ເລຂາທິການໃຫຍ່ຄະນະບໍລິຫານງານ
ສູນກາງພັກກອມມູນິດ ຫວຽດນາມ)
ມະຫາວິທະຍາໄລ Fulbright ຫວຽດນາມ ໄດ້ຮັບການລົງມືກໍ່ສ້າງໃນປີນີ້ ຢູ່ເຂດເຕັກໂນໂລຢີສູງ, ນະຄອນ ໂຮ່ຈີມິນ, ດ້ວຍຈຳນວນທຶນ 70 ລ້ານ USD. ນີ້ແມ່ນມະຫາວິທະຍາໄລເອກະຊົນບໍ່ຫາກຳໄລແຫ່ງທຳອິດຢູ່ ຫວຽດນາມ, ທີ່ສຸມໃສ່ເປັນພິເສດເຖິງການຮັບສະໝັກບັນດານັກຮຽນຮູ້ ແລະ ນັກວິທະຍາສາດທີ່ດີເດັ່ນພາຍໃນປະເທດ. ທ່ານ Michael Michalak ອະດີດເອກອັກຄະລັດຖະທູດ ອາເມລິກາປະຈຳ ຫວຽດນາມຖືວ່າ, ການສົ່ງເສີມບັນດາມະຫາວິທະຍາໄລສາກົນເຂົ້າຮ່ວມ ແມ່ນບາດກ້າວທີ່ຈຳເປັນສຳລັບ ຫວຽດນາມໃນປະຈຸບັນ:
“ເລື່ອງດຶງດູດບັນດາມະຫາວິທະຍາໄລສາກົນສ້າງຕັ້ງຮາກຖານສຶກສາຢູ່ ຫວຽດນາມ ແມ່ນມີບົດບາດສຳຄັນ ສຳລັບການສຶກສາພາຍໃນປະເທດ. ນອກຈາກ Harvard, ດ້ວຍໂຄງການສ້າງຕັ້ງມະຫາວິທະຍາໄລ Fulbright ຫວຽດນາມ ແລ້ວ, ຍັງມີມະຫາວິທະຍາໄລຫຼາຍແຫ່ງຂອງ ອາເມລິກາກໍ່ປາຖະໜາຢາກສ້າງຕັ້ງສາຂາຢູ່ ຫວຽດນາມອີກ. ຂ້າພະເຈົ້າຖືວ່າ, ຫວຽດນາມຄວນດຳເນີນການປະຕິຮູບ ເພື່ອສ້າງເງື່ອນໄຂໃຫ້ບັນດາຄວາມປາຖະໜານີ້ປະກົດຜົນເປັນຈິງ.“
ດ້ວຍຈຳນວນນັກສຶກສາເກືອບ 17.000 ຄົນ. ປະຈຸບັນ, ຫວຽດນາມພວມນຳໜ້າບັນດາປະເທດ ອາຊຽນ ແລະ ຢືນອັນດັບ 8 ຢູ່ໂລກ, ກ່ຽວກັບຈຳນວນນັກສຶກສາຢູ່ ອາເມລິກາ. ບໍ່ພຽງແຕ່ໄດ້ສຳຜັດກັບພື້ນຖານການສຶກສາທີ່ກ້າວໜ້າເທົ່ານັ້ນ, ບັນດານັກສຶກສານີ້ຍັງມີໂອກາດໄດ້ສະສົມບົດຮຽນກ່ຽວກັບການເຮັດວຽກຢູ່ບັນດາບໍລິສັດຂອງ ອາເມລິກາ, ໃນວິວັດແຫ່ງການເຝິກງານ ຫຼືພາຍຫຼັງຮຽນຈົບອີກດ້ວຍ, ແລະກາຍເປັນແຫຼ່ງຊັບພະຍາກອນມະນຸດທີ່ຈຳເປັນໃນການສ້າງສາປະເທດ. ທ້າວ ຫວໍຮ່ວາງອານ, ອະດີດນັກສຶກສາ ຫວຽດນາມ, ປະຈຸບັນພວມເຮັດວຽກໃນວິສາຫະກິດແຫ່ງໜຶ່ງຂອງ ອາເມລິກາ, ແບ່ງປັນວ່າ:
“ຍາມໃດໄວໜຸ່ມກໍ່ຢາກໄດ້ທົດສອບຫຼາຍກວ່າອີກ. ເມື່ອຮຽນຢູ່ທີ່ນີ້, ນອກຈາກຄວາມຮູ້ທີ່ໄດ້ຮັບຈາກໂຮງຮຽນແລ້ວ, ພວກນ້ອງຍັງຢາກສຳຜັດກັບທຸກສິ່ງທຸກຢ່າງທີ່ກ້າວໜ້າກວ່າອີກ. ນັ້ນແມ່ນສາຍເຫດທີ່ພາໃຫ້ພວກເພື່ອນພາຍຫຼັງຮຽນຈົບແລ້ວ ແຕ່ຍັງສືບຕໍ່ເຮັດວຽກ ຫຼືເຝິກງານຢູ່ ອາເມລິກາຕື່ມອີກສອງສາມປີ ຫຼັງຈາກນັ້ນຈຶ່ງກັບເມືອປະເທດ. ຂ້າພະເຈົ້າຈະກັບເມືອ ຫວຽດນາມ ພາຍຫຼັງທີ່ມີບົດຮຽນພໍສົມຄວນເພື່ອສາມາດຮັບໃຊ້ປະເທດຊາດໄດ້ຫຼາຍທີ່ສຸດ“.
ໃນຂະນະທີ່ນັກສຶກສາສ່ວນຫຼາຍແມ່ນໄປຮຽນແບບຈ່າຍເງິນເອງນັ້ນ, ບັນດາທຶນສຶກສາຂອງລັດຖະບານ ອາເມລິກາ, ຄືກອງທຶນສຶກສາ ຫວຽດນາມ (VEF) ກໍ່ໄດ້ຊ່ວຍໃຫ້ນັກສືກສາ ຫວຽດນາມຫຼາຍຄົນສຳຜັດກັບການສຶກສາອັນດັບໜຶ່ງຂອງໂລກ. ໂດຍໄດ້ຮັບການສ້າງຕັ້ງຈາກສະພາແຫ່ງຊາດ ອາເມລິກາເມື່ອປີ 2000, ດ້ວຍງົບປະມານປະມານ 5 ລ້ານ USD/ປີ, VEF ແມ່ນອົງການຂຶ້ນກັບລັດຖະບານ ອາເມລິກາ ແລະ ເຄື່ອນໄຫວຕົ້ນຕໍໃນຂົງເຂດແລກປ່ຽນການສຶກສາເໜືອມະຫາວິທະຍາໄລ. ມາຮອດປະຈຸບັນ, ກອງທຶນສຶກສາ ຫວຽດນາມ ໄດ້ໜູນຊ່ວຍທຶນສຶກສາ 500 ກວ່າທຶນໃຫ້ໄວໜຸ່ມຫວຽດນາມທີ່ມີຄວາມສາມາດໄປຄົ້ນຄ້ວາວິທະຍາສາດ ແລະ ເຕັກໂນໂລຢີຢູ່ ອາເມລິກາ. ໃນຈຳນວນນັກຄົ້ນຄ້ວານີ້, ມີ 300 ກວ່າຄົນໄດ້ຮຽນຈົບແລ້ວ, ສ່ວນຫຼາຍແມ່ນລະດັບປະລິຍາເອກ. ນອກນັ້ນ VEF ກໍ່ໄດ້ອຸປະຖຳໃຫ້ສາສະດາຈານ 30 ກວ່າຄົນມາສິດສອນໃນບັນດາມະຫາວິທະຍາໄລຢູ່ ຫວຽດນາມອີກ. ໂດຍສະເພາະແມ່ນຢູ່ບັນດາມະຫາວິທະຍາໄລການແພດ. ທ່ານນາງ Sandy Dang, ຜູ້ອຳນວຍການຝ່າຍບໍລິຫານ VEF ໃຫ້ຂໍ້ສັງເກດວ່າ, ການສຶກສາແມ່ນຂົວຕໍ່ທີ່ສຳຄັນໃນການພົວພັນລະຫວ່າງ ຫວຽດນາມ - ອາເມລິກາ.
“ຂ້າພະເຈົ້າຖືວ່າການແລກປ່ຽນດ້ານການສຶກສາມີບົດບາດສຳຄັນທີ່ສຸດ, ປະກອບສ່ວນກໍ່ສ້າງ ແລະ ປັບປຸງສາຍພົວພັນລະຫວ່າງຫວຽດນາມ - ອາເມລິກາ ໃນໄລຍະ 20 ປີທີ່ຜ່ານມາ. ການເຄື່ອນໄຫວນີ້ບໍ່ພຽງແຕ່ຊ່ວຍບັນດານັກສຶກສາ ຫວຽດນາມໄດ້ໜ້າຢູ່ບັນດາມະຫາວິທະຍາໄລທີ່ມີຊື່ສຽງຂອງ ອາເມລິກາເທົ່ານັ້ນ, ຫາກຍັງປະກອບສ່ວນຊຸກຍູ້ການແລກປ່ຽນວັດທະນະທຳອີກດ້ວຍ, ເມື່ອເຂົາເຈົ້າໂຄສະນາວັດທະນະທຳ ຫວຽດນາມຢູ່ ອາເມລິກາ ກໍ່ຄືມີຄວາມເຂົາໃຈຕື່ມອີກກ່ຽວກັບວັດທະນະທຳ, ສັງຄົມ, ການດຳລົງຊີວິດຢູ່ທີ່ນີ້. ຂ້າພະເຈົ້າຖືວ່າ, ການຮ່ວມມືດ້ານການສຶກສາໄດ້ປະກອບສ່ວນເຮັດໃຫ້ການພົວພັນລະຫວ່າງສອງປະເທດຫຍັບມໍ່ໃກ້ກັນກວ່າ“.
ນອກຈາກໜູນຊ່ວຍທຶນສຶກສາ, VEF ຍັງສົມທົບກັບບັນດາມະຫາວິທະຍາໄລ ອາເມລິກາດຳເນີນການຕີລາຄາສະພາບຕົວຈິງແຫ່ງການສຶກສາມະຫາວິທະຍາໄລ ແລະ ເໜືອມະຫາວິທະຍາໄລຢູ່ຫວຽດນາມ ເພື່ອຊອກຫາສິ່ງທີ່ຈຳກັດ, ຜ່ານນັ້ນພ້ອມກັບລັດຖະບານ ຫວຽດນາມວາງບັນດາມາດຕະການຕ່າງໆທີ່ສາມາດຕອບສະໜອງຄວາມຕ້ອງການສຶກສາພາຍໃນປະເທດໃນລະດັບສູງສຸດ. ປະຈຸບັນ, ບັນດາມະຫາວິທະຍາໄລ ອາເມລິກາພວມສ້າງຮູບແບບການສຶກສາສົມທົບລະຫວ່າງຮູບແບບການສຶກສາຂອງອາເມລິກາ ກັບເງື່ອນໄຂສຶກສາໃນປະຈຸບັນຢູ່ຫວຽດນາມ, ໃນນັ້ນກຸ້ມຕົນເອງກ່ຽວກັບລາຍການສຶກສາ ແລະ ດ້ານການເງິນ, ແນໃສ່ສ້າງສະພາບແວດລ້ອມແຫ່ງການຮຳ່ຮຽນສະດວກສະບາຍ, ຂະຫຍັນຂັນແຂງກວ່າ.ທ່ານນາງ Sandy Dang ໃຫ້ຮູ້ຕື່ມອີກວ່າ:
“ສິ່ງຈັບອົກຈັບໃຈກວ່າ ນັ້ນແມ່ນພວກເຮົາບໍ່ນຳໃຊ້ຮູບແບບການສຶກສາທັງໝົດຂອງ ອາເມລິກາ, ຫາກອີງຕາມພື້ນຖານການສຶກສາຂອງຫວຽດນາມ. ນີ້ແມ່ນສິ່ງສຳຄັນ. ພວກຂ້າພະເຈົ້າພ້ອມແລ້ວທີ່ຈະຊ່ວຍ ຫວຽດນາມສ້າງຮູບແບບການສຶກສາທີ່ຕອບສະໜອງໄດ້ຄວາມຕ້ອງການລະອຽດຂອງຫວຽດນາມ“.
ນອກຈາກ VEF, ລັດຖະບານ ອາເມລິກາຍັງມີບັນດາລາຍການແລກປ່ຽນການສຶກສາອື່ນໆກັບ ຫວຽດນາມເຊັ່ນ: ລາຍການທຶນສຶກສາ Fulbright, ການບຳລຸງສ້າງພາສາອັງກິດໃຫ້ຄູສອນຊັ້ນກາງ ແລະ ມະຫາວິທະຍາໄລ, ແລະ ຫວ່າງແລ້ວນີ້ແມ່ນຂໍ້ລິເລີ່ມການນຳໜຸ່ມ ອາຊີຕາເວັນອອກ, ໂດຍປະທານາທິບໍດີ ອາເມລິກາ Barack Obama ເປັນຜູ້ລິເລີ່ມ. ພ້ອມກັບບັນດາຂົງເຂດຮ່ວມມືອື່ນໆ, ການຮ່ວມມືດ້ານການສຶກສາ ຫວຽດນາມ - ອາເມລິກາພວມກາຍເປັນຂົວຕໍ່ຢ່າງແທ້ຈິງ, ປະກອບສ່ວນພັດທະນາການພົວພັນຄູ່ຮ່ວມມືຮອບດ້ານລະຫວ່າງສອງປະເທດ.