(vovworld)- ປະເທດຊາດກ້າວເຂົ້າປີ 2017, ດ້ວຍຄວາມຕັດສິນໃຈຂອງ “ລັດຖະບານສ້າງສາ” ພ້ອມກັບຫລາຍນະໂຍບາຍທີ່ມີປະໂຫຍດໃຫ້ແກ່ວິສາຫະກິດ. ສຳລັບປະຊາຄົມວິສາຫະກິດ, ປີນີ້ ຈະແມ່ນປີມີສັນຍານດີ, ເສດຖະກິດພັດທະນາເປັນປົກກະຕິ. ບົດຂຽນຂອງນັກຂ່າວ ຫງວຽນຮັ່ງ ທີ່ມີຫົວຂໍ້ວ່າ: ປີ 2017: ປີມີກາລະໂອກາດຫລາຍຢ່າງເພື່ອໃຫ້ປະຊາຄົມວິສາຫະກິດພັດທະນາ
ການເຄື່ອນໄຫວຂອງວິສາຫະກິດອຸດສາຫະກຳຫນູນຊ່ວຍຂອງ
ຫວຽດນາມໃນປີ2016
ພາບປະກອບ:
|
ຕາມບົດລາຍງານສະພາບແວດລ້ອມແຫ່ງການດຳເນີນທຸລະກິດຂອງທະນາຄານໂລກ, ສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມ ໄດ້ເພີ່ມຂຶ້ນ 9 ຂັ້ນ ຈາກລະດັບທີ 91 ໃນປີ 2016 ຂຶ້ນເປັນ ລະດັບ 82 ໃນປີ 2017. ພ້ອມກັນນັ້ນ, ບັນດາການປະຕິຮູບກ່ຽວກັບພາສີ ແລະ ກ່ຽວຂອ້ງເຖິງດ້ານການຄ້າ ໄດ້ຊ່ວຍໃຫ້ຫວຽດນາມ ຂຶ້ນ 14 ຂັ້ນ ໃນດັດຊະນີຊຸກຍູ້ດ້ານການຄ້າປີ 2016 ຂອງເວທີປາໄສເສດຖະກິດໂລກ.
ບັນດານະໂຍບາຍສະດວກໃຫ້ແກ່ວິສາຫະກິດ
ລັດຖະບານໄດ້ກຳນົດມາດຖານ “ລັດຖະບານສ້າງສາ” ເປັນເຂັມຊີ້ທິດເຍືອງທາງໃຫ້ແກ່ວິວັດການປະຕິຮູບ. ຕາມນັ້ນແລ້ວ ເດືອນ 11/2016, ສະພາແຫ່ງຊາດໄດ້ຮັບຮອງເອົາກົດໝາຍສະບັບຫນຶ່ງ ຫລຸດຜ່ອນ 41 ຂະແຫນງທຸລະກິດມີເງື່ອນໄຂ. ມີກົດໝາຍຫລາຍສະບັບ ແລະ ຂໍ້ກຳນົດຕ່າງໆຈະໄດ້ຮັບການປັບປຸງເພື່ອຕັດອອກ ແລະ ສືບຕໍ່ຫລຸດຜ່ອນບັນດາຮົ້ວກີດຂວາງສຳລັບວິສາຫະກິດ. ທ່ານຮວ່າງຕຽນຢ້ຽນ, ປະທານສະພາບໍລິຫານ ບໍລິສັດ Ko ko ມີຄວາມປະເອີບໃຈຕໍ່ສະພາບການເສດຖະກິດປີ 2017 ຈະພັດທະນາດີກວ່າປີ 2016, ໂດຍລັດຖະບານ ໄດ້ ແລະ ພວມວາງອອກຫລາຍນະໂຍບາຍສະດວກໃຫ້ແກ່ວິສາຫະກິດ.
“ປະຈຸບັນ, ລັດຖະບານພວມວາງອອກຫລາຍນະໂຍບາຍດີໃຫ້ແກ່ວິສາຫະກິດ, ພິເສດ ແມ່ນບັນດາທະນາຄານກໍພວມຫນູນຊ່ວຍວິສາຫະກິດເລີ່ມທຸລະກິດ ແລະ ວິສາຫະກິດພວມເຄື່ອນໄຫວໃນຕະຫລາດກ່ຽວກັບດ້ານທຶນຮອນ, ບັນດານະໂຍບາຍຂອງທະນາຄານພວມສ້າງຄວາມສະດວກເພື່ອໃຫ້ບັນດາວິສາຫະກິດແກ້ໄຂຄວາມຫຍຸ້ງຍາກກ່ຽວກັບດ້ານທຶນຮອນ. ດ້ວຍສັນຍານດີຄືແນວນັ້ນ, ປີ 2017 ນີ້ ເສດຖະກິດຂອງຫວຽດນາມ ຈະພັດທະນາດີກວ່າປີ 2016.”
ທ່ານ ບູ່ຍງອກເຕືອງ, ປະທານ ສະພາບໍລິຫານ ຜູ້ອຳນວຍການໃຫຍ່ບໍລິສັດຫຸ້ນສ່ວນກຸ່ມບໍລິສັດລົງທຶນນ້ຳສະອາດ ຮຸ່ງແທ່ງ ປາດຖະຫນາວ່າ ສະພາແຫ່ງຊາດ ຈະຮັບຮອງເອົາ ກົດໝາຍວ່າດ້ວຍວິສາຫະກິດຂະຫນາດກາງ ແລະ ນ້ອຍ ໃນປີ 2017, ເພາະນີ້ແມ່ນເຄື່ອງມືຫນູນຊ່ວຍຕັ້ງຫນ້າເພື່ອຊ່ວຍໃຫ້ 97% ໃນຍອດຈຳນວນວິສາຫະກິດຂະຫນາດກາງ ແລະ ນ້ອຍພັດທະນາໃນການເຄື່ອນໄຫວຜະລິດດຳເນີນທຸລະກິດ ກວ່າ 600.000 ແຫ່ງ. ທ່ານບູ່ຍງອກເຕື່ອງ ປາດຖະຫນາວ່າ ລັດຈະສ້າງເງື່ອນໄຂຫນູນຊ່ວຍໃຫ້ວິສາຫະກິດລົງທຶນ, ບຸກເບີກຫນ້າພຽງ, ທີ່ດິນ.. ຜ່ານນັ້ນ ສ້າງທ່າໃຫ້ວິສາຫະກິດເປີດກວ້າງການເຄື່ອນໄຫວຂອງຕົນ.
“ປີ 2017 ລັດຈະຫນູນຊ່ວຍກ່ຽວກັບລະບຽບການບໍລິຫານໃຫ້ສະດວກສະບາຍເພື່ອສ້າງເງື່ອນໄຂໃຫ້ບັນດາວິສາຫະກິດພັດທະນາ, ປະດິດຄິດສ້າງ ແລະ ພ້ອມທັງສ້າງເງື່ອນໄຂສະດວກເພື່ອຫນູນຊ່ວຍວິສາຫະກິດກ່ຽວກັບອັດຕາດອກເບ້ຍເພື່ອໃຫ້ວິສາຫະກິດພັດທະນາ, ຫນູນຊ່ວຍທີ່ດິນ, ບຸກເບີກຫນ້າພຽງ. ດ້ວຍທ່າພັດທະນາ ແລະ ຄວາມຕັດສິນໃຈຂອງລັດຖະບານ, ພວກຂ້າພະເຈົ້າມີຄວາມເຊື່ອໝັ້ນວ່າ ບັນດາວິສາຫະກິດກ້າວຂຶ້ນຢ່າງແຮງໃນໄລຍະຈະມາເຖິງ.”
ວິສາຫະກິດຕ້ອງຮັບມືກັບວິວັດການໂລກາພິວັດ
ຕາມທ່ານ ມາກກວກແອງ, ຜູ້ອຳນວຍການໃຫຍ່ ບໍລິສັດຫຸ້ນສ່ວນສິນຄ້າ MAC ແລ້ວ, ບັນດາກອງທຶນຄື: ຄ້ຳປະກັນສິນເຊື່ອ, ຫນູນຊ່ວຍກ່ຽວກັບດ້ານວິທະຍາສາດເຕັກໂນໂລຊີ, ຫນູນຊ່ວຍໃຫ້ບັນດາວິສາຫະກິດຂະຫນາດກາງ ແລະ ນ້ອຍ ຄວນຫັນເປັນຂອງສັງຄົມເພື່ອຊ່ວຍບັນດາວິສາຫະກິດມີຫລາຍແຫລ່ງທຶນເພື່ອລົງທຶນເຂົ້າໃນການເຄື່ອນໄຫວຜະລິດດຳເນີນທຸລະກິດ.
“ພວກຂ້າພະເຈົ້າປາດຖະຫນາວ່າເສດຖະກິດປີ 2017 ກ່ຽວກັບ ອັດຕາແລກປ່ຽນເງິນຕາ, ອັດຕາດອກເບ້ຍ ຈະໄດ້ຮັບການຮັກສາເປັນປົກກະຕິ ແລະ ເປັນປະຈຳໃນປີ 2017. ເພາະວ່າ ນີ້ແມ່ນສິ່ງທີ່ຊ່ວຍໃຫ້ການສົ່ງອອກສິນຄ້າ, ການພົວພັນແລກປ່ຽນການຄ້າຂອງວິສາຫະກິດສົ່ງອອກໄປຍັງບັນດາຕະຫລາດ ເຂົາເຈົ້າຈະມີຄວາມອຸ່ນອ່ຽນໃຈກວ່າໃນການເຄື່ອນໄຫວຜະລິດດຳເນີນທຸລະກິດ. ປີ 2017, ພວກເຮົາຈັດຕັ້ງກອງປະຊຸມ APEC ເວລານັ້ນ ນັກລົງທຶນຕ່າງປະເທດຫລາຍຄົນຈະມາຊອກຫາ, ຊອກຮູ້ບັນດາກາລະໂອກາດຮ່ວມມືຢູ່ຫວຽດນາມ, ປີ 2017 ເສດຖະກິດຈະເຕີບໂຕ, ເພາະປີ 2016 ພວກເຮົາໄດ້ມີບັນດາການກະທຳເພື່ອຫນູນຊ່ວຍວິສາຫະກິດພັດທະນາ.”
ທ່ານ ຫວູຕຽນລົກ, ປະທານຫ້ອງການການຄ້າ ແລະ ອຸດສາຫະກຳຫວຽດນາມ ສັງເກດວ່າ: ປີ 2017 ມີກາລະໂອກາດຫລາຍຢ່າງ ແຕ່ສິ່ງທ້າທາຍບໍ່ແມ່ນຫນ້ອຍສຳລັບບັນດາວິສາຫະກິດ. ສະນັ້ນ ປະຊາຄົມວິສາຫະກິດ ຕ້ອງຮັບມືກັບວິວັດການໂລກາພິວັດ ກໍຄືການປະຕິວັດອຸດສາຫະກຳຄັ້ງທີ 4. ທ່ານ ຫວູຕຽນລົກ ຖືວ່າ:
“ເຖິງວ່າ ປີ 2017 ຈະສືບຕໍ່ແມ່ນຊຸມປີທີ່ປະສົບກັບຄວາມຫຍຸ້ງຍາກສຳລັບບັນດາວິສາຫະກິດກໍຕາມ, ແຕ່ບັນດາກາລະໂອກາດໃຫຍ່ພວມເປີດກວ້າງ. ຂ້າພະເຈົ້າເຊື່ອໝັ້ນວ່າ ບັນດາວິສາຫະກິດຍາມໃດກໍຮັກສາຄວາມໄວ້ເນື້ອເຊື່ອໃຈ ແລະ ມີຫົວຄິດປະດິດສ້າງເພື່ອກ້າວໄປເຖິງມາດຖານຂອງໂລກ ເພື່ອອາດສາມາດແກ້ງແຍ້ງ ແລະ ເຊື່ອມໂຍງຢ່າງສຳເລັດຜົນ. ຂ້າພະເຈົ້າຄິດວ່າ ເລື່ອງປ່ຽນໃຫມ່ທີ່ມີຫົວຄິດປະດິດສ້າງ ແມ່ນຄຳຮຽກຮ້ອງສຳຄັນປະຈຳວັນຂອງທຸກວິສາຫະກິດ ແລະ ຄົນງານ. ຖ້າປຸກລະດົມໄດ້ຈິດໃຈປ່ຽນໃຫມ່ທີ່ມີຫົວຄິດປະດິດສ້າງ ພວກເຮົາຈະປະສົບຜົນສຳເລັດ ແລະ ໂຄງການຈຸດໝາຍແຫ່ງຊາດຂອງປະເທດຊາດມີວິສາຫະກິດ 1 ລ້ານແຫ່ງເຄື່ອນໄຫວຢ່າງມີປະສິດທິຜົນໃນປີ 2020 ຈະປະກົດຜົນເປັນຈິງ.”
ເຖິງວ່າຍັງມີສິ່ງທ້າທາຍບໍ່ແມ່ນຫນ້ອຍ ແຕ່ປະຊາຄົມວິສາຫະກິດມີຄວາມເຊື່ອໝັ້ນວ່າ ລັດຖະບານຈະສືບຕໍ່ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດຕາມທິດໂປ່ງໃສ, ສະເຫມີພາບ. ນີ້ແມ່ນເງື່ອນໄຂທຳອິດເພື່ອຊ່ວຍໃຫ້ບັນດາວິສາຫະກິດສາມາດເຊື່ອມໂຍງສຳເລັດຜົນ ແລະ ພັດທະນາແບບຍືນຍົງ.