(vovworld)- ເຂົ້າຮ່ວມການເລືອກໃນວັນທີ 22/5, ປະຊາຊົນຫວຽດນາມ ບໍ່ພຽງແຕ່ປະຕິບັດສິດປະຊາທິປະໄຕເທົ່ານັ້ນ ຫາກຍັງປະຕິບັດພັນທະພົນລະເມືອງ, ສະແດງໃຫ້ເຫັນຄວາມຮັບຜິດຊອບດ້ານການເມືອງຂອງຕົນຕໍ່ປະເທດຊາດ. ບັດເລືອກຕັ້ງຂອງບັນດາຜູ້ມີສິດເລືອກຕັ້ງໃນວັນບຸນປະຊາທິປະໄຕນີ້ ແມ່ນການສະແດງໃຫ້ເຫັນຄວາມໄວ້ເນື້ອເຊື່ອໃຈຂອງປະຊາຊົນຫວຽດນາມ ຕໍ່ພັກກອມມູນິດຫວຽດນາມ, ລະບອບການເມືອງຊື່ງໄດ້ລະບຸໄວ້ໃນລັດຖະທຳມະນູນ ຢ່າງມີຊີວິດຊີວາ.
ພະນັກງານ, ນັກຮົບຢູ່ເກາະ ຊອກຕືໄຕໄປປ່ອນບັດເລືອກຕັ້ງ
ພາບ:TTXVN
|
ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ແມ່ນຮູບການປະຊາທິປະໄຕໂດຍກົງ, ແມ່ນວິທີການສະແດງໃຫ້ເຫັນເຈດຈຳນົງ, ຄວາມມຸ້ງມາດປາດຖະຫນາ ແລະ ສິດເປັນເຈົ້າຂອງປະຊາຊົນໃນການສ້າງລັດເວົ້າລວມ ແລະ ອົງການຕົວແທນ, ອົງການແຫ່ງສິດອຳນາດແຫ່ງລັດຈາກສູນກາງຕະຫລອດຮອດທ້ອງຖິ່ນຢູ່ຫວຽດນາມ ເວົ້າສະເພາະ. ເຂົ້າຮ່ວມການສະໝັກຮັບເລືອກຕັ້ງ ແລະ ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ແມ່ນສິດພື້ນຖານຂອງພົນລະເມືອງໃນການສ້າງອຳນາດການປົກຄອງຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ຜ່ານການເລືອກຕັ້ງ, ປະຊາຊົນປະຕິບັດສິດປະຊາທິປະໄຕດ້ວຍວິທີຄັດເລືອກບັນດາຜູ້ແທນເຂົ້າເປັນສະມາຊິກສະພາແຫ່ງຊາດ, ສະພາປະຊາຊົນ. ສຳລັບຜູ້ມີສິດເລືອກຕັ້ງແຕ່ລະຄົນ, ເລື່ອງໄປປ່ອນບັດເລືອກຕັ້ງແມ່ນສິດຜົນປະໂຫຍດ ພ້ອມທັງກໍແມ່ນຄວາມຮັບຜິດຊອບຂອງພົນລະເມືອງຕໍ່ປະເທດຊາດ.
ການໄປປ່ອນບັດເລືອກຕັ້ງແມ່ນປະຕິບັດສິດເປັນເຈົ້າຂອງພົນລະເມືອງ
ວັນທີ 22/5 ເປັນຂີດໝາຍຄັ້ງທີ 14 ຂອງພົນຕີ ຟ້າມຮົ່ງກື, ອະດີດຮອງຫົວຫນ້າກົມໃຫຍ່ການເມືອງກອງທັບປະຊາຊົນຫວຽດນາມ ໄປປ່ອນບັດເລືອກຕັ້ງຜູ້ຕາງຫນ້າໃຫ້ແກ່ຕົນເອງໃນ ສະພາແຫ່ງຊາດ ແລະ ສະພາປະຊາຊົນທຸກຂັ້ນ. ເມື່ອເວົ້າເຖິງຄວາມຮູ້ສຶກ ແລະ ຄວາມຊົງຈຳກ່ຽວກັບຊຸມວັນເລືອກຕັ້ງ, ພິເສດ ແມ່ນການເລືອກຕັ້ງທົ່ວປະເທດຄັ້ງທຳອິດຂອງປະເທດ ຫວຽດນາມ ເອກະລາດ ພາຍຫລັງຜົນສຳເລັດຂອງການປະຕິວັດເດືອນສິງຫາປີ 1945, ພົນຕີ ຟ້າມຮົ່ງກື ຊີ້ແຈ້ງວ່າ:
“ຂ້າພະເຈົ້າຄິດວ່າ ແຕ່ລະເທື່ອເມື່ອໄປປ່ອນບັດເລືອກຕັ້ງ, ຜູ້ມີສິດເລືອກຕັ້ງ ນອກຈາກຄັດເລືອກຜູ້ຕາງຫນ້າໃຫ້ຕົນເອງແລ້ວ ຍັງຝາກຝັງຄວາມຫວັງຕໍ່ເຂົາເຈົ້າອີກ. ຂ້າພະເຈົ້າຫວັງກວ່າ ຜ່ານການເລືອກຕັ້ງສະມາຊິກສະພາແຫ່ງຊາດຊຸດທີ 14, ຫວຽດນາມ ຈະສ້າງສາ ແລະ ປົກປັກຮັກສາປະເທດຊາດຢ່າງໝັ້ນຄົງກວ່າອີກ. ປະເທດຊາດຈະຫລຸດພົ້ນອອກຈາກສະພາບຕົກຕ່ຳຖອຍຫລັງເມື່ອທຽບໃສ່ບັນດາປະເທດອື່ນ, ສືບຕໍ່ປ່ຽນໃຫມ່, ພັດທະນາ, ຕ້ານສັດຕູພາຍໃນປະເທດ, ຕ້ານການສໍ້ລາດບັງຫລວງ, ການຟຸມເຟືອຍ, ຕ້ານສັດຕູພາຍນອກ, ແກ້ໄຂຄວາມເຄັ່ງຕຶງຢູ່ທະເລຕາເວັນອອກ.”
ໂດຍເຂົ້າໃຈໄດ້ຄວາມໝາຍຂອງການເລືອກຕັ້ງ, ເພື່ອນ ເຈີນທິຖູຍ, ນັກສຶກສາສະຖາບັນສື່ມວນຊົນ ແລະ ໂຄສະນາ ຖືວ່າ: ການໄປປ່ອນບັດເລືອກຕັ້ງແມ່ນຄວາມເປັນກຽດ, ແມ່ນສິດເປັນເຈົ້າຢ່າງແທ້ຈິງຂອງປະຊາຊົນຫວຽດນາມ ເວົ້າລວມ ແລະ ຂອງລຸ້ນຫນຸ່ມຫວຽດນາມ ເວົ້າສະເພາະ. ສະນັ້ນ ປະຊາຊົນແຕ່ລະຄົນ ຄວນມີຄວາມເຂົ້າໃຈແຈ້ງ ແລະ ມີຄວາມຮັບຮູ້ຢ່າງຄົບຖ້ວນຕໍ່ຄວາມຮັບຜິດຊອບຂອງຕົນ, ມີຄວາມສະຫລາດສ່ອງໃສໃນການຄັດເລືອກຜູ້ມີເງື່ອນໄຂພຽງພໍເພື່ອເຮັດສຳເລັດຫນ້າທີ່ເປັນຕົວແທນຂອງປະຊາຊົນ.
“ໄປປ່ອນບັດເລືອກຕັ້ງແມ່ນສິດຜົນປະໂຫຍດ ແລະ ຄວາມຮັບຜິດຊອບພົນລະເມືອງຂອງໄວຫນຸ່ມ. ຄວາມຮັບຜິດຊອບເປັນເຈົ້າຂອງປະເທດຊາດ, ຄວາມຮັບຜິດຊອບໃນການຄັດເລືອກ ແລະ ສ້າງກົງຈັກລັດຂອງປະຊາຊົນ, ໂດຍປະຊາຊົນ ແລະເພື່ອປະຊາຊົນ. ເພາະສະນັ້ນ ເມື່ອໄດ້ຮັບບັດເລືອກຕັ້ງ, ຄວາມຮັບຜິດຊອບຂອງຊາວຫນຸ່ມແຕ່ລະຄົນແມ່ນຕ້ອງຕິດຕາມບັນຊີລາຍຊື່ຜູ້ແທນ, ມີຄວາມສະຫລາດສ່ອງໃສໃນການຄັດເລືອກຜູ້ມີເງື່ອນໄຂສຳເລັດຫນ້າທີ່ທີ່ໄດ້ຮັບການມອບໝາຍ.”
ທ່ານຮ່ວາງຈູງຫາຍ, ເລຂາຄະນະພັກນະຄອນ ຮ່າໂນ້ຍ ປ່ອນບັດຢູ່ຫົວໜ່ວຍເລກທີ 4, ລ໋າງຮ້້າ, ເມືອງ ດົ໋ງດາ |
ສຳເລັດຫນ້າທີ່ຂອງພົນລະເມືອງເປັນຢ່າງດີໃນການວັນບຸນປະຊາທິປະໄຕ
ໂດຍປະຕິບັດກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ, ສິດປະຊາທິປະໄຕໃນການສະໝັກຮັບເລືອກຕັ້ງ ແລະ ການເລືອກຕັ້ງໃນການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນຄັ້ງນີ້ໄດ້ຮັບການເປີດກວ້າງ. ຕາມນັ້ນແລ້ວ, ຈຳນວນຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ, ສະມາຊິກສະພາປະຊາຊົນທຸກຂັ້ນຫລາຍກວ່າ; ການພົບປະກັບຜູ້ມີສິດເລືອກຕັ້ງ, ການຂົນຂວາຍຫາສຽງເລືອກຕັ້ງຜ່ານບັນດາພາຫະນະສື່ມວນຊົນໄດ້ຮັບຄວາມສົນໃຈເປັນພິເສດ. ທ່ານ ເລວັນຫວູ, ຜູ້ມີສິດເລືອກຕັ້ງ ຕາແສງ ຕາມຟູ, ເມືອງ ຖູດືກ ນະຄອນ ໂຮ່ຈິມີນ ແບ່ງປັນວ່າ:
“ຂ້າພະເຈົ້າເຂົ້າຮ່ວມການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນ ຫລາຍຄັ້ງແລ້ວ. ແຕ່ຄັ້ງນີ້ ຂ້າພະເຈົ້າເຫັນວ່າ ບັນຍາກາດ, ສະພາບການປະຊາທິປະໄຕຢູ່ຫວຽດນາມ ປະຈຸບັນ ສູງກວ່າເມື່ອທຽບໃສ່ກ່ອນນີ້ຫລາຍ. ໂດຍແມ່ນຜູ້ມີສິດເລືອກຕັ້ງ, ຂ້າພະເຈົ້າໄດ້ຮັບຂໍ້ມູນຂ່າວຈາກຄະນະເລືອກຕັ້ງຂັ້ນຮາກຖານຫລາຍກວ່າ ແລະ ໄດ້ພົບປະກັບຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ, ສະພາປະຊາຊົນ, ມີສິດຊັກຖາມບັນດາຜູ້ສະໝັກຮັບເລືອກຕັ້ງ.”
ສິດປະຊາທິປະໄຕໄດ້ຮັບການເປີດກວ້າງ, ຜູ້ມີສິດເລືອກຕັ້ງມີຄວາມປິຕິຊົມຊື່ນເມື່ອປະຕິບັດສິດພົນລະເມືອງຂອງຕົນ. ທ່ານ ເລຍືຕຽນ, ຮອງປະທານກຳມາທິການວັດທະນະທຳ, ສຶກສາ, ຊາວຫນຸ່ມ, ເຍົາວະຊົນ ແລະ ອະນຸຊົນ ຂອງສະພາແຫ່ງຊາດ ໃຫ້ຮູ້ວ່າ:
“ລັດຖະທຳມະນູນປີ 2013 ໄດ້ກຳນົດສິດເສລີປະຊາທິປະໄຕ, ສິດຂອງປະຊາຊົນໃນການສ້າງອຳນາດການປົກຄອງໂດຍກົງ ແລະ ທາງອ້ອມ. ເມື່ອປ່ອນບັດເພື່ອເລືອກຕັ້ງຜູ້ຕາງຫນ້າໃຫ້ແກ່ຕົນເອງເຂົ້າຮ່ວມອຳນາດການປົກຄອງທ້ອງຖິ່ນ ແລະ ກົງຈັກລັດ, ນັ້ນແມ່ນການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ. ທົ່ວປວງຊົນໄປປ່ອນບັດເລືອກຕັ້ງເພື່ອປະຕິບັດສິດຜົນປະໂຫຍດ ແລະ ພັນທະຂອງຕົນໃນການສ້າງລັດ, ສ້າງອຳນາດການປົກຄອງ.”
ເມື່ອສິດປະຊາທິປະໄຕໃນການສະໝັກຮັບເລືອກຕັ້ງ ແລະ ການເລືອກຕັ້ງໄດ້ຮັບການເສີມຂະຫຍາຍ, ຜູ້ມີສິດເລືອກຕັ້ງຈະເລືອກຕັ້ງບັນດາຜູ້ທີ່ມີຄວາມເກັ່ງກ້າສາມາດ, ສົມເປັນຕົວແທນແຫ່ງເຈດຈຳນົງ, ຄວາມມ້ງມາດປາດຖະຫນາ ແລະ ສິດເປັນເຈົ້າຂອງປະຊາຊົນໃນສະພາແຫ່ງຊາດ ແລະ ສະພາປະຊາຊົນທຸກຂັ້ນ. ນັ້ນແມ່ນພື້ນຖານສຳຄັນ ແລະ ຕັດສິນຊີ້ຂາດເພື່ອນຳຫວຽດນາມ ປະຕິບັດເປົ້າໝາຍສືບຕໍ່ ປັບປຸງ ແລະ ສ້າງລັດແຫ່ງອຳນາດນິຕິບັນຍັດສັງຄົມນິຍົມຂອງປະຊາຊົນ,ໂດຍປະຊາຊົນ ແລະ ເພື່ອປະຊາຊົນ.