ຊາວຫວຽດນາມກວ່າ 500 ຄົນທີ່ອາໄສຢູ່ຫຼາຍແຫ່ງໃນໂລກໄດ້ມາຮ່ວມກອງປະຊຸມທີ່ມີຫົວຂໍ້: “ຊາວຫວຽດນາມອາໄສຢູ່ຕ່າງປະເທດຮ່ວມແຮງຮ່ວມໃຈສ້າງສານະຄອນໂຮ່ຈິມິນພັດທະນາໄວ, ຍືນຍົງ ແລະ ເຊື່ອມໂຍງເຂົ້າກັບສາກົນ” ຊຶ່ງຈືກຈັດຂຶ້ນໃນວັນທີ 12 ແລະ 13/11 ຢູ່ນະຄອນໂຮ່ຈິມິນ. ກອງປະຊຸມໄດ້ປຸກລະດົມ ແລະ ເສີມຂະຫຍາຍພູມປັນຍາຂອງບັນດານັກປັນຍາຊົນ, ນັກທຸລະກິດ ຊາວຫວຽດນາມອາໄສຢູ່ຕ່າງປະເທດ, ຊອກຫາວິທີການແກ້ໄຂຢ່າງມີປະສິດທິຜົນ, ແທດຈິງໃຫ້ແກ່ບັນດາບັນຫາທີ່ຮີບດ່ວນ ກໍຄືຍາວນານຂອງນະຄອນໂຮ່ຈິມິນ, ນຳນະຄອນກາຍເປັນຮູບແບບວຽກງານຂົນຂວາຍ, ສ້າງນະໂຍບາຍປຸລະດົມການປະກອບສ່ວນຂອງ ຊາວຫວຽດນາມອາໄສຢູ່ຕ່າງປະເທດເພື່ອພັດທະນາປະເທດຊາດ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພົບປະກັບບັນດາຜູ້ຊ່ຽວຊານ, ນັກປັນຍາຊົນຊາວຫວຽດນາມທີ່ພວມອາໄສຢູ່ຕ່າງປະເທດ (ພາບ:TTXVN) |
ປະຊາຄົມ ຊາວຫວຽດນາມທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ຕ່າງປະເທດແມ່ນພາກສ່ວນໜຶ່ງທີ່ບໍ່ອາດຕັດແຍກອອກຈາກປະເທດຊາດໄດ້, ແມ່ນຂົວເຊື່ອມຕໍ່ເພີ່ມທະວີນ້ຳໃຈມິດຕະພາບລະຫວ່າງຫວຽດນາມກັບປະເທດຕ່າງໆ. ໄລຍະທີ່ຜ່ານມາ, ກະຊວງການຕ່າງປະເທດຫວຽດນາມໄດ້ຈັດຕັ້ງຫຼາຍລາຍການເຄື່ອນໄຫວທີ່ອຸດົມສົມບູນເພື່ອສ້າງເງື່ອນໄຂໃຫ້ແກ່ ຊາວຫວຽດນາມອາໄສຢູ່ຕ່າງປະເທດມາພົວພັນແລກປ່ຽນ, ຊຸກຍູ້ການດຳເນີນທຸລະກິດ, ການລົງທຶນຢູ່ພາຍໃນປະເທດ, ເພີ່ມທະວີການເຊື່ອມຈອດ, ອວາຍໜ້າເມືອຫາກົກເຄົ້າເຫງົ້າກໍ. ກອງປະຊຸມ: “ຊາວຫວຽດນາມອາໄສຢູ່ຕ່າງປະເທດຮ່ວມແຮງຮ່ວມໃຈສ້າງສານະຄອນໂຮ່ຈິມິນ” ແມ່ນເຫດການໃຫຍ່ທຳອິດທີ່ຈັດຕັ້ງໃຫ້ແກ່ຊາວຫວຽດນາມອາໄສຢູ່ຕ່າງປະເທດທີ່ນະຄອນໂຮ່ຈິມິນ ເພາະນີ້ແມ່ນນະຄອນນຳໜ້າທົ່ວປະເທດໃນວິວັດທະນາການເປີດປະຕູ ແລະ ເຊື່ອມໂຍງເຂົ້າກັບສາກົນ.
ຮ່ວມແຮງຮ່ວມໃຈພັດທະນາວິທະຍາສາດເຕັກໂນໂລຢີ, ເສດຖະກິດພູມປັນຍາຂອງນະຄອນ.
ນະຄອນໂຮ່ຈິມິນໄດ້ວາງເປົ້າໝາຍກາຍເປັນໜຶ່ງໃນບັນດາສູນກາງໃຫຍ່ກ່ຽວກັບເສດຖະກິດ, ການເງິນ, ການຄ້າ, ວິທະຍາສາດ-ເຕັກໂນໂລຢີຂອງພາກພື້ນອາຊີຕາເວັນອອກສ່ຽງໃຕ້”. ເພາະສະນັ້ນ, ວິທະຍາສາດ-ເຕັກໂນໂລຢີ ແລະ ການປ່ຽນແປງໃໝ່ຢ່າງມີຫົວຄິດປະດິດສ້າງໄດ້ກາຍເປັນກຳລັງໜູນຕົ້ນຕໍເພື່ອພັດທະນາເສດຖະກິດ-ສັງຄົມຕິດພັນກັບການພັດທະນາເສດຖະກິດພູມປັນຍາ. ທາງນະຄອນໄດ້ສຸມໃສ່ຄົ້ນຄ້ວາຊຸກຍູ້ການສ້າງເປັນຮູບປະທຳ ແລະ ພັດທະນາສະພາບແວດລ້ອມການປ່ຽນແປງໃໝ່ຢ່າງມີຫົວຄິດປະດິດສ້າງ ແລະ ການເລີ່ມສ້າງອາຊີບ, ພັດທະນາບັນດາກຳລັງບົ່ມຊ້ອນທາງດ້ານວິທະຍາສາດ-ເຕັກໂນໂລຢີ ແລະ ພັດທະນາຕະຫຼາດເຕັກໂນໂລຢີ. ກ່າວຄຳເຫັນທີ່ກອງປະຊຸມ, ທ່ານສາດສະດາຈານ, ປອ ວູ້ເລຫາຍ ສັງກັດມະຫາວິທະຍາໄລ Monash , Melbourne ປະເທດອົດສະຕາລີ ຖືວ່າ :
“ ຖ້າຫາກພວກເຮົາສາມາດພັດທະນາເຕັກໂນໂລຢີຂອງສະເພາະພວກເຮົານັ້ນ, ກໍສາມາດແກ້ໄຂບັນຫາຂອງປະເທດຊາດ ແລະ ຂອງນະຄອນໄດ້. ພ້ອມກັນນັ້ນ, ພວກເຮົາຈະນຳໜ້າໃນຂົງເຂດເຕັກໂນໂລຢີນັ້ນ ແລະ ອາດຈະນຳເຕັກໂນໂລຢີນັ້ນ ອອກສູ່ຕ່າງປະເທດ, ເຮັດໄດ້ເຊັ່ນນັ້ນ, ພວກເຮົາຈຶ່ງແມ່ນເປັນເຈົ້າຂອງ
ເຕັກໂນໂລຢີ, ສາມາດຂາຍເຕັກໂນໂລຢີອອກ ແລະ ພວກເຮົາບໍ່ອາໄສທາງດ້ານເຕັກໂນໂລຢີຂອງຕ່າງປະເທດອີກ”
ແລະກໍໃນກອງປະຊຸມ, ຊາວຫວຽດນາມຫຼາຍຄົນອາໄສຢູ່ຕ່າງປະເທດຖືວ່າ : ນະຄອນໂຮ່ຈິມິນຕ້ອງມີສະພາບແວດລ້ອມໃຫ້ແກ່ພື້ນຖານເສດຖະກິດພູມປັນຍາ, ສຸມໃສ່ທາງດ້ານພູມປັນຍາຢ່າງແທ້ຈິງ, ຜະລິດອອກບັນດາຜະລິດຕະພັນ, ການບໍລິການທີ່ມີມູນຄ່າເພີ່ມສູງ ຊຶ່ງສ່ວນຫຼາຍແມ່ນບັນດາຊັບສິນແບບນາມທຳ. ທ່ານ ປອ ຟານບິກຖ້ຽນ ຊາວຫວຽດນາມອາໄສຢູ່ຮຸ່ງກາຣີ ມີຂໍ້ສະເໜີວ່າ :
“ ຂ້າພະເຈົ້າຢາກສະເໜີກ່ຽວກັບການປະກອບສ່ວນຂອງວິສາຫະກິດສຳລັບວິທະຍາສາດ-ເຕັກໂນໂລຢີເພື່ອຮັບໃຊ້ການພັດທະນາ. ຊາວຫວຽດນາມມີຄວາມສະຫຼາດສະຫຼຽວ, ໄດ້ຮັບຫຼາຍລາງວັນລະດັບໂລກກ່ຽວກັບບັນດາຫົວເລື່ອງຄົ້ນຄ້ວາ. ແຕ່ການຄົ້ນຄ້ວາວິທະຍາສາດ ແລະ ບັນດາວິສາຫະກິດຍັງບໍ່ທັນຮ່ວມສຳພັນນຳກັນເທື່ອ. ຂ້າພະເຈົ້າສະເໜີໃຫ້ສ້າງກອງທຶນພັດທະນາວິທະຍາສາດ-ເຕັກໂນໂລຢີ. ກອງທຶນນີ້ຄວນຫັນເປັນວຽກງານຂອງສັງຄົມ ”
ສຸມຈິດສຸມໃຈກັບການພັດທະນາຂອງປະເທດຊາດ
ຄຳເຫັນປະກອບຂອງຊາວຫວຽດນາມອາໄສຢູ່ຕ່າງປະເທດສຳລັບການພັດທະນານະຄອນໂຮ່ຈິມິນແມ່ນມີຫຼາຍຮູບຫຼາຍແບບໃນບັນຫາຕ່າງໆເຊັ່ນ: ການທົດລອງສ້າງນະຄອນເລີ່ມສ້າງອາຊີບ, ນະຄອນສະຫຼາດ, ບັນດາບັນຫາຍຸດທະສາດຂອງປະເທດຊາດກ່ຽວກັບການສຶກສາ ບຳລຸງສ້າງ, ເສດຖະກິດ-ສັງຄົມ, ວິທະຍາສາດ-ເຕັກໂນໂລຢີ, ສົ່ງເສີມການລົງທຶນ…..ທ່ານ ຮອງລັດຖະມົນຕີກະຊວງການຕ່າງປະເທດຫວຽດນາມວູ້ຮົ່ງນາມ ຫົວໜ້າຄະນະຈັດຕັ້ງກອງປະຊຸມຖືວ່າ :
“ ຂ້າພະເຈົ້າຖືວ່າ ຜົນສຳເລັດຂອງພວກເຮົາແມ່ນການເຊື່ອມຕໍ່ລະຫວ່າງ 2 ປັດໄຈທີ່ສ້າງເປັນຄວາມມຸ່ງຫວັງແຫ່ງກະຕືລືລົ້ນຂອງບັນດາລູກຮັກຫຼານແພງຂອງປະເທດຫວຽດນາມທີ່ຢູ່ຫ່າງໄກຈາກບ້ານເກີດເມືອງນອນ, ແຕ່ຍາມໃດກໍອວາຍໜ້າເມືອຫາປະເທດຊາດ, ນະຄອນໂຮ່ຈິມິນ, ຮ່ວມແຮງຮ່ວມໃຈພ້ອມກັບຊາວນະຄອນໂຮ່ຈິມິນ ສ້າງນະຄອນທີ່ແສນຮັກຂອງພວກເຮົາກາຍເປັນຄວາມເອກອ້າງທະນົງໃຈຂອງຊາວຫວຽດນາມບໍ່ວ່າຜູ້ໃດທີ່ຢູ່ ຫ່າງໄກຈາກບ້ານເກີດເມືອງນອນ, ປະເທດຊາດ”
ເຂົ້າຮ່ວມກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ຕີລາຄາສູງ ໃນໄລຍະທີ່ຜ່ານມາ, ບັນດາວິສາຫະກິດຊາວຫວຽດນາມອາໄສຢູ່ຕ່າງປະເທດໄດ້ຕັ້ງໜ້າຮ່ວມມືກັບບັນດານັກທຸລະກິດຢູ່ພາຍໃນປະເທດ ເພື່ອນຳສິນຄ້າ, ການບໍລິການຂອງຫວຽດນາມອອກສູ່ຕ່າງປະເທດ; ລົງທຶນ, ສ້າງຕັ້ງວິສາຫະກິດຜະລິດ ດຳເນີນທຸລະກິດຢູ່ຕະຫຼາດພາຍໃນປະເທດ. ນັກປັນຍາຊົນ ຊາວຫວຽດນາມອາໄສຢູ່ຕ່າງປະເທດກໍໄດ້ເຂົ້າຮ່ວມບັນດາການເຄື່ອນໄຫວຄົ້ນຄ້ວາ, ນຳໃຊ້ວິທະຍາສາດ-ເຕັກໂນໂລຢີ, ການສຶກສາ-ບຳລຸງສ້າງ, ຜັນຂະຫຍາຍບັນດາໂຄງການເພື່ອການກຸສົນ, ສັງຄົມຢູ່ພາຍໃນປະເທດ…ພິເສດຈຳນວນເງິນຕາຂອງ ຊາວຫວຽດນາມອາໄສຢູ່ຕ່າງປະເທດທີ່ຝາກມາປະເທດຊາດ ນັບມື້ນັບເພີ່ມຂຶ້ນ ດ້ວຍ 12,5 ຕື້ USD ໃນປີ 2015, ຊຶ່ງເລັ່ງໃສ່ການລົງທຶນ, ຜະລິດ ດຳເນີນທຸລະກິດ ແລະ ການແກ້ໄຂຊີວິດການເປັນຢູ່ຂອງ ຊາວຫວຽດນາມພາກສ່ວນໜຶ່ງຢູ່ພາຍໃນປະເທດ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ກ່າວວ່າ :
“ຊາວຫວຽດນາມແຕ່ລະຄົນທີ່ພວມອາໄສຢູ່ຕ່າງປະເທດ ເຖິງວ່າມີສະພາບຄອບຄົວທີ່ແຕກຕ່າງກັນ, ມີຄວາມນຶກຄິດກ່ຽວກັບປະເທດຊາດທີ່ແຕກຕ່າງກັນ ແລະ ຢູ່ແຫ່ງຫົນໃດກໍຕາມ, ແຕ່ໃນຫົວໃຈຂອງທຸກໆຄົນ ຕ່າງກໍຮັກບ້ານເກີດເມືອງນອນ, ປະເທດຊາດຍາມໃດກໍຢາກອວາຍໜ້າເມືອຫາກົກເຄົ້າເຫງົາກໍ. ພວກເຮົາທຸກໆຄົນຈົ່ງຮ່ວມແຮງຮ່ວມໃຈ ສ້າງສາບ້ານເກີດເມືອງນອນປະເທດຊາດໃຫ້ຈະເລີນຮຸ່ງເຮືອງ, ສາມາດທຽບທັນກັບບັນດາເພື່ອນມິດໃນ 5 ທະວີບໃນໂລກ”
ຄວາມເຄົາລົບຕໍ່ບັນດາການປະກອບສ່ວນຂອງ ຊາວຫວຽດນາມອາໄສຢູ່ຕ່າງປະເທດ, ຮັບຟັງຄຳເຫັນປະກອບຂອງບັນດາລູກຮັກຫຼານແພງຂອງປະເທດຊາດທີ່ດຳລົງຊີວິດຢູ່ແດນໄກ ແມ່ນເພື່ອແນໃສ່ ເສີມຂະຫຍາຍແຫຼ່ງກຳລັງອັນໃຫຍ່ຫຼວງຂອງ ຊາວຫວຽດນາມອາໄສຢູ່ຕ່າງປະເທດໃນກິດຈະການປ່ຽນແປງໃໝ່ ແລະ ພັດທະນາແບບຍືນຍົງ, ໃນນັ້ນ ມີ ນະຄອນໂຮ່ຈິມິນ ຊຶ່ງແມ່ນນະຄອນນຳໜ້າທົ່ວປະເທດໃນວິວັດທະນາການເປີດປະຕູ ແລະ ເຊື່ອມໂຍງເຂົ້າກັບສາກົນ.