(vovworld)- ຫນຶ່ງໃນບັນດາພາລະບົດບາດ, ຫນ້າທີ່ ປະກອບສ່ວນສຳຄັນສ້າງເປັນຂີດໝາຍປ່ຽນແປງໃຫມ່ໃນອາຍຸການສະພາແຫ່ງຊາດຊຸດທີ XIII ແມ່ນການເຄື່ອນໄຫວນິຕິບັນຍັດ. ມີກົດໝາຍກວ່າ 100 ສະບັບ ໂດຍສະພາແຫ່ງຊາດຮັບຮອງເອົາ ໄດ້ສ້າງກອບກົດໝາຍອັນໝັ້ນຄົງໜັກແໜ້ນເພື່ອສ້າງລັດແຫ່ງອຳນາດນິຕິບັນຍັດສັງຄົມນິຍົມ, ຮັບປະກັນສິດທິມະນຸດ, ສ້າງເງື່ອນໄຂພັດທະນາເສດຖະກິດ. ບົດຂຽນຂອງນັກຂ່າວ ຮົ່ງເວີນ ທີ່ມີຫົວຂໍ້ວ່າ: ຂີດໝາຍນິຕິບັນຍັດຂອງສະພາແຫ່ງຊາດຊຸດທີ XIII.
ກອງປະຊຸມຂອງສະພາແຫ່ງຊາດຊຸດທີ XIII
|
ສະພາແຫ່ງຊາດຊຸດທີ
XIII ໄດ້ສ້າງຂີດໝາຍສຳຄັນຫລາຍຢ່າງ ເມື່ອຮັບຮອງເອົາລັດຖະທຳມະນູນປີ 2013 ແລະ ກົດໝາຍສຳຄັນຫລາຍສະບັບ. ນີ້ກໍແມ່ນອາຍຸການຂອງສະພາແຫ່ງຊາດທີ່ມີຈຳນວນກົດໝາຍໄດ້ຮັບຮອງເອົາຫລາຍກວ່າໝູ່ (ກວ່າ 107 ສະບັບ) ແລະ ມະຕິຫລາຍສະບັບ.
ສ້າງເອກະສານນິຕິກຳຫລາຍສະບັບ, ສ້າງກອບກົດໝາຍ, ປະກອບສ່ວນພັດທະນາປະເທດຊາດ
ໃນຂີດໝາຍນິຕິບັນຍັດຂອງ ສະພາແຫ່ງຊາດຊຸດທີ XIII, ຜົນງານທີ່ພົ້ນເດັ່ນກວ່າໝູ່ ນັ້ນແມ່ນ ສະພາແຫ່ງຊາດໄດ້ຮັບຮອງເອົາລັດຖະທຳມະນູນປີ 2013, ຊື່ງແມ່ນລັດຖະທຳມະນູນຂອງໄລຍະປ່ຽນແປງໃຫມ່ຮອບດ້ານ, ຄົບຊຸດ ກ່ຽວກັບດ້ານເສດຖະກິດ ແລະ ການເມືອງ, ຕອບສະຫນອງຄວາມຮຽກຮ້ອງຕ້ອງການຂອງກິດຈະການສ້າງສາ ແລະ ປົກປັກຮັກສາປະເທດຊາດ ແລະ ເຊື່ອມໂຍງເຂົ້າກັບສາກົນ.
ພ້ອມກັບການຮັບຮອງເອົາລັດຖະທຳມະນູນໃຫມ່, ໃນອາຍຸການ, ສະພາແຫ່ງຊາດໄດ້ພິຈາລະນາ, ປັບປຸງ, ເພີ່ມເຕີມຫລືປະກາດໃຊ້ປະມວນກົດໝາຍໃຫຍ່, ກົດໝາຍສຳຄັນສະບັບໃຫມ່ເປັນສ່ວນຫລາຍ. ບັນດາກົດໝາຍ, ລັດຖະບັນຍັດໄດ້ສ້າງພື້ນຖານດ້ານນິຕິກຳຢ່າງຄົບຊຸດ, ປະກອບສ່ວນຮັບປະກັນສະຖຽນລະພາບ, ພັດທະນາປະເທດຊາດ. ທ່ານ ໂງດືກແມ້ງ, ສະມາຊິກສະພາແຫ່ງຊາດ ແຂວງ ບີງທ້ວນ ຖືວ່າ:
“ໃນ 5 ປີຜ່ານມາ, ບໍ່ທັນມີເວລາໃດສະພາບການຢູ່ພາຍໃນປະເທດຖືກປະສົບກັບຄວາມຫຍຸ້ງຍາກຍ້ອນວິກິດການເສດຖະກິດ, ການເງິນ, ເງິນຕາຂອງໄລຍະ 2008, ພິເສດ ບາງຄັ້ງບາງຄາວອະທິປະໄຕແຫ່ງຊາດຖືກລ່ວງລ້ຳຢ່າງຮ້າຍແຮງ. ໃນສະພາບການນັ້ນ, ສະພາແຫ່ງຊາດໄດ້ມີບົດບາດພົ້ນເດັ່ນ. ດ້ວຍການສຳເລັດບັນດາການເຄື່ອນໄຫວນິຕິບັນຍັດ, ສ້າງລັດຖະທຳມະນູນ, ສະພາແຫ່ງຊາດແມ່ນອົງການປະກອບສ່ວນສຳຄັນເຂົ້າໃນການສ້າງສະພາບແວດລ້ອມສັນຕິພາບ ແລະ ສ້າງເງື່ອນໄຂໃຫ້ປະເທດຊາດເຊື່ອມໂຍງເຂົ້າກັບສາກົນ ແລະ ພັດທະນາ. ນັ້ນແມ່ນຈຸດພິເສດ, ແມ່ນຜົນງານລວມຂອງສະພາແຫ່ງຊາດ.”
ທ່ານ ຮ່າຮູຍທົງ, ສະມາຊິກສະພາແຫ່ງຊາດ ແຂວງ ເທື່ອທຽນເຫ້ວ ໄດ້ແບ່ງປັນການຕີລາຄາຂອງຫາງສຽງສາກົນຢ່າງພາວະວິໄສວ່າ:
“ ການນຳທະນາຄານໂລກ ຕີລາຄາສູງບັນດາກົດໝາຍກ່ຽວກັບເສດຖະກິດ ຊື່ງສະພາແຫ່ງຊາດຫວຽດນາມ ໄດ້ຮັບຮອງເອົາໃນອາຍຸການຜ່ານມາ ນັ້ນແມ່ນ: ກົດໝາວ່າດ້ວຍງົບປະມານແຫ່ງລັດ, ກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການລົງທຶນ…. ບັນດາກົດໝາຍເຫລົ່ານັ້ນ ມີຫລາຍຈຸດທີ່ກ້າວຫນ້າ ໂດຍສະພາແຫ່ງຊາດ ຮັບຮອງເອົາດ້ວຍບັດເຫັນດີສູງສຸດ. ເຂົາເຈົ້າກໍຕີລາຄາວ່າ ລັດຖະທຳມະນູນປີ 2013 ແມ່ນລັດຖະທຳມະນູນຂອງໄລຍະປ່ຽນແປງໃຫມ່ຢ່າງຮອບດ້ານ ນັບທັງເສດຖະກິດ ແລະ ການເມືອງ, ແມ່ນຫນຶ່ງໃນບັນດາພື້ນຖານສຳຄັນທີ່ສຸດໃຫ້ແກ່ບັນດາບາດກ້າວປ່ຽນໃຫມ່ໃນໄລຍະຕໍ່ໄປຂອງປະເທດຊາດ.”
ຖືຜົນປະໂຫຍດຂອງປະຊາຊົນເປັນກົກຂອງກົດໝາຍທຸກສະບັບ
ໃນອາຍຸການ 5 ປີຜ່ານມາ, ສະພາແຫ່ງຊາດ ບໍ່ພຽງແຕ່ສຳເລັດປະລິມານວຽກງານດ້ວຍຕົວເລກສະຖິຕິເທົ່ານັ້ນ ຫາກການເຄື່ອນໄຫວສ້າງລັດຖະທຳມະນູນ, ນິຕິບັນຍັດຂອງສະພາແຫ່ງຊາດແມ່ນເຕັມໄປດ້ວຍຈິດໃຈເຊີດຊູການປົກປ້ອງ, ເຄົາລົບສິດທິມະນຸດ ອີກດ້ວຍ. ທ່ານ ໂງດືກແມ້ງ, ສະມາຊິກສະພາແຫ່ງຊາດ ແຂວງ ບີງທ້ວນ ໃຫ້ຮູ້ວ່າ:
“ພວກເຮົາມີບັນດາຂໍ້ກຳນົດໃຫມ່ທີ່ກ້າວຫນ້າ, ສອດຄ່ອງກັບທຳນຽມສາກົນ ໃນລັດຖະທຳມະນູນປີ 2013. ນັ້ນແມ່ນເຊີດຊູ ແລະ ປົກປ້ອງສິດທິມະນຸດ, ບັນດາກົດໝາຍ ກ່ຽວກັບສິດໄດ້ສ້າງຕັ້ງສະມາຄົມ, ສິດສຳຜັດກັບຂໍ້ມູນຂ່າວສານ ແລະ ບັນດາກົດໝາຍອື່ນອີກ. ຂ້າພະເຈົ້າຖືວ່າ ພວກເຮົາໄດ້ສ້າງສະພາບແວດລ້ອມລະບອບລະບຽບການ, ໃຫ້ສຳເລັດໂດຍພື້ນຖານ ເພື່ອສ້າງກຳລັງຫນູນ ເຊີດຊູຄຸນຄ່າສິດທິມະນຸດ, ສິດເສລິພາບ ປະຊາທິປະໄຕຂອງປະຊາຊົນ. ເປັນທີ່ຈະແຈ້ງແລ້ວວ່າ ກົດໝາຍຂອງພວກເຮົາທີ່ປະກາດໃຊ້ນັ້ນ ໄດ້ຕອບສະຫນອງຄວາມຮຽກຮ້ອງຕ້ອງການຂອງພຶດຕິກຳຕົວຈິງ, ກິດຈະການປ່ຽນແປງໃຫມ່ ແລະ ການເຊື່ອມໂຍງເຂົ້າກັບສາກົນຂອງປະເທດຊາດ.”
ການຮັບຮອງເອົາບັນດາປະມວນກົດໝາຍສຳຄັນ ຮັບປະກັນສິດພົນລະເມືອງ ແລະ ສິດທິມະນຸດ ໄດ້ຮັບຄວາມເຫັນດີເຫັນພ້ອມຈາກປະຊາຊົນ ແລະ ຜູ້ມີສິດເລືອກຕັ້ງເປັນຈຳນວນຫລວງຫລາຍ. ທ່ານ ຮີ່ງວັນຕີງ, ສະມາຊິກສະພາແຫ່ງຊາດ ແຂວງ ຕຽນຢາງ ໃຫ້ຂໍ້ສັງເກດວ່າ:
“ບັນດາປະມວນກົດໝາຍອາຍາ, ການດຳເນີນຄະດີອາຍາ, ປະມວນກົດໝາຍແພ່ງ ແລະ ການດຳເນີນຄະດີແພ່ງ, ການປະຕິບັດການກັງຂັງ, ກັກຕົວຊົ່ວຄາວ, ກົດໝາຍວ່າດ້ວຍອົງການສືບສວນສອບສວນອາຍາ. ໄດ້ຮັບຄວາມຊົມເຊີຍຈາກຜູ້ມີສິດເລືອກຕັ້ງ. ອາດຈະເວົ້າໄດ້ວ່າ ສະພາແຫ່ງຊາດຊຸດນີ້ ມີການປ່ຽນແປງໃຫມ່ຫລາຍຢ່າງ. ມີສະມາຊິກສະພາແຫ່ງຊາດຫລາຍທ່ານ ຢືດໝັ້ນຕາມທິດປະຕິຮູບດ້ານຕຸລາການ, ຕາມທິດສິດຂອງພົນລະເມືອງ, ສິດທິມະນຸດ. ນີ້ແມ່ນບາດກ້າວປະຕິຮູບໃຫຍ່ຂອງສະພາແຫ່ງຊາດ ສຳລັບດ້ານຕຸລາການ.”
ບັນດາສະມາຊິກສະພາແຫ່ງຊາດດຳເນີນການປ່ອນບັດ
|
ຈຳນວນຮ່າງກົດໝາຍທີ່ໄດ້ຮັບການປະກອບຄວາມເຫັນຈາກປະຊາຊົນແມ່ນເພີ່ມຂຶ້ນ, ລະດົມພູມປັນຍາ, ຄວາມເຫັນດີເຫັນພ້ອມຂອງສັງຄົມ. ທ່ານນາງ ຫງວຽນທິກວຽດເຕີມ, ສະມາຊິກສະພາແຫ່ງຊາດ ນະຄອນ ໂຮ່ຈິມີນ ຖືວ່າ:
“ເພື່ອບັນລຸໄດ້ຜົນງານນັ້ນ ມີຫລາຍສາຍເຫດ, ໃນນັ້ນ ທັດສະນະເພື່ອປະຊາຊົນ, ຮ່ຳຮຽນຈາກປະຊາຊົນ, ເຄົາລົບປະຊາຊົນ ຂອງພັກ ໂດຍສະພາແຫ່ງຊາດ, ສະມາຊິກສະພາແຫ່ງຊາດ ຊາບຊືມ ແລະ ຫັນເປັນການເຄື່ອນໄຫວພຶດຕິກຳຕົວຈິງຂອງຕົນ.”
ອາຍຸການສະພາແຫ່ງຊາດຊຸດທີ XIII ໃກ້ຈະສິ້ນສຸດ. ບັນດາຜົນງານໃນຂົງເຂດນິຕິບັນຍັດໃນ 5 ປີຜ່ານມາ ຈະແມ່ນກຳລັງຫນູນ ເພື່ອໃຫ້ສະພາແຫ່ງຊາດຊຸດໃຫມ່ ສືບຕໍ່ຍົກສູງຄຸນນະພາບ, ລັກສະນະຄົບຊຸດ ແລະ ເປັນເອກະພາບຂອງບັນດາກົດໝາຍ, ເສີມຂະຫຍາຍປະສິດທິຜົນບົດບາດຂອງສະມາຊິກສະພາແຫ່ງຊາດສະເພາະກິດ, ການເຂົ້າຮ່ວມຂອງບັນດາຜູ້ຊ່ຽວຊານ ແລະ ປະຊາຊົນເຂົ້າໃນການເຄື່ອນໄຫວນິຕິບັນຍັດ. ວຽກງານນີ້ ຈະປະກອບສ່ວນສຳຄັນເຂົ້າໃນພາລະກິດຍູ້ແຮງກິດຈະການປ່ຽນແປງໃຫມ່ຢ່າງຮອບດ້ານ, ເຊື່ອມໂຍງເຂົ້າກັບສາກົນ ຕາມເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງທີ XII ຂອງພັກກອມມູນິດຫວຽດນາມ.