(vovworld)- ມະຕິກອງປະຊຸມຄັ້ງທີ 4 ຂອງຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ໄດ້ຢືນຢັນວ່າ: ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ແມ່ນມາດຕະການສຳຄັນຕົ້ນຕໍໃນການກໍ່ສ້າງ, ປັບປຸງພັກ. ທີ່ບັນດາການພົບປະກັບຜູ້ມີສິດເລືອກຕັ້ງ, ກອງປະຊຸມສູນກາງ, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ເນັ້ນຫນັກເປັນຫລາຍຄັ້ງເຖິງການຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍແມ່ນຂອດຫລັກແຫລ່ງ, ມີຄວາມໝາຍ ແລະ ຄວາມສຳຄັນພິເສດເພື່ອສ້າງການຫັນປ່ຽນຢ່າງເຫັນໄດ້ຊັດ, ແກ້ໄຂບັນດາຂໍ້ຈຳກັດ, ຄວາມອ່ອນດອ້ຍໃນວຽກງານກໍ່ສ້າງພັກ.
ກອງປະຊຸມຄັ້ງທີ 4 ຂອງຄະນະບໍລິຫານງານສູນກາງພັກ
ກອມມູນິດຫວຽດນາມ ຊຸດທີ 11
ພາບ:vietbao
|
ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ແມ່ນລະບອບຫນຶ່ງ, ເນື້ອໃນຫນຶ່ງທີ່ສຳຄັນໃນການດຳເນີນຊີວິດ ແລະ ການເຄື່ອນໄຫວຂອງພັກ, ແມ່ນກົດເກນພື້ນຖານໃນການພັດທະນາຂອງພັກ, ແມ່ນວິທີພື້ນຖານເພື່ອປັບປຸງ ແລະ ເພີ່ມທະວີຄວາມສາມັກຄີເປັນເອກະພາບໃນພັກ. ສິ່ງດັ່ງກ່າວຍິ່ງມີຄວາມໝາຍສຳລັບການຄົງຕົວ, ພັດທະນາຂອງພັກກອມມູນິດຫວຽດນາມ ໃນໄລຍະປະຕິວັດໃຫມ່ຂອງປະເທດຊາດປະຈຸບັນ.
ປະຕິບັດຈາກຮູບແບບດີເດັ່ນ
ເມືອງ ຟຸກທໍ້ ແມ່ນຫນຶ່ງໃນບັນດາທ້ອງຖິ່ນ ໄດ້ຮັບການຕີລາຄາຈາກນະຄອນ ຮ່າໂນ້ຍ ວ່າແມ່ນທອ້ງຖິ່ນ ນຳຫນ້າໃນການປະຕິບັດມະຕິສູນກາງພັກຄັ້ງທີ 4. ປະຈຸບັນ, ເມືອງ ຟຸກທໍ້ ນຳຫນ້າໃນທົ່ວນະຄອນ ກ່ຽວກັບການກໍ່ສ້າງຊົນນະບົດໃຫມ່ ດ້ວຍສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ. ທ່ານ ຫງໍ້ຢູຍຫຽວ, ເລຂາຄະນະພັກ ເມືອງ ຟຸກທໍ້ ຖືວ່າ: ບັນດາການປ່ຽນແປງຂອງເມືອງ ຟຸກທໍ້ ປະຈຸບັນ ຍ້ອນມີການຜັນຂະຫຍາຍປະຕິບັດມະຕິສູນກາງພັກຄັ້ງທີ 4 ກ່ຽວກັບບາງບັນຫາຮີບດ່ວນໃນການກໍ່ສ້າງພັກ.
“ເມື່ອປະຕິບັດມະຕິດັ່ງກ່າວ ດ້ວຍໝວດມາດຕະການທຳອິດ ແມ່ນ ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ແລະ ລັກສະນະນຳຫນ້າ ເປັນແບບຢ່າງຂອງຫົວຫນ້າ, ພວກຂ້າພະເຈົ້າໄດ້ປະຕິບັດເປັນລະບົບ. ພາຍຫລັງສຳຫລວດກວດຄືນ, ພວກຂ້າພະເຈົ້າສ້າງແຜນການ ແລະ ປະກາດໃຊ້ແຜນການແກ້ໄຂຂອງໝູ່ຄະນະ ແລະ ສ່ວນບຸກຄົນ.”
ມາຮອດປະຈຸບັນ, ມະຕິສູນກາງພັກຄັ້ງທີ 4 ໄດ້ສ້າງການຫັນປ່ຽນຢ່າງແຮງໃນພະນັກງານ, ສະມາຊິກພັກ ແລະ ປະຊາຊົນນະຄອນ ຮ່າໂນ້ຍ. ທີ່ການສຳຫລວດກວດຄືນຄັ້ງຕ່າງໆຈັດຂຶ້ນເປັນປະຈຳເດືອນ,ປີ ໃນທົ່ວນະຄອນ ລ້ວນແຕ່ມີ 70-80% ອົງຄະນະພັກ, ຫນ່ວຍພັກ ບັນລຸລະດັບອົງຄະນະພັກ, ຫນ່ວຍພັກປອດໄສ, ເຂັ້ມແຂງ.
ທະວີຄູນອົງການຈັດຕັ້ງພັກທຸກຂັ້ນ
ມະຕິສູນກາງພັກຄັ້ງທີ 4 ກ່ຽວກັບບາງບັນຫາຮີບດ່ວນໃນການກໍ່ສ້າງພັກ ໄດ້ຮັບການຜັຂະຫຍາຍຢ່າງແຮງໃນຊີວິດ ບໍ່ພຽງແຕ່ຢູ່ນະຄອນ ຮ່າໂນ້ຍ ເທົ່ານັ້ນ ຫາກຍັງຢູ່ທຸກຂັ້ນ, ທຸກຂະແຫນງການ ແລະ ທ້ອງຖິ່ນທັງໝົດອີກດ້ວຍ. ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ຕ້ອງຕິດພັນກັບການແກ້ໄຂ, ປັບປຸງຢ່າງລະອຽດ, ແທ້ຈິງ ໄດ້ຊ່ວຍຍົກສູງກຳລັງຄວາມສາມາດ, ກຳລັງຕໍ່ສູ້ຂອງພັກ, ສະແດງໃຫ້ເຫັນຜ່ານປະສິດທິຜົນການບໍລິຫານວຽກງານຂອງພັກ, ລັດ, ລັດຖະບານ ແລະ ອຳນາດການປົກຄອງທຸກຂັ້ນຢ່າງລະອຽດ. ຈາກວິທີ ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ຢ່າງກົງໄປກົງມາ, ເຂັ້ມງວດ ຂອງກົມການເມືອງ, ຄະນະເລຂາ, ບັນດາອົງຄະນະພັກ, ຫນ່ວຍພັກຂັ້ນລຸຸ່ມ ໄດ້ຜັນຂະຫຍາຍການ ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ຢ່າງມີຫົວຄິດປະດິດສ້າງ. ບໍ່ພຽງແຕ່ປະຕິບັດການສຳຫລວດກວດຄືນ, ຕຳຫນິຕິຊົມເທົ່ານັ້ນ, ຫາກເລື່ອງປ່ອນບັດໄວ້ວາງໃຈ, ການສ້າງແຜນຊັບຊ້ອນພະນັກງານຂັ້ນຍຸດທະສາດ, ສ້າງບັນດາກົນໄກ, ນະໂຍບາຍໃຫ້ສົມບູນແບບ, ສຸມໃສ່ຍູ້ແຮງວຽກງານຕໍ່ສູ້ ປ້ອງກັນ, ຕ້ານການສໍ້ລາດບັງຫລວງ, ການຟຸມເຟືອຍ, ເພີ່ມທະວີວຽກງານກວດກາ, ການສືບສວນສອບສວນ, ສັ່ງຟ້ອງ, ນຳບັນດາຄະດີສໍ້ລາດບັງຫລວງໃຫຍ່ອອກມາພິພາກສາ ກໍໄດ້ຮັບການຜັນຂະຫຍາຍຕາມເນື້ອໃນຈິດໃຈຂອງມະຕິສູນກາງພັກຄັ້ງທີ 4 ນັບແຕ່ປີ 2012 ມາຮອດປະຈຸບັນ.
ສືບຕໍ່ຜັນຂະຫຍາຍການຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນ ສະຫາຍຢ່າງແຮງ
ການຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ຕາມເນື້ອໃນຈິດໃຈຂອງມະຕິສູນກາງພັກຄັ້ງທີ 4 ແມ່ນການຕໍ່ສູ້ດ້ານແນວຄິດ, ການເມືອງພາຍໃນ. ວຽກງານ ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ໄດ້ເອົາໃຈໃສ່ເປັນພິເສດເຖິງການເຊີດຊູລັກສະນະນຳຫນ້າ, ເປັນແບບຢ່າງຂອງຫົວຫນ້າອົງການຈັດຕັ້ງ, ຫົວຫນ່ວຍ. ຮອງສາດສະດາຈານ, ດຣ ໂງຫືວຖາວ, ຄູສອນຂັ້ນສູງ, ສະຖາບັນການເມືອງການປົກຄອງແຫ່ງຊາດ ໂຮ່ຈິມີນ ຖືວ່າ: ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍຕ້ອງອີງໃສ່ພື້ນຖານວິທະຍາສາດກວ່າ.
“ຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ ຄວນເອົາໃຈໃສ່ເຖິງຜູ້ມີຖານະຕຳແຫນ່ງສູງສູດ. ຜູ້ນຳພາປະເທດຊາດ, ການນຳພັກ ຕ້ອງເປັນແບບຢ່າງເພື່ອໃຫ້ບັນດາສະມາຊິກພັກປະຕິບັດຕາມ. ຂ້າພະເຈົ້າຖືວ່າ ໃນຖັນແຖວການນຳການເມືອງ ຄວນອີງໃສ່ພື້ນຖານວິທະຍາສາດ. ການນຳໃຊ້, ໝູນໃຊ້ວິທະຍາສາດແມ່ນພື້ນຖານທີ່ມີລັກສະນະພາວະວິໄສທີ່ສຸດ.”
ປະສິດທິຜົນຂອງບັ້ນດຳເນີນຊີວິດການເມືອງຢ່າງເລິກເຊິ່ງກວ້າງຂວາງ ຕາມເນື້ອໃນຈິດໃຈຂອງມະຕິສູນກາງພັກຄັ້ງທີ 4 ໄດ້ສົ່ງຜົນກະທົບຢ່າງຕັ້ງຫນ້າເຖິງຫນ້າທີ່ກໍ່ສ້າງ ແລະ ປັບປຸງພັກ, ເບື້ອງຕົ້ນສະກັດກັ້ນທ່າເຊື່ອມເສຍດ້ານແນວຄິດການເມືອງ, ຄຸນສົມບັດ, ແບບແຜນການດຳລົງຊີວິດຂອງພາກສ່ວນພະນັກງານ, ສະມາຊິກພັກ. ພ້ອມກັບການຕຳຫນິຕິຊົມຕົນເອງ ແລະ ຕຳຫນິຕິຊົມເພື່ອນສະຫາຍ, ວຽກງານການຈັດຕັ້ງ, ພະນັກງານ ແລະ ການດຳເນີນຊີວິດພັກ ກໍມີການປ່ຽນແປງຢ່າງແຮງ. ບັນດາມາດຕະການ ກ່ຽວກັບກົນໄກ, ນະໂຍບາຍ, ການສຶກສາດ້ານການເມືອງ, ແນວຄິດໃຫ້ແກ່ພະນັກງານ, ສະມາຊິກພັກ ໄດ້ຮັບຄວາມເອົາໃຈໃສ່ ແລະໄດ້ຮັບການປະຕິບັດໃນທົ່ວພັກ ເພື່ອສືບຕໍ່ເພີ່ມທະວີກຳລັງແຮງຂອງພັກກອມມູນິດຫວຽດນາມ.