(vovworld) - ການຊ້ອມຮົບຮ່ວມກັນປະຈຳປີລະຫວ່າງ ສເກົາຫຼີ ແລະ ອາເມລິກາ ທີ່ມີຊື່ວ່າ ”ຜູ້ຮັກສາຄວາມເສລີ ອູນຈີ” ໄດ້ດຳເນີນໄປແຕ່ຕົ້ນສັບປະດານີ້, ໂດຍບໍ່ຫົວຊາຕໍ່ຄຳນາບຂູ່ຈາກສປປ ເກົາຫຼີ. ການຊ້ອມຮົບໃນຄັ້ງນີ້, ເປັນຄັ້ງທຳອິດທີ່ນຳໃຊ້ຍຸດທະສາດຂົ່ມຂູ່ ດ້ວຍສະຖານະການທີ່ວາງອອກນັ້ນແມ່ນຮັບມືກັບໄພນາບຂູ່ບຸກໂຈມຕີດ້ານນິວຄະເລຍໂດຍກົງຈາກພຽງຢາງ.
(ພາບ: ອິນເຕີແນດ)
ກໍ່ເຊັ່ນດຽວກັບບັນດາການຊ້ອມຮົບກ່ອນນີ້, ສປປ ເກົາຫຼີ ໄດ້ຄັດຄ້ານຢ່າງຮຸນແຮງ ແລະ ຖືວ່ານີ້ແມ່ນການຊ້ອມຮົບຮ່ວມເພື່ອກະກຽມໃຫ້ແກ່ສົງຄາມນິວຄະເລບ, ສປປ ເກົາຫຼີ ນາບຂູ່ຈະດຳເນີນການບຸກໂຈມຕີໂຕ້ຕອບ ສເກົາຫຼີ ໃນບໍ່ວ່າເວລາໃດ, ພ້ອມທັງກ່າວເຕືອນເຊີອູນ ແລະ ວໍຊິງຕັນ ຈະ ຖືກຮັບຂໍ້ຮ້າຍຈາກການກະທຳຂອງເຂົາເຈົ້າ.
ການຊ້ອມຮົບມີຂອບຂະໜາດໃຫຍ່ທີ່ບໍ່ເຄີຍມີມາ
ນີ້ແມ່ນການຊ້ອມຮົບດ້ານການທະຫານທີ່ມີຂອບຂະໜາດໃຫຍ່ກວ່າໝູ່ໃນປີຂອງອາເມລິກາ ແລະ ສເກົາຫຼີ ແລະ ກໍ່ຖືວ່າ ແມ່ນການຊ້ອມຮົບທີ່ມີຂອບຂະໜາດໃຫຍ່ກວ່າໝູ່ນັບແຕ່ກ່ອນມານີ້. ຍຸດທະສາດການຊ້ອມຮົບສອງຝ່າຍນີ້ຖືກຍົກອອກມາໃນການປະຊຸມລັດຖະມົນຕີປ້ອງກັນປະເທດລະຫວ່າງອາເມລິກາ ແລະ ສເກົາຫຼີ ເມື່ອປີກາຍ. ຕາມນັ້ນແລ້ວ, ສອງຝ່າຍຖືວ່າຕ້ອງມີການສົມທົບກັນເພື່ອຮັບມືກັບພຽງຢາງ.
ກ່ອນໜ້ານັ້ນ, ການຊ້ອມຮົບຮ່ວມອາເມລິກາ - ສເກົາຫຼີ ໄດ້ສະເໜີໃຫ້ສະພາຄວາມໝັ້ນຄົງ ສປຊ ຮຽກໂຮມກອງປະຊຸມດ່ວນ, ແຕ່ຂໍ້ສະເໜີນີ້ບໍ່ໄດ້ຕອບສະໜອງ. ສ ເກົາຫຼີຖືວ່າ, ການຊ້ອມຮົບຮ່ວມປະຈຳປີແມ່ນການເຄື່ອນໄຫວຮ່ວມມືທຳມະດາລະຫວ່າງເຊີອູນ ກັບວໍຊິງຕັນ, ເພື່ອຍົກສູງຄວາມສາມາດກຽມພ້ອມສູ້ຮົບ. ສ່ວນພຽງຢາງ ພັດປະກາດວ່າ, ຖ້າຫາກ ສະຫະປະຊາຊາດ “ຕັ້ງໃຈເມີນເສີຍ“ ສປປ ເກົາຫຼີ ຈະ “ເລືອກເຟັ້ນຊ່ອງທາງສະເພາະໃຫ້ແກ່ຕົນ“. ພຽງຢາງຍັງຢືນຢັນວ່າ, ຖ້າຫາກອາເມລິກາ ແລະ ສເກົາຫຼີ ບໍ່ຍຸບເລີກການຊ້ອມຮົບຮ່ວມທີ່ມີລັກສະນະເກາະຜິດຕ້ານພຽງຢາງ ນັ້ນ, ສັນຕິພາບ ແລະ ຄວາມປອດໄພຢູ່ແຫຼມເກົາຫຼີ ຈະບໍ່ໄດ້ຮັບປະກັນ. ຕໍ່ໜ້າທັດສະນະຂອງພຽງຢາງ, ເຊີອູນ ກໍ່ໄດ້ປະກາດຢ່າງຂັນແຂງວ່າ ຈະໂຕ້ຕອບບໍ່ວ່າການກະທຳເກາະຜິດໃດໆຈາກ ພຽງຢາງ.
ບັນດາຄຳກ່າວເຕືອນທີ່ຂັນແຂງ
ໃນຫຼາຍປີຜ່ານມາ, ສະພາບການຢູ່ແຫຼມເກົາຫຼີ ມີຄວາມເຄັ່ງຕຶງທີ່ສຸດ. ໃນໄລຍະມໍ່ໆມານີ້, ການພົວພັນລະຫວ່າງສອງພາກເກົາຫຼີ ຍິ່ງຮ້າຍແຮງກວ່າອີກ, ພາຍຫຼັງການຍິງລູກສອນໄພຕ່າງໆຂອງພຽງຢາງ. ຊຳ້ບໍ່ໜຳ. ກ່ອນການຊ້ອມຮົບຄັ້ງນີ້ ແລະ ການຢ້ຽມຢາມສເກົາຫຼີ ຂອງສັນຕະປາປາ Francis I ເພື່ອທຳພິທີສວດພາວະນາຂໍໃຫ້ສອງພາກເກົາຫຼີ ມີຄວາມປອງດອງກັນນັ້ນ. ພຽງຢາງ ໄດ້ຍິງລູກສອນໄຟໄລຍະສັ້ນ 5 ໜ່ວຍໃສ່ເຂດທະເລທາງທິດຕາເວັນອອກ. ນັບແຕ່ຕົ້ນປີມາຮອດປະຈຸບັນ, ສປປເກົາຫຼີ ໄດ້ຍິງລູກສອນໄຟເຖິງ 17 ຄັ້ງ, ດ້ວຍ 105 ໜ່ວຍ. ສິ່ງທີ່ໜ້າສົນໃຈແມ່ນລະດັບຄວາມໄວ, ໄລຍະຍິງ ແລະ ຄວາມອັນຕະລາຍຂອງການຍິງລູກສອນໄຟທົດລອງນີ້ນັບມື້ນັບໄດ້ຮັບການປັບປຸງ. ພຽງຢາງກ່າວເຕືອນວ່າກຳລັງທະຫານທັງໝົດຈະເຂົ້າຮ່ວມການຊ້ອມຮົບນີ້ ແລະ ທຳນຽບຂາວ, ທຳນຽບ 5 ແຈ, ສຳນັກງານຂອງປະທານາທິບໍດີ ສເກົາຫຼີ ພ້ອມກັບບັນດາຖານທີ່ໝັ້ນທະຫານຢູ່ ສເກົາຫຼີ ແລະ ຢູ່ໃນໂລກຈະກາຍເປັນເປົ້າໝາຍຂອງອາວຸດບຸກໂຈມຕີທີ່ທັນສະໄໝຂອງ ສປປ ເກົາຫຼີ.
ບາດກ້າວຖອຍຫຼັງໃນຄວາມມານະພະຍາຍາມປັບປຸງການພົວພັນລະຫວ່າງສອງພາກເກົາຫຼີ
ບໍ່ສາມາດປະຕິເສດເຈດຕະນາດີຂອງ ສປປເກົາຫຼີ ໃນການເຈລະຈາຕ່າງໆນັບແຕ່ຕົ້ນປີມານີ້. ເດືອນ 7 ຜ່ານມາ, ພຽງຢາງ ໄດ້ຕົກລົງສົ່ງຜູ້ແທນຄະນະໜຶ່ງລວມມີ 700 ຄົນ, ລວມມີນັກກິລາ ແລະ ກອງເຊຍມາຮ່ວມ ASIAD 17 ຢູ່ Incheon, ສ ເກົາຫຼີ ໃນເດືອນ 10 ຈະມາເຖິງ. ສປປ ເກົາຫຼີ ກໍ່ພວມພິຈາລະນາແຜນການເຂົ້າຮ່ວມກອງປະຊຸມສຳມະນາ ສົນທິສັນຍາ ສປຊ ຄັ້ງທີ 12 ກ່ຽວກັບຊີວະນາໆພັນ, ເຊິ່ງຄາດວ່າຈະຈັດຕັ້ງຢູ່ Pieng chang, ສເກົາຫຼີ, ແຕ່ວັນທີ 29/9-19/10 ຈະມາເຖິງ. ແຕ່ການຜັນແປຢ່າງສັບສົນໃນປະຈຸບັນ, ອາດຈະຍູ້ບັນດາຄວາມມານະພະຍາຍາມໃນການປັບປຸງການພົວພັນລະຫວ່າງສອງພາກເກົາຫຼີໃຫ້ຖອຍໄປ. ຄວາມຈິງແລ້ວ, ການເຈລະຈາຂັ້ນສູງລະຫວ່າງສອງພາກເກົາຫຼີ ເຊິ່ງຄາດວ່າຈະຈັດຕັ້ງໃນວັນທີ 19/8 ເພື່ອປຶກສາຫາລືກ່ຽວກັບແຜນການເຕົ້າໂຮມບັນດາຄອບຄົວຖືກພັດພາກຈາກກັນພາຍຫຼັງສົງຄາມເກົາຫຼີ (1950-1953) ນັ້ນແມ່ນບໍ່ໄດ້ຮັບການປະຕິບັດ.
ຄວາມຫວັງທີ່ວ່າ ສອງພາກເກົາຫຼີຈະທ້ອນໂຮມເປັນເອກະພາບ “ໃນຄອບຄົວດຽວ“ ບົນຈິດໃຈໄກເກ່ຍປອງດອງຊາດນັ້ນ ແມ່ນຍາກທີ່ຈະປະຕິບັດໄດ້. ສັນຕິພາບພຽງແຕ່ບັນລຸໄດ້ໂດຍຜ່ານການເຈລະຈາ, ຫາກບໍ່ແມ່ນການນຳໃຊ້ກຳລັງອາວຸດ. ແຕ່ໜ້າເສຍດາຍ, ສະພາບເຄັ່ງຕຶງໃນປະຈຸບັນ, ໄດ້ເຮັດໃຫ້ເລື່ອງຊອກຫາມາດຕະການຫຼຸດຜ່ອນຄວາມເຄັ່ງຕຶງລະ ຫວ່າງສອງພາກເກົາຫຼີ ຍິ່ງມີຄວາມຫຍຸ້ງຍາກກວ່າອິກ.