(vovworld)- ການເຈລະຈາກັບບັນດາຜູ້ລາຍງານພິເສດຂອງ ສປຊ ແມ່ນການເຄື່ອນໄຫວສຳຄັນໃນຂອບເຂດການຮ່ວມມື ລະຫວ່າງຫວຽດນາມ ແລະ ກົນໄກທົບທວນປະຈຳໄລຍະດ້ານສິດທິມະນຸດ(UPR) ຂອງ ສປຊ ກ່ຽວກັບສິດທິມະນຸດ. ບັນດາການແລກປ່ຽນຢ່າງກົງໄປກົງມາກ່ຽວກັບນະໂຍບາຍ, ກົດໝາຍ ແລະ ພຶດຕິກຳຕົວຈິງ ຮັບປະກັນສິດເສລີໃນການເຫລື້ອມໃສສາສະຫນາ ລະຫວ່າງບັນດາອົງການກ່ຽວຂ້ອງ ແລະ ລັດຖະບານຫວຽດນາມ ແລະ ບັນດາຜູ້ລາຍງານ ໄດ້ສະແດງໃຫ້ເຫັນເຈດຕະນາດີ, ທ່າທີຮ່ວມມື, ເປີດເຜີຍຂອງລັດຖະບານຫວຽດນາມ ໃນດ້ານສິດທິມະນຸດ.
ທ່ານ Heiner Bielefeldt ເຮັດວຽກກັບການນຳ ສູນກາງ
ສະມາຄົມພຸດທະສາສະຫນາຫວຽດນາມ
|
ກົນໄກທົບທວນປະຈຳໄລຍະດ້ານສິດທິມະນຸດ (UPR) ແມ່ນກົນໄກໂດຍສະພາສິດທິມະນຸດ ສ້າງຂຶ້ນເມື່ອປີ 2007 ເພື່ອຕີລາຄາສະພາບການປະຕິບັດບັນດາພັນທະ, ຄຳໝັ້ນສັນຍາກ່ຽວກັບດ້ານສິດທິມະນຸດຂອງທຸກປະເທດສະມາຊິກ ສປຊ ຢ່າງຮອບດ້ານ ແລະ ພາວະວິໄສ.ແຕ່ປີ 2010 ມາຮອດປະຈຸບັນ, ຫວຽດນາມ ໄດ້ສ້າງເງື່ອນໄຂສະດວກເພື່ອໃຫ້ 6 ລະບຽບການພິເສດ ຂອງ ສປຊ ມາຫວຽດນາມ, ສະແດງທ່າທີເຂັ້ມງວດໃນການປະຕິບັດບັນດາຄຳໝັ້ນສັນຍາສາກົນ ເມື່ອອອກສະໝັກຮັບເລືອກຕັ້ງ, ກາຍເປັນສະມາຊິກຂອງສະພາສິດທິມະນຸດ ແລະ ບັນດາຄຳສະເຫນີແນະ ຊື່ງຫວຽດນາມ ໄດ້ຮັບຮູ້ຕາມກົນໄກດັ່ງກ່າວ.
ສິດເສລີໃນການເຫລື້ອມໃສສາສະຫນາຂອງຫວຽດນາມໄດ້ຮັບການປັບປຸງ
ໃນການຢ້ຽມຢາມຫວຽດນາມ ແຕ່ວັນທີ 21-31/7/2014, ຜູ້ລາຍງານພິເສດຂອງ ສປຊ, ທ່ານ Heiner Bielefeldt ໄດ້ເຮັດວຽກກັບຜູ້ຕາງຫນ້າບັນດາກະຊວງ, ຂະແຫນງການ, ອົງການກ່ຽວຂ້ອງຢູ່ສູນກາງ ແລະ ທ້ອງຖິ່ນຈຳນວນຫນຶ່ງ, ຢ້ຽມຢາມບັນດາຮາກຖານສາສະຫນາ ແລະ ພົບປະກັບອົງການ, ສ່ວນບຸກຄົນຈຳນວນຫນຶ່ງ ເພື່ອຊອກຮູ້ພຶດຕິກຳຕົວຈິງໃນການເຄື່ອນໄຫວສາສະຫນາຢູ່ຫວຽດນາມ. ໃນຖະແຫລງການຫນັງສືພິມ ພາຍຫລັງການຢ້ຽມຢາມ, ທ່ານ Heiner Bielefeldt ເນັ້ນຫນັກວ່າ: ຄວາມຈິງ ບັນດາເງື່ອນໄຂເພ່ືອເຄື່ອນໄຫວສາສະຫນາຢ່າງເສລີຢູ່ຫວຽດນາມ ໄດ້ຮັບການປັບປຸງ ແລະ ຜູ້ຕາງຫນ້າບັນດາປະຊາຄົມສາສະຫນາກໍໄດ້ຮັບຮູ້ວ່າ ເຂົາເຈົ້າມີສະຖານທີ່ຫລາຍແຫ່ງເພື່ອດຳເນີນການເຄື່ອນໄຫວສາສະຫນາກວ່າເມື່ອທຽບໃສ່ອະດີດຕະການ. ຫວຽດນາມ ໄດ້ໃຫ້ສັດຕະຍາບັນສົນທິສັນຍາສິດທິມະນຸດສາກົນເກືອບທັງໝົດ, ຊື່ງລວມມີ: ສົນທິສັນຍາສາກົນກ່ຽວກັບບັນດາສິດພົນລະເຮືອນ ແລະ ການເມືອງ,ໃນນັ້ນ ມີມາດຕາ 18 ກ່ຽວກັບສິດເສລີດ້ານແນວຄິດ, ມະໂນທຳ,ສາສະຫນາ ແລະ ການເຫລື້ອມໃສ. ທ່ານ Heiner Bielefeldt ກໍເຕື້ອງເຖິງລັດຖະທຳມະນູນປີ 2013 ຂອງຫວຽດນາມ, ໃນນັ້ນ ມີພາກທີ 2 ກ່ຽວກັບສິດທິມະນຸດ, ບັນດາສິດ ແລະ ພັນທະພື້ນຖານຂອງພົນລະເມືອງ ແລະ ມາດຕາ 24 ເວົ້າແຈ້ງສິດເສລີໃນການເຊື່ອຖືສາສະຫນາ ແລະ ການເຫລື້ອມໃສສາສະຫນາຂອງພົນລະເມືອງ. ຕາມນັ້ນແລ້ວ, ທຸກຄົນລ້ວນແຕ່ມີສິດເສລີໃນການເຫຼື້ອມໃສ, ສາສະໜາ, ເຊື່ອຖືຫຼືບໍ່ເຊື່ອຖືສາສະໜາໃດໜຶ່ງ. ບັນດາສາສະໜາລ້ວນແຕ່ສະເໝີພາບຕໍ່ໜ້າກົດໝາຍ. ລັດເຄົາລົບ ແລະ ປົກປ້ອງສິດເສລີໃນການເຫຼື້ອມໃສ, ສາສະໜາ. ບໍ່ມີໃຜໄດ້ແຊກແຊງສິດເສລີພາບໃນການເຫຼື້ອມໃສ, ສາສະໜາ ຫຼືສວຍໃຊ້ການເຫຼື້ອມໃສ, ສາສະໜາເພື່ອລະເມີດກົດໝາຍ.
ບັນດາຄວາມກ້າວໜ້າອື່ນໃນຂົງເຂດສິດທິມະນຸດ
ບໍ່ພຽງແຕ່ບັນລຸໄດ້ບັນດາຜົນງານກ່ຽວກັບຄວາມເສລີພາບໃນການເຫຼື້ອມໃສ, ສາສະໜາ ຄືດັ່ງຜູ້ລາຍງານພິເສດຂອງ ສປຊ ໄດ້ເຫັນປະຈັກຕາໃນການຢ້ຽມຢາມຫວຽດນາມ ຫວ່າງແລ້ວນີ້ເທົ່ານັ້ນ, ຫວຽດນາມ ຍັງມີຄວາມ ກ້າວໜ້າອື່ນຫຼາຍຢ່າງໃນຂົງເຂດສິດທິມະນຸດອີກດ້ວຍ. ສິ່ງດັ່ງກ່າວສະແດງໃຫ້ເຫັນຜ່ານເລື່ອງຫວຽດນາມ ໄດ້ເຂົ້າຮ່ວມສົນທິສັນຍາກ່ຽວກັບສິດຂອງຄົນພິການ; ຮັບຮອງເອົາກົດໝາຍວ່າດ້ວຍຄົນພິການ; ເຂົ້າເປັນສະມາຊິກສົນທິສັນຍາກ່ຽວກັບການຕ້ານອາດຊະຍາກຳຂ້າມຊາດ ມີການຈັດຕັ້ງ ແລະ ອະນຸສັນຍາກ່ຽວກັບການສະກັດກັ້ນ, ປາບປາມ ແລະ ລົງໂທດການຄ້າມະນຸດ, ພິເສດແມ່ນແມ່ຍິງ ແລະ ເດັກນ້ອຍ; ສົນທິສັນຍາເລກທີ 122 ຂອງອົງການແຮງງານສາກົນ (ILO) ກ່ຽວກັບນະໂຍບາຍວຽກເຮັດງານທຳ; ເຊັນອະນຸມັດ ສົນທິສັນຍາເລກທີ 186 ກ່ຽວກັບແຮງງານເດີນທະເລ. ໃນຕົວຈິງ, ຍາມໃດຫວຽດນາມ ກໍ່ເຄົາລົບນັບຖື, ປົກປ້ອງ ແລະ ຊຸກຍູ້ບັນດາສິດທິມະນຸດຄື: ສິດເສລີໃນການປາກເວົ້າ, ສິດເສລີພາບໃນຂົງເຂດສື່ສານ, ສິດເສລີໃນການເຫຼືອມໃສ, ສາສະໜາ; ສິດຂອງຜູ້ທີ່ພວມປະຕິບັດການຕັດສິນລົງໂທດຂອງສານ, ຜູ້ຖືກກັກຂັງຊົ່ວຄາວເພື່ອສືບສວນ, ສິດເສດຖະກິດ, ສັງຄົມ ແລະ ວັດທະນະທຳເພື່ອແນໃສ່ຍົກສູງຄຸນນະພາບຊີວິດຂອງປະຊາຊົນ. ໃນດ້ານສາກົນ, ຫວຽດນາມ ໄດ້ປະກອບສ່ວນຢ່າງຕັ້ງໜ້າເຂົາໃນການສ້າງຕັ້ງຄະນະກຳມະການລະຫວ່າງລັດຖະບານອາຊຽນ ກ່ຽວກັບສິດທິມະນຸດ (AICHR), ຄະນະກຳມະການອາຊຽນກ່ຽວກັບການປົກປ້ອງ ແລະ ຊຸກຍູ້ບັນດາສິດຂອງແມ່ຍິງ ແລະ ເດັກນ້ອຍ(ACWC) ແລະ ຖະແຫລງການສິດທິມະນຸດ ອາຊຽນ; ຕັ້ງຫນ້າເຂົ້າຮ່ວມຂໍ້ລິເລີ່ມຂັ້ນລັດຖະມົນຕີບັນດາປະເທດອະນຸພາກພື້ນແມ່ນ້ຳຂອງ ກ່ຽວກັບການປ້ອງກັນ ແລະ ຕ້ານການຄ້າມະນຸດ (COMMIT), ສົມທົບກັນຢ່າງແຫນ້ນແຟ້ນກັບບັນດາອົງການ ສປຊ, ລົງນາມໃນຂໍ້ຕົກລົງ, ສັນຍາຮ່ວມມືສອງຝ່າຍກັບບັນດາປະເທດຫລາຍສະບັບ, ສ້າງກົນໄກເຈລະຈາສອງຝ່າຍປະຈຳກ່ຽວກັບສິດທິມະນຸດກັບປະເທດຈຳນວນຫນຶ່ງ ແລະ ຄູ່ຮ່ວມມືຄື: ອາເມລິກາ, ສະຫະພາບເອີລົບ (ອີຢູ), ອົດສະຕາລີ, ນອກແວ, ສະວິດ. ຄວາມຈິງພິສູດໃຫ້ເຫັນຄວາມຕັ້ງຫນ້າ ແລະ ເປັນເຈົ້າການຂອງຫວຽດນາມ ໃນການເຂົ້າຮ່ວມປະກອບສ່ວນເຂົ້າໃນວຽກງານສາກົນ, ເປັນຕົ້ນແມ່ນການຊຸກຍູ້ ແລະ ປົກປ້ອງສິດທິມະນຸດ ສະແດງໃຫ້ເຫັນຜ່ານຈຳນວນບັດສະຫນັບສະຫນູນຫວຽດນາມ ເຂົ້າເປັນສະມາຊິກສະພາສິດທິມະນຸດ ສປຊ ອາຍຸການ 2014-2016 ດ້ວຍລະດັບສູງ.
ການເຈລະຈາເພື່ອຊຸກຍູ້ດ້ານສິດທິມະນຸດ
ໃນການຢ້ຽມຢາມ ແລະ ເຮັດວຽກຂອງບັນດາຜູ້ລາຍງານພິເສດຂອງ ສປຊ ຢູ່ ຫວຽດນາມ ທັງໝົດ ໃນຂອບເຂດ ກົນໄກທົບທວນປະຈຳໄລຍະດ້ານສິດທິມະນຸດ ນັບແຕ່ປີ 2010 ມາຮອດປະຈຸບັນ, ບັນດາຜູ້ລາຍງານ ແລະ ຜູ້ຕາງຫນ້າບັນດາອົງການກ່ຽວຂ້ອງຂອງຫວຽດນາມ ຍາມໃດກໍແລກປ່ຽນກ່ຽວກັບນະໂຍບາຍ, ກົດໝາຍ ແລະ ພຶດຕິກຳຕົວຈິງ ຮັບປະກັນສິດເສລີໃນການເຫລື້ອມໃສສາສະຫນາເວົ້າສະເພາະ ແລະ ສິດທິມະນຸດເວົ້າລວມ ຢູ່ ຫວຽດນາມ. ບັນດາກະຊວງ, ຂະແຫນງການສູນກາງ ແລະ ທ້ອງຖິ່ນ ຂອງຫວຽດນາມ ຍາມໃດກໍຊີ້ໃຫ້ເຫັນນະໂຍບາຍ, ຄວາມມານະພະຍາຍາມ, ຜົນງານກໍຄືການແບ່ງເບົາຄວາມຫຍຸ້ງຍາກ, ສິ່ງທ້າທາຍຂອງຫວຽດນາມ ໃນການຮັບປະກັນສິດທິມະນຸດ ແລະ ບັນດາການກຳນົດທິດຂອງຫວຽດນາມ ເພື່ອຕອບສະຫນອງບັນດາສິດຂອງປະຊາຊົນໃນຂົງເຂດນີ້ນັບມື້ນັບດີກວ່າ. ສ້າງເງື່ອນໄຂສະດວກ ເພື່ອໃຫ້ຜູ້ລາຍງານພິເສດຂອງ ສປຊ ໄດ້ເຫັນປະຈັກຕາສະພາບຕົວຈິງຢູ່ຫວຽດນາມ ໃນຂອບເຂດ ກົນໄກທົບທວນປະຈຳໄລຍະດ້ານສິດທິມະນຸດ ແລະ ການເຈລະຈາຢ່າງເປີດເຜີຍກັບເຂົາເຈົ້າ ແມ່ນວຽກງານທີ່ມີປະສິດທິຜົນ, ສະແດງໃຫ້ເຫັນເຈດຕະນາດີ, ການຮ່ວມມືຢ່າງແທດຈິງຂອງຫວຽດນາມ ກັບສາກົນ ເພື່ອຊຸກຍູ້ສິດທິມະນຸດ.