ວັນທີ 22/5, ຜູ້ມີສິດເລືອກຕັ້ງນັບສິບລ້ານຄົນໄດ້ໄປປ່ອນບັດເພື່ອເລືອກເອົາສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆຢູ່ 184 ຫົວໜ່ວຍເລືອກຕັ້ງ. ມາຮອດຈຸດເວລານີ້, ວຽກງານກະກຽມໃຫ້ແກ່ເຫດການການເມືອງສຳຄັນນີ້ ໄດ້ສ້າງສຳເລັດຢູ່ 63 ແຂວງ ແລະ ນະຄອນທົ່ວປະເທດ. ບັນດາທ້ອງຖິ່ນຂອງຫວຽດນາມໄດ້ກຽມພ້ອມໃຫ້ແກ່ວັນເລືອກຕັ້ງນີ້.
ຂະບວນລົດໂຄສະນາວັນເລືອກຕັ້ງ ສ.ສ.ຊ |
ການເລືອກຕັ້ງແມ່ນເຫດການທີ່ສຳຄັນໃນຊີວິດການເມືອງສັງຄົມຂອງປະເທດຊາດ ແລະ ຂອງແຕ່ລະທ້ອງຖິ່ນ ເພາະມັນສະແດງໃຫ້ເຫັນສິດອຳນາດຂອງປະຊາຊົນໃນການເລືອກເອົາຜູ້ເປັນຕົວແທນຂອງຕົນເພື່ອນຳພາທ້ອງຖິ່ນ ແລະ ປະເທດຊາດ. ການກະກຽມທຸກເງື່ອນໄຂເພື່ອໃຫ້ຜູ້ມີສິດເລືອກຕັ້ງໄປເລືອກຕັ້ງໄດ້ຮັບການຜັນຂະຫຍາຍມາແຕ່ຫຼາຍເດືອນແລ້ວ ນັບທັງດ້ານບຸກຄະລາກອນ, ພື້ນຖານວັດຖຸ, ຖະແຫຼງຂ່າວ, ໂຄສະນາ.
ຜັນຂະຫຍາຍຖືກຕາມຄວາມຄືບໜ້າ
ໄລ່ມາຮອດຈຸດເວລານີ້, ວຽກງານໃຫຍ່ 9 ປະການໄດ້ຮັບການຜັນຂະຫຍາຍເພື່ອດຳເນີນການເລືອກຕັ້ງ. ໃນນັ້ນມີການສ້າງຕັ້ງສະພາເລືອກຕັ້ງແຫ່ງຊາດ, ບັນດາອະນຸກຳມະການຂອງສະພາເລືອກຕັ້ງແຫ່ງຊາດ, ດຳເນີນການປຶກສາຫາລື 3 ຮອບເພື່ອກຳນົດໂຄງປະກອບຂອງບັນດາສະມາຊິກສະພາແຫ່ງຊາດ, ກຳນົດໂຄງປະກອບພາກສ່ວນບັນດາຜູ້ໄດ້ຮັບການສະເໜີອອກສະໝັກຮັບເລືອກຕັ້ງເປັນ ສະມາຊິກສະພາແຫ່ງຊາດ ສາມາດຕອບສະໜອງມາດຕະຖານຂອງ ສະມາຊິກສະພາແຫ່ງຊາດເພື່ອປະກາດບັນຊີລາຍຊື່ນີ້. ບົນພື້ນຖານນັ້ນ, ກຳນົດບັນດາຫົວໜ່ວຍເລືອກຕັ້ງຢູ່ບັນດາທ້ອງຖິ່ນ, ຈຳນວນສະມາຊິກສະພາແຫ່ງຊາດ ແລະ ຈຳນວນ ສະມາຊິກສະພາປະຊາຊົນທີ່ອອກສະໝັກຮັບເລືອກຕັ້ງຢູ່ແຕ່ລະຫົວໜ່ວຍເລືອກຕັ້ງ, ຕິດປະກາດບັນຊີລາຍຊື່ບັນດາຜູ້ ອອກສະໝັກຮັບເລືອກຕັ້ງ, ຈັດຕັ້ງການພົບປະກັບ ຜູ້ມີສິດເລືອກຕັ້ງໃຫ້ບັນດາຜູ້ ອອກສະໝັກຮັບເລືອກຕັ້ງ. ທ່ານ ຫງວຽນຖ້ຽນເຍີນ ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຮອງປະທານ ສະພາເລືອກຕັ້ງແຫ່ງຊາດຕີລາຄາວ່າ :
“ ບັນດາເນື້ອໃນວຽກງານທັງໝົດແມ່ນປະຕິບັດຕາມກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນ ແລະ ແຜນການເລືອກຕັ້ງໂດຍ ສະພາເລືອກຕັ້ງແຫ່ງຊາດຮັບຮອງເອົາໄດ້ສຳເລັດໂດຍພື້ນຖານຕາມຄວາມຄືບໜ້າ. ວຽກງານໃຫຍ່ 9 ຢ່າງໄດ້ຜັນຂະຫຍາຍຢ່າງຮຽບຮ້ອຍແລ້ວໃນໄລຍະທີ່ຜ່ານມາ ແລະ ບັນດາທ້ອງຖິ່ນພວມກວດກາຄືນການກະກຽມ. ຂ້າພະເຈົ້າຢືນຢັນວ່າ ກຳລັງຢູ່ຕາມຫົວໜ່ວຍເລືອກຕັ້ງໄດ້ກຽມພ້ອມໃຫ້ວັນເລືອກຕັ້ງແລ້ວ ”
ຜູ້ມີສິດເລືອກຕັ້ງກຽມພ້ອມໄປປ່ອນບັດ
ຊຸມມື້ນີ້, ຫໍວັດທະນະທຳຢູ່ຕາແສງ ດົງຟອງ ນະຄອນລາຍເຈົາມີຄົນເຂົ້າອອກຢ່າງໜາແໜ້ນ. ບ່ອນຕິດປະກາດບັນດາຊີລາຍຊື່ຜູ້ ອອກສະໝັກຮັບເລືອກຕັ້ງແມ່ນບໍລິເວນໄດ້ຮັບຄວາມສັນໃຈທີ່ສຸດຈາກ ຜູ້ມີສິດເລືອກຕັ້ງ. ທ່ານ ບຸຍເທ້ແມ້ງ ຜູ້ມີສິດເລືອກຕັ້ງຢູ່ບ້ານດົງຟອງໃຫ້ຮູ້ວ່າ :
“ຜູ້ມີສິດເລືອກຕັ້ງພວກຂ້າພະເຈົ້າໄດ້ຮັບບັດເລືອກຕັ້ງ. ຂ້າພະເຈົ້າກໍໄດ້ຄົ້ນຄ້ວາລະອຽດຊີວະປະຫວັດຫຍໍ້ຂອງບັນດາຜູ້ ອອກສະໝັກຮັບເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆຢູ່ທ້ອງຖິ່ນຄັ້ງນີ້. ຂ້າພະເຈົ້າກໍເຊັ່ນດຽວກັນກັບ ຜູ້ມີສິດເລືອກຕັ້ງຄົນອື່ນໆໃນເຂດຊຸມຊົນ ຕ່າງກໍມີຄວາມຫວັງຕໍ່ບັນດາຜູ້ເມືອ່ໄດ້ຮັບການເລືອກຕັ້ງເປັນຕົວແທນປະຊາຊົນຈະຕ້ອງປະກອບສຽງເວົ້າຂອງຕົນເພື່ອໃຫ້ທ້ອງຖິ່ນມີກົນໄກ, ນະໂຍບາຍດີກວ່າ ”
ໃນການເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016-2021, ທົ່ວແຂວງຈາວິງມີ 1.111 ໜ່ວຍເລືອກຕັ້ງ ແລະ ຜູ້ມີສິດເລືອກຕັ້ງເກືອບ 800.000 ຄົນ. ມາຮອດປະຈຸບັນ, ບັນດາ ຜູ້ມີສິດເລືອກຕັ້ງ ໄດ້ຮັບບັດເລືອກຕັ້ງແລ້ວ. ບັນຊີລາຍຊື່ ຜູ້ມີສິດເລືອກຕັ້ງ ແລະ ບັນດາຜູ້ ອອກສະໝັກຮັບເລືອກຕັ້ງໄດ້ຕິດປະກາດແລ້ວ.
ຢູ່ບ້ານ Plei Sar ນະຄອນກອນຕຸມ, ຍິ່ງຫຍັບເຂົ້າໃກ້ວັນເລືອກຕັ້ງ, ບັນຍາກາດກໍຍິ່ງຟົດຟື້ນມ່ວນຊື່ນດ້ວຍສຽງໂທລະໂຄງໂຄສະນາ, ປ້າຍໂຄສະນາ, ປ້າຍຄຳຂວັນ, ເປັນຕົ້ນແມ່ນຢູ່ຕາມຫົວໜ່ວຍເລືອກຕັ້ງ. ອ້າຍ ອາທິກ ຊາວບ້ານ Plei Sar ນະຄອນກອນຕຸມໃຫ້ຮູ້ວ່າ :
“ ປະຊາຊົນໃນບ້ານພວກຂ້າພະເຈົ້າສະໜັບສະໜູນວັນເລືອກຕັ້ງຢ່າງສຸດໃຈ. ຕ້ອງເລືອກເອົາຜູ້ທີ່ມີຄວາມເກັ່ງກ້າສາມາດ, ມີຄຸນສົມບັດຢ່າງພຽງພໍເພື່ອຊ່ວຍເຫຼືອປະຊາຊົນ ”
ໃນຂະນະນັ້ນ, ຢູ່ຕາມບັນດາເຂດອຸດສາຫະກຳ, ກຳມະກອນຜູ້ອອກແຮງງານໄດ້ຮັບການອຳນວຍຄວາມສະດວກເພື່ອເຂົ້າຮ່ວມວັນເລືອກຕັ້ງ. ທ່ານນາງຫງວຽນທິຕວຽນ ປະທານສະຫະພັນແຮງງານຮ່າໂນ້ຍ ໃຫ້ຮູ້ວ່າ :
“ ຖ້າຫາກມີຜູ້ມີສິດເລືອກຕັ້ງກວ່າ 300 ຄົນ ຈະມີຫີບບັດເພື່ອໃຫ້ຜູ້ມີສິດເລືອກຕັ້ງມີເງື່ອນໄຂສະດວກໃຫ້ແກ່ຜູ້ມີສິດເລືອກຕັ້ງໄດ້ປ່ອນບັດ. ສຳລັບບັນດາເຂດອຸດສາຫະກຳ, ເຂດຜະລິດສົ່ງອອກຮ່າໂນ້ຍ ກໍລ້ວນແຕ່ມີກຳມະກອນກວ່າ 10.000 ຄົນ, ດັ່ງນັ້ນ ພວກຂ້າພະເຈົ້າກໍມີບໍລິເວນສະເພາະເພື່ອໃຫ້ກຳມະກອນເຂົ້າຮ່ວມປ່ອນບັດ ”
ການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນຕ່າງໆຖືກຈັດຂຶ້ນ 5 ປີເທື່ອໜຶ່ງ. ການກະກຽມຢ່າງລອບຄອບຖີ່ຖ້ວນຈະປະກອບສ່ວນສຳຄັນເຂົ້າໃນຜົນສຳເລັດຂອງວັນເລືອກຕັ້ງ, ຊ່ວຍໃຫ້ຜູ້ມີສິດເລືອກຕັ້ງເລືອກເຟັ້ນເອົາບັນດາຜູ້ສົມກັບເປັນຕົວແທນຂອງຕົນເຂົ້າເຮັດວຽກໃນອົງການສຳນັກງານອຳນາດແຫ່ງລັດຢູ່ຂັ້ນສູນກາງ ແລະ ທ້ອງຖິ່ນ.