ວັນທີ 3/7, ທ່ານປະທານປະເທດຈີນ ສີຈີນຜີງ ໄດ້ເລີ່ມຕົ້ນການຢ້ຽມຢາມທາງ ລັດຖະກິດ ສ.ເກົາຫຼີ ເປັນເວລາ 2 ວັນ. ການເດີນທາງຢ້ຽມຢາມຂອງຜູ້ນຳລັດຈີນຄັ້ງນີ້, ບໍ່ກໍ່ຄວາມປະຫຼາດໃຈຕໍ່ຫາງສຽງເພາະວ່າ ໃນສະພາວະພາກພື້ນປະຈຸບັນ ພວມມີບັນດາສາຍພົວພັນແບບປະສານກັນຢ່າງສັບສົນ.
ທ່ານປະທານປະເທດຈີນ ສີຈີນຜີງ ແລະ ທ່ານນາງປະທານາທິບໍດີ ສ.ເກົາຫຼີ Park Geun-Hye
|
ນີ້ແມ່ນຄັ້ງທີ 3 ຊຶ່ງ ທ່ານປະທານປະເທດຈີນ ສີຈີນຜີງໄປຍັງເຊີອູນ, ແຕ່ພັດແມ່ນການຢ້ຽມຢາມເປັນຄັ້ງທຳອິດໃນຖານະຕຳແໜ່ງເປັນປະມຸກລັດ. ເຖິງວ່າໃນທາງນອກຂອງການຢ້ຽມຢາມ, ຕາມທີ່ໄດ້ປະກາດກ່ອນການເດີນທາງຢ້ຽມຢາມ, ນີ້ແມ່ນການຕອບແທນການຢ້ຽມຢາມຈີນຂອງທ່ານນາງປະທານາທິບໍດີ ສ.ເກົາຫຼີ Park Geun-Hye ເມື່ອເດືອນ 6/2013, ແຕ່ເປັນຄັ້ງທຳອິດທີ່ຜູ້ນຳສູງສຸດຂອງຈີນໄດ້ປະລະທຳນຽມທີ່ເຄີຍມີມາຄືຢ້ຽມຢາມເຊີອູນກ່ອນພຽງຢາງນັ້ນ, ໄດ້ສະແດງໃຫ້ເຫັນວ່າ ປັກກິງພວມມີການປ່ຽນແປງຍຸດໂທບາຍການຕ່່າງປະເທດໂດຍພື້ນຖານ.
ຖືເບົາພຽງຢາງ, ຖືເປັນສຳຄັນເຊີອູນ
ການຕັດສິນເລືອກເອົາ ສ.ເກົາຫຼີ ຫາກບໍ່ແມ່ນພຽງຢາງເພື່ອທຳການຢ້ຽມຢາມນັ້ນ, ສ່ວນໃດສ່ວນໜຶ່ງໄດ້ສ່ອງແສງເຖິງຄວາມແຕກແຫງລະຫວ່າງຈີນ ແລະ ສ.ປ.ປ.ເກົາຫຼີໃນໄລຍະມໍ່ໆມານີ້. ຫຼາຍປີທີ່ຜ່ານມາ, ໃນຕົວຈິງ, ເຖິງວ່າແມ່ນປະເທດພັນທະມິດຂອງຈີນ, ເພິ່ງພາອາໄສດ້ານເສດຖະກິດຂອງຈີນຢ່າງຫຼວງຫຼາຍ, ແຕ່ໃຕ້ລະບອບຂອງການນຳ Kim Jong Un , ພຽງຢາງນັບມື້ນັບສະແດງໃຫ້ເຫັນຄວາມຜິດປົກກະຕິ, ກໍ່ຄວາມຫຍຸ້ງເຫຍືອງຫຼາຍຢ່າງໃຫ້ແກ່ຈີນ, ຊ້ຳບໍໜຳຈີນກໍເຄີຍຖືກສາກົນຖືເປັນສັດຕູ, ຂະນະທີ່ ສ.ປ.ປ.ເກົາຫຼີຍິງລູກສອນໄຟ ແລະ ທົດລອງນິວເຄຼຍ.
ແຕ່ສິ່ງທີ່ໜ້າສົນໃຈກ່ວາໝູ່ ແມ່ນໃນຂະນະທີ່ນັບມື້ນັບສະແດງທ່າທີບໍ່ສະໜິດສະໜົມກັບພັນທະມິດນັ້ນ, ພຽງຢາງພັດມີການກະທຳຫຍັບເຂົ້າໃກ້ໂຕກຽວ ຊຶ່ງແມ່ນກຳລັງສູ້ຢັນກັບຍີປຸ່ນໃນພາກພື້ນ. ພາຍຫຼັງດຳເນີນການເຈລະຈາຫຼາຍຮອບກ່ຽວກັບບັນຫາບັນດາພົນລະເມືອງຍີປຸ່ນຖືກລອກຈັບຕົວໃນຊຸມປີ 1970-1980, ການພົວພັນລະຫວ່າງຍີປຸ່ນ-ສ.ປ.ປ.ເກົາຫຼີໄດ້ມີການປ່ຽນແປງຫຼາຍຢ່າງທີ່ຕັ້ງໜ້າ ແລະ ການຢ້ຽມຢາມສ.ປ.ປ.ເກົາຫຼີ ຂອງທ່ານນາຍົກລັດຖະມົນຕີຍີປຸ່ນ Shinzo Abe ໄດ້ຖືກຂຶ້ນແຜນໃນປີນີ້ ແມ່ນພະຍານຫຼັກຖານທີ່ຈະແຈ້ງສຳລັບການປົວແປງນີ້. ພຽງຢາງກໍພວມມານະພະຍາຍາມຫັນໄປສູ່ການຊອກຫາການລົງທຶນ ແລະ ການຊ່ວຍເຫຼືອຈາກໂຕກຽວ ແລະ ແນ່ນອນວ່າ ການກະທຳນີ້ໄດ້ເຮັດໃຫ້ບັນດາການນຳຈີນເສຍໃຈ. ດັ່ງນັ້ນ, ການຢ້ຽມຢາມເຊີອູນຂອງ ທ່ານປະທານປະເທດຈີນ ສີຈີນຜີງ, ສ່ວນໃດສ່ວນໜຶ່ງໄດ້ສະແດງໃຫ້ເຫັນແຈ້ງກ່ຽວກັບຄວາມເສຍຫວັງຂອງປັກກິງທີ່ມີຕໍ່ພຽງຢາງ.
ສ້າງສຳພັນທະມິດຕ້ານຍີປຸ່ນ.
ນອກຈາກ ສ.ປ.ປ.ເກົາຫຼີ, ຍີປຸ່ນກໍແມ່ນເປົ້າໝາຍທີ 2 ຊຶ່ງຈີນໄດ້ມຸ່ງໄປເຖິງໃນ ການຢ້ຽມຢາມຄັ້ງນີ້. ໃນຂະນະທີ່ ການພົວພັນລະຫວ່າງຍີປຸ່ນ-ສ.ເກົາຫຼີ ພວມຢູ່ໃນລະດັບຕ່ຳທີ່ສຸດ, ຊຶ່ງກ່ຽວຂ້ອງເຖິງບັນດາສິ່ງຂ້ອງຄ່າໃນອະດີດຕະການ ແລະ ບັນດາຄວາມຂັດແຍ້ງໃນມໍ່ໆມານີ້ກ່ຽວກັບການຍາດຊິງອະທິປະໄຕເຂດທະເລໝູ່ເກາະນັ້ນ, ຈຸດເວລານີ້ ກໍແມ່ນໂອກາດ“ຄຳ” ເພື່ອໃຫ້ປັກກິງແກ່ດຶງເຊີອູນ ສ້າງສຳພັນທະມິດຕ້ານຍີປຸ່ນ. ເລື່ອງອຳນາດການປົກຄອງຂອງທ່ານນາຍົກລັດຖະມົນຕີຍີປຸ່ນ Shinzo Abe ພວມພະຍາຍາມປະຕິບັດບັນດາບາດກ້າວເດີນເພື່ອອະທິບາຍຄືນກ່ຽວກັບລັດຖະທຳມະນູນສັນຕິພາບ, ຜ່ານນັ້ນອະນຸຍາດໃຫ້ກອງທັບຂອງປະເທດນີ້ ສາມາດປະຕິບັດສິດປ້ອງກັນຕົວລວມໝູ່, ອັນໄດ້ເຮັດໃຫ້ປັກກິງ ແລະ ເຊີອູນພ້ອມກັນປະຕິກິລີຍາຢ່າງຮຸນແຮງ, ນີ້ກໍແມ່ນຂໍ້ອ້າງອີງເພື່ອໃຫ້ຈີນ-ສ.ເກົາຫຼີ ຫຍັບມໍ່ເຂົ້າກັນ.
ເຈດຈຳນົງເພີ່ມທະວີແກ່ດຶງ ສ.ເກົາຫຼີຂອງຈີນ ກໍເຫັນໄດ້ຊັດ, ມັນສະແດງໃຫ້ເຫັນຜ່ານການຢ້ຽມຢາມເຊີອູນລວງໜ້າຂອງທ່ານລັດຖະມົນຕີການຕ່າງປະເທດຈີນ ຫວາງອີເມື່ອທ້າຍເດືອນແລ້ວນີ້. ໃນການຢ້ຽມຢາມນັ້ນ, ທ່ານລັດຖະມົນຕີການຕ່າງປະເທດຈີນ ຫວາງອີ ກໍບໍ່ຊຸກເຊ່ືອງເຈດຈຳນົງຖະແຫຼງປະກາດຢ່າງເປີດເຜີຍວ່າ ຈີນ ແລະ ສ.ເກົາຫຼີຄວນຈັບມືກັນໃຫ້ແໜ້ນ, ລ່ວງເກີນຂອບເຂດສາຍພົວພັນ 2 ຝ່າຍ, ມຸ່ງໄປສູ່ອາຊີ ແລະ ໂລກ, ເປີດສະພາບແວດລ້ອມພັດທະນາລວມທີ່ກ້ວາງໃຫຍ່ກວ່າ.
ມ້າງທ່າໂດດດ່ຽວ
ບໍ່ພຽງແຕ່ ສ້າງສຳພັນທະມິດຕ້ານຍີປຸ່ນເທົ່ານັ້ນ, ການຢ້ຽມຢາມເຊີອູນຂອງ ທ່ານປະທານປະເທດຈີນ ສີຈີນຜີງ ຍັງເພື່ອແນໃສ່ຊອກຫາການໜູນຊ່ວຍຈາກ ສ.ເກົາຫຼີໃນສະຖານະການ ແລະ ສະພາບຍຸດທະສາດອາຊີຕາເວັນອອກສ່ຽງເໜືອ ພວມມີບັນດາການຜັນແປທີ່ສັບສົນຫຼາຍຢ່າງ ບໍ່ນຳມາເຊິ່ງຜົນປະໂຫຍດໃຫ້ແກ່ຈີນ. ບັນດາການກະທຳປີນຂັ້ນໄດທີ່ເຄັ່ງຕຶງຂອງຈີນໃນມໍ່ໆມານີ້ ຊຶ່ງກ່ຽວຂ້ອງເຖິງການຂັດແຍ້ງກ່ຽວກັບອະທິປະໄຕເຂດທະເລໝູ່ເກາະກັບຍີປຸ່ນໃນທະເລຮວາຕຸງ ແລະ ບັນດາປະເທດອາຊີຕາເວັນອອກສ່ຽງໃຕ້ຢູ່ທະເລຕາເວັນອອກນັ້ນ, ໄດ້ຊຸກຍູ້ອາເມລິກາແຊກແຊງນັບມື້ນັບເລິກກ່ວາເຂົ້າໃນພາກພື້ນ. ທ້າຍເດືອນ 4/2014, ເປັນຄັ້ງທຳອິດທີ່ອາເມລິກາໄດ້ຖະແຫຼງປະກາດນຳເກາະ Senkaku ຂອງຍີປຸ່ນ ເຂົ້າໃນເປົ້າໝາຍປະຕິບັດໜ້າທີ່ປົກປັກຮັກສາຂອງອາເມລິກາ, ພ້ອມກັນນັ້ນ, ກໍຖະແຫຼງສະໜັບສະໜູນບັນດາປະເທດອາຊຽນທີ່ມີການຂັດແຍ້ງ ອະທິປະໄຕເຂດທະເລໝູ່ເກາະກັບຈີນ. ການກະທຳເຫຼົ່ານີ້ ໄດ້ພາໃຫ້ຈີນຕົກຢູ່ໂດດດ່ຽວ ແລະ ຕ້ອງຊອກຫາການໜູນຫຼັງຈາກ ສ.ເກົາຫຼີ.
ແຕ່ເພື່ອໄດ້ຮັບການສະໜັບສະໜູນຈາກເຊີອູນຢ່າງແທ້ຈິງນັ້ນ, ຫາງສຽງຖືວ່າ ປັກກິງຕ້ອງເສຍເວລາຫຼາຍ ແລະ ບໍ່ແນ່ນອນວ່າຈະໄປຮອດຈຸດໝາຍປາຍທາງ. ເລີ່ມມາຈາກການພົວພັນຢ່າງແໜ້ນແຟ້ນຂອງສຳພັນທະມິດອາເມລິກາ-ສ.ເກົາຫຼີໃນປະຈຸບັນ, ພິເສດແມ່ນເລື່ອງອາເມລິກາຍັງຄົງຕັ້ງທັບຢູ່ສ.ເກົາຫຼີ, ແລະ ບໍ່ແມ່ນເລື່ອງງ່າຍທີ່ ສ.ເກົາຫຼີເດີນຕາມເຈດຈຳນົງຂອງຈີນ ເພື່ອແນໃສ່ແລກເອົາການສະໜັບສະໜູນຂອງປັກກິງໃນໄລຍະສັ້ນ.
ແຕ່ມີສິ່ງໜຶ່ງທີ່ຈະແຈ້ງວ່າ ບັນດາສາຍພົວພັນແບບປະສານກັນທີ່ສັບສົນໃນພາກພື້ນຈະມີບັນດາການກະທຳໃໝ່ພາຍຫຼັງການຢ້ຽມຢາມຄັ້ງນີ້. ເປັນທີ່ຈະແຈ້ງແລ້ວວ່າ, ປັກກິງໄດ້ ແລະ ພວມມີບັນດາບາດກ້າວເດີນໃໝ່, ປັບປຸງກຳລັງແຮງເພື່ອແນໃສ່ປະຕິບັດຄວາມມັກໃຫຍ່ໃຝ່ສູງແຜ່ອຳນາດໃນພາກພື້ນ.