(vovworld) – ວັນທີ 9/9, ທ່ານ Mamnoon Husain ໄດ້ຮັບຕຳແໜ່ງເປັນປະທານາທິບໍດີ ປາກິສະຖານ ພາຍຫຼັງຍາດໄດ້ໄຊຊະນະໃນການເລືອກຕັ້ງເມື່ອເດືອນ 7 ຜ່ານມາ. ປະທານາທິບໍດີຜູ້ທີ 12 ຂອງ ປະກິສະຖານ ຂຶ້ນກຳອຳນາດໃນສະຖານະການທີ່ປະເທດພວມປະເຊີນໜ້າກັບການທ້າທາຍຫຼາຍຢ່າງ, ນັບແຕ່ເສດຖະກິດຕະຫຼອດຮອດຄວາມໝັ້ນຄົງ. ເພື່ອແກ້ໄຂຄວາມຫຍຸ້ງຍາກນີ້ແມ່ນບັນຫາບໍ່ງ່າຍດາຍ. ບົດຂຽນ “ປະທານາທິບໍດີ ປາກິສະຖານ ຕໍ່ໜ້າພາລະສຳຄັນ“ຂອງບັນນາທິການວິທະຍຸກະຈາຍສຽງຫວຽດນາມ ຈະໄຈ້ແຍກຢ່າງຈະແຈ້ງກ່ຽວກັບພາລະນີ້ຂອງທ່ານ Mamnoon Husain
ປະທານາທິບໍດີ ປາກິສະຖານ Mamnoon Husain
(ພາບ: ອິນເຕີແນດ)
3 ພາລະສຳຄັນທີ່ວາງອອກສຳລັບທ່ານ Mamnoon Husain ໃນອາຍຸການເປັນປະທານາທິບໍດີນັ້ນແມ່ນຟື້ນຟູພື້ນຖານເສດຖະກິດ, ຮັບມືກັບການເຄື່ອນໄຫວລຸກຮຶ້ຂຶ້ນຂອງຕາລີບານ, ແກ້ໄຂວິກິດການດ້ານພະລັງງານ.
ກ່ຽວກັບທາງດ້ານເສດຖະກິດ, ປາກິສະຖານ ມີພື້ນຖານເສດຖະກິດອ່ອນດ້ອຍ. ສິ່ງດັ່ງກ່າວສະແດງໃຫ້ເຫັນຢູ່ບ່ອນວ່າ, ລະດັບເຕີບໂຕເສດຖະກິດຂອງປະເທດນີ້ຍາມໃດກໍ່ຢູ່ໃນລະດັບຕຳ່. ຜະລິດຕະພັນພາຍໃນ (ຈີດີພີ) ເພີ່ມຂຶ້ນ 3,7% ໃນປີ 2012 ແລະ ຄາດວ່າຈະຫຼຸດລົງ 3,5% ໃນປີນີ້ ແລະ 3.3% ໃນປີ 2014. ລະດັບເຕີບໂຄນີ້ຕຳ່ກວ່າລະດັບທີ່ຈຳເປັນເພື່ອສາມາດສ້າງວຽກເຮັດງານທຳຕື່ມອີກໃຫ້ກຳລັງແຮງງານທີ່ນັບມື້ນັບເພີ່ມຂຶ້ນ ແລະ ຊ່ວຍຫຼຸດຜ່ອນໄພທຸກຍາກອຶດຫີວ. ປາກິສະຖານ ກໍ່ຕ້ອງຮັບມືກັບວິກິດການດຸນຊຳລະ. ເຖິງວ່າອຳນາດການປົກຄອງວາງຄາດໝາຍຄວບຄຸມສະພາບຂາດດຸນງົບປະມານ 4,7% ຂອງ ຈີດີພີ ໃນປີການເງິນປະຈຸບັນກໍ່ຕາມ, ແຕ່ບັນດານັກໄຈ້ແຍກສ່ວນຫຼາຍພັດຖືວ່າ ລະດັບຂາດດຸນອາດຈະສູງກວ່າຫຼາຍ. ຫວ່າງແລ້ວນີ້, ກອງທຶນເງິນຕາສາກົນ (IMF) ຫາກໍ່ຮັບຮອງເອົາບ້ວງເງິນກູ້ຢືມທີ່ມີມູນຄ່າ 6,7ຕື້ USD ເພື່ອຊ່ວຍປາກິສະຖານ ປະຕິຮູບເສດຖະກິດ. ເຈົ້າໜ້າທີ່ລັດຖະບານປາກິສະຖານທ່ານໜຶ່ງຍອມຮັບວ່າ ປາກິສະຖານ ມີພຽງເສັ້ນທາງດຽວນັ້ນແມ່ນຕ້ອງກູ້ຢືມເງິນເພື່ອກູ້ຊ່ວຍປະເທດໃຫ້ຫຼຸດພົ້ນອອກຈາກສະພາບລົ້ມລະລາຍ. ກ່ຽວກັບດ້ານພະລັງງານ, ປາກິສະຖານ ພວມຕົກຢູ່ໃນສະພາບວິກິດການພະລັງງານຮ້າຍແຮງທີ່ສຸດໃນປະຫວັດສາດ. ສະພາບຂາດໄຟຟ້າ (ຕັດໄຟຟ້າ 20ຊົ່ວໂມງ/ວັນ) ແລະ ຂາດອາຍແກສ ໄດ້ເຮັດໃຫ້ປະເທດນີ້ຕົກເຂົ້າສູ່ສະພາບວຸ່ນວາຍ, ອັນໄດ້ເປັນສິ່ງທີ່ກີດຂວາງເຖິງການເຕີບໂຕເສດຖະກິດ.
ໃນຂະນະນັ້ນ, ການທ້າທາຍກ່ຽວກັບຄວາມໝັ້ນຄົງ ກໍ່ຖືກຖືວ່າ ແມ່ນການທ້າທາຍໃຫຍ່ຫຼວງທີ່ສຸດສຳລັບປະທານາທິບໍດີຄົນໃໝ່ນີ້. ການວາງລະເບີດ, ການບຸກໂຈມຕີກໍ່ການຮ້າຍຫຼາຍຄັ້ງ ໂດຍຕາລີບານ ແລະ ບັນດາພາກສ່ວນ Al-Qaeda ກໍ່ຂຶ້ນ ຍັງເກີດຂຶ້ນເປັນປະຈຳ ແລະ ນັບມື້ນັບຫຼາຍກວ່າ. ຫວ່າງແລ້ວນີ້, ປາກິສະຖານ ຕ້ອງປຸກລະດົມບັ້ນປາບປາມການກໍ່ການຮ້າຍ ແລະ ການໃຊ້ຄວາມຮຸນແຮງຢູ່ນະຄອນທ່າ ກາຣາຈີ, ທາງພາກໃຕ້ປະເທດນີ້. ປາກິສະຖານ ກໍ່ຕົກລົງສ້າງຕັ້ງຄະນະກຳມະການພິເສດ ເຊິ່ງລວມມີບັນດາເຈົ້າໜ້າທີ່ປ້ອງກັນຄວາມສະຫງົບຂັ້ນສູງ ແລະ ອົງການສືບລາຊະການລັບ ເພື່ອແນໃສ່ຊອກຫາມາດຕະການສະກັດກັ້ນການໃຊ້ຄວາມຮຸນແຮງ, ຮັກສາສັນຕິພາບຢູ່ ກາຣາຈີ.
ຍັງມີພາລະພິເສດໜຶ່ງອີກ ເຊິ່ງການນຳຄົນໃໝ່ຂອງ ປາກິສະຖານ ຕ້ອງປະເຊີນໜ້າ ນັ້ນແມ່ນແກ້ໄຂການພົວພັນທີ່ສັບສົນກັບບັນດາປະເທດບ້ານໃກ້ເຮື້ອນຄຽງ ແລະ ອາເມລິກາ ຢ່າງສົມເຫດສົມຜົນ. ສຳລັບອິນເດຍ ແລະ ອາບການິສະຖານ, ການປະທະກັນທີ່ກ່ຽວຂ້ອງເຖິງບັນຫາຊາຍແດນເກີດຂື້ນເປັນປະຈຳ. ສຳລັບອາເມລິກາ, ການພົວພັນຄູ່ຮ່ວມມືປ້ອງກັນຄວາມສະຫງົບແມ່ນບໍ່ດີປານໃດ. ການພົວພັນທັງໝົດເຫຼົ່ານັ້ນ ຈຳເປັນຕ້ອງໄດ້ຮັບການແກ້ໄຂຢ່າງລະມັດລະວັງ ແລະ ຕ້ອງມີເວລາ.
ປະທານາທິບໍດີປາກິສະຖານ ເຄີຍໃຫ້ຄຳໝັ້ນສັນຍາວ່າ ຈະເປັນປະທານາທິບໍດີເພື່ອປະຊາຊົນ, ແຕ່ເບິ່ງຄືວ່າ ເສັ້ນທາງໃນຕໍ່ໜ້າຂອງທ່ານ Mamnoon Husain ຍັງປະສົບກັບຄວາມຫຍຸ້ງຍາກຫຼາຍຢ່າງ, ມັນຮຽກຮ້ອງໃຫ້ທ່ານຕ້ອງມີບັນດາລັດຖະນະໂຍບາຍທີ່ແຂງແຮງ ເພື່ອຮັບມືກັບການທ້າທາຍຢູ່ພາຍໃນ ແລະ ນອກປາກິສະຖານ ຖ້າບໍ່ຄືແນວນັ້ນທ່ານຈະຕ້ອງຮັບມືກັບວິກິດການຄັ້ງໃໝ່ ແລະ ການຕຳນິຕິຕຽນ. ໄລຍະເວລາຈະເປັນຄຳຕອບໃຫ້ແກ່ຄວາມສາມາດຊີ້ນຳນຳພາປະເທດຂອງປະທານາທິບໍດີປາກິສະຖານຜູ້ທີ 12 ນີ້.