(vovworld)-ເບິ່ງແຍງດູແລໃຫ້ຜູ້ທຸກຍາກໄດ້ຕອ້ນຮັບບຸນເຕັດຢ່າງອົບອຸ່ມ ຍາມໃດກໍແມ່ນແຜນນະໂຍບາຍຊື່ງລັດຫວຽດນາມໄດ້ເອົາໃຈໃສ່ເປັນພິເສດ ແລະ ປະຕິບັດຢ່າງມີປະສິດທິຜົນ, ເປັນຕົ້ນໃນສະພາບທີ່ອັດຕາຄອບຄົວທຸກຍາກຢູ່ຫວຽດນາມ ຍັງຄົງກວມປະມານ 6% ຈຳນວນພົນລະເມືອງ. ພ້ອມກັບການເຂົ້າຮ່ວມຈາກລັດ, ສັງຄົມກໍຮັບຮູ້ການປະກອບສ່ວນຢ່າງມີປະສິດທິຜົນຂອງວົງຄະນາຍາດໃນການເບິ່ງແຍງດູແລບຸນເຕັດໃຫ້ຜູ້ທຸກຍາກ. ການຮ່ວມແຮງຮ່ວມໃຈຂອງທົ່ວສັງຄົມ ແລະ ການກະທຳອັນສູງສົ່ງນີ້ ບໍ່ພຽງແຕ່ນຳມາເຊິ່ງລະດູບານໃຫມ່ອັນອົບອຸ່ນໃຫ້ແກ່ຜູ້ທຸກຍາກເທົ່ານັ້ນ ຫາກຍັງປະກອບສ່ວນສຳຄັນເຂົ້າໃນການປະຕິບັດນະໂຍບາຍຮັບປະກັນຊີວິດສັງຄົມຂອງຫວຽດນາມ ອີກດ້ວຍ.
ມອບຂອງຂວັນໃຫ້ຜູ້ທຸກຍາກໃນໂອກາດບຸນເຕັດ
ພາບ:vov
|
ກິດຈະການລົບລ້າງຄວາມອຶດຫິວຫລຸດຜ່ອນຄວາມທຸກຍາກຂອງຫວຽດນາມ ໃນຫລາຍປີຜ່ານມາ ຍາມໃດກໍໄດ້ຮັບການຮັບຮູ້ຈາກປະຊາຄົມສາກົນ. ເຖິງຢ່າງໃດກໍຕາມ, ມາຮອດປະຈຸບັນ, ຫວຽດນາມ ຍັງມີຄອບຄົວທຸກຍາກເກືອບ 1,8 ລ້ານ ຄອບຄົວ ແລະ ຄອບຄົວໃກ້ຈະຖືກຈັດຢູ່ໃນລະດັບຄອບຄົວທຸກຍາກກວ່າ 1,4 ລ້ານຄອບຄົວ, ພ້ອມກັນນັ້ນຍັງມີຫລາຍຄອບຄົວປະສົບກັບຄວາມຫຍຸ້ງຍາກອີກ. ສະນັ້ນຍາມໃດບັນດາຂະແຫນງການ, ຂັ້ນຕ່າງໆກໍປະຕິບັດການເບິ່ງແຍງດູແລບຸນເຕັດໃຫ້ຜູ້ທຸກຍາກ, ຄອບຄົວໃນເປົ້າໝາຍນະໂຍບາຍຢ່າງຄົບຊຸດ, ປະຈຳປີ.
ຜັນຂະຫຍາຍຈາກສູນກາງລົງຮອດທ້ອງຖິ່ນຢ່າງເປັນເອກະພາບ
ໂດຍປະຕິບັດການຫັນແຜນນະໂຍບາຍ “ປະຊາຊົນທຸກຄົນລ້ວນແຕ່ໄດ້ຮັບບຸນເຕັດຢ່າງອົບອຸ່ນ” ໃຫ້ປະກົດຜົນເປັນຈິງ, ຕົ້ນປີ 2015, ນາຍົກລັດຖະມົນຕີ ໄດ້ສະເຫນີກະຊວງແຮງງານ, ທະຫານເສຍອົງຄະ ແລະ ສັງຄົມ, ຄະນະກຳມະການປະຊາຊົນບັນດາແຂວງ, ນະຄອນ ປະຕິບັດບັນດາລະບອບນະໂຍບາຍສຳລັບຄອບຄົວທຸກຍາກ, ເປົ້ນໝາຍນະໂຍບາຍຢ່າງທັນການ, ຄົບຖ້ວນ. ຕາມນັ້ນແລ້ວ, ກະຊວງແຮງງານ ທະຫານເສຍອົງຄະ ແລະ ສັງຄົມ ໄດ້ນຳໃຊ້ຈຳນວນເງິນເກືອບ 400 ຕື້ດົງ ເພື່ອຊື້ຂອງຂວັນບຸນເຕັດມອບໃຫ້ບັນດາຜູ້ທີ່ມີຄຸນງາມຄວາມດີຕໍ່ການປະຕິວັດ. ທ່ານນາຍົກລັດຖະມົນຕີ ໄດ້ຊີ້ນຳກະຊວງການເງິນ ຫັກເຂົ້າສານນັບພັນໂຕນຈາກແຫລ່ງສະສົມແຫ່ງຊາດສະຫນອງໃຫ້ບາງແຂວງເພື່ອຫນູນຊ່ວຍໃຫ້ປະຊາຊົນໃນໂອກາດບຸນເຕັດປີມະແມ 2015. ທ່ານ ຫງວຽນງອກຕວານ, ຮອງຫົວຫນ້າກົມອຸປະກະລະສັງຄົມ, ສັງກັດກະຊວງແຮງງານ ທະຫານເສຍອົງຄະ ແລະ ສັງຄົມໃຫ້ຮູ້ວ່າ:
“ໝວດເປົ້າໝາຍປະສົບກັບຄວາມຫຍຸ້ງຍາກ, ຢູ່ໂດດດ່ຽວ ຍາມໃດກໍໄດ້ຮັບຄວາມເອົາໃຈໃສ່ເປັນພິເສດຈາກພັກ, ລັດ, ສະແດງໃຫ້ເຫັນການເຂົ້າຮ່ວມຂອງທັງລະບົບການເມືອງ. ສະເພາະ ຂະແຫນງແຮງງານ ທະຫານເສຍອົງຄະ ແລະ ສັງຄົມ ກໍຊີ້ນຳ, ຜັນຂະຫຍາຍການປະຕິບັດຢູ່ 2 ຂົງເຂດໃຫຍ່. ທີຫນຶ່ງ ແມ່ນຫນູນຊ່ວຍບັງເອີນ, ຫນູນຊ່ວຍເຂົ້າສານໃຫ້ແກ່ປະຊາຊົນຕ້ອນຮັບບຸນເຕັດ. ທີສອງ ແມ່ນຊີ້ນຳປະຕິບັດບັນດາລະບອບນະໂຍບາຍ ຫນູນຊ່ວຍສັງຄົມເປັນປະຈຳ, ສຸມໃສ່ຫນູນຊ່ວຍໝວດເປົ້າໝາຍອຸປະກະລະສັງຄົມທີ່ປະສົບກັບຄວາມຫຍຸ້ງຍາກ.”
ຢູ່ຫລາຍທ້ອງຖິ່ນ, ບັນດາການເຄື່ອນໄຫວຊ່ວຍເຫລືອບັນດາຄອບຄົວໃນເປົ້າໝາຍນະໂຍບາຍ ແລະ ຜູ້ປະສົບກັບຄວາມຫຍຸ້ງຍາກກໍຖືກດຳເນີນໄປຢ່າງຕັ້ງຫນ້າ. ນອກຈາກການຫນູນຊ່ວຍຈາກສູນກາງ, ປີນີ້ ລະດັບຫນູນຊ່ວຍ ເບິ່ງແຍງດູແລບຸນເຕັດໃຫ້ຜູ້ທຸກຍາກ, ຜູ້ມີຄຸນງາມຄວາມດີ, ເປົ້າໝາຍນະໂຍບາຍ ຢູ່ຫລາຍແຂວງ ລ້ວນແຕ່ເພີ່ມຂຶ້ນ ແຕ່ 10-20% ເມື່ອທຽບໃສ່ປີກາຍ. ຕົວຢ່າງຄື: ນະຄອນໂຮ່ຈິມີນ ໄດ້ສະຫງວນຈຳນວນເງິນເກືອບ 200 ຕື້ດົງເພື່ອ ເບິ່ງແຍງດູແລບຸນເຕັດໃຫ້ເປົ້າໝາຍນະໂຍບາຍ, ຜູ້ມີຄຸນງາມຄວາມດີຕໍ່ປະເທດຊາດ (ເພີ່ມຂຶ້ນປະມານ 20%). ຄະນະກຳມະການປະຊາຊົນແຂວງ ບີງເຢືອງ ສະຫງວນ 146 ຕື້ດົງເພື່ອເບິ່ງແຍງດູແລບຸນເຕັດໃຫ້ຜູ້ທຸກຍາກ (ເພີ່ມຂຶ້ນ 15% ເມື່ອທຽບໃສ່ປີ 2014). ນະຄອນ ຮ່າໂນ້ຍ ຫັກງົບປະມານກວ່າ 230 ຕື້ດົ່ງເພື່ອມອບຂອງຂວັນໃຫ້ບັນດາເປົ້າໝາຍນະໂຍບາຍ ແລະ ຫນູນຊ່ວຍຄອບຄົວທຸກຍາກ. ທ່ານ ຟ້າມວັນແທງ, ຫົວຫນ້າຫ້ອງການນະໂຍບາຍແຮງງານ ແລະ ວຽກເຮັດງານທຳ (ສັງກັດພະແນກແຮງງານ ທະຫານເສຍອົງຄະ ແລະ ສັງຄົມຮ່າໂນ້ຍ) ໃຫ້ຮູ້ວ່າ:
ຊ່ວຍໃຫ້ຜູ້ທຸກຍາກໄດ້ຕ້ອນຮັບບຸນເຕັດຢ່າງອົບອຸ່ນ
ພາບ:phuyen
|
“ໃນໂອກາດນີ້, ນະຄອນ ຮ່າໂນ້ຍ ບໍ່ພຽງແຕ່ມີນະໂຍບາຍສຳລັບຄອບຄົວທຸກຍາກເທົ່ານັ້ນ ຫາກຍັງມີນະໂຍບາຍສຳລັບຜູ້ມີຄຸນງາມຄວາມດີອີກດ້ວຍ. ດ້ວຍຜູ້ມີຄຸນງາມຄວາມດີປະມານ 70.000 ຄົນ, ນອກຈາກຂອງຂວັນບຸນເຕັດຂອງລັດຖະບານ, ປະທານປະເທດມອບໃຫ້ແລ້ວ, ທາງນະຄອນຍັງຫັກເງິນຫນູນຊ່ວຍຕື່ມອີກຜູ້ລະ 300.000 ດົ່ງ ຫລື 500.000 ດົ່ງ, ຮັບປະກັນໃຫ້ຜູ້ມີຄຸນງາມຄວາມດີໄດ້ຕ້ອນຮັບບຸນເຕັດຢ່າງອົບອຸ່ນ.”
ການຮ່ວມແຮງຮ່ວມໃຈຂອງທົ່ວສັງຄົມ
ພ້ອມກັບງົບປະມານແຫ່ງລັດ, ການລະດົມ, ຂົນຂວາຍບັນດາແຫລ່ງກຳລັງຈາກກອງທຶນຕອບບຸນແທນຄຸນຂອງແນວໂຮມປະເທດຊາດ, ສະພາກາແດງ, ບັນດາອົງການສາກົນ, ວົງຄະນາຍາດເພື່ອ ເບິ່ງແຍງດູແລບຸນເຕັດໃຫ້ແກ່ຜູ້ທຸກຍາກ, ຜູ້ມີຄຸນງາມຄວາມດີ, ຄອບຄົບໃນເປົ້າໝາຍນະໂຍບາຍໄດ້ຮັບຄວາມເອົາໃຈໃສ່ເປັນພິເສດ. ທ່ານ ຫງວຽນງອກຕວ໋ານ, ຮອງຫົວຫນ້າກົມອຸປະກະລະສັງຄົມ, ສັງກັດກະຊວງແຮງງານ ທະຫານເສຍອົງຄະ ແລະ ສັງຄົມໃຫ້ຮູ້ວ່າ:
“ໃນໂອກາດບຸນເຕັດ, ບັນດາອົງການບໍ່ຂຶ້ນກັບລັດຖະບານ, ວິສາຫະກິດ, ບັນດາຜູ້ໃຈບຸນໃຈກຸສົນຢູ່ທ້ອງຖິ່ນ ກໍໄດ້ຫນູນຊ່ວຍ, ມອບຂອງຂວັນບຸນເຕັດໃຫ້ແກ່ໝວດເປົ້າໝາຍປະສົບກັບຄວາມຫຍຸ້ງຍາກ. ສະມາຄົມຜູ້ອາຍຸສູງກໍໄດ້ຈັດຕັ້ງອວຍພອນອາຍຸຍືນ ແລະ ລະດົມກຳລັງໃຈ, ຢື້ຢາມຖາມຂ່າວຜູ້ອາຍຸສູງ, ບັນດາອົງການຂອງສະມາຄົມຄົນພິການ ກໍໄດ້ຂົນຂວາຍບໍລິຈາກຊ່ວຍຫນູນຄົນພິການໃນໂອກາດບຸນເຕັດ. ສະພາກາແດງ, ບັນດາອົງການບໍ່ຂຶ້ນກັບລັດຖະບານ ລ້ວນແຕ່ເພີ່ມທະວີການຂົນຂວາຍ, ຈັດຕັ້ງການຫນູນຊ່ວຍໃຫ້ແກ່ບັນດາໝວດເປົ້າໝາຍ, ຮັບປະກັນໃຫ້ໝວດອຸປະກະລະສັງຄົມ ແລະ ຜູ້ທຸກຍາກໄດ້ຮັບບຸນເຕັດຢ່າງອົບອຸ່ນກວ່າ.”
ໃນຂະນະນັ້ນ, ປະຊາຄົມວິສາຫະກິດ ກໍເປັນເຈົ້າການປະກອບລາຍຈ່າຍເພື່ອ ເບິ່ງແຍງດູແລບຸນເຕັດໃຫ້ແກ່ຜູ້ທຸກຍາກ. ມີຮ້ານຊັບພະສິນຄ້າ, ເຂດອຸດສາຫະກຳຫລາຍແຫ່ງໄດ້ຮ່ວມກັນມອບຂອງຂວັນນັບພັນໆພູດໃຫ້ແກ່ຄອບຄົວທຸກຍາກ. ຄຽງຄູ່ກັນນັ້ນ ແມ່ນຂົນສົ່ງສິນຄ້າໄປຍັງບັນດາຕາແສງເຂດພູດອຍ, ເຂດອຸດສາຫະກຳເພື່ອຮັບໃຊ້ຊາວຊົນເຜົ່າ, ຄົນງານທຸກຍາກ.
ນອກຈາກການມອບຂອງຂວັນແລ້ວ, ມີວິສາຫະກິດຫລາຍແຫ່ງ ແລະ ອົງການຈັດຕັ້ງມະຫາຊົນ ໄດ້ສ້າງເງື່ອນໄຂສະດວກເພື່ອໃຫ້ຄົນງານທຸກຍາກກັບຄືນບ້ານຕ້ອນຮັບບຸນເຕັດ. ຕາມນັ້ນແລ້ວ ປີ້ລົດນັບໝື່ນປີ້ ໄດ້ມອບໃຫ້ກຳມະກອນຢູ່ບັນດາເຂດອຸດສາຫະກຳ, ນັກສຶກສາທຸກຍາກ. ອ້າຍ ຫງວຽນດຶກຕຽນ, ເລຂາຄະນະຊາວຫນຸ່ມມະຫາວິທະຍາໄລ ດາຫນັງ ໃຫ້ຮູ້ວ່າ:
“ໂອກາດບຸນເຕັດປີມະແມນີ້, ຄະນະຊາວຫນຸ່ມ, ສະມາຄົມນັກສຶກສາມະຫາວິທະຍາໄລ ດາຫນັງ ໄດ້ມອບປີ້ລົດໃຫ້ນັກສຶກສາ, ຫນູນຊ່ວຍລາຍຈ່າຍ ສ່ວນຫນຶ່ງ ໃຫ້ພວກເພື່ອນທີ່ປະສົບກັບຄວາມຫຍຸ້ງຍາກ. ພວກຂ້າພະເຈົ້າມອບຂອງຂວັນ ແຕ່ 250-300 ພູດ ດ້ວຍຈຳນວນເງິນແຕ່ 50-60 ລ້ານດົງ, ສ່ວນຍັງເຫລືອແມ່ນລະດົມຕື່ມອີກຈາກແຫລ່ງອື່ນເພື່ອຫນູນຊ່ວຍພວກນ້ອງ.”
ການເປັນເຈົ້າການຂອງອຳນາດການປົກຄອງທຸກຂັ້ນໃນການເບິ່ງແຍງດູແລບຸນເຕັດໃຫ້ຜູ້ທຸກຍາກ, ເປົ້າໝາຍນະໂຍບາຍ ເພື່ອໃຫ້ເຂົາເຈົ້າໄດ້ຕ້ອນຮັບບຸນເຕັດຢ່າງອົບອຸ່ນ ພ້ອມກັບການແບ່ງເປັນຂອງວົງຄະນາຍາດນັ້ນໄດ້ເປັນການພິສູດໃຫ້ເຫັນນ້ຳໃຈສາມັກຄີຂອງຊາວຫວຽດນາມ, ຫັນນະໂຍບາຍຮັບປະກັນຊີວິດສັງຄົມຊື່ງຫວຽດນາມ ໄດ້ວາງອອກໃຫ້ປະກົດຜົນເປັນຈິງ.