vovworld)- ຫວຽດນາມ ມີຊາວຊົນເຜົ່າສ່ວນຫນ້ອຍປະມານ 12 ລ້ານຄົນດຳລົງຊີວິດຢູ່ເຂດພູດອຍ, ກວມປະມານ 13% ຈຳນວນພົນລະເມືອງ. ປີ 2014, ລັດຖະບານໄດ້ປະກາດໃຊ້ຫລາຍໂຄງການ, ນະໂຍບາຍພັດທະນາເສດຖະກິດສັງຄົມ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ ກໍຄືຈັດແບ່ງແຫລ່ງກຳລັງໃຫ້ແກ່ເຂດຊົນເຜົ່າສ່ວນຫນ້ອຍ. ປີ 2015, ລັດຖະບານ ສືບຕໍ່ເລືອກເຟັ້ນບັນດາຂົງເຂດຈຸດສຸມ ເພື່ອລົງທຶນໃຫ້ແກ່ເຂດນີ້ ເພື່ອແນໃສ່ນຳມາເຊິ່ງໂສມຫນ້າໃຫມ່ໃຫ້ແກ່ບັນດາຕາແສງປະສົບກັບຄວາມຫຍຸ້ງຍາກເປັນພິເສດ, ສ້າງການຫັນປ່ຽນກ່ຽວກັບຄຸນນະພາບຊີວິດຂອງປະຊາຊົນຢູ່ເຂດໄດ້ຮັບຖືວ່າແມ່ນເຂດທຸກຍາກກວ່າໝູ່ໃນທົ່ວປະເທດ.
ພາບປະກອບ:tuyengiaovn
|
ປີ 2014, ຊີວິດການເປັນຢູ່ຂອງປະຊາຊົນເຂດຊົນເຜົ່າ ແລະ ເຂດພູດອຍ ເບິ່ງລວມແລ້ວມີຄວາມເປັນປົກກະຕິ ແລະ ນັບມື້ນັບໄດ້ຮັບການປັບປຸງ. ອັດຕາສ່ວນຄອບຄົວທຸກຍາກຫລຸດລົງ ແຕ່ 2-4%, ສະເພາະບັນດາເມືອງທຸກຍາກຫລຸດລົງກວ່າ 4%. ເພື່ອນຳມາເຊິ່ງໂສມຫນ້າໃຫມ່ໃຫ້ແກ່ບັນດາບ້ານ, ຕາແສງຢູ່ທີ່ນີ້, ບັນດາກະຊວງ, ຂະແຫນງການ ແລະ ທ້ອງຖິ່ນ ໄດ້ສຸມໃສ່ບຳລຸງສ້າງແຫລ່ງຊັບພະຍາກອນມະນຸດ, ປັບປຸງພື້ນຖານໂຄງລ່າງ, ຫນູນຊ່ວຍປະຊາຊົນພັດທະນາການຜະລິດ.
ລົງທຶນຢ່າງຮອບດ້ານ
ກ່ຽວກັບນະໂຍບາຍ, ປີ 2014, ມີຫລາຍນະໂຍບາຍໃຫມ່ໄດ້ຮັບການປະກາດໃຊ້ ແລະ ຜັນຂະຫຍາຍຢ່າງມີປະສິດທິຜົນ ສົ່ງຜົນກະທົບຢ່າງຕັ້ງຫນ້າ, ເຮັດໃຫ້ຊາວຊົນເຜົ່າສ່ວນຫນ້ອຍຢູ່ບັນດາເຂດປະສົບກັບຄວາມຫຍຸ້ງຍາກກວ່າໝູ່ຫລຸດພົ້ນອອກຈາກຄວາມທຸກຍາກ, ປະກອບສ່ວນຊຸກຍູ້ເສດຖະກິດ ສັງຄົມຢູ່ເຂດຊົນເຜົ່າ ແລະເຂດພູດອຍເທື່ອລະກ້າວ. ໂສມຫນ້າຊົນນະບົດຢູ່ເຂດຊົນເຜົ່າ ແລະ ເຂດພູດອຍ ມີການປ່ຽນແປງຢ່າງເຫັນໄດ້ຊັດ, ເປັນຕົ້ນແມ່ນພື້ນຖານໂຄງລ່າງ. ທ້ອງຖິ່ນຈຳນວນຫນຶ່ງ ໄດ້ພັດທະນາເສດຖະກິດຕາມທິດຜະລິດເປັນສິນຄ້າ. ລະດັບເຕີບໂຕສະເລ່ຍຂອງບັນດາແຂວງຢູ່ ເຂດຊົນເຜົ່າ ແລະ ເຂດພູດອຍ ແຕ່ 8-10%. ຂະບວນການກໍ່ສ້າງຊົນນະບົດໃຫມ່ພວມໄດ້ຮັບການຍູ້ແຮງ. ຕາຫນ່າງສຸກສາລາ, ຫໍວັດທະນະທຳ, ໂຮງຮຽນ, ເປັນຕົ້ນແມ່ນໂຮງຮຽນມັດທະຍົມກິນນອນຊົນເຜົ່າ, ໂຮງຮຽນມັດທະຍົມເຄິ່ງກິນນອນຊົນເຜົ່າສືບຕໍ່ໄດ້ຮັບການລົງທຶນກໍ່ສ້າງ.
ກ່ຽວກັບແຫລ່ງເງິນລົງທຶນ, ໄລ່ສະເພາະປີ 2014, ເຖິງວ່າຍັງປະສົບກັບຄວາມຫຍຸ້ງຍາກຫລາຍຢ່າງ, ເສດຖະກິດພາຍໃນປະເທດບໍ່ທັນຟື້ນຕົວ ແຕ່ລັດຖະບານຍັງຄົງບຸລິມະສິດສະຫງວນຈຳນວນເງິນ 7.800 ຕື້ດົງໃຫ້ແກ່ ເຂດຊົນເຜົ່າ ແລະ ເຂດພູດອຍ, ກວມ 20%ຍອດຈຳນວນແຫລ່ງທຶນຫນູນຊ່ວຍຕາມຄາດໝາຍຈາກທະນາຄານແຫລ່ງລັດ. ປີ 2015, ສະພາແຫ່ງຊາດ ໄດ້ຮັບຮອງເອົາ ແລະນາຍົກລັດຖະມົນຕີໄດ້ຕົກລົງມອບຈຳນວນເງິນກວ່າ 8.900 ຕື້ດົງໃຫ້ແກ່ ເຂດຊົນເຜົ່າ ແລະ ເຂດພູດອຍ, ເພີ່ມຂຶ້ນ 14% ເມື່ອທຽບໃສ່ປີກາຍ.ນັ້ນບໍ່ທັນເວົ້າເຖິງແຫລ່ງທຶນຂອງບັນດາອົງການຈັດຕັ້ງສາກົນຫນູນຊ່ວຍໃຫ້ແກ່ປະຊາຊົນຢູ່ ເຂດຊົນເຜົ່າ ແລະ ເຂດພູດອຍຜ່ານບັນດາໂຄງການພິເສດສະເພາະ.
ເລືອກເຟັ້ນບັນດາຂົງເຂດຈຸດສຸມເພື່ອຫນູນຊ່ວຍ
ເພື່ອຕອບສະຫນອງຄວາມຮຽກຮ້ອງຕ້ອງການການພັດທະນາເສດຖະກິດສັງຄົມຢູ່ ເຂດຊົນເຜົ່າ ແລະ ເຂດພູດອຍ, ເລື່ອງເລືອກເຟັ້ນບັນດາຫນ້າທີ່ຈຸດສຸມມີລັກສະນະບຸກທະລຸແມ່ນຄວາມຮຽກຮ້ອງທີ່ຈຳເປັນ. ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ຫນ້າທີ່ຫລຸດຜ່ອນຄວາມທຸກຍາກຍັງຫຍຸ້ງຍາກຢູ່, ເປັນຕົ້ນແມ່ນຫລຸດຜ່ອນຄວາມທຸກຍາກຢູ່ເຂດຊົນເຜົ່າ ແລະ ເຂດພູດອຍ, ຮຽກຮ້ອງຕ້ອງປະຕິບັດບັນດາມາດຕະການຢ່າງຂ້ຽວຂາດ, ຄົບຊຸດ, ມີຈຸດສຸມ ແລະ ບັນລຸປະສິດທິຜົນສູງກວ່າ. ປະຕິບັດບັນດາມາດຕະການຫລຸດຜ່ອນຄວາມທຸກຍາກໃນ 3 ຂົງເຂດຢ່າງມີປະສິດທິຜົນ ນັ້ນແມ່ນຫນູນຊ່ວຍຜູ້ທຸກຍາກສຳພັດກັບບັນດາບໍລິການສັງຄົມ, ພັດທະນາການຜະລິດ, ກໍ່ສ້າງພື້ນຖານໂຄງລ່າງ, ເສດຖະກິດສັງຄົມຢູ່ເຂດປະສົບກັບຄວາມຫຍຸ້ງຍາກ. ນອກນັ້ນ ເອົາໃຈໃສ່ເຖິງບັນດາມາດຕະການຫນູນຊ່ວຍ ສ້າງເງື່ອນໄຂໃຫ້ຜູ້ທຸກຍາກບືນຕົວຂຶ້ນຫລຸດພົ້ນອອກຈາກຄວາມທຸກຍາກ.”
ໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ບັນດາກະຊວງ, ຂະແຫນງການ, ພິເສດແມ່ນຄະນະພັກແຂວງ, ສະພາປະຊາຊົນ, ຄະນະກຳມະການປະຊາຊົນບັນດາແຂວງ ຕ້ອງເອົາໃຈໃສ່ເປັນພິເສດເຖິງວຽກງານຊົນເຜົ່າ, ໃນນັ້ນເປັນຫນ້າສົນໃຈແມ່ນແຫລ່ງຊັບພະຍາກອນມະນຸດ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີວ່າການກະຊວງແຮງງານ ທະຫານເສຍອົງຄະ ແລະ ສັງຄົມຫວຽດນາມ ໃຫ້ຮູ້ວ່າ:
“ດ້ວຍຄວາມຮັບຜິດຊອບເປັນຜູ້ຄຸ້ມຄອງຂະແຫນງ ພວກຂ້າພະເຈົ້າ ຈະແນະນຳກ່ຽວກັບບັນຫາປະຕິບັດການບຳລຸງສ້າງ ແລະ ຊີ້ນຳການຈັດຕັ້ງ, ມີບາງວຽກງານອາດຈະປັບປຸງຄືນ ຈາກລະດັບການຫນູນຊ່ວຍ, ວິທີການຈັດຕັ້ງບຳລຸງສ້າງຕອ້ງປັບປຸງໃຫ້ດີກວ່າ ເພື່ອຕອບສະຫນອງຄວາມຮຽກຮ້ອງຕ້ອງການບຳລຸງສ້າງຂອງຊາວຊົນເຜົ່າສ່ວນຫນ້ອຍ.”
ກ່ຽວກັບບັນຫາແກ້ໄຂທີ່ດິນທຳການຜະລິດໃຫ້ແກ່ຊາວຊົນເຜົ່າ, ກໍ່ສ້າງພື້ນຖານໂຄງລ່າງ, ທ່ານນາຍົກລັດຖະມົນຕີ ຫງວຽນເຕີນຢູງ ຢືນຢັນວ່າ:
“ຮີບເຮັ່ງປະກາດໃຊ້ນະໂຍບາຍພິເສດສະເພາະເພື່ອຫລຸດຜ່ອນຄວາມທຸກຍາກຢ່າງວ່ອງໄວຢູ່ເຂດຊາວຊົນເຜົ່າສ່ວນຫນ້ອຍ.ຫນູນຊ່ວຍຢ່າງແທດຈິງ ແລະ ມີປະສິດທິຜົນເພື່ອໃຫ້ຊາວຊົນເຜົ່າເພີ່ມລາຍຮັບ, ຫລຸດພົ້ນອອກຈາກຄວາມທຸກຍາກ. ຄົ້ນຄ້ວາເພີ່ມລະດັບມອບເໝົາ, ລະດັບຫນູນຊ່ວຍໃນການປົກປັກຮັກສາປ່າ ແລະ ປູກປ່າໄມ້. ພ້ອມທັງປະຕິບັດບັນດານະໂຍບາຍຫນູນຊ່ວຍຢ່າງມີປະສິດທິຜົນ, ເປັນຕົ້ນແມ່ນທີ່ດິນທຳການຜະລິດ, ທີ່ດິນປຸກສ້າງເຮືອນ, ນ້ຳສະອາດ, ພັດທະນາຂະແຫນງອາຊີບ, ສົ່ງເສີມກະສິກອນ, ປ່າໄມ້ ແລະ ໝູນໃຊ້ບັນດາຄວາມກ້າວຫນ້າວິທະຍາສາດເຕັກໂນໂລຊີເຂົ້າໃນການຜະລິດ. ລັດຖະບານໄດ້ປຶກສາຫາລືຮ່າງດຳລັດກ່ຽວກັບບັນດານະໂຍບາຍດັ່ງກ່າວ ແລະ ພວມຊີ້ນຳການປັບປຸງ ແລະ ປະກາດໃຊ້ດຳລັດດັ່ງກ່າວໂດຍໄວ.”
ຫລຸດຜ່ອນຄວາມທຸກຍາກໃນເຂດຊົນເຜົ່າສ່ວນຫນ້ອຍ ຍາມໃດກໍແມ່ນຫນ້າທີ່ສຳຄັນໃນກິດຈະການລົບລ້າງຄວາມອຶດຫິວຫລຸດຜ່ອນຄວາມທຸກຍາກຂອງຫວຽດນາມ. ເລື່ອງລັດຖະບານສືບຕໍ່ສຸມໃສ່ແຫລ່ງກຳລັງໃຫຍ່ກວ່າ, ກົນໄກໄດ້ຮັບການປັບປຸງໃຫ້ເໝາະສົມກວ່າ, ໄຫວພິບກວ່າ ຈະສ້າງກຳລັງຫນູນໃຫ້ບັນດາຕາແສງປະສົບກັບຄວາຫຍຸ້ງຍາກ, ເຂດຊົນເຜົ່າສ່ວນຫນ້ອຍພັດທະນາ, ປະກອບສ່ວນຊ່ວຍໃຫ້ປະຊາຊົນຢູ່ທີ່ນີ້ ຫລຸດຜົ້ນອອກຈາກຄວາມທຸກຍາກແບບຍືນຍົງ.