ໂດຍຮັບຄຳເຊີນຈາກທ່ານນາຍົກລັດຖະມົນຕີຍີ່ປຸ່ນ Shinzo Abe , ວັນທີ 2/7, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງໄດ້ເລີ່ມເຂົ້າຮ່ວມກອງປະຊຸມສຸດຍອດແມ່ຂອງ - ຍີປຸ່ນຄັ້ງທີ 7 ຢູ່ໂຕກຽວປະເທດຍີປຸ່ນ. ນີ້ແມ່ນກອງປະຊຸມທີ່ສຳຄັນ ແນໃສ່ເປັນເອກະພາບກັນກ່ຽວກັບການກຳນົດທິດຮ່ວມມືແມ່ຂອງ - ຍີ່ປຸ່ນໃນໄລຍະ 2016-2018. ຫວຽດນາມເຂົ້າຮ່ວມກອງປະຊຸມແມ່ນເພື່ອຢັ້ງຢືນຄຳໝັ້ນສັນຍາ ແລະ ບົດບາດຂອງຫວຽດນາມທີ່ມີຕໍ່ການຮ່ວມມື ແມ່ຂອງ - ຍີ່ປຸ່ນ, ພ້ອມກັນນັ້ນ, ກໍເປັນການປັບປຸງການພົວພັນຮ່ວມມືມິດຕະພາບກັບບັນດາປະເທດອະນຸພາກພື້ນແມ່ນ້ຳຂອງ, ເຮັດໃຫ້ການພົວພັນຄູ່ຮ່ວມມືຍຸດທະສາດກັບຍີປຸ່ນເລິກເຊິ່ງກ່ວາອີກ.
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ແລະ
ທ່ານນາຍົກລັດຖະມົນຕີຍີ່ປຸ່ນ Shinzo Abe ໃນການພົບປະກັນຢູ່ຮ່າໂນ້ຍເມື່ອຕົນປີ 2013 |
ກອງປະຊຸມສຸດຍອດແມ່ຂອງ - ຍີ່ປຸ່ນຄັ້ງທີ 7 ຢູ່ໂຕກຽວປະເທດຍີປຸ່ນໄດ້ດຳເນີນໃນສະພາວະທີ່ການຮ່ວມມືແມ່ຂອງ - ຍີປຸ່ນໄດ້ ແລະ ພວມບັນລຸໝາກຜົນທີ່ສຳຄັນຫຼາຍຢ່າງ. ກອງປະຊຸມສຸດຍອດຄັ້ງນີ້ຈະສຳຫຼວດກວດຄືນສະພາບການຮ່ວມມືແມ່ຂອງ - ຍີ່ປຸ່ນ, ພິເສດແມ່ນໝາກຜົນແຫ່ງການຜັນຂະຫຍາຍແຜນການດຳເນີນງານແມ່ຂອງ - ຍີ່ປຸ່ນໄລຍະ 2013-2015 ແລະ ວາງອອກບັນດາບຸລິມະສິດໃນໄລຍະທີ່ຈະເຖິງ.
ປະສິດທິຜົນຂອງກົນໄກຮ່ວມມືແມ່ຂອງ - ຍີປຸ່ນ
ກົນໄກຮ່ວມມືແມ່ຂອງ - ຍີປຸ່ນໄດ້ເລີ່ມປະຕິບັດແຕ່ປີ 2007 ແລະ ມາຮອດປະຈຸບັນ, ກົນໄກນີ້ນັບມື້ນັບນັບເສີມຂະຫຍາຍປະສິດທິຜົນຢ່າງຕັ້ງໜ້າ. ຍີ່ປຸ່ນໄດ້ກຳນົດແມ່ນ້ຳຂອງແມ່ນພາກພື້ນຮັບບຸລິມະສິດ ODA ສຳລັບບັນດາປະເທດອະນຸພາກພື້ນແມ່ນ້ຳຂອງຊຶ່ງລວມມີ ກຳປູເຈຍ, ລາວ, ມຽນມາ, ໄທ ແລະ ຫວຽດນາມ, ການພົວພັນຄູ່ຮ່ວມມືແມ່ຂອງ - ຍີປຸ່ນ ແມ່ນເອົາໃຈໃສ່ເຖິງບັນດາຂົງເຂດຮັບບຸລິມະສິດຄື ປົວແປງໂຄງປະກອບໂຄງລ່າງ, ເພີ່ມທະວີການຮ່ວມສຳພັນໃນພາກພື້ນ, ຊຸກຍູ້ການຄ້າ- ການລົງທຶນ, ລົບລ້າງຄວາມອຶດຫິວຫຼຸດຜ່ອນຄວາມທຸກຍາກ, ຄວບຄຸມໂລກພະຍາດ, ປົກປັກຮັກສາສິ່ງແວດລ້ອມ. ຜ່ານນັ້ນ, ກໍເປັນການຊ່ວຍຮັດແຄບຊອງວ່າງໃນການພັດທະນາໃນອາຊຽນ, ໜູນຊ່ວຍເປົ້າໝາຍສ້າງຕັ້ງປະຊາຄົມອາຊຽນ.
ໃນ 8 ປີທີ່ຜ່ານມາ, ຍີ່ປຸ່ນໄດ້ຕັ້ງໜ້າໜູນຊ່ວຍທຶນ ODA ກ້ອນໃຫຍ່ເພື່ອໃຫ້ບັນດາປະເທດພາກພື້ນແມ່ນ້ຳຂອງ, ເປັນຕົ້ນແມ່ນ ກຳປູເຈຍ, ລາວ, ມຽນມາ ແລະ ຫວຽດນາມພັດທະນາພື້ນຖານໂຄງລ່າງ. ຍີປຸ່ນໄດ້ສະຫງວນບ້ວງເງິນ 20 ລ້ານ USD ໃຫ້ແກ່ ກຳປູເຈຍ, ລາວ, ມຽນມາ ແລະ ຫວຽດນາມ ເພື່ອພັດທະນາພື້ນຖານໂຄງລ່າງໂດຍຈຳເປັນໃນແລວເສດຖະກິດຕາເວັນອອກ-ຕາເວັນຕົກ ແລະ ແລວນະຄອນໂຮ່ຈິມິນ-ພະນົມເປັນ-ບາງກອກ. ຍີ່ປຸ່ນກໍໄດ້ໜູນຊ່ວຍທຶນ ODA 500 ຕື້ເຢັນໃຫ້ແກ່ບັນດາປະເທດອະນຸພາກພື້ນແມ່ນ້ຳຂອງໃນໄລຍະ 2009-2012; ເພີ່ມທະວີການໜູນຊ່ວຍທຶນ ODA ໃຫ້ແກ່ກຳປູເຈຍ, ລາວ, ແລະ ຫວຽດນາມ. ໃນໄລຍະ 2013-2015, ຍີປຸ່ນສືບຕໍໍ່ໃຫ້ຄຳໝັ້ນສັນຍາສະຫງວນທຶນ ODA ປະມານ 600ຕື້ເຢັນໃຫ້ແກ່ບັນດາປະເທດ ພາກພື້ນແມ່ນ້ຳຂອງເພື່ອປະກອບສ່ວນປະຕິບັດແຜນການດຳເນີນງານໃນໄລຍະນີ້. ແມ່ຂອງ - ຍີປຸ່ນ ຍັງຜັນຂະຫຍາຍໂຄງການດຳເນີນງານ “ຂໍ້ລິເລີ່ມຮ່ວມມືດ້ານເສດຖະກິດ ແລະ ອຸດສາຫະກຳແມ່ຂອງ - ຍີ່ປຸ່ນ”, ປະຕິບັດຂໍ້ລິເລີ່ມ “ທົດສະວັດ ແມ່ຂອງຂຽວ”ໂດຍເລັ່ງໃສ່ບັນດາຂົງເຂດຄຸ້ມຄອງແຫຼ່ງນ້ຳ, ຄຸ້ມຄອງປ່າຢ່າງໝັ້ນຄົງ, ປ້ອງກັນ ແລະ ຕ້ານໄພທຳມະຊາດ, ປົວແປງສະພາບແວດລ້ອມຕົວເມືອງ.
ຢັ້ງຢືນບົດບາດຕັ້ງໜ້າໃນ ກົນໄກຮ່ວມມືແມ່ຂອງ - ຍີ່ປຸ່ນ
ເຂົ້າຮ່ວມຢ່າງຕັ້ງໜ້າໃນການເຄື່ອນໄຫວຂອງ ກົນໄກຮ່ວມມືແມ່ຂອງ - ຍີປຸ່ນນັບແຕ່ຊຸມວັນທຳອິດທີ່ກົນໄກນີ້ໄດ້ຮັບການສ້າງຕັ້ງຂຶ້ນເມື່ອປີ 2007. ຢູ່ຫວຽດນາມ, ມີຫຼາຍໂຄງການໄດ້ຮັບການຜັນຂະຫຍາຍໃນຂອບເຂດຮ່ວມມືແມ່ຂອງ - ຍີ່ປຸ່ນໃນໄລຍະທີ່ຜ່ານມາ. ຊຶ່ງພົ້ນເດັ່ນແມ່ນໂຄງການກໍ່ສ້າງທ່າກຳປັ່ນນ້ຳເລິກ ແລກຮ້ວຽນດ ນະຄອນຫາຍຟ່ອງ, ໂຄງການກໍ່ສ້າງສູນສອນວິຊາຊີບ ແມ່ຂອງ - ຍີປຸ່ນ…….ຫວຽດນາມກໍໄດ້ມີການປະກອບສ່ວນຫຼາຍຢ່າງທີ່ສຳຄັນເຂົ້າໃນກົນໄກຮ່ວມມືນີ້. ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ບຸຍແທງເຊີນ ໃຫ້ຮູ້ວ່າ :
“ ເພີ່ມທະວີການເຊື່ອມຕໍ່ການຂົນສົ່ງທາງແມ່ນ້ຳຕື່ມອີກ, ກໍເປັນການຫຼຸດຜ່ອນຄ່າໃຊ້ຈາຍລົງ, ນຳໃຊ້ທ່າໄດ້ປຽບຂອງພາກພື້ນແມ່ນມີແມ່ນ້ຳຂອງ ແລະ ແມ່ນ້ຳອື່ນໆທີ່ເຊື່ອມຕໍ່ກັນລະຫວ່າງບັນດາປະເທດ, ກໍຈະຫຼຸດຜ່ອນຄ່າຂົນສົ່ງທາງບົກ, ທາງທະເລ. ຜ່ານນັ້ນ ກໍເພີີ່ມທະວີການແລກປ່ຽນສິນຄ້າ ກໍຄືການທ່ອງທ່ຽວລະຫວ່າງບັນດາປະເທດໃນພາກພື້ນແມ່ນ້ຳຂອງດ້ວຍກັນ ແລະ ລະຫວ່າງບັນດາປະເທດໃນພາກພື້ນແມ່ນ້ຳຂອງກັບນອກພາກພື້ນ ”
ຫວຽດນາມກໍເປັນເຈົ້າພາບຈັດການເຄື່ອນໄຫວຫຼາຍຢ່າງເພື່ອຊຸກຍູ້ການພັດທະນາການທ່ອງທ່ຽວ, ພົວພັນແລກປ່ຽນ ປະຊາຊົນ ລະຫວ່າງບັນດາປະເທດອະນຸພາກພື້ນແມ່ນ້ຳຂອງເວົ້າລວມ, ກັບແມ່ຂອງ ແລະ ບັນດາຄູ່ຮ່ວມມືໃນນັ້ນມີຍີປຸ່ນເວົ້າສະເພາະ. ທີ່ເວທີປາໄສທ່ອງທ່ຽວ ແມ່ຂອງ 2015 ຊຶ່ງຈັດຂຶ້ນຢູ່ດານັ້ງເມື່ອມໍ່ໆມານີ້, ທ່ານລັດຖະມົນຕີຊ່ວຍວ່າການກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ເລແຄ້ງຫາຍ ເນັ້ນໜັກວ່າ :
“ ຫວຽດນາມກໍຫວັງຢ່າງຍິ່ງຢາກເຊື່ອມຕໍ່ລະຫວ່າງບັນດາສະຖານທີ່ທ່ອງທ່ຽວຂອງຫວຽດນາມກັບບັນດາສະຖານທີທ່ອງທ່ຽວໃນພາກພື້ນ, ກໍຄືກັບບັນດາຄູ່ຮ່ວມມືອື່ນໆ ເພື່ອສ້າງເປັນຜະລິດຕະພັນທີ່ມີຫຼາຍຮູບຫຼາຍສີ ແລະ ດູດດື່ມສຳລັບແຂກທ່ອງທ່ຽວ. ອົງການທ່ອງທ່ຽວແຫ່ງຊາດປະເທດຕ່າງໆໃນອະນຸພາກພື້ນແມ່ນ້ຳຂອງຄວນສົມທົບກັນ ວາງອອກກົນໄກ, ນະໂຍບາຍຮ່ວມ, ສ້າງເງື່ອນໄຂໄປມາຢ່າງສະດວກສະບາຍ, ສົ່ງເສີມວິສາຫະກິດເຂົ້າຮ່ວມລົງທຶນກໍ່ສ້າງພື້ນຖານໂຄງລ່າງທ່ອງທ່ຽວ, ສ້າງ ແລະ ໂຄສະນາບັນດາຜະລິດຕະພັນທ່ອງທ່ຽວ… ”
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງເຂົ້າຮ່ວມກອງປະຊຸມສຸດຍອດແມ່ຂອງ - ຍີປຸ່ນຄັ້ງທີ 7 ຢູ່ໂຕກຽວປະເທດຍີ່ປຸ່ນ ແມ່ນແນໃສ່ປະກອບສ່ວນຊຸກຍູ້ການຮ່ວມມືແມ່ຂອງ - ຍີປຸ່ນໄລຍະທີ່ຈະມາເຖິງຕາມທິດໜູນຊ່ວຍຢ່າງແຂງແຮງໃຫ້ແກ່ການພັດທະນາເສດຖະກິດ-ສັງຄົມຂອງບັນດາປະເທດອະນຸພາກພື້ນແມ່ນ້ຳຂອງເວົ້າລວມ ແລະ ຫວຽດນາມເວົ້າສະເພາະ. ຜ່ານນັ້ນ ກໍຢັ້ງຢືນຄຳໝັ້ນສັນຍາ ແລະ ບົດບາດຂອງຫວຽດນາມທີ່ມີຕໍ່ການຮ່ວມມືແມ່ຂອງ - ຍີປຸ່ນ, ປັບປຸງການພົວພັນຮ່ວມມືມິດຕະພາບກັບບັນດາປະເທດອະນຸພາກພື້ນແມ່ນ້ຳຂອງ, ນຳການພົວພັນຄູ່ຮ່ວມມືຍຸດທະສາດທີ່ເລິກເຊິ່ງກ້ວາງຂວາງກັບຍີ່ປຸ່ນ ໃຫ້ນັບມື້ນັບພັດທະນາຢ່າງຮອບດ້ານ ແລະ ມີປະສິດທິຜົນ.