ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016-2021 ຈະຖືກດຳເນີນໃນຂອບເຂດທົ່ວປະເທດໃນວັນທີ 22/5 ທີ່ຈະມາເຖິງ. ນີ້ແມ່ນຄັ້ງທີ 2 ທີ່ຫວຽດນາມໄດ້ດຳເນີນ ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆໃນຈຸດເວລາດຽວກັນ, ແນໃສ່ສັບຊ້ອນດ້ານບຸກຄະລາກອນໃນລະບົບການເມືອງເປັນປົກກະຕິໂດຍໄວເພື່ອສຸມໃສ່ຜັນຂະຫຍາຍບັນດາໜ້າທີ່ກໍ່ສ້າງ ແລະ ພັດທະນາປະເທດຊາດ.
ທ່ານ ເລມິນທົງ ຮອງເລຂາທິການໃຫຍ່ສະພາແຫ່ງຊາດຫວຽດນາມ, ຮອງຫົວໜ້າຫ້ອງການສະພາເລືອກຕັ້ງແຫ່ງຊາດ |
ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆຈະຖືກດຳເນີນໃນຈຸດເວລາດຽວກັນ, ອັນໄດ້ສ້າງບັນຍາກາດທີ່ຟົດຟື້ນມ່ວນຊື່ນໃຫ້ແກ່ຊຸມວັນກະກຽມການເລືອກຕັ້ງ. ນີ້ແມ່ນວັນບຸນໃຫຍ່ທີ່ທົ່ວພັກ, ທົ່ວກອງທັບ ແລະ ທົ່ວປວງຊົນຫວຽດນາມພວມມຸ່ງໄປເຖິງໃນທ່າມກາງຄວາມເບີກບານມ່ວນຊື່ນ ແລະ ເຊື່ອໝັ້ນ.
ເສີມຂະຫຍາຍນ້ຳໃຈມະຫາສາມັກຄີທັງຊາດ
ກ່ຽວກັບລັກສະນະສຳຄັນຍິ່ງຂອງເຫດການການເມືອງທີ່ຈະມາເຖິງນີ້, ທ່ານ ເລມິນທົງ ຮອງເລຂາທິການໃຫຍ່ສະພາແຫ່ງຊາດຫວຽດນາມ, ຮອງຫົວໜ້າຫ້ອງການສະພາເລືອກຕັ້ງແຫ່ງຊາດ ຖືວ່າ : ການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016-2021 ແມ່ນໂອກາດເພື່ອໃຫ້ປະຊາຊົນເສີມຂະຫຍາຍຄວາມຮັບຜິດຊອບຂອງພົນລະເມືອງ, ເພີ່ມທະວີການເສີມຂະຫຍາຍກຸ່ມກ້ອນມະຫາສາມັກຄີທົ່ວປວງຊົນທັງຊາດ. ໂດຍຜ່ານການເລືອກຕັ້ງ, ປະຊາຊົນຫວຽດນາມໄດ້ຢັ້ງຢືນເຈດຈຳນົງ, ຄວາມຕັດສິນໃຈຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນໃຫ້ໝັ້ນຄົງໜັກແໜ້ນ, ສືບຕໍ່ກ້າວເດີນບົນເສັ້ນທາງແຫ່ງການສ້າງສາ ແລະ ພັດທະນາປະເທດຊາດໃຫ້ໝັ້ນຄົງເຂັ້ມແຂງເພື່ອເຊື່ອມໂຍງເຂົ້າກັບສາກົນ. ທ່ານເລມິນທົງ ຍັງໃຫ້ຮູ້ວ່າ ວຽກງານກະກຽມໃຫ້ແກ່ວັນບຸນໃຫຍ່ຂອງທົ່ວປວງຊົນພວມຖືກດຳເນີນໄປດ້ວຍດີ. ຍ້ອນການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆຖືກດຳເນີນໃນຈຸດເວລາດຽວກັນ, ດັ່ງນັ້ນຈຳນວນວຽກງານທີ່ຕ້ອງຜັນຂະຫຍາຍຢູ່ບັນດາອົງການສຳນັກງານຂັ້ນສູນກາງ ແລະ ອຳນາດການປົກຄອງທ້ອງຖິ່ນ ແມ່ນຫຼວງຫຼາຍທີ່ສຸດ ພ້ອມກັນນັ້ນ, ຈຳນວນພະນັກງານທີ່ເຂົ້າຮ່ວມວຽກງານເລືອກຕັ້ງກໍໄດ້ຮັບການລະດົມໃນລະດັບສູງສຸດ. ທ່ານ ເລມິນທົງ ຮອງເລຂາທິການໃຫຍ່ສະພາແຫ່ງຊາດຫວຽດນາມ, ຮອງຫົວໜ້າຫ້ອງການສະພາເລືອກຕັ້ງແຫ່ງຊາດ ເວົ້າວ່າ :
“ ອາດຈະເວົ້າວ່າ ການ ເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆ ຖືກດຳເນີນໃນສະພາວະພິເສດສະເພາະ. ດັ່ງນັ້ນ ວຽກງານກະກຽມການເລືອກຕັ້ງ, ວຽກງານໂຄສະນາ, ຂົນຂວາຍ ແລະ ຜັນຂະຫຍາຍການເລືອກຕັ້ງ ໄດ້ຖືກຈັດວາງໃນສະພາວະພິເສດ. ພິເສດ ນີ້ແມ່ນຄັ້ງທຳອິດທີ່ພວກເຮົາດຳເນີນການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆໃຕ້ແສງສະຫວ່າງຂອງລັດຖະທຳມະນູນປີ 2013 ຊຶ່ງແມ່ນລັດຖະທຳມະນູນທີ່ໄດ້ເຊີດຊູສິດທິມະນຸດ, ສິດອັນເປັນພື້ນຖານຂອງພົນລະເມືອງ”
ຜູ້ມີສິດເລືອກຕັ້ງດ້ວຍຄວາມຮັບຜິດຊອບ ແລະ ສະຫຼາດສ່ອງໃສຈະເລືອກເອົາບັນດາຜູ້ເປັນຕົວແທນຂອງຕົນ
ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆຖືກດຳເນີນໃນຈຸດເວລາດຽວກັນ, ດັ່ງນັ້ນ ຜູ້ມີສິດເລືອກຕັ້ງຈະຕ້ອງເລືອກຕັ້ງເປັນ 4 ຄັ້ງໃນ 4 ບັນຊີລາຍຊື່ຜູ້ອອກສະໝັກຮັບເລືອກຕັ້ງເພື່ອຊອກຫາຜູ້ທີ່ເໝາະສົມເພື່ອເລືອກຕັ້ງເຂົ້າໃນບັນດາອົງການສຳນັກງານຕົວແທນປະຊາຊົນໃນ 4 ຂັ້ນແຕກຕ່າງກັນ. ເພາະສະນັ້ນ, ທ່ານ ຫງວຽນວັນຟາ ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມໃຫ້ຮູ້ວ່າ :
“ ໃນພາບດຽວ, ຜູ້ມີສິດເລືອກຕັ້ງໄດ້ເລືອກເຟັ້ນ, ຄົ້ນຄ້ວາ 4 ບັນຊີລາຍຊື່ບັນດາຜູ້ອອກສະໝັກຮັບເລືອກຕັ້ງ, ແຕ່ລະບັນຊີລາຍຊື່ກໍມີຜູ້ອອກສະໝັກຮັບເລືອກຕັ້ງ ເຖິງ 3 – 5 ຄົນ, ເປັນອັນວ່າ ການຄົ້ນຄ້ວາຜູ້ອອກສະໝັກຮັບເລືອກຕັ້ງຈຳນວນ 20 ຄົນໃນເວລາອັນສັ້ນໆນັ້ນ , ຖ້າຫາກບໍ່ຄົ້ນຄ້ວາລະອຽດ ກໍພາໄປເຖິງການເລືອກເຟັ້ນຕາມລຳພັງໃຈ . ຍ້ອນເຫດນີ້ເອງ, ພັກ, ອຳນາດການປົກຄອງ, ແນວໂຮມປະເທດຊາດຫວຽດນາມຂັ້ນຕ່າງໆ ມີແຜນນະໂຍບາຍເປີດກ້ວາງ ແລະ ເພີ່ມທະວີຮູບການຂົນຂວາຍຫາສຽງເລືອກຕັ້ງຕາມລະບຽບກົດໝາຍເພື່ອໃຫ້ຜູ້ອອກສະໝັກຮັບເລືອກຕັ້ງມີເງື່ອນໄຂ ຂົນຂວາຍຫາສຽງເລືອກຕັ້ງເພື່ອໃຫ້ບັນດາ ຜູ້ມີສິດເລືອກຕັ້ງຮູ້ຈັກເຖິງໂຄງການດຳເນີນງານຂອງຜູ້ອອກສະໝັກຮັບເລືອກຕັ້ງ ເພື່ອຈະເລືອກເອົາຜູ້ທີ່ເໝາະສົມເຂົ້າເຮັດວຽກໃນບັນດາອົງການສຳນັກງານຕົວແທນປະຊາຊົນ”
ຜົນສຳເລັດຂອງການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆຄັ້ງນີ້ ແມ່ນມີການປະກອບສ່ວນບໍ່ໜ້ອຍຂອງຜູ້ມີສິດເລືອກຕັ້ງແຕ່ລະຄົນ. ທ່ານ ຫງວຽນວັນຖີ ຜູ້ມີສິດເລືອກຕັ້ງຢູ່ເມືອງ ບັກຕືລຽມ, ຮ່າໂນ້ຍ ມີຄຳເຫັນດັ່ງນີ້ :
“ ເຖິງວ່າ ແມ່ນສ່ວນບຸກຄົນດຽວເທ່ົານັ້ນ, ແຕ່ໃນຈຳນວນຜູ້ມີສິດເລືອກຕັ້ງນັບລ້ານຄົນນັ້ນ, ບັດເລືອກຕັ້ງຂອງເຮົາແມ່ນມີຄວາມສຳຄັນທີ່ສຸດເພື່ອເລືອກເອົາບັນດາຜູ້ສຸມຈິດສຸມໃຈໃຫ້ແກ່ປະເທດຊາດ ແລະ ຫວັງວ່າບັນດາຜູ້ທີ່ໄດ້ຮັບການເລືອກຕັ້ງນັ້ນ ຕ້ອງພະຍາຍາມເພື່ອສິດຜົນປະໂຫຍດຂອງປະຊາຊົນ ”
ຜູ້ມີສິດເລືອກຕັ້ງຄວນຄົ້ນຄ້ວາ ບັນຊີລາຍຊື່ຜູ້ອອກສະໝັກຮັບເລືອກຕັ້ງຢ່າງລະອຽດເພື່ອເລືອກເອົາບັນດາຜູ້ທີ່ເໝາະສົມເຂົ້າເຮັດວຽກຢູ່ບັນດາອົງການສຳນັກງານອຳນາດແຫ່ງລັດ ເພື່ອແນໃສ່ສະແດງຄວາມເຊື່ອໝັ້ນຕໍ່ບັນດາຜູ້ແທນປະຊາຊົນ, ຮ່ວມແຮງຮ່ວມໃຈກໍ່ສ້າງລັດຂອງປະຊາຊົນ, ໂດຍປະຊາຊົນ, ເພື່ອປະຊາຊົນ, ນຳປະເທດຊາດ ແລະ ແຕ່ລະທ້ອງຖິ່ນໃຫ້ນັບມື້ນັບພັດທະນາໃນໄລຍະຫັນປະເທດຊາດເປັນອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນ.