(vovworld)- ວັນທີ 26/11, ທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ເລີ່ມຕົ້ນການຢ້ຽມຢາມສາທາລະນະລັດເບລາຣຸດ ຢ່າງເປັນທາງການ. ການຢ້ຽມຢາມເພື່ອແນໃສ່ປັບປຸງສາຍພົວພັນອັນເປັນມູນເຊື້ອ, ສ້າງຄວາມໄວ້ເນື້ອເຊື່ອໃຈດ້ານການເມືອງ, ແລກປ່ຽນບັນດາມາດຕະການສົມທົບກັນເຄື່ອນໄຫວໃນເວທີສາກົນ.
(ພາບ: vov.vn)
ນີ້ແມ່ນການຢ້ຽມຢາມເບລາຣຸດ ເປັນຄັ້ງທຳອິດຂອງທ່ານຫງວຽນຟູຈ້ອງ ໃນຖານະເປັນຜູ້ນຳພັກກອມມູນິດຫວຽດນາມ. ໃນການຢ້ຽມຢາມຄັ້ງນີ້, ທ່ານເລຂາທິການໃຫ່ຍຫງວຽນຟູຈ້ອງ ແລະ ທ່ານປະທານາທິບໍດີ ສາທາລະນະລັດເບລາຣຸດ Alexander Lukashenko ແລກປ່ຽນບັນດາມາດຕະການລະອຽດເພື່ອແນໃສ່ປັບປຸງ ແລະ ພັດທະນາສາຍພົວພັນອັນເປັນມູນເຊື້ອ, ຊຸກຍູ້ການຮ່ວມມືຫຼາຍດ້ານລະຫວ່າງສອງປະເທດຫວຽດນາມ-ເບລາຣຸດ, ນຳການພົວພັນສອງຝ່າຍໃຫ້ພັດທະນາຢ່າງແທດຈິງ ແລະ ເຂົ້າສູ່ລວງເລິກ.
ພື້ນຖານການພົວພັນທີ່ເປັນມູນເຊື້ອອັນຈົບງາມ
ການພົວພັນລະຫວ່າງຫວຽດນາມ-ເບລາຣຸດ ອີງບົນພື້ນຖານສາຍພົວພັນທີ່ເປັນມູນເຊື້ອນັບແຕ່ຊຸມປີທ້າຍສັດຕະວັດທີ 20. ນີ້ແມ່ນສາຍພົວພັນຮອບດ້ານໃນທຸກຂົງເຂດ. ໃນຊຸມປີຜ່ານມາ, ສອງປະເທດໄດ້ເພີ່ມທະວີສາຍພົວພັນຖານເພື່ອນມິດທີ່ເປັນມູນເຊື້ອອັນດີງາມ ແລະ ການຮ່ວມມືໃນຫຼາຍຂົງເຂດຢ່າງບໍ່ຢຸດຢັ້ງ. ອາດຈະເຫັນໄດ້ຄວາມຕັ້ງໜ້ານັບມື້ນັບເພີ່ມຂຶ້ນໃນການແລກປ່ຽນດ້ານການຄ້າລະຫວ່າງຫວຽດນາມ-ເບລາຣຸດ. ວົງເງິນການຄ້າສອງສົ້ນ ຫວຽດນາມ-ເບລາຣຸດ ເພີ່ມຂຶ້ນທົບ 7 ເທົ່າໃນ 10 ປີຜ່ານມາ, ປະຈຸບັນບັນລຸປະມານ 200 ລ້ານໂດລາສະຫະລັດ. ເຖິງຢ່າງໃດກໍ່ຕາມ, ຄວາມສາມາດບົ່ມຊ້ອນຂອງສອງປະເທດຍັງບໍ່ທັນໄດ້ຮັບການຂຸດຄົ້ນໃຫ້ໝົດເທື່ອ. ຍ້ອນເຫດນັ້ນ, ການຢ້ຽມຢາມ ເບລາຣຸດ ຂອງທ່ານເລຂາທິການໃຫ່ຍຫງວຽນຟູຈ້ອງ ໄດ້ຮັບຄວາມຫວັງວ່າຈະສ້າງກຳລັງໜູນໃໝ່ເພື່ອພັດທະນາການພົວພັນສອງຝ່າຍຢ່າງແຮງກ່ວາອີກ, ພິເສດແມ່ນໃນຂົງເຂດການຄ້າ, ການລົງທຶນ. ເມື່ອຕອບສຳພາດຕໍ່ນັກຂ່າວ VOV, ທ່ານເອກອັກຄະລັກຖະທູດເບລາຣຸດ ປະຈຳຫວຽດນາມ Valery Sadokho ຢືນຢັນວ່າ:
“ເບລາຣຸດ ຖືການຢ້ຽມຢາມຄັ້ງນີ້ເປັນສຳຄັນທີ່ສຸດ. ພວກຂ້າພະເຈົ້າຫວັງວ່າ, ຜ່ານການຢ້ຽມຢາມຄັ້ງນີ້, ສອງຝ່າຍຈະພິຈາລະນາຄວາມສາມາດຍົກສູງສາຍພົວພັນຄູ່ຮ່ວມມືຂຶ້ນສູ່ລະດັບໃໝ່, ເປີດກ້ວາງບັນດາຂົງເຂດຮ່ວມມືດ້ານເສດຖະກິດ, ການສຶກສາ,ວັດທະນະທຳ… ສອງປະເທດພວມມີບັນດາເງື່ອນໄຂສະດວກເພື່ອຊຸກຍູ້ການພົວພັນຮ່ວມມື, ນຳມາເຊິ່ງຜົນປະໂຫຍດ ໃຫ້ແກ່ທັງສອງຝ່າຍ“.
(ພາບ: vov.vn)
ປະຈຸບັນ, ຫວຽດນາມ ແລະ ເບລາຣຸດ ພວມສຳເລັດວິວັດທະນາການດຳເນີນການເຈລະຈາສັນຍາການຄ້າເສລີ FTA 3 ຝ່າຍ, ລະຫວ່າງ ຫວຽດນາມ ແລະ ບັນດາປະເທດໃນສຳພັນທະມິດພາສີ ລວມມີລັດເຊຍ, ເບລາຣຸດ ແລະ ກາຊັກສະຖານ. ແລະ ຄາດວ່າຈະລົງນາມໃນຕົ້ນປີ 2015. ເມື່ອສຳເລັດ, ສັນຍາຈະນຳມາເຊິ່ງຜົນປະໂຫຍດໃຫ້ແກ່ແຕ່ລະປະເທດຄື: ຫລຸດຜ່ອນອາກອນນຳເຂົ້າ, ຍົກສູງລະດັບແກ່ງແຍ້ງບັນດາຜະລິດຕະພັນຂອງຫວຽດນາມ ຢູ່ເບລາຣຸດ ກໍ່ຄືສິນຄ້າຂອງເບລາຣຸດ ຢູ່ຫວຽດນາມ
ແງ່ຫວັງແຫ່ງການຮ່ວມມືສອງຝ່າຍ ຫວຽດນາມ-ເບລາຣຸດ
ໜ້າສົນໃຈແມ່ນ, ປະຈຸບັນ, ສອງປະເທດພວມດຳເນີນການເຈລະຈາກ່ຽວກັບການເປີດສາຍການບິນໂດຍກົງຊື່ງຄາດວ່າຈະສ້າງເງື່ອນໄຂໃຫ້ແກ່ການພົວພັນແລກປ່ຽນລະຫວ່າງສອງປະເທດ, ໂດຍສະເພາະແມ່ນໃນຂົງເຂດການທ່ອງທ່ຽວ. ທ່ານເອກອັກຄະລັກຖະທູດ Valery Sadokho ເນັ້ນໜັກວ່າ:
“ນີ້ບໍ່ພຽງແຕ່ແມ່ນສາຍການບິນໂດຍກົງລະຫວ່າງ ຫວຽດນາມ-ເບລາຣຸດ ເທົ່ານັ້ນ ຫາກຍັງແມ່ນຂົວຕໍ່ບັນດາສາຍການບິນອື່ນໆຢູ່ເອີລົບອີກດ້ວຍ. ເບລາຣຸດ ກໍ່ສົນໃຈຕໍ່ການເປີດສາຍການບິນໄປຍັງບັນດາປະເທດອາຊີຕາເວັນອອກສ່ຽງໃຕ້ ແລະ ສົ່ງແຂກທ່ອງທ່ຽວມາແຫ່ງນີ້ອີກດ້ວຍ. ຫວຽດນາມ ມີສະຖານທີ່ທ່ອງທ່ຽວທີ່ດູດດື່ມຫຼາຍແຫ່ງເພື່ອພັດທະນາການທ່ອງທ່ຽວຄື: ໂຮງແຮມມີຄູນນະພາບດີ, ຫາດຊາຍທະເລສວຍງາມ, ໝາກໄມ້ເຂດຮ້ອນ ແລະ ສິນທະເລ. ບັນດາປັດໄຈດັ່ງກ່າວໄດ້ດຶງດູດແຂກທ່ອງທ່ຽວເບລາຣຸດ ມາຫວຽດນາມ ນັບມື້ນັບຫຼາຍ“.
ໃນຊຸມປີຜ່ານມາ, ເບລາຣຸດ ໄດ້ບຳລຸງສ້າງພະນັກງານ, ຜູ້ຊ່ຽວຊານຫວຽດນາມ ມີລະດັບຄວາມຮູ້ສູງຫຼາຍຄົນ. ສ່ວນການຮ່ວມມືດ້ານແຮງງານແມ່ນທິດທາງຮ່ວມມືໃໝ່ລະຫວ່າງສອງປະເທດ, ການຮ່ວມມືລະຫວ່າງທ້ອງຖິ່ນຕ່າງໆຂອງສອງປະເທດພວມໄດ້ຮັບການຊຸກຍູ້…ປະຈຸບັນ, ມີຊາວຫວຽດນາມ ປະມານ 1000 ຄົນພວມດຳລົງຊີວິດຢູ່ເບລາຣຸດ. ຄາດວ່າ, ໃນການຢ້ຽມຢາມເບລາຣຸດ ຄັ້ງນີ້ຂອງທ່ານເລຂາທິການໃຫ່ຍຫງວຽນຟູຈ້ອງ, ສອງຝ່າຍຈະລົງນາມໃນຂໍ້ຕົກລົງຮ່ວມມືຈຳນວນໜຶ່ງ.
ການຢ້ຽມຢາມເບລາຣຸດ ຄັ້ງນີ້ຂອງທ່ານເລຂາທິການໃຫ່ຍຫງວຽນຟູຈ້ອງ ສະແດງໃຫ້ເຫັນຄວາມປາດຖະໜາຢາກພັດທະນາການພົວພັນມິດຕະ ພາບ, ການຮ່ວມມືຮອບດ້ານກັບເບລາຣຸດ, ຊຸກຍູ້ການຮ່ວມມືໃນຫຼາຍຂົງເຂດ, ພິເສດແມ່ນດ້ານເສດຖະກິດ, ການຄ້າ, ການລົງທຶນ. ນອກຈາກນັ້ນແລ້ວ, ນີ້ກໍ່ແມ່ນໂອກາດເພື່ອໃຫ້ສອງຝ່າຍແລກປ່ຽນບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ ເພື່ອແນໃສ່ເພີ່ມທະວີການປະສານສົມທົບກັນໃນບັນດາເວທີປາໄສຫຼາຍຝ່າຍຢ່າງມີປະສິດທິຜົນ./.